Gidrometeorologiya xizmati agentligi faoliyatining samaradorligini oshirish, gidrologik kuzatuvlar tizimini takomillashtirishga doir qoʻshimcha chora-tadbirlar toʻgʻrisida (66-son)

02.02.2024

Oʻzbekiston Respublikasi Vazirlar Mahkamasining

qarori

Hozirgi vaqtda gidrometeorologiya xizmati 330 dan ortiq gidrometeorologik kuzatuvlar va atrof tabiiy muhit ifloslanishi monitoringini olib boruvchi punktlarni birlashtirib, ular yordamida 240 turdan ortiq prognostik, sunʼiy yoʻldoshlardan olinadigan, tahliliy, ixtisoslashtirilgan va maʼlumotnoma tusidagi gidrometeorologik, shuningdek, gidrologik mahsulotlar tayyorlanishi yoʻlga qoʻyilgan.

Gidrometeorologiya xizmati agentligining vazifalaridan biri suv resurslarining holatini monitoring qilish, ularni aniq hisobga olish, shuningdek, iqlim oʻzgarishi va suv resurslari taqchilligi sharoitida Sirdaryo va Amudaryo havzalarining kutilayotgan suv oʻtkazuvchanligi prognozlarini tayyorlashdan iborat. Daryolardagi nazorat suv oʻlchash nuqtalari (gidropost)da transchegaraviy suv resurslarini obyektiv hisobga olish va ushbu suv oʻlchash nuqtalari orqali oʻtadigan suv miqdori toʻgʻrisida ishonchli maʼlumotlar almashinuvini taʼminlash muhim ahamiyat kasb etadi.

Sel oqimlari va toshqin hodisalarining ortib borishi munosabati bilan daryolardagi suv sarfi boʻyicha maʼlumotlar aniqligini oshirish, maʼlumotlarni onlayn tarzda olish hamda toshqinlar, sel oqimlari haqida barvaqt ogohlantirish tizimini takomillashtirish, gidrometeorologiya xizmatining gidrologik tarmogʻi moddiy-texnik bazasini mustahkamlash maqsadida Vazirlar Mahkamasi qaror qiladi:

1. Quyidagilar:

2024 — 2026-yillarda Ekologiya, atrof-muhitni muhofaza qilish va iqlim oʻzgarishi vazirligi huzuridagi Gidrometeorologiya xizmati agentligi gidrologik kuzatuv tarmogʻini kengaytirish va avtomatlashtirish dasturi (keyingi oʻrinlarda — Dastur) 1-ilovaga muvofiq;

2024 — 2026-yillarda Ekologiya, atrof-muhitni muhofaza qilish va iqlim oʻzgarishi vazirligi huzuridagi Gidrometeorologiya xizmati agentligining amaldagi gidrologik kuzatuvlar tarmogʻi moddiy-texnika bazasini mustahkamlash va kuzatuv punktlarini jihozlash dasturi 2-ilovaga muvofiq;

2024 — 2026-yillarda Ekologiya, atrof-muhitni muhofaza qilish va iqlim oʻzgarishi vazirligi huzuridagi Gidrometeorologiya xizmati agentligining yangi tashkil etiladigan gidrologik kuzatuvlar tarmogʻini jihozlash, bino va inshootlarini qurish dasturi 3-ilovaga muvofiq tasdiqlansin.

2. Oʻzbekiston Respublikasining 2024 — 2026-yillarga moʻljallangan ijtimoiy va ishlab chiqarish infratuzilmasini rivojlantirish dasturi doirasida Ekologiya, atrof-muhitni muhofaza qilish va iqlim oʻzgarishi vazirligi huzuridagi Gidrometeorologiya xizmati agentligi (keyingi oʻrinlarda — Oʻzgidromet) uchun nazarda tutilgan Oʻzbekiston Respublikasining respublika budjeti mablagʻlari ushbu dasturlarni amalga oshirish bilan bogʻliq xarajatlarni moliyalashtirish manbalari etib belgilansin.

3. Ekologiya, atrof-muhitni muhofaza qilish va iqlim oʻzgarishi vazirligi:

“Binolardan foydalanish va kapital qurilish direksiyasi” DUK ushbu qaror bilan tasdiqlangan dasturlar doirasida bino va inshootlarni qurish, rekonstruksiya qilish va kapital taʼmirlash boʻyicha buyurtmachi etib belgilansin;

Suv xoʻjaligi vazirligi bilan birgalikda Davlat budjeti va xalqaro moliya institutlarining grantlari hisobidan ilovalarga muvofiq mavjud hamda yangi ochilayotgan gidrologiya stansiyalari va postlarini avtomatik qurilmalar bilan jihozlashni hamda xodimlarning malakasini oshirishni taʼminlasin;

Raqamli texnologiyalar vazirligi vazirlik huzuridagi Kosmik tadqiqotlar va texnologiyalar agentligi bilan birgalikda gidrologik maʼlumotlar bilan almashish uchun maʼlumotlar uzatishning yagona telekommunikatsiya tarmogʻini yaratish dasturini ishlab chiqsin va tasdiqlasin;

gidrometeorologik hodisalar xavfi yuqori boʻlgan mintaqa va hududlarni prognozlash, monitoring qilish, kuzatish, baholash hamda aniqlash, shuningdek, aholini va hududlarni muhofaza qilish maqsadida muhandislik-texnik va boshqa chora-tadbirlarni amalga oshirish boʻyicha zarur maʼlumotlar taqdim etib borsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 1-ilovaga muvofiq Dasturda nazarda tutilgan yangi ochilayotgan gidrologiya stansiyalari va postlari uchun yer uchastkalari belgilangan tartibda Gidrometeorologiya xizmati agentligiga doimiy foydalanishga (qishloq xoʻjaligi yerlaridan tashqari) ajratilishini taʼminlasin.

5. Suv xoʻjaligi vazirligi Gidrometeorologiya xizmati agentligi bilan birgalikda suv zaxiralari va resurslarini nazorat qilish, suv resurslari boʻyicha prognozlar ishonchliligini oshirish boʻyicha tezkor gidrometeorologik maʼlumotlar almashinuvini takomillashtirib borsin.

6. Quyidagilar:

a) iqtisodiyot va moliya vazirining birinchi oʻrinbosari I.I. Norqulov:

2024 — 2026-yillarga moʻljallangan ijtimoiy va ishlab chiqarish infratuzilmasini rivojlantirish dasturi doirasida Gidrometeorologiya xizmati agentligi uchun zarur mablagʻlar oʻz vaqtida ajratilishiga;

b) ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov:

mazkur qarorning sifatli, toʻliq va oʻz vaqtida ijro etilishi, masʼul ijrochilar tomonidan koʻrilgan choralar haqidagi hisobotlarni eshitish, aniqlangan muammo va kamchiliklarni tezkor bartaraf etishga;

Dasturda nazarda tutilgan tadbirlarning oʻz vaqtida va sifatli bajarilishini muvofiqlashtirishga;

mazkur qarorda nazarda tutilgan koʻrsatkichlarga toʻliq va oʻz vaqtida erishishni taʼminlash yuzasidan masʼul vazirlik va idoralarning birinchi navbatdagi vazifalarini belgilab berish hamda faoliyatini muvofiqlashtirib borishga;

ajratilgan mablagʻlar toʻliq oʻzlashtirilishiga hamda maqsadli sarflanishini nazorat qilishga;

v) Gidrometeorologiya xizmati agentligi direktori Sh.H. Habibullayev:

Dasturda nazarda tutilgan tadbirlarni oʻz vaqtida va sifatli bajarishga;

gidrologik xizmat koʻrsatish faoliyatiga intellektual tizimlar, axborot resurslari va boshqa dasturiy mahsulotlarni joriy etishga;

g) tegishli vazirlik va idoralar rahbarlari zimmasiga Dasturda nazarda tutilgan tadbirlarni oʻz vaqtida va sifatli bajarishga shaxsan masʼul va javobgar ekanligi belgilab qoʻyilsin.

7. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduhakimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 2-fevral,

66-son

Vazirlar Mahkamasining 2024-yil 2-fevraldagi 66-son qaroriga 1-ILOVA

DASTURI

* GM — Gidrometeorologiya markazi;

** suratda — ochilishi rejalashtirilayotgan, maxrajda — avtomatlashtirilishi rejalashtirilayotgan gidropostlar soni.

Vazirlar Mahkamasining 2024-yil 2-fevraldagi 66-son qaroriga 2-ILOVA

2024 — 2026-yillarda Ekologiya, atrof-muhitni muhofaza qilish va iqlim oʻzgarishi vazirligi huzuridagi Gidrometeorologiya xizmati agentligining amaldagi gidrologik kuzatuvlar tarmogʻi moddiy-texnik bazasini mustahkamlash va kuzatuv punktlarini jihozlash

DASTURI

Izoh. Tavsiya etilayotgan Sommer RQ — 30 gidrologik uskunasi yirik va oʻrta daryolar uchun, kichik daryo va soylarga — GR-21 M gidrometrik vertushka oʻrnatiladi. Sommer RQ-30 gidrologik qurilmasining toʻliq toʻplamiga Sommer RQ-30a ultratovushli suv sathi va oqimi tezligini oʻlchagich, shaxsiy kompyuterlar (2 dona, elektron maʼlumotlar bazasini yuritish uchun) va yagona tizimga integratsiya qilish, ishga tushirish, sozlash va kadrlar tayyorlash uchun dasturiy taʼminot kiradi.

Jizzax viloyati gidrometeorologiya boshqarmasiga qarashli Arnasoy irmogʻi — Gʻarbiy Arnasoy gidrologik posti uchun KERN suv sathi loggeri, boshqa gidrologik postlarga esa gidrometrik vertushka taklif etiladi.

Vazirlar Mahkamasining 2024-yil 2-fevraldagi 66-son qaroriga 3-ILOVA

DASTURI

Izoh. 1 koʻl gidrologik postida 2 ta kuzatuvchi shtati Gidrometeorologiya xizmati agentligining umumiy shtat birliklari doirasida rejalashtirilgan (2 ta postga — 4 kuzatuvchi).

Kuzatilgan obyektga va belgilangan kuzatuvlar hajmiga qarab, gidrologik postlar maʼlum bir turga va toifaga boʻlinadi: daryo va kanallardagi gidrologik postlar (GP) va koʻl va suv omborlaridagi gidrologik postlar (OGP).