15-modda. Davlat mulkini xususiylashtirish dasturlarini ishlab chiqish

Davlat mulkini xususiylashtirish dasturlari vakolatli davlat organi va (yoki) uning hududiy boshqarmalari tomonidan davlat organlarining va mahalliy davlat hokimiyati organlarining, shuningdek jismoniy va nodavlat yuridik shaxslarning takliflari asosida ishlab chiqiladi.

Davlat mulkini xususiylashtirish dasturlari quyidagilar tomonidan shakllantiriladi:

vakolatli davlat organi tomonidan — respublika mulkini xususiylashtirish dasturlari;

vakolatli davlat organining hududiy boshqarmalari tomonidan — munitsipal mulkni xususiylashtirish dasturlari.

Davlat mulki, shu jumladan xalqaro kelishuvlarga muvofiq amalga oshiriladigan loyihalarga koʻra realizatsiya qilinadigan davlat mulki Oʻzbekiston Respublikasi Prezidentining vakolatli davlat organi taklifiga koʻra qabul qilingan hujjatlariga asosan toʻgʻridan-toʻgʻri bozor qiymati boʻyicha xususiylashtirilishi mumkin.

Vakolatli davlat organining hududiy boshqarmalari munitsipal mulkka nisbatan quyidagilarni shakllantiradi:

vakolatli davlat organlari hamda Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari bilan kelishilgan holda, tegishincha Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari tomonidan tasdiqlanadigan davlat muassasalarini va xoʻjalik jamiyatlarining ustav fondidagi (ustav kapitalidagi) davlat ulushlarini xususiylashtirish dasturlarini;

Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari bilan kelishilgan holda, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari tomonidan tasdiqlanadigan koʻchmas mulk obyektlarini xususiylashtirish dasturlarini.

Tijorat banklarining ustav fondidagi (ustav kapitalidagi) davlat aksiyalarini sotish banklar va bank faoliyati toʻgʻrisidagi qonunchilik talablari inobatga olingan holda amalga oshiriladi.

Davlat mulkini xususiylashtirish dasturida davlat mulkini xususiylashtirishning asosiy maqsadlari va vazifalari, shuningdek xususiylashtirilishi lozim boʻlgan davlat mulkining roʻyxati nazarda tutiladi.

Davlat mulkini xususiylashtirish dasturiga bir yoki bir nechta davlat mulki obyekti kiritilishi mumkin.

Vakolatli davlat organining yoki uning hududiy boshqarmalarining soʻrovlariga asosan tegishli tashkilotlar davlat mulkini xususiylashtirish dasturini ishlab chiqish doirasida quyidagilarni taqdim etadi: