34-modda. Xususiylashtiriladigan davlat mulkining oldi-sotdi shartnomasi shartlarini xaridor tomonidan bajarmaslik va lozim darajada bajarmaslik oqibatlari
Davlat mulkini xususiylashtirish toʻgʻrisida (O‘RQ-907-son) · Sana: 14.02.2024 · Amalda
Xususiylashtiriladigan davlat mulkining oldi-sotdi shartnomasi boʻyicha majburiyatlar bajarilmagan yoki lozim darajada bajarilmagan taqdirda, taraflar qonunchilikka va xususiylashtiriladigan davlat mulkining oldi-sotdi shartnomasiga muvofiq javobgar boʻladi.
Xususiylashtiriladigan davlat mulkining oldi-sotdi shartnomasi boʻyicha majburiyatlar xaridor tomonidan bajarilmagan yoki lozim darajada bajarilmagan taqdirda, vakolatli davlat organi yoki uning hududiy boshqarmalari xaridorga sotib olish toʻlovlarini toʻlash muddatlariga rioya etilmayotganligi va (yoki) davlat mulkini xususiylashtirishning shartlarini belgilangan muddatlarda bajarish hamda xususiylashtiriladigan davlat mulkining oldi-sotdi shartnomasiga muvofiq axborot taqdim etish toʻgʻrisida yozma talab (xabarnoma) yuborishi shart.
Xususiylashtiriladigan davlat mulkining oldi-sotdi shartnomasi boʻyicha majburiyatlar bajarilmagan yoki lozim darajada bajarilmagan taqdirda, taraflar mediatsiya tartib-taomillarini oʻtkazishi mumkin.
Xususiylashtiriladigan davlat mulkining oldi-sotdi shartnomasi shartlarining xaridor tomonidan bajarilishi bilan bogʻliq nizolar boʻyicha daʼvo muddati uch yilni tashkil etadi.
Xaridor xususiylashtiriladigan davlat mulkining oldi-sotdi shartnomasi shartlarini bajarmagan yoki lozim darajada bajarmagan taqdirda, vakolatli davlat organiga xususiylashtiriladigan davlat mulkining oldi-sotdi shartnomasida belgilangan miqdorda neustoyka toʻlashi shart.