Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomni tasdiqlash toʻgʻrisida (KQ-666-IV-son)

30.01.2024

Oʻzbekicton Respublikasi Oliy Majlisi Senati Kengashining

qarori

Aholini tashabbusli budjet jarayoniga keng jalb qilishni yanada kuchaytirish, budjet mablagʻlarining bir qismini jamoatchilik fikri asosida yoʻnaltirish boʻyicha amalga oshirilayotgan ishlarni izchil davom ettirish, shuningdek, oʻtgan davr mobaynida orttirilgan tajribani inobatga olgan holda mazkur tizimni yanada takomillashtirish maqsadida Oʻzbekiston Respublikasi Oliy Majlisi Senatining Kengashi qaror qiladi:

1. Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizom ilovaga muvofiq tasdiqlansin.

2. Xalq deputatlari tuman (shahar) Kengashlariga jamoatchilik fikri asosida shakllangan loyihalarni baholash, saralab olish hamda ijrosini monitoring qilish boʻyicha Ishchi komissiyalar tarkibini tasdiqlash tavsiya etilsin.

3. Belgilansinki, “Mening yoʻlim” loyihasi 2024-yildan boshlab Tashabbusli budjet jarayonining 1-mavsumi doirasida oʻtkaziladi.

Bunda “Mening yoʻlim” loyihasi uchun koʻzda tutilgan mablagʻlar Fuqarolar tashabbusi jamgʻarmasiga yoʻnaltirilgan holda mazkur Qaror ilovasida keltirilgan nizom talablari asosida sarflanadi.

4. Raqamli texnologiyalar vazirligi Iqtisodiyot va moliya vazirligi bilan birgalikda 2024-yil 9-fevralga qadar “Ochiq budjet” axborot portalida fuqarolarni identifikatsiya qilish orqali “Bir fuqaro — bir ovoz” tamoyili ishga tushirilishini taʼminlasin.

Bunda “Ochiq budjet” axborot portalida jismoniy shaxsning mobil raqami maʼlumotlari Elektron hukumat loyihalarini boshqarish markazining elektron tizimi orqali aniqlashtiriladi.

5. Kambagʻallikni qisqartirish va bandlik vazirligi jamoatchilik fikri asosida shakllangan loyihalarga ovoz berish jarayonlarida budjet tashkiloti xodimlarini majburiy ovoz berishga jalb etish holatlarining oldini olish borasida tizimli ishlarni tashkil etsin hamda har mavsum yakunlariga koʻra amalga oshirilgan chora-tadbirlar yuzasidan Oliy Majlis Senatiga axborot kiritsin.

6. Maktabgacha va maktab taʼlimi, Sogʻliqni saqlash hamda Oliy taʼlim, fan va innovatsiyalar vazirliklari Iqtisodiyot va moliya vazirligi bilan birgalikda 2024-yil 9-fevralga qadar “Ochiq budjet” axborot portalida xarid bilan bogʻliq loyihalarni shakllantirishda ruxsat etiladigan tovar va xizmatlar roʻyxatini shakllantirsin.

7. Oʻzbekiston Respublikasi Oliy Majlisi Senati Kengashining 2021-yil 22-apreldagi “Mahalliy budjet mablagʻlari sarflanishida jamoatchilik ishtirokini taʼminlash toʻgʻrisida”gi KQ-213-IV-sonli Qarori bilan tasdiqlangan Tuman (shahar) budjetlari mablagʻlarini jamoatchilik fikri asosida shakllantirilgan tadbirlarga yoʻnaltirish tartibi toʻgʻrisidagi namunaviy nizom oʻz kuchini yoʻqotgan deb hisoblansin.

8. Mazkur Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2024-yil 30-yanvar,

KQ-666-IV-son

Oʻzbekiston Respublikasi Oliy Majlisi Senati Kengashining 2024-yil 30-yanvardagi KQ-666-IV-sonli qaroriga ILOVA

Tashabbusli budjet jarayonlarini oʻtkazish hamda moliyalashtirish tartibi toʻgʻrisida

NIZOM

1-bob. Umumiy qoidalar

1. Mazkur Nizom tashabbusli budjet jarayonlarini oʻtkazish, shuningdek, “Ochiq budjet” portali orqali jamoatchilik fikri asosida loyihalarni shakllantirish, moliyalashtirish hamda amalga oshirish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

tashabbusli budjet jarayoni — “Ochiq budjet” axborot portalida (keyingi oʻrinlarda — Portal) jamoatchilik fikri asosida loyihalarni shakllantirish, ularni saralash, ovoz berish yoʻli orqali gʻolib loyihalarni aniqlash hamda budjet mablagʻlari hisobidan moliyalashtirishni oʻz ichiga olgan jarayon;

jamoatchilik fikri asosida shakllangan loyiha (keyingi oʻrinlarda — loyiha) ushbu Nizomda belgilangan tartibda fuqarolar tomonidan mahalladagi mavjud ijtimoiy ahamiyatga ega muammolarni hal etishga qaratilgan taklif;

gʻolib loyiha — ovoz berish jarayoni yakunlariga koʻra toʻplangan ovozlar soni asosida Portal tomonidan avtomatik tarzda tanlab olingan loyiha;

fuqarolar tashabbusi jamgʻarmasi — tuman (shahar) hokimliklarida budjet tashkilotlarining budjetdan tashqari jamgʻarmalari shaklida ochilgan shaxsiy gʻazna hisobvaragʻi;

loyihalarni amalga oshirish xronologiyasi — tashabbusli budjet jarayoni doirasida gʻolib deb topilgan loyihalarni moliyalashtirishning barcha bosqichlarini Portal orqali bevosita fuqarolarga kuzatib borish imkoniyatini beruvchi maxsus boʻlim;

ishchi komissiya — loyihalarni baholash, saralab olish hamda ijrosini monitoring qilish boʻyicha tuman (shahar) hokimliklari huzurida tashkil etilgan komissiya;

tashabbuskor — Portal orqali gʻolib deb topilgan loyiha muallifi;

onlayn murojaat — Portalda fuqarolar tomonidan savol, shikoyat, taklif yoki qonun buzilishi holatlari yuzasidan xabar qoldirish imkoniyatini beruvchi maxsus sahifa;

favqulodda xabar — Portalda tashabbuskor tomonidan gʻolib loyihani amalga oshirishda yuzaga kelgan favqulodda holat yuzasidan qoldirilgan xabar;

“monitoring” moduli — Portalda loyihalar ijrosi boʻyicha oʻtkazilgan monitoring natijalari aks ettirib boriladigan maxsus boʻlim;

deputat tashabbusi loyihasi — Oliy Majlis Qonunchilik palatasi deputatlari tanloviga koʻra qoʻshimcha ravishda gʻolib deb topilgan loyihalar.

3. Tashabbusli budjet jarayonlarini oʻtkazish ushbu Nizomning 1-ilovasiga muvofiq sxema asosida amalga oshiriladi.

Tashabbusli budjet jarayonlarini tashkillashtirish, oʻtkazish hamda tartibga solishda Oʻzbekiston Respublikasi Iqtisodiyot va moliya vazirligi vakolatli organ hisoblanadi.

4. Loyihalarni baholash, saralab olish hamda ijrosini monitoring qilish ushbu Nizomning 2-ilovasiga muvofiq namunaviy tarkibda tashkil etiladigan Ishchi komissiya (keyingi oʻrinlarda — Ishchi komissiya) tomonidan amalga oshiriladi.

5. Har bir tuman va shahar boʻyicha Iqtisodiyot va moliya organlaridan Tashabbusli budjet masalalariga masʼul etib biriktirilgan xodimlar Ishchi komissiyaning ishchi organi (keyingi oʻrinlarda — ishchi organ) hisoblanadi. Ishchi organ Portalda oʻziga biriktirilgan vakolatlardan elektron raqamli kalit orqali foydalanadi.

2-bob. Tashabbusli budjet jarayonlarini moliyalashtirish

6. Quyidagilar tashabbusli budjet jarayonini moliyalashtirishga yoʻnaltiriladi:

tuman (shahar)lar budjetlarida Tashabbusli budjet jarayoni uchun rejalashtirilgan mablagʻlar. Bunda, har yili tuman va shahar budjetida tegishli moliya yilida ishtirok etadigan mahallalar sonidan kelib chiqib (tanaffusga tushgan mahallalar mustasno), qoida tariqasida 6 tadan kam boʻlmagan, koʻpi bilan 30 ta loyiha uchun yetarli mablagʻlar rejalashtiriladi;

tuman (shahar) budjetlari qoʻshimcha mablagʻlarining kamida 30 foizi;

Qoraqalpogʻiston Respublikasi, viloyatlar va Toshkent shahrining budjetlari qoʻshimcha mablagʻlarining 30 foizi;

aholi va davlat oʻrtasida sherikchilik asosida loyihalarni moliyalashtirish maqsadida fuqarolarning ixtiyoriy ravishda yoʻnaltirgan mablagʻlari;

vazirlik va idoralarning tegishli davr uchun tasdiqlangan rivojlantirish dasturlari doirasida koʻzda tutilgan mablagʻlar;

61. Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi “Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi toʻgʻrisida nizom”ga muvofiq belgilanadi.

7. Mablagʻlarni tashabbusli budjet jarayonini moliyalashtirishga yoʻnaltirish uchun tuman (shahar) hokimliklarida budjet tashkilotlarining budjetdan tashqari jamgʻarmalari shaklidagi Fuqarolar tashabbusi jamgʻarmasi shaxsiy gʻazna hisobvaragʻi (keyingi oʻrinlarda — Jamgʻarma) ochiladi.

8. Mablagʻlarni Jamgʻarmaga yoʻnaltirishda:

Tuman (shahar)lar hokimliklari:

har yili tuman (shahar) budjet parametrlarini tasdiqlashda Jamgʻarmaga yoʻnaltiriladigan mablagʻlar miqdorini belgilashga;

har chorak (yil) yakunlari boʻyicha shakllangan qoʻshimcha mablagʻlarning kamida 30 foiz qismini Jamgʻarmaga yoʻnaltirishga doir takliflarni tasdiqlash uchun tegishli xalq deputatlari tuman (shahar)lar Kengashlariga kiritadi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tegishli moliya yilining 1-yanvar holatiga qayd etilgan aholi va mahallalar sonidan kelib chiqib, har chorak (yil) yakunlari boʻyicha shakllangan qoʻshimcha mablagʻlarning 30 foiz qismini teng taqsimlagan holda tuman (shahar) jamgʻarmalariga yoʻnaltirish boʻyicha takliflarni tasdiqlash uchun tegishincha Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlariga kiritadi.

Bunda Qoraqalpogʻiston Respublikasi respublika budjetidan, viloyatlar viloyat budjetlaridan va Toshkent shahri shahar budjetidan, tumanlar va shaharlar budjetlarida har chorak (yil) yakunlari boʻyicha shakllangan qoʻshimcha mablagʻlarni taqsimlash masalasi chorak (yil) yakunlariga koʻra keyingi oyning 25-sanasiga qadar tegishli xalq deputatlari mahalliy Kengashlarida muhokama qilinishi lozim.

9. Tashabbusli budjet jarayonlarini moliyalashtirish uchun yoʻnaltiriladigan mablagʻlar Jamgʻarmaga:

tuman (shahar) budjetlarida rejalashtirilgan mablagʻlarning teng yarmi — birinchi mavsum uchun yanvar oyidan boshlab, qolgan qismi ikkinchi mavsum uchun may oyidan boshlab oʻtkazib beriladi;

Qoraqalpogʻiston Respublikasi, viloyatlar va Toshkent shahar hamda tuman (shahar) budjetlarining qoʻshimcha manbalari hisobiga ajratiladigan mablagʻlar — xalq deputatlari mahalliy Kengashlari tegishli qarori qabul qilinganidan soʻng uch ish kunida oʻtkaziladi.

Vazirlik va idoralarning tasdiqlangan rivojlantirish dasturlari doirasida koʻzda tutilgan mablagʻlar aprel oyida tegishli loyihalarni moliyalashtirish uchun ochilgan hisob raqamlariga oʻtkazib beriladi.

Tashabbusli budjet jarayoni uchun hukumat qarorlari yoki boshqa hujjatlar asosida qoʻshimcha mablagʻlar ajratilganda — bir hafta muddatda (agar hujjatda boshqa muddat belgilanmagan boʻlsa) qoʻshimcha tarzda gʻolib deb eʼlon qilingan loyihalar uchun ochilgan hisob raqamlariga oʻtkaziladi.

10. Agar mahalliy budjetlarning qoʻshimcha mablagʻlari hisobidan Jamgʻarmaga oʻtkazilishi lozim boʻlgan mablagʻlar tegishli chorak (yil) hisobidan oʻtkazilmasa, kelgusi chorak (yil) yakunlari boʻyicha shakllangan qoʻshimcha mablagʻlar hisobidan qoplab berilishi shart.

11. Jamgʻarma mablagʻlari faqat gʻolib loyihalar mazmunida nazarda tutilgan tadbirlarni amalga oshirish hamda shu bilan bogʻliq hujjatlarni rasmiylashtirish (loyiha-smeta hujjatlarini ishlab chiqish, ekspertiza xulosalarini olish va boshqalar) xarajatlari uchun yoʻnaltiriladi. Mazkur mablagʻlarni boshqa maqsadlarga yoʻnaltirish taqiqlanadi.

Bunda, Oʻzbekiston Respublikasi Bosh prokuraturasi huzuridagi Majburiy ijro Byurosi va boshqa undiruvchi organlar tomonidan tuman/shahar hokimliklari huzuridagi fuqarolar tashabbusi jamgʻarmalariga sud va boshqa organlar ijro hujjatlariga asosan undiruvlar qoʻllash taqiqlanadi.

12. Gʻolib loyihada nazarda tutilgan tadbirlar toʻliq amalga oshirilib, loyiha foydalanishga qabul qilib olingandan soʻng ushbu loyiha uchun ochilgan hisob raqamidagi qoldiq mablagʻlar (kafolat mablagʻlari bundan mustasno) tejalgan mablagʻ hisoblanadi.

Tejalgan mablagʻlar hisobidan qoʻshimcha tadbirlarni amalga oshirishga yoʻl qoʻyilmaydi hamda buyurtmachi tomonidan oʻn ish kuni ichida ushbu mablagʻlar tegishli tuman (shahar) Jamgʻarmasiga oʻtkaziladi.

Har oy (chorak) yakuni boʻyicha yakunlangan va foydalanishga topshirilgan loyihalar yuzasidan tejalgan mablagʻlar (kafolat summasi bundan mustasno) avtomatik tarzda Davlat moliyasini boshqarish axborot tizimi orqali tegishli tuman (shahar) Jamgʻarmasida tiklanadi.

13. Tadbirlarni amalga oshirish ishlari tegishli moliya yilida yakunlanmay qolsa, shuningdek, bajarilgan ishlar uchun mablagʻlar pudratchilarga toʻliq oʻtkazib berilmasa, gʻazna hisobvaragʻidagi mablagʻlar Jamgʻarmaga oʻtkazilmaydi hamda kelgusi yil davomida belgilangan tartibda pudratchiga toʻlab beriladi.

Agar yil yakunlariga koʻra rasmiylashtirilgan shartnomaga muvofiq tadbirlar amalga oshirilmagan yoki qisman bajarilgan boʻlsa, shartnomada belgilangan tadbirlarni hamda toʻlovlarni kelgusi yilda amalga oshirishni nazarda tutadigan qoʻshimcha kelishuv rasmiylashtiriladi.

3-bob. Jamoatchilik fikri asosida loyihalarni shakllantirish, saralab olish va gʻoliblarni aniqlash

14. Tashabbusli budjet jarayoni har yili ikki mavsum doirasida:

birinchi mavsum — fevral-mart oylari;

ikkinchi mavsum — iyun-iyul oylari davomida oʻtkaziladi.

Zarur hollarda vakolatli organ keng jamoatchilikni xabardor qilgan holda mavsumlarni oʻtkazish muddatiga aniqlik kiritishi mumkin.

15. Tashabbusli budjet jarayonlari “Ochiq budjet” axborot portali (openbudget.uz) orqali oʻtkaziladi. Bunda Portalning veb-sahifasi va mobil ilovasi teng kuchli hisoblanadi.

16. Vakolatli organ mavsum boshlanishidan kamida yigirma kun avval rasmiy veb-sayt va ommaviy axborot vositalari orqali:

mavsumni oʻtkazish muddatlari;

tegishli mavsum uchun yoʻnaltirilayotgan mablagʻlar miqdori;

loyihalarni saralab olish mezonlari haqida keng jamoatchilikni xabardor qiladi.

17. Har bir mavsum qoida tariqasida quyidagi bosqichlarda va muddatlarda oʻtkaziladi:

fuqarolar tomonidan loyihalarni shakllantirish bosqichi — 20 kun;

ishchi komissiya tomonidan loyihalarni saralab olish bosqichi — 20 kun;

targʻibot bosqichi — 7 kun;

ovoz berish bosqichi — 10 kun;

qoʻshimcha ravishda gʻolib loyihalarni aniqlash — 10 kun.

Bosqichlarning davomiyligiga vakolatli organ tomonidan har bir mavsumning oʻziga xosligidan hamda texnologik shartlarni inobatga olgan holda aniqlik kiritilishi mumkin.

18. Fuqarolar Portaldan roʻyxatdan oʻtgan holda 20 kun davomida oʻzlarining mahalla yoki tuman (shahar)dagi yoxud respublikaning istalgan hududidagi mavjud muammolarini bartaraf etish boʻyicha loyihalarni joylashtiradi.

19. Har bir fuqaro bir mavsumda faqat bitta loyihani ilgari surish huquqiga ega.

Bunda, barcha mahallalar uchun gʻolib boʻlish imkoniyatini yaratish maqsadida tashabbusli budjet doirasida soʻnggi mavsumlarda ketma-ket ikki marotaba gʻolib deb topilgan mahallalar (tashkilotlar) uchun navbatdagi ikkita mavsum doirasida loyiha kiritish imkoniyati cheklanadi.

Quyidagilarga tashabbusli budjet doirasida ketma-ket ikki marotaba gʻolib deb topilgani munosabati bilan loyiha kiritish imkoniyatini cheklash qoidasi qoʻllanmaydi:

mahalla soni 15 va undan kam boʻlgan tuman va shaharlardagi barcha mahallalarga;

“Eng yaxshi soliq toʻlovchi mahalla” sifatida TOP-100 talik roʻyxatga kirgan mahallalarga;

aholi va davlat oʻrtasida sheriklik asosida moliyalashtiriladigan loyihalarga.

Bunda, loyiha kiritish imkoniyati cheklangan mahallalarga istisno tariqasida sherikchilik asosida loyihalarni ilgari surishga ruxsat etiladi.

191. Agar yil davomida loyiha kiritish imkoniyati cheklangan mahallalar boshqa mahallalar bilan birlashtirilsa, loyiha kiritish boʻyicha cheklov birlashish natijasida hosil boʻlgan (yoki yangi tashkil etilgan) mahalla uchun tegishli davr mobaynida amal qiladi.

Agar tanaffusga tushgan mahalla hududida yangi mahalla tashkil etilsa (mahalla hududi boʻlinsa), ushbu hudud boʻyicha soʻnggi ikki mavsumda gʻolib boʻlgan loyihalar qaysi mahalla hududiga tegishli boʻlsa ushbu mahallaga nisbatan tanaffus saqlab qolinadi.

20. Olis hamda Internet xizmati toʻliq yetib bormagan hududlarda fuqarolarga imkoniyat yaratish maqsadida tuman (shahar) hokimliklari tomonidan tegishli mahalla yoki ovulda loyihalarni shakllantirishga koʻmaklashuvchi tashabbuskorlar burchaklari tashkil etiladi.

21. Loyihalarni shakllantirishda quyidagi talablar qoʻyiladi:

loyiha mazmuni, jumladan, amalga oshiriladigan ish turlari yoki xarid qilinadigan tovar va xizmatlar nomi va soni aniq koʻrsatilgan boʻlishi (bunda jihozlar roʻyxati elektron tarzda shakllantiriladi);

loyihani amalga oshirish aniq manzili (mahalla va ushbu mahalladagi koʻchalar nomi) koʻrsatilgan boʻlishi;

loyihada yagona ijtimoiy muammo aks ettirilgan boʻlishi (loyiha tarkibiga bir necha manzildagi yoki turli xil obyektlar boʻyicha tadbirlarni kiritilishiga ruxsat berilmaydi);

obyektning amaldagi holatini tasvirlovchi kamida 3 ta fotosurat ilova qilinishi.

Bunda fuqarolarga loyihani amalga oshirish boʻyicha qoʻshimcha hujjatlarni (loyiha hujjatlari, vakolatli organ xulosalari kabi hujjatlar) ilova qilish imkoniyati beriladi.

22. Loyihalarni amalga oshirish turiga koʻra qurilish-taʼmirlash yoki jihozlash yoʻnalishlari boʻyicha ilgari surilishi mumkin. Bir loyiha tarkibida ikki xil turdagi tadbirlar kiritilishiga ruxsat berilmaydi.

Jihozlash boʻyicha xarid qilinishi ruxsat etilgan tovar (xizmat)lar roʻyxati vakolatli organ tomonidan tegishli vazirliklar bilan kelishilgan holda tasdiqlanadi.

Bunda, ruxsat etilgan tovar (xizmat)lar roʻyxati tegishli vazirliklar tomonidan har mavsum boshlanishidan kamida oʻn kun avval vakolatli organga taqdim etilishi lozim. Roʻyxat taqdim etilmagan hollarda tegishli soha boʻyicha jihozlash loyihalarini shakllantirish imkoniyati cheklanadi.

23. Ilgari surilgan loyihalar Ishchi komissiya tomonidan quyidagi mezonlar asosida tanlab olinadi:

loyihada aks etgan muammo/tadbir tegishli tuman (shahar) hududiga tegishli boʻlishi (maʼlum bir tuman (shahar)ga tegishli boʻlgan (roʻyxatdan oʻtgan) ammo joylashuvi boʻyicha boshqa tuman (shahar) hududida joylashgan tashkilotlar bundan mustasno);

ijtimoiy soha tashkilotlari bino va inshootlarini taʼmirlash yoki jihozlash, bunda tashabbusli budjet jarayonida ishtirok etishi ruxsat etilgan tashkilotlar roʻyxati vakolatli organ tomonidan har mavsum boshida “Ochiq budjet” axborot portalida eʼlon qilib boriladi;

jamoaviy muammolarni hal etishga qaratilganligi (yoʻllarni taʼmirlash, xiyobonlar va bolalar maydonchalarini barpo etish, ekologiyani yaxshilash, ichimlik va oqova suv taʼminotini yaxshilash, koʻcha chiroqlarini oʻrnatish (taʼmirlash) va mahalla hududini obod qilish boʻyicha tadbirlar;

jamoatchilik tomonidan bildirilgan takliflar idoraviy yoki shaxsiy xususiyatga ega boʻlmasligi (barcha turdagi avtomashinalar, turar joy, bino-inshootlarni xarid qilish, maʼmuriy binolarni taʼmirlash);

xoʻjalik yurituvchi subyekt sifatida faoliyat yuritmasligi va tadbirkorlik faoliyatini qoʻllab-quvvatlamasligi;

budjet tashkilotini saqlab turish bilan bogʻliq xarajatlarni oʻzida aks ettirmasligi (ish haqi va unga tenglashtirilgan toʻlovlar, kommunal, aloqa va Internet xizmati uchun toʻlovlar, shuningdek, kanstovar va boshqa tez eskiruvchi moddiy qiymatliklar);

mahalliy davlat hokimiyati, davlat organlarining binolarini shuningdek, ushbu organlar balansida boʻlgan obyektlarni qurish, taʼmirlash va jihozlashga qaratilgan boʻlmasligi;

boshqa dastur yoki Hukumat topshiriqlari asosida moliyalashtirish manbasi aniq belgilab berilgan obyekt yoki ishlarni oʻz ichiga olmasligi;

loyihani amalga oshirishning umumiy qiymati qurilish-taʼmirlash loyihalari boʻyicha bazaviy hisoblash miqdorining toʻrt ming, jihozlash loyihalari boʻyicha ikki ming barobaridan oshmasligi lozim.

Bunda bir xil mazmundagi bir necha loyihalar ilgari surilgan boʻlsa, ulardan maʼlumoti toʻliq koʻrsatilgan dastlabki kiritilgan loyiha qabul qilinadi.

24. Tashabbusli budjet jarayonlari doirasida Hukumat topshirigʻi yoki koʻrsatmalari ijrosini taʼminlash maqsadida manzilli ravishda loyihalarning shakllantirilishiga yoʻl qoʻyilmaydi.

25. Ishchi komissiya loyihalarni saralash bosqichi davomida ushbu Nizomning 23-bandida koʻrsatilgan mezonlarga muvofiqligi hamda tadbirlar amalga oshirilishi imkoniyatlarini oʻrganadi.

Bunda kelib tushgan loyihalar Ishchi komissiya tomonidan buyurtmachilarga saralash bosqichining dastlabki kunidan kechiktirilmasdan yuborilishi taʼminlanadi.

26. Loyihalarni koʻrib chiqish va amalga oshirish boʻyicha buyurtmachi tashkilotlar (keyingi oʻrinlarda — buyurtmachi) mazkur Nizomning 3-ilovasiga muvofiq belgilanadi.

27. Buyurtmachilar tomonidan loyihalar qabul qilingan kundan boshlab 10 ish kuni mobaynida qonun hujjatlarida belgilangan mezonlarga muvofiqligi yuzasidan loyihalarni koʻrib chiqadi.

Bunda, buyurtmachilar belgilangan mezonlarga muvofiq loyihalarni qabul qilish yoki mezonga zid loyihalarni asoslantirilgan holda rad etish yuzasidan ishchi komissiyaga xulosa taqdim etadi. Taqdim etilgan xulosada qabul qilingan loyihalarning hisob-kitoblar asosida dastlabki qiymati koʻrsatilishi shart.

Umumtaʼlim maktablari hamda maktabgacha taʼlim muassasalari boʻyicha loyihalarning dastlabki qiymatiga istisno tariqasida tegishincha tuman (shahar) maktabgacha va maktab taʼlimi boʻlimining tegishli boʻlinmalar tomonidan aniqlik kiritiladi. Bunda, tegishli boʻlinmalar loyihani amalga oshirish boʻyicha dastlabki texnik smetani Ishchi komissiyaga taqdim etishi shart.

28. Loyihalarni amalga oshirish uchun talab etiladigan mablagʻning dastlabki qiymati tegishliligiga koʻra buyurtmachilar xulosasi yoki tegishli boʻlinmalarning hisob-kitoblari asosida Ishchi organ tomonidan Portalga kiritiladi.

29. Tarmoq tashkilotlarining taqdim etgan xulosasiga asosan Ishchi komissiya loyihalarni ovoz berish bosqichiga oʻtkazish yoki rad etish yuzasidan qaror qabul qiladi.

Mazkur qaror asosida Ishchi organ Portalda rad etiladigan va ovoz berishga oʻtkaziladigan loyihalar roʻyxatini shakllantiradi hamda masʼul xodimlar tomonidan elektron kalit orqali ushbu roʻyxat tasdiqlanadi.

30. Ishchi komissiya tomonidan loyihalarni asossiz ravishda rad etishga yoʻl qoʻyilmaydi.

Loyihalar asossiz rad etilganda fuqarolarga holat yuzasidan Portal orqali xabar yuborish imkoniyati yaratiladi.

31. Vakolatli organ kelib tushgan murojaatlarni oʻrganib chiqish jarayonida loyihalar haqiqatda asossiz ravishda rad etilgan deb topilsa, vakolatli organ tomonidan ushbu loyihalar ovoz berish bosqichiga oʻtkaziladi.

32. Agar bir tuman (shahar)da mavsum doirasida ikki yoki undan ortiq asossiz ravishda rad etish holati yuzasidan xabar kelib tushsa, ushbu tuman (shahar) Ishchi organining mazkur mavsum uchun loyihalarni saralash jarayonidagi vakolatlari cheklanadi hamda tegishli hudud boʻyicha barcha loyihalar vakolatli organ tomonidan qaytadan saralashdan oʻtkaziladi.

Bunda agar tegishli tuman (shahar) Ishchi komissiyasi loyihalarni rad etish uchun asoslantiruvchi hujjatlarni taqdim etmasa, barcha loyihalar ovoz berish bosqichiga oʻtkazilishi mumkin.

33. Ishchi komissiya tomonidan rad etilgan takliflar boʻyicha taklif bergan shaxsning shaxsiy kabinetiga rad etishning asoslangan sabablari toʻgʻrisida xabarnoma yuboriladi.

34. Saralash bosqichi yakunlariga koʻra loyihalarni targʻib qilish uchun targʻibot bosqichi oʻtkaziladi. Bunda tashabbuskorlar loyihalariga ovoz toʻplash uchun oʻz loyihalarini targʻib qiladilar.

Bunda targʻibot bosqichi boshlangunga qadar kelib tushgan barcha loyihalar saralashdan oʻtkazilishiga shaxsan Ishchi komissiya masʼul hisoblanadi.

Targʻibot bosqichi yakunlariga koʻra Portalda ovoz berish jarayonlari oʻtkaziladi.

35. Ovoz berish bosqichida fuqarolar bir mavsum doirasida bitta loyihaga ovoz berish imkoniyatiga ega boʻladi.

Bunda ovoz berishda fuqaroning shaxsiga aniqlik kiritilib, Portalda ovoz beruvchilar roʻyxati shakllantirilib boriladi hamda takroran ovoz berishga yoʻl qoʻyilmaydi.

36. Fuqarolarga qulayliklar yaratish maqsadida ovoz berish SMS xizmati orqali Portal, mobil ilova yoki ijtimoiy tarmoqlarda ishga tushirilgan rasmiy botlar orqali amalga oshirilishi mumkin.

37. Har bir tuman (shahar)da loyihalar gʻolib deb topilishi uchun 50 tadan kam boʻlmagan ovozlarga ega boʻlishi lozim.

38. Ovoz berish bosqichi yakunlariga koʻra:

har bir tuman (shahar) boʻyicha loyihalar toʻplangan ovozlar boʻyicha yuqoridan pastga saralanadi;

ovoz berish bosqichi yakunlangan kun holatiga Portalda tegishli mavsum uchun yoʻnaltirilishi lozim boʻlgan mablagʻlarga aniqlik kiritiladi;

eng koʻp ovoz olgan loyihalar tegishli mavsum uchun nazarda tutilgan mablagʻlar doirasida Portal tomonidan avtomatik tarzda gʻolib deb topiladi.

Bunda gʻolib loyihalarni aniqlashda ovoz beruvchilar maʼlumotiga aniqlik kiritish uchun qoʻshimcha vaqt talab etilishi natijasida gʻolib loyihalar roʻyxatini eʼlon qilish maʼlum bir muddat talab etishi mumkin.

Agar ovoz berish bosqichi yakunlariga koʻra, ayrim loyihalar teng ovoz toʻplagan boʻlsa gʻoliblarni aniqlashda ushbu loyihalardan mazkur ovozni Portalda birinchi boʻlib qayd etgan loyiha tanlab olinadi.

381. Ovoz berish jarayoni davomida fuqarolar tomonidan loyihalarga majburiy ovoz toʻplashga jalb etilishi yuzasidan shikoyatlar kelib tushsa, vakolatli organ tomonidan mazkur holatga aniqlik kiritish yuzasidan mehnat munosabatlari boʻyicha vakolatli tashkilotga soʻrov yuboriladi.

Agar holat oʻz tasdigʻini topsa majburiy ovoz toʻplangan loyihalarni ovoz berish bosqichidan chetlatish yoki gʻoliblar roʻyxatidan chiqarish boʻyicha vakolatli organ tomonidan tegishli tuman (shahar) xalq deputatlari Kengashiga taqdimnoma yuboriladi.

Bunda, loyiha gʻolib loyiha sifatida aniqlangandan soʻng Kengash tomonidan majburiy ravishda ovoz toʻplagan deb topilib rad etilganda, rad etilgan loyihaga ajratilishi lozim boʻlgan mablagʻlar doirasida keyingi oʻrindagi loyiha(lar) gʻolib deb eʼlon qilinadi.

39. Barcha tuman (shahar)lar boʻyicha gʻolib loyihalar bir vaqtning oʻzida Portal orqali eʼlon qilinadi. Loyiha tashabbuskorlariga gʻolib boʻlganligi yuzasidan SMS xabar yuboriladi.

40. Gʻoliblar aniqlanganidan soʻng Jamgʻarmada shakllangan qoldiq mablagʻlar qoʻshimcha gʻolib loyihalarni aniqlashga, gʻolib deb topilgan loyihalarning yakuniy qiymatiga aniqlik kiritilishi munosabati bilan qoʻshimcha talab etiladigan farqni qoplashga yoki kelgusida oʻtkaziladigan tashabbusli budjet jarayonlariga yoʻnaltiriladi.

401. Ovoz berish bosqichi yakunlangandan soʻng gʻolib boʻlmagan loyihalar orasidan qoʻshimcha ravishda gʻolib loyihalarni aniqlash bosqichi oʻtkaziladi. Ushbu bosqich ovoz berish jarayoni yakunlangan kundan boshlab oʻn kun davomida oʻtkaziladi.

Qoʻshimcha gʻolib loyihalar quyidagi usulda aniqlanishi mumkin:

xalq deputatlari tuman (shahar) kengashlari tomonidan Jamgʻarmaga qoʻshimcha mablagʻ yoʻnaltirish orqali;

Oliy Majlis Qonunchilik Palatasi deputatlari tomonidan tegishli saylov okruglaridagi loyihalardan birini Portalda tanlash orqali.

402. Xalq deputatlari tuman (shahar) kengashlariga mahalliy budjetning qoʻshimcha mablagʻlari yoki iqtisod qilinib Jamgʻarmaga qaytarilgan mablagʻlar hisobidan keyingi oʻrinlardagi loyihalarni (ushbu loyihalarga yetmagan mablagʻni toʻliq ajratgan holda) qoʻshimcha tarzda gʻolib deb eʼlon qilish vakolati beriladi.

Bunda, tegishli xalq deputatlari tuman (shahar) kengashlari Jamgʻarmaga mablagʻlar oʻtkazilganligi hamda qoʻshimcha gʻoliblarni aniqlash yuzasidan vakolatli organga ovoz berish jarayoni yakunlangan kundan boshlab 10 kun ichida soʻrov yuborishi lozim.

403. Qoʻshimcha gʻolib loyihalarni aniqlash bosqichi doirasida Oliy Majlis Qonunchilik palatasi deputatlariga tegishli saylov okruglarida gʻolib boʻlmagan loyihalar orasidan bitta loyihani deputat tashabbusi loyihasi sifatida qoʻshimcha ravishda gʻolib deb eʼlon qilish vakolati beriladi.

Deputatlar saylovchilarning manfaatlarini inobatga olgan holda oʻzlarining Portaldagi shaxsiy sahifalari orqali loyihalardan birini tanlaydi hamda ushbu loyihalar Portalda gʻolib loyihalar roʻyxatiga kiritiladi.

Deputatlar tomonidan tanlangan loyihalar Oʻzbekiston Respublikasi respublika budjetidan moliyalashtiriladi. Bunda, ushbu loyihalar uchun mablagʻlar tegishli tuman (shahar) Jamgʻarmalariga oʻtkazib beriladi.

Portalda deputat tashabbusi asosida moliyalashtiriladigan loyihalar uchun alohida sahifa tashkil etilib, shu turdagi barcha loyihalarning jamoatchilik uchun ochiq roʻyxati yuritiladi.

404. Deputatlar tomonidan loyihalarni tanlab olishda qoʻyidagilar inobatga olinadi:

loyiha deputat saylangan tegishli saylov okrugi hududida joylashgan boʻlishi;

loyiha ovoz berish bosqichiga oʻtgan hamda mazkur Nizom bilan belgilangan eng kam ovoz sonini toʻplagan boʻlishi;

birgalikda moliyalashtirish amaliyoti doirasida ishtirok etib sherikchilik asosida loyiha amalga oshirilayotgan mahallaga tegishli loyiha boʻlmasligi.

Bunda, bir mahalladan ketma-ket ikki mavsumda deputat tashabbusi sifatida loyihalarni tanlab olinishiga yoʻl qoʻyilmaydi.

Agar tegishli mavsum doirasida qoʻshimcha gʻolib loyihalarni aniqlash bosqichi yakuniga qadar deputatlar tomonidan qoʻshimcha gʻoliblar aniqlanmasa (loyihalar tanlanmasa), deputatlar oʻz vakolatidan foydalanmagan deb hisoblanadi hamda bu kelgusi mavsum(lar)da ushbu vakolatdan foydalanish huquqini bermaydi.

41. Gʻolib deb topilgan loyihalarni amalga oshirishda yuzaga kelgan texnik muammolar yoki ushbu loyihani amalga oshirish boʻyicha boshqa manbalar hisobidan mablagʻlar ajratilganida mazkur loyihalar gʻoliblar roʻyxatidan chiqariladi.

Bunda gʻoliblar roʻyxatidan chiqarish uchun Ishchi komissiya tomonidan tegishli xalq deputatlari tuman (shahar) Kengashining qarori rasmiylashtirilib, Portalga joylashtiriladi.

42. Xalq deputatlari tuman (shahar) Kengashlari tomonidan gʻolib loyihalarning asossiz tarzda rad etilishiga yoʻl qoʻyilmaydi. Gʻolib loyihalar toʻliq amalga oshirilmagunga qadar Portaldan nazoratdan olinmaydi.

43. Asoslangan holda gʻoliblar roʻyxatidan chiqarilgan loyihalar uchun ajratilgan mablagʻlar Jamgʻarmaga qayta tiklanadi.

Vakolatli organ tomonidan ushbu mablagʻlar doirasida (kelgusi mavsum boshlangunga qadar) tegishli tuman (shahar)da eng koʻp ovoz toʻplab gʻolib boʻlmagan navbatdagi loyiha(lar) gʻolib deb eʼlon qilinishi mumkin.

44. Oʻzbekiston Respublikasi Prezidenti farmon yoki qarorlari, Oʻzbekiston Respublikasi Vazirlar Mahkamasining qarorlari asosida qoʻshimcha gʻolib deb eʼlon qilingan loyihalar uchun alohida shaxsiy gʻazna hisobvaraqlari ochilib, ajratilgan mablagʻlar ushbu hisobvaraqlarga yoʻnaltiriladi.

Ushbu loyihalar Portalda shartli gʻolib sifatida qayd etilib, umumiy gʻolib loyihalar roʻyxatiga kiritiladi.

4-bob. Gʻolib loyihalarni moliyalashtirish va amalga oshirish

45. Jamgʻarma mablagʻlari hisobidan gʻolib loyihalarni moliyalashtirish tegishli xalq deputatlari tuman (shahar) Kengashlari qarorlari asosida amalga oshiriladi.

46. Gʻolib loyihalar eʼlon qilingan kundan boshlab 7 kun muddatda mazkur loyihalarni moliyalashtirish yuzasidan Ishchi komissiya tomonidan xalq deputatlari tuman (shahar) Kengashlariga qaror loyihasi kiritiladi.

47. Qaror loyihasiga gʻolib deb topilgan loyihalarni moliyalashtirish yuzasidan 4-ilovadagi namunaga muvofiq “Manzilli roʻyxat” ilova qilinadi.

Bunda jihozlash loyihalari uchun mazkur Nizomning 5-ilovasiga muvofiq shaklda xarid qilinadigan tovar (xizmatlar) reyestrida (keyingi oʻrinlarda — Reyestr) koʻzda tutilgan xaridlarning jami summasi Manzilli roʻyxatda tegishli loyihani moliyalashtirish uchun koʻzda tutilgan mablagʻdan ortib ketishiga yoʻl qoʻyilmaydi.

48. Gʻolib loyiha doirasida faqat tashabbuskor tomonidan loyiha mazmunida koʻrsatib oʻtilgan tadbirlar amalga oshiriladi. Xalq deputatlari tuman (shahar) Kengashi qarori bilan gʻolib deb topilgan loyiha mazmunini Manzilli roʻyxatda oʻzgartirishga yoki loyihada koʻzda tutilmagan tadbirlar kiritilishiga ruxsat etilmaydi.

49. Manzilli roʻyxat belgilangan tartibda rasmiylashtirilishi, jumladan, buyurtmachi tashkilotlar toʻgʻri tanlanishi, Reyestr toʻgʻri shakllantirilishi, xarid qilish tartib-taomili turi va loyihani amalga oshirish aniq manzili kabi maʼlumotlar toʻgʻri koʻrsatilishda Ishchi komissiya masʼul hisoblanadi.

50. Gʻolib deb topilgan loyihalarni amalga oshirish uchun yer va boshqa resurslar ajratilishi, shuningdek, tegishli soha inspeksiyalarining ekspertiza xulosalari talab etilgan hollarda ushbu resurslarni ajratish boʻyicha qaror qabul qilish vakolatiga ega tashkilotlarga Manzilli roʻyxat tasdiqlangandan soʻng 3 ish kunida tuman (shahar) hokimligi tomonidan soʻrov yuboriladi.

51. Xalq deputatlari tuman (shahar) Kengashi qarori bilan Manzilli roʻyxat tasdiqlangandan soʻng tuman (shahar) iqtisodiyot va moliya boʻlimi tomonidan gʻolib deb topilgan loyihalarni moliyalashtirish maqsadida buyurtmachi tashkilotlarga har bir loyiha uchun alohida Davlat moliyasini boshqarish axborot tizimida shaxsiy gʻazna hisobvaraqlari ochiladi.

Agar gʻolib loyihani amalga oshirishda respublika yoki viloyat darajasidagi tashkilot buyurtmachi etib tayinlansa — ushbu tashkilotga tegishli tuman (shahar) darajasida Fuqarolar tashabbusi jamgʻarmasida shaxsiy gʻazna hisobvaragʻi ochiladi.

52. Ochilgan shaxsiy gʻazna hisobvaraqlariga 3 ish kuni ichida tuman (shahar) hokimligi tomonidan gʻolib deb topilgan loyihalar uchun Manzilli roʻyxatda nazarda tutilgan mablagʻlar oʻtkazib beriladi.

Gʻolib deb topilgan loyihalar uchun nazarda tutilgan mablagʻlarni oʻtkazib berilishini asossiz tarzda kechiktirilishiga yoʻl qoʻyilmaydi.

53. Manzilli roʻyxatda nazarda tutilgan mablagʻlar tegishli shaxsiy gʻazna hisobvaraqlariga oʻtkazib berilgandan soʻng buyurtmachi tashkilotlar 3 ish kunida tovar-moddiy boyliklar (ishlar va xizmatlar) xarid qilish uchun taʼminotchi korxonalarni aniqlash, qurilish-taʼmirlash bilan bogʻliq tadbirlar boʻyicha loyihachi korxonalarni aniqlash boʻyicha davlat xaridlari elektron tizimiga eʼlon joylashtiradi.

54. Qurilish va taʼmirlash bilan bogʻliq tadbirlar yuzasidan loyiha-smeta hujjatlari ishlab chiqilib, ekspertiza xulosasi olingan kundan boshlab 1 ish kunida buyurtmachi tashkilotlar Manzilli roʻyxatda koʻrsatilgan xarid qilish tartib-taomili boʻyicha pudratchi korxonalarni aniqlash choralarini koʻradi.

Bunda ekspertizadan oʻtkazilgan loyiha-smeta hujjatlari asosida gʻolib loyihaning yakuniy qiymatiga aniqlik kiritiladi.

55. Agar loyihaning dastlabki qiymatiga nisbatan yakuniy qiymati koʻproqni tashkil etsa, loyihani amalga oshirish uchun talab etiladigan qoʻshimcha mablagʻ tegishli xalq deputatlari tuman (shahar) Kengashining qarori asosida Jamgʻarmadagi mavjud yoki kelgusida kelib tushadigan mablagʻlar hisobidan qoplab beriladi.

Bunda, Jamgʻarma hisobidan loyihaga ajratiladigan mablagʻ tegishli mavsum oʻtkazilgan holatga amalda boʻlgan bazaviy hisoblash miqdorining 4 ming barobaridan oshib ketmasligi lozim. Loyiha qiymati ushbu miqdordan oshgan hollarda qoʻshimcha talab etiladigan mablagʻ tuman (shahar) mahalliy budjetining qoʻshimcha manbalari hisobidan tegishli xalq deputatlari tuman (shahar) Kengashining qaroriga asosan qoplab berilishi mumkin.

Gʻolib deb topilgan loyihaning dastlabki qiymatidan kelib chiqib, tadbir doirasida amalga oshiriladigan ishlar (tovar va xizmatlar) hajmini kamaytirishga yoʻl qoʻyilmaydi.

5-bob. Jihozlash boʻyicha loyihalarni moliyalashtirish

56. Jihozlash boʻyicha loyihalarni amalga oshirishda buyurtmachi tashkilot davlat xaridlari toʻgʻrisidagi qonun hujjatlariga muvofiq moddiy qiymatliklar (xizmatlar)ni yetkazib beruvchi yoki pudratchilarni aniqlash:

elektron doʻkon orqali;

boshlangʻich narxni pasaytirish uchun oʻtkaziladigan auksion orqali;

eng yaxshi takliflarni tanlash orqali;

qonun hujjatlarida belgilangan tartibda toʻgʻridan-toʻgʻri shartnomalar tuzish orqali davlat xaridlarini amalga oshiradi.

57. Loyihalar uchun mablagʻlar oʻtkazib berilgan kundan boshlab qoida tariqasida toʻrt oyda tovar-moddiy boyliklar (xizmatlar) xarid qilish tadbirlari toʻliq yakunlanishi lozim. Loyihalarni toʻliq amalga oshirilishiga buyurtmachi tashkilotlar masʼul hisoblanadi.

58. Ajratilgan mablagʻlar faqat Manzilli roʻyxatga ilova qilingan Reyestrda nazarda tutilgan tovar-moddiy qiymatliklar (xizmatlar)ni xarid qilish uchun sarflanadi.

Bunda Reyestrga kiritilgan tovar-moddiy boyliklar (xizmatlar) turini oʻzgartirish yoki miqdorini oshirishga yoʻl qoʻyilmaydi.

59. Xarid qilinishi nazarda tutilgan tovar-moddiy qiymatliklarni haqiqiy bozor narxi gʻolib deb topilgan loyiha uchun nazarda tutilgan mablagʻdan ortiq boʻlsa, ushbu holatda Reyestrning jami summasiga oʻzgartirish kiritilishi mumkin.

Bunda qoʻshimcha talab etiladigan mablagʻlar Jamgʻarma hisobidan ajratilishi uchun Manzilli roʻyxatga tegishli oʻzgartirishlar kiritish yuzasidan xalq deputatlari tuman (shahar) Kengashining qarori qabul qilinishi lozim.

60. Xarid qilinishi nazarda tutilgan tovar yoki xizmat turi boʻyicha ichki bozorda takliflar mavjud boʻlmagan holda mazkur tovar (xizmatlar)ni turiga oʻzgartirish kiritilishi mumkin. Bunda xaridlar vakolatli organ bilan kelishilgan holda amalga oshiriladi.

61. Xarid qilingan tovar-moddiy qiymatliklar buyurtmachi tashkilot tomonidan belgilangan tartibda tovar va xizmatlar yetkazib berilgan kundan boshlab balansga kirim qiladi hamda buxgalteriya hisobotida aks ettiriladi.

62. Balansda saqlovchi tashkilot xarid qilingan tovar-moddiy qiymatliklarni saqlab turish bilan bogʻliq xarajatlarni moliyalashtirish yuzasidan kelgusi moliya yili uchun budjet soʻrovida tegishli mablagʻlar koʻzda tutilishini taʼminlaydi.

63. Umumfoydalanishda boʻlgan resurslar bilan taʼminlash vositalari (transformator, quvurlar, uzellar va boshqa resurslarni yetkazib berishda qoʻllaniladigan vositalar)dan foydalanishda buyurtmachi tashkilot mazkur vositalarni oʻz balansiga kirim qiladi hamda tomonlar oʻrtasida kelishuv asosida tegishli ekspluatatsiya korxonalariga foydalanish uchun beradi.

64. Jamgʻarma mablagʻlari hisobidan 2025-yilga qadar xarid qilingan avtotransport vositalariga vakolatli organ tomonidan taqdim etilgan shablon boʻyicha maxsus belgi — stikerlar joylashtiriladi. Maxsus belgilari oʻrnatilmagan transport vositalaridan foydalanish taqiqlanadi.

Ishchi komissiya har yili 25-yanvarga qadar mazkur Nizomning 8-ilovasida keltirilgan shaklda jamgʻarma mablagʻlari hisobidan xarid qilingan avtotransport vositalaridan foydalanishi yuzasidan hisobotni mahalliy hokimlikning rasmiy veb-sayti hamda Portal orqali jamoatchilikka eʼlon qilib boriladi.

6-bob. Qurilish-taʼmirlash loyihalari boʻyicha tadbirlarni amalga oshirish

65. Mavjud bino va inshootlarni joriy yoki kapital taʼmirlash (keyingi oʻrinlarda — taʼmirlash) hamda bino va inshootlarni qurish boʻyicha tadbirlar buyurtmachi tashkilot tomonidan “Shaffof-qurilish” axborot tizimi orqali tender tanlovlari asosida amalga oshiriladi.

66. Loyihalar uchun mablagʻlar oʻtkazib berilgan kundan boshlab qoida tariqasida besh oyda taʼmirlash ishlarini amalga oshirish tadbirlari toʻliq yakunlanishi lozim. Loyihalarni toʻliq amalga oshirilishiga buyurtmachi tashkilotlar masʼul hisoblanadi.

67. Ajratilgan mablagʻlar faqat Manzilli roʻyxatda nazarda tutilgan tadbirlarni amalga oshirish va ushbu tadbirlarni bajarish uchun qoʻshimcha talab etiladigan hujjatlarni rasmiylashtirish xarajatlariga sarflanishi mumkin. Bunda Manzilli roʻyxatda koʻrsatilgan taʼmirlash ishlari hajmining oshirilishiga yoʻl qoʻyilmaydi.

68. Taʼmirlash ishlarining haqiqiy bozor narxi Manzilli roʻyxatda nazarda tutilgan mablagʻdan ortiq boʻlsa, ekspertizadan oʻtkazilgan loyiha-smeta hujjatlari hamda buyurtmachi korxonaning xulosasiga asosan loyihaning amalga oshirish yakuniy qiymatiga oʻzgartirish kiritilishi mumkin.

Bunda qoʻshimcha talab etiladigan mablagʻlar Jamgʻarma hisobidan ajratilishi uchun Manzilli roʻyxatga tegishli oʻzgartirishlar kiritish yuzasidan xalq deputatlari tuman (shahar) Kengashi qarori qabul qilinishi lozim.

69. Buyurtmachi korxona etib yagona buyurtmachi korxonalar belgilanganda ushbu korxona uchun tegishli tuman (shahar) darajasida maxsus gʻazna hisobvaraqlari ochiladi va gʻolib loyihani amalga oshirish uchun koʻzda tutilgan mablagʻlar maxsus gʻazna hisobvaragʻiga oʻtkazib beriladi.

70. Taʼmirlash ishlarini amalga oshirish uchun yagona buyurtmachi korxona va balansda saqlovchi oʻrtasida bitim imzolanadi. Bitimda loyihani amalga oshirish qiymati, amalga oshiriladigan ishlar, qabul qilib olish muddati va boshqa texnik koʻrsatkichlar aks ettiriladi.

71. Yagona buyurtmachi korxonalar tomonidan loyihani amalga oshirish uchun qonun hujjatlarida belgilangan tartibda pudratchi korxonalar bilan shartnomalar rasmiylashtiriladi.

72. Taʼmirlash ishlari yakunlangandan soʻng taʼmirlangan obyekt amalga oshirilgan ishlar yuzasidan tegishli hujjat va xulosalar bilan birga balansda saqlovchiga topshiriladi.

73. Taʼmirlash ishlari sifatli va oʻz vaqtida amalga oshirilishi uchun javobgarlik buyurtmachi tashkilot zimmasiga yuklatiladi.

74. Balansda saqlovchilar sifatida buyurtmachi belgilanib ishlar amalga oshirilganda qurilish ishlari yakunlariga koʻra bajarilgan ishlarni belgilangan texnik mezonlarga muvofiqligi yuzasidan mutaxassislar jalb etilgan holda obyektlar qabul qilib olinishi va foydalanishga topshirilishi lozim.

75. Tashabbusli budjet jarayonlari doirasida gʻolib deb topilgan qurilish-taʼmirlash bilan bogʻliq loyihalarni amalga oshirishda barcha turdagi buyurtmachi korxonalarning saqlash xarajatlari uchun toʻlovlar shaharsozlik hujjatlarini ekspertiza qilish Respublika markazining xulosasiga asosan aniqlangan loyiha yakuniy qiymatining uch foizidan ortmasligi lozim.

Bunda buyurtmachi korxonalarning saqlash xarajatlari uchun toʻlovlar dastlab boʻnak sifatida 50 foiz qismi, obyekt foydalanishga topshirilgandan soʻng qolgan 50 foiz qismi toʻlab beriladi.

7-bob. Hisobdorlik va ochiqlikni taʼminlash

76. Ishchi komissiya gʻolib deb topilgan loyihalar roʻyxatini hokimlikning rasmiy veb-sayti hamda ommaviy axborot vositalari orqali eʼlon qiladi.

77. Gʻolib deb topilgan loyihalarni amalga oshirishning barcha bosqichlari fuqarolar uchun ochiqligini va ular tomonidan jamoatchilik nazorati oʻrnatilishini taʼminlash maqsadida Portalda loyihalarni amalga oshirish xronologiyasi yuritib boriladi.

78. Ishchi komissiya loyihalarni amalga oshirish xronologiyasida tegishli maʼlumotlar belgilangan muddatlarda kiritilishiga va yangilab borilishiga masʼul hisoblanadi.

79. Loyihalarni amalga oshirish xronologiyasi quyidagilarni oʻz ichiga oladi:

buyurtmachi tashkilot nomi;

loyihani moliyalashtirish uchun ochilgan hisobvaraq;

loyiha uchun ajratilgan mablagʻ miqdori;

loyiha-smeta va ekspertiza hujjatlari;

“Davlat xaridlari toʻgʻrisida”gi Qonunga muvofiq oʻtkazilgan tanlovlar;

pudratchi korxona toʻgʻrisida maʼlumotlar;

amalga oshirilgan xarajatlar va rasmiylashtirilgan shartnomalar.

791. Loyihalarning amalga oshirilishini doimiy nazorat qilib borish va monitoringini kuchaytirish maqsadida Portalda Sayyor-monitoring boʻlimi ishga tushiriladi.

Bunda, tumandagi ishchi organ har oy loyihalarni bevosita joyiga chiqqan holda doimiy tarzda nazorat qilib borish hamda pudratchilar uchun toʻlov qilishdan avval Sayyor-monitoring boʻlimi orqali obyektning joriy holatini oʻrganish va Portalda qayd etish imkoniyati yaratiladi.

80. Ishchi komissiya har oyning yakunlari boʻyicha keyingi oyning 10-kuniga qadar loyihalar bajarilishi toʻgʻrisidagi maʼlumot, video-rolik va fotolavhalarning ommaviy axborot vositalari orqali keng yoritib borilishini taʼminlaydi.

81. Ishchi komissiya tomonidan tashabbusli budjet jarayonlari ijrosi toʻgʻrisida har chorak yakunlariga koʻra keyingi oyning 25-sanasiga qadar mazkur Nizomning 6 va 7-ilovalarida keltirilgan shakllarda hisobotlar mahalliy hokimlikning rasmiy veb-sayti hamda Portal orqali jamoatchilikka eʼlon qilib boriladi.

82. Ishchi komissiya har yili 25-yanvarga qadar oʻtgan yilda oʻtkazilgan tashabbusli budjet jarayonlarini moliyalashtirishga yoʻnaltirilgan mablagʻlar yuzasidan tegishli xalq deputatlari tuman (shahar) Kengashiga hisobot kiritadi.

83. Xalq deputatlari tuman (shahar) Kengashlari har yili 1-fevralga qadar tuman (shahar) hokimliklari tomonidan kiritilgan hisobotni koʻrib chiqadi.

84. Ishchi komissiya har yili 10-fevralga qadar ajratilgan mablagʻlarning sarflanishi yuzasidan tasdiqlangan hisobotni “Ochiq budjet” axborot portaliga joylashtiradi.

85. Oʻzbekiston Respublikasi Iqtisodiyot va moliya vazirligi har chorak (yil) yakunlariga koʻra “Ochiq budjet” axborot portalida fuqarolarning budjet jarayoniga jalb etilishi hamda tashabbusli budjetlashtirish tadbirlari amalga oshirilishi samaradorligi va natijadorligi yuzasidan tuman (shahar) hokimliklari faoliyatini baholab boradi.

86. Baholash tizimi “0” balldan “100” ballgacha baholanib, tuman va shaharlar tashabbusli budjetlashtirish jarayonlari natijalariga koʻra “yashil”, “sariq” va “qizil” toifalarga ajratiladi.

Bunda quyidagilar baholash mezonlari sifatida qoʻllaniladi:

ishchi komissiya tomonidan saralash bosqichi haqqoniy va sifatli oʻtkazilishini baholash — asossiz rad etilgan loyihalar hamda loyihalarni amalga oshirish imkoniyati toʻliq oʻrganilmaslik natijasida gʻolib boʻlgan loyihalarning keyinchalik rad etilishi holatlari mavjudligi (20 ballgacha);

fuqarolarning budjet jarayoniga jalb etilishi darajasi — tegishli hudud boʻyicha toʻplangan ovoz sonining mavjud aholi soniga nisbati hamda mavjud mahallalar jalb etilishi darajasi (20 ballgacha);

Fuqarolar tashabbusi jamgʻarmasiga mablagʻlar oʻz vaqtida va toʻliq oʻtkazilishini baholashda — Jamgʻarmaga tuman (shahar) qoʻshimcha mablagʻlarining tegishli qismi yoʻnaltirilishi holatidan kelib chiqib (20 ballgacha);

Jamgʻarma mablagʻlaridan foydalanish samaradorligi va natijadorligini baholashda — “Ochiq budjet” axborot portalida Jamoatchilik nazorati boʻlimi orqali loyiha mualliflari tomonidan bajarilgan ishlarni sifati va holatini baholash tizimi orqali (20 ballgacha);

loyihalarni amalga oshirish boʻyicha buyurtmachilar bilan tizimli ishlar tashkil etilganligi darajasi — loyihalar moliyalashtirilishidan kelib chiqib, jami ajratilgan mablagʻga nisbatan oʻzlashtirilgan mablagʻga nisbati orqali (20 ballgacha) baholab boriladi.

Zarur hollarda Oʻzbekiston Respublikasi Iqtisodiyot va moliya vazirligi tomonidan hududlar faolligini baholashda qoʻshimcha mezonlar joriy etilishi mumkin.

87. Har chorak yakunlariga koʻra mezonlarga muvofiq tuman va shaharlarning toʻplagan ballaridan kelib chiqib:

71 balldan 100 ballgacha — “yashil hudud”,

55 balldan 71 ballgacha — “sariq hudud”,

55 balldan past boʻlganda — “qizil hudud” deb topiladi.

Reyting natijalariga koʻra tuman va shaharlar boʻyicha koʻrsatkichlari eng past hudud hokimliklarining tashabbusli budjet jarayoni ijrosi yuzasidan hisoboti yil yakunlariga koʻra Oliy Majlis Senatida eshitib borilishi mumkin.

8-bob. Jamoatchilik nazoratining oʻrnatilishi

88. Portalda gʻolib deb topilgan loyihalar mualliflari tomonidan tadbirlarni amalga oshirishning barcha bosqichlarini kuzatish hamda bajarilgan ishlarni real-vaqt koʻrinishida baholab borish imkoniyati yaratiladi.

89. Fuqarolar tomonidan loyihani amalga oshirishda boshqa koʻrinishdagi aralashuvlarga (pudratchi korxonani aniqlash yoki ishlarni ularning oʻzlari tomonidan amalga oshirilishi, loyiha-smeta hujjatlarini ishlab chiqish va shu kabilar) yoʻl qoʻyilmaydi.

90. Jamoatchilik nazorati doirasida fuqarolar loyihalar ijrosini kuzatib borish orqali qonun buzilishi holatlari yoki kamchiliklar kuzatilganda shikoyat tarzida Portal orqali “Favqulodda xabar” qoldirishlari mumkin.

Bunda ushbu xabar Portalda tegishli hudud sahifasida muammoli holat sifatida aks ettiriladi va tashabbuskor tomonidan koʻrsatib oʻtilgan vajlarga aniqlik kiritilib xabarda koʻrsatilgan holat bartaraf etilmagunga qadar Portalda nazoratdan olinmaydi.

91. Loyihalar amalga oshirilgandan soʻng tashabbuskorlar tomonidan amalga oshirilgan ishlar Portalda Jamoatchilik nazorati boʻlimi orqali “yashil”, “sariq” va “qizil” toifalarda baholanadi.

“Qizil” toifaga kiritilgan loyihalar boʻyicha tegishli tuman (shahar) hokimliklari tomonidan mavjud kamchiliklarni bartaraf etish choralari koʻriladi.

92. Ishlar toʻliq yakunlangan loyihalarni tashabbuskorlar, mahalla raisi va faollarining ish sifati yuzasidan roziligi olinganidan keyingina foydalanishga topshiriladi.

93. Moliya yili yakunlariga koʻra “qizil” deb baholangan loyihalar boʻyicha ishlarni amalga oshirgan pudratchilar roʻyxati shakllantirilib, Portal orqali eʼlon qilinadi.

Bunda vakolatli organ tomonidan ushbu loyihalar tahlil qilinib, mavjud kamchiliklar bartaraf etilmagan holatlar aniqlansa, ushbu pudratchilarni “Shaffof-qurilish” tizimining Insofsiz ijrochilarning yagona reyestriga kiritilishi boʻyicha tegishli ushbu reyestrni yuritishga vakolatli boʻlgan organga taklif kiritiladi.

9-bob. Ragʻbatlantirish

94. Yil yakunlariga koʻra har yili dekabr oyida Oʻzbekiston Respublikasi Iqtisodiyot va moliya vazirligi tashabbusli budjet jarayonida faollik koʻrsatgan fuqarolar, mahalla raislari, ishchi organ yoki pudratchi korxonalardan bir guruhini ragʻbatlantirish choralarini koʻradi.

Bunda ragʻbatlantiruvchilar soni hamda ularni tanlab olish mezonlari Oʻzbekiston Respublikasi Iqtisodiyot va moliya vazirligi tomonidan belgilanadi.

10-bob. Javobgarlik

95. Mazkur Nizomda belgilangan meʼyorlarga rioya etilmasligi, jumladan, loyihalarni saralab olish, buyurtmachi korxonalar tomonidan xulosalarni belgilangan muddatlarda taqdim etilishi, tegishli hujjatlarni rasmiylashtirish, loyihalarni amalga oshirish tartibi va muddatlariga rioya etmaslik, shuningdek, tegishli hujjatlarni ochiqligini taʼminlamaslik — budjet jarayonining ochiqligini taʼminlash tartibini buzish deb baholanadi.

96. Jamgʻarma mablagʻlarining belgilangan maqsadlarda va samarali foydalanilishi hamda mablagʻlarning ajratilishi uchun taqdim etiladigan barcha hujjatlarning haqqoniyligiga Ishchi komissiya aʼzolari shaxsan javobgar hisoblanadi.

97. Jamgʻarma mablagʻlarining belgilangan maqsadlarda va samarali foydalanilishi ustidan nazorat qiluvchi vakolatli organlar tomonidan doimiy nazorat amalga oshiriladi.

Nazorat tadbirlari yakunlariga koʻra aniqlangan kamomad mablagʻlari toʻliq hajmda tegishli Jamgʻarmalarga qaytariladi.

11-bob. Yakunlovchi qoidalar

98. Hududlarda takliflarni saralab olish jarayoni yuzasidan yoki tadbirlarni moliyalashtirish bilan bogʻliq yuzaga kelgan nizolar Oʻzbekiston Respublikasi Iqtisodiyot va moliya vazirligi tomonidan koʻrib chiqiladi.

99. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 1-ILOVA

TASHABBUSLI BUDJET JARAYONLARINI OʻTKAZISH

SXEMASI

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 2-ILOVA

Jamoatchilik fikri asosida tadbirlarni baholash, tanlab olish hamda ijrosini monitoring qilish boʻyicha ishchi komissiyaning

NAMUNAVIY TARKIBI

Izoh:

1) zaruratga koʻra tuman (shahar) hokimliklari taklifiga asosan ishchi komissiya tarkibiga boshqa mutaxassislar ham jalb etilishi mumkin;

2) Komissiya aʼzolari soni (kamida 9 kishi) toq boʻlgan tarkibda tuziladi.

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 3-ILOVA

Tashabbusli budjet jarayoni yakunlariga koʻra gʻolib boʻlgan loyihalarni koʻrib chiqish va amalga oshirish boʻyicha buyurtmachi tashkilotlar

ROʻYXATI

Izoh: Ushbu roʻyxatda koʻrsatib oʻtilmagan loyihalarni amalga oshirish boʻyicha buyurtmachilarni belgilash xalq deputatlari tuman (shahar) Kengashi tomonidan amalga oshiriladi.

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 4-ILOVA

_________________ tumani (shahri) boʻyicha 20__-yil __-bosqichida gʻolib boʻlgan loyihalarni Fuqarolar tashabbusi jamgʻarmasi hisobidan moliyalashtirish boʻyicha

MANZILLI ROʻYXAT

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 5-ILOVA

____________ tumani (shahri) boʻyicha oʻtkazilgan tashabbusli budjet jarayoni yakunlariga koʻra gʻolib boʻlgan ID ____________ loyihani amalga oshirish boʻyicha xarid qilinadigan tovar (xizmat)lar

REYESTRI

* Manzilli roʻyxatda nazarda tutilgan mablagʻdan ortib ketishi mumkin emas.

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 6-ILOVA

_________________ tumani (shahri) boʻyicha tashabbusli budjetlashtirish natijalari yuzasidan

MAʼLUMOT

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi nizomga 7-ILOVA

_________________ tumani (shahri) boʻyicha Fuqarolar tashabbusi jamgʻarmasi hisobidan loyihalarni moliyalashtirish uchun yoʻnaltirilgan mablagʻlar toʻgʻrisida

MAʼLUMOT

* loyiha-smeta hujjatlari va ekspertiza xulosasiga asosan pudratchi korxonalar tomonidan taklif etilgan qiymat.

Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi Nizomga 8-ILOVA

Tashabbusli budjet jarayoni doirasida xarid qilingan transport vositalari holati toʻgʻrisida maʼlumot