Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizomni tasdiqlash haqida (3493-son)

29.01.2024

Oʻzbekiston Respublikasi Istiqbolli loyihalar milliy agentligi direktorining

buyrugʻi

[Oʻzbekiston Respublikasi Adliya vazirligi tomonidan 2024-yil 29-yanvarda roʻyxatdan oʻtkazildi, roʻyxat raqami 3493]

Oʻzbekiston Respublikasi Prezidentining 2017-yil 27-iyuldagi PQ-3150-son “Oʻzbekiston Respublikasi Istiqbolli loyihalar milliy agentligi faoliyatini tashkil etish toʻgʻrisida”gi va 2023-yil 2-sentabrdagi PQ-291-son “Kapital bozorini rivojlantirishning qoʻshimcha chora-tadbirlari toʻgʻrisida”gi qarorlariga muvofiq buyuraman:

1. Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Direktor D. LI

Toshkent sh.,

2023-yil 26-dekabr,

104-son

Oʻzbekiston Respublikasi Istiqbolli loyihalar milliy agentligi direktorining 2023-yil 26-dekabrdagi 104-son buyrugʻiga ILOVA

Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi

NIZOM

Mazkur Nizom kapital bozori sohasida “Tartibga solish qumdoni” maxsus huquqiy rejimida (bundan buyon matnda maxsus rejim deb yuritiladi) maxsus rejim ishtirokchilarini roʻyxatdan oʻtkazish va ularning faoliyatini monitoring qilish, maxsus rejim ishtirokchisi maqomidan mahrum qilish hamda maxsus rejim ishtirokchilari reyestrini yuritish tartibini belgilaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

arizachi — maxsus rejim ishtirokchisi sifatida roʻyxatdan oʻtish uchun murojaat qilgan Oʻzbekiston Respublikasining rezidenti boʻlgan yuridik shaxs yoki tan olingan xorijiy yurisdiksiyada roʻyxatdan oʻtgan Oʻzbekiston Respublikasining norezidenti boʻlgan yuridik shaxs;

kastodian — chet elda qimmatli qogʻozlar bozorining professional ishtirokchisi sifatida faoliyat yurituvchi moliyaviy tashkilot, shu jumladan bank boʻlib, u moliyaviy vositalar va mijozlarning pul mablagʻlarining hisobini yuritish, ularga boʻlgan huquqlarni tasdiqlash, mijozlarning moliyaviy vositalarini saqlash boʻyicha majburiyatlarni oʻz zimmasiga olish vazifasini amalga oshiradi;

maxsus rejim — kapital bozori sohasida moliyaviy vositalar, tartib va mexanizmlarni joriy etuvchi yuridik shaxslar uchun alohida tashkiliy-huquqiy shart-sharoitlar yaratish;

maxsus rejim ishtirokchisi — maxsus rejim ishtirokchisi sifatida roʻyxatdan oʻtkazilgan Oʻzbekiston Respublikasining rezidenti boʻlgan yuridik shaxs yoki tan olingan xorijiy yurisdiksiyada roʻyxatdan oʻtgan Oʻzbekiston Respublikasining norezidenti boʻlgan yuridik shaxs;

maxsus rejim ishtirokchilarining reyestri (bundan buyon matnda reyestr deb yuritiladi) — maxsus rejimda roʻyxatdan oʻtgan ishtirokchilar toʻgʻrisidagi maʼlumotlarni aks ettiruvchi ommaviy axborot resursi;

omnibus hisobvaraq — chet ellik nominal saqlovchi tomonidan Oʻzbekiston Respublikasi Qimmatli qogʻozlar markaziy depozitariysida yoki “Oʻzbekiston respublika valyuta birjasi” AJ (bundan buyon matnda “OʻzRVB” AJ deb yuritiladi) depozitariy tizimida ochilgan va barcha chet ellik benefitsiar mulkdorlar va (yoki) chet ellik nominal saqlovchilarga tegishli qimmatli qogʻozlarning soni va qiymati jamlangan holda hisobga olinadigan xorijiy nominal hisobvaraq turi;

tan olingan xorijiy yurisdiksiya — Oʻzbekiston Respublikasining qimmatli qogʻozlar bozorini tartibga solish boʻyicha vakolatli davlat organi tomonidan tan olingan xorijiy yurisdiksiya;

qimmatli qogʻozlar bozorini tartibga solish boʻyicha xorijiy vakolatli davlat organi — tan olingan xorijiy yurisdiksiyaning qimmatli qogʻozlar bozorini tartibga solish boʻyicha vakolatli davlat organi;

chet ellik mijoz — qimmatli qogʻozlar bozorini tartibga solish boʻyicha xorijiy vakolatli davlat organi tomonidan berilgan ruxsatnoma asosida mijozlarga Oʻzbekiston Respublikasi yurisdiksiyasidan tashqarida xizmat koʻrsatuvchi chet ellik nominal saqlovchining mijozi (jismoniy yoki yuridik shaxs, shu jumladan boshqa chet ellik nominal saqlovchi);

chet ellik investitsiya vositachisi — Oʻzbekiston Respublikasining “Qimmatli qogʻozlar bozori toʻgʻrisida”gi Qonunida belgilangan investitsiya vositachisining professional faoliyati bilan tenglashtiriladigan tan olingan xorijiy yurisdiksiyaning qimmatli qogʻozlar bozorida professional faoliyatni amalga oshirish huquqiga ega boʻlgan investitsiya kompaniyasi (investitsiya yoki depozitar bank, broker yoki investitsiya vositachisi), global kastodian, kastodian, bank yoki boshqa yuridik shaxs;

chet ellik benefitsiar mulkdor — Oʻzbekiston Respublikasi Qimmatli qogʻozlar markaziy depozitariysi hisobida yoki “OʻzRVB” AJ depozitariy tizimida qimmatli qogʻozlarning egasi sifatida roʻyxatga olingan yoki roʻyxatga olinmagan, biroq qimmatli qogʻozlarga toʻgʻridan-toʻgʻri yoki bilvosita egalik qilish yoki ulardan foyda olish huquqiga ega boʻlgan va chet ellik nominal saqlovchi hisobida qimmatli qogʻozlarning yakuniy egasi hisoblangan jismoniy yoki yuridik shaxs;

chet ellik nominal saqlovchi — Oʻzbekiston Respublikasi Markaziy banki bilan maslahatlashuvlar natijasiga koʻra Oʻzbekiston Respublikasi qimmatli qogʻozlar bozorini tartibga solish boʻyicha vakolatli davlat organi tomonidan tan olingan chet ellik investitsiya vositachisi, xorijiy yoki xalqaro qimmatli qogʻozlar markaziy depozitariysi boʻlib, professional faoliyatni amalga oshirish uchun jumladan quyidagi vakolatlarga ega boʻladi:

oʻzining chet ellik mijozlari (chet ellik benefitsiar mulkdorlar yoki boshqa chet ellik nominal saqlovchilar) nomidan va ularning topshirigʻiga koʻra harakat qilish;

qimmatli qogʻozlar bilan hisob-kitoblarni amalga oshirish, agar ular xorijiy yoki xalqaro qimmatli qogʻozlar markaziy depozitariysi boʻlsa;

qimmatli qogʻozlar bozorini tartibga solish boʻyicha xorijiy vakolatli davlat organi tomonidan tartibga solinadigan chet el birjalaridagi savdolar natijasiga koʻra xorijiy yoki xalqaro qimmatli qogʻozlar markaziy depozitariysi hisob-kitoblari asosida oʻzining chet ellik mijozlari uchun qimmatli qogʻozlar va pul mablagʻlari bilan hisob-kitoblarni amalga oshirish;

oʻzining chet ellik mijozlari topshirigʻiga koʻra yoki ular nomidan qimmatli qogʻozlarga boʻlgan huquqlarni oʻtkazish, roʻyxatga olish, hisobini yuritish, saqlash va (yoki) tasdiqlash;

xorijiy nominal hisobvaraq — chet ellik nominal saqlovchi tomonidan Oʻzbekiston Respublikasi Qimmatli qogʻozlar markaziy depozitariysida yoki “OʻzRVB” AJ depozitariy tizimida bevosita bitta chet ellik benefitsiar mulkdor nomiga toʻgʻridan-toʻgʻri individual hisobvaraq yoki omnibus hisobvaraq shaklida ochiladigan depo hisobvaragʻining turi;

toʻlovga nisbatan oʻtkazish (delivery versus payment) — qimmatli qogʻozlarni oʻtkazish tizimi va pul oʻtkazmasini qimmatli qogʻozlarni oʻtkazish tegishli toʻlov bilan bir vaqtda amalga oshirilishini taʼminlaydigan tarzda bogʻlaydigan qimmatli qogʻozlar boʻyicha hisob-kitob mexanizmi;

toʻgʻridan-toʻgʻri individual hisobvaraq — chet ellik nominal saqlovchi tomonidan Oʻzbekiston Respublikasi Qimmatli qogʻozlar markaziy depozitariysida yoki “OʻzRVB” AJ depozitariy tizimida bevosita chet ellik benefitsiar mulkdor nomidan va uning nomiga ochilgan depo hisobvaragʻi;

asoslantirilgan mulohaza — qonunchilikda belgilangan talablarga qoʻshimcha ravishda qimmatli qogʻozlar bozorini tartibga solish boʻyicha vakolatli davlat organi tomonidan qoʻllaniladigan, koʻrib chiqilayotgan masalaning haqiqiy mazmuni rasmiy mazmunidan ustuvorligini nazarda tutuvchi professional baholash. Asoslantirilgan mulohaza vakolatli organ tomonidan qimmatli qogʻozlar bozori professional ishtirokchilarining faoliyati ustidan nazoratni amalga oshirish doirasida olingan axborotga, jismoniy va yuridik shaxslardan, xalqaro tashkilotlardan, davlat organlaridan, shu jumladan chet el nazorat organlari hamda tashkilotlaridan, boshqa ochiq manbalardan olingan va asoslantirilgan mulohazani shakllantirish uchun muhim boʻlgan boshqa axborotga asoslanadi.

11. Agar ushbu Nizomda boshqacha qoida nazarda tutilgan boʻlmasa, maxsus rejim doirasida Oʻzbekiston Respublikasining qimmatli qogʻozlar bozori toʻgʻrisidagi amaldagi qonunchiligi normalari va qoidalari qoʻllaniladi.

2. Maxsus rejim ishtirokchilarini roʻyxatdan oʻtkazish qimmatli qogʻozlar bozorini tartibga solish boʻyicha vakolatli davlat organi — Oʻzbekiston Respublikasi Istiqbolli loyihalar milliy agentligi (bundan buyon matnda Agentlik deb yuritiladi) tomonidan mazkur Nizomning 1-ilovasida keltirilgan sxemaga muvofiq amalga oshiriladi.

3. Agentlikning maxsus rejim ishtirokchisi sifatida roʻyxatdan oʻtkazish uchun taqdim etilgan arizalarni qabul qilish va koʻrib chiqish boʻyicha ishchi organi funksiyalari Agentlikning Kapital bozorini rivojlantirish boshqarmasi (bundan buyon matnda ishchi organ deb yuritiladi) tomonidan amalga oshiriladi.

4. Ishchi organ:

arizachining maxsus rejim ishtirokchisi sifatida roʻyxatdan oʻtkazish toʻgʻrisidagi arizalarini qabul qiladi va koʻrib chiqadi;

arizachilar tomonidan taqdim etilgan hujjatlarni koʻrib chiqish natijalari boʻyicha Agentlik rahbariga (oʻrinbosariga) maxsus rejim ishtirokchisi sifatida roʻyxatga olish yoki roʻyxatga olishni rad etish toʻgʻrisida xulosa beradi;

maxsus rejim ishtirokchilarining reyestrini yuritadi;

maxsus rejim ishtirokchilarini tashkiliy-huquqiy va maslahat jihatdan qoʻllab-quvvatlaydi.

Agentlikning rahbariga (oʻrinbosariga) maxsus rejim ishtirokchisi maqomidan mahrum qilish toʻgʻrisida takliflar kiritadi.

5. Arizachilar tomonidan taqdim etilgan ariza va hujjatlarni koʻrib chiqish hamda maxsus rejim ishtirokchisini roʻyxatdan oʻtkazish uchun yigʻim undirilmaydi.

51. “Qimmatli qogʻozlar markaziy depozitariysi” AJ (bundan keyin Markaziy depozitariy deb yuritiladi) va “Toshkent” Respublika fond birjasi” AJ Oʻzbekiston Respublikasi Prezidentining 2025-yil 18-dekabrdagi PF-254-son “Kapital bozorida investitsiya muhitini yaxshilashga doir qoʻshimcha chora-tadbirlar toʻgʻrisida”gi Farmoni va 2023-yil 2-sentabrdagi PQ-291-son “Kapital bozorini rivojlantirishning qoʻshimcha chora-tadbirlari toʻgʻrisida”gi qaroriga muvofiq maxsus rejim doirasida harakatlarni (operatsiyalarni) amalga oshirish uchun maxsus rejim ishtirokchisi sifatida roʻyxatdan oʻtishi talab etilmaydi.

2-bob. Maxsus rejim ishtirokchilarini roʻyxatdan oʻtkazish talablari va shartlari

6. Chet ellik ishtirokchilar maxsus rejim ishtirokchisi sifatida roʻyxatdan oʻtishga ariza berish uchun ushbu Nizomning 2-ilovasida keltirilgan tan olingan xorijiy yurisdiksiyalarda roʻyxatdan oʻtgan boʻlishi lozim.

7. Oʻzbekiston Respublikasi hududida maxsus rejim doirasida quyidagilar taqiqlanadi:

Oʻzbekiston Respublikasi vakolatli davlat organining yoki tan olingan xorijiy yurisdiksiyalar vakolatli organining tegishli litsenziyasi yoki ruxsat etish xususiyatiga ega hujjati mavjud boʻlmagan investitsiya vositachilari va chet ellik nominal saqlovchi faoliyatni amalga oshirish;

Oʻzbekiston Respublikasi qonunchilik hujjatlarida nazarda tutilgan investitsiya vositachisi va chet ellik nominal saqlovchi faoliyatidan tashqari boshqa faoliyatni amalga oshirish.

8. Maxsus rejim ishtirokchilarining egalari va rahbarlari (direktorlari va oʻrinbosarlari) terrorchilik faoliyatida yoki ommaviy qirgʻin qurolini tarqatishda ishtirok etgan yoki ishtirok etishda gumon qilinayotgan shaxslar boʻlishi mumkin emas.

9. Maxsus rejim doirasida:

chet ellik investitsiya vositachilari Oʻzbekiston Respublikasi qimmatli qogʻozlar bozorida investitsiya vositachisi faoliyatini amalga oshirishi va depo hisobvaraqlarini ochishi mumkin;

chet ellik nominal saqlovchilar qimmatli qogʻozlar boʻyicha hisobvaraqlar ochishi va Oʻzbekiston Respublikasida oʻz faoliyatini toʻgʻridan toʻgʻri yoki agent orqali amalga oshirishi mumkin;

chet ellik nominal saqlovchilar, jumladan kastodian banklarga Oʻzbekiston Respublikasi Markaziy bankida xorijiy va milliy valyutada hisobvaraqlar ochishga, shuningdek Qimmatli qogʻozlar markaziy depozitariysida depo hisobvaraqlari ochishga ruxsat beriladi;

depozitar bank (Oʻzbekiston Respublikasi Prezidentining qarorlari asosida kiritilgan xalqaro bozorlarda davlat aksiya paketlarini IPO/SPO orqali sotishda ishtirok etayotgan rezident-emitentlarning aksiyalariga nisbatan huquqlarni tasdiqlovchi global depozitar tilxatlarning xorijiy emitenti) (bundan buyon matnda depozitar bank deb yuritiladi) maxsus rejim ishtirokchisi sifatida roʻyxatdan oʻtgan kastodian maʼlumotlari asosida oʻz nomidan kastodianda va Qimmatli qogʻozlar markaziy depozitariysida rezident-emitentlarning aksiyalari mavjudligini tasdiqlovchi hujjatni berishga huquqiga ega;

Oʻzbekiston Respublikasi hududida chiqarilgan qimmatli qogʻozlar — bazaviy aktiv asosidagi depozitar tilxatlar dasturi (chiqarish, konvertatsiya qilish va bekor qilish) doirasida qimmatli qogʻozlarni toʻlovsiz oʻtkazish (Free of Payment Transfer) Qimmatli qogʻozlar markaziy depozitariysi tomonidan egalik huquqi oʻzgarishi (Change of Beneficiary Owner) haqidagi topshiriqnomalar asosida amalga oshiriladi va qonunchilikda belgilangan tartibda bitim sifatida rasmiylashtirilishiga yoʻl qoʻyilmaydi;

uyushgan savdolarda qimmatli qogʻozlarni sotuvchi (sotib oluvchi) norezident yuridik shaxslarga Oʻzbekiston Respublikasi tijorat banklarida milliy valyutada hisobvaraqlar ochishga ruxsat beriladi;

korporativ obligatsiyalarning chiqarilishi va muomalasi hamda ular boʻyicha hisob-kitoblarni amalga oshirishda obligatsiyalarning qiymatini chet el valyutasida belgilash va mazkur valyutada toʻlashga ruxsat beriladi. Bunda Oʻzbekiston Respublikasi rezidentlari boʻlgan emitentlarning korporativ obligatsiyalarini chiqarish, joylashtirish va ularning muomalasi tartibi Agentlik tomonidan belgilanadi;

chet ellik nominal saqlovchilar oʻzlarining Oʻzbekiston Respublikasida ochilgan hisobvaraqlaridagi hisobga olingan qimmatli qogʻozlar yoki pul mablagʻlarining benefitsiar mulkdori hisoblanmaydi;

qimmatli qogʻozlarning chet el nominal hisobvaragʻidan (yoki chet el nominal hisobvaragʻiga) benefitsiar mulkdor oʻzgarmagan holda “qimmatli qogʻozlarni toʻlovsiz yetkazib berish” (Free of Payment transfer of securities) orqali oʻtkazilishi ushbu qimmatli qogʻozlarni realizatsiya qilish (sotish) hisoblanmaydi va tomonlarning hech biri, shu jumladan chet ellik nominal saqlovchi uchun soliq majburiyatini keltirib chiqarmaydi;

chet ellik nominal saqlovchilar Oʻzbekiston Respublikasida oʻz faoliyatini alohida litsenziya yoki ruxsat etish xususiyatiga ega hujjat olmasdan, filial yoki yangi yuridik shaxs tashkil etmasdan yoxud mahalliy yuridik shaxsning ustav kapitalida ishtirok etmasdan vakolatli davlat organi tomonidan belgilangan tartibda amalga oshiradi;

chet ellik investitsiya vositachilarining xodimlariga tan olingan xorijiy yurisdiksiyalarda berilgan qimmatli qogʻozlar bilan ishlash imkonini beruvchi malaka sertifikatlari mazkur xodimlarga Oʻzbekiston Respublikasining qimmatli qogʻozlar bozorini tartibga solish boʻyicha vakolatli davlat organi tomonidan tasdiqlanadigan tartibga muvofiq alohida qimmatli qogʻozlar bozori mutaxassisining malaka attestatini olmagan holda Oʻzbekiston Respublikasida qimmatli qogʻozlar bilan operatsiyalarni amalga oshirish huquqini beradi;

maxsus rejimning chet ellik ishtirokchilari tomonidan, Oʻzbekiston Respublikasi rezidentlari boʻlgan yuridik shaxslarga, shu jumladan investitsiya fondlariga ular chiqarilgan va ularga tegishli boʻlgan qimmatli qogʻozlarga nisbatan kastodial xizmatlar va nominal saqlash xizmatlari koʻrsatilishiga yoʻl qoʻyiladi;

ushbu bandning beshinchi xatboshida koʻrsatilgan qimmatli qogʻozlarga nisbatan depozitar bank Qimmatli qogʻozlar markaziy depozitariysida qimmatli qogʻozlar hisobvaraqlarini ochishga, shuningdek qimmatli qogʻozlarni xorijiy nominal hisobvaraqdan (yoki xorijiy nominal hisobvaraqqa) benefitsiar egasini almashtirmasdan “qimmatli qogʻozlarni toʻlovsiz yetkazib berish” (Free of Payment transfer of securities) yoʻli bilan oʻtkazishga haqli;

Qimmatli qogʻozlarning chet ellik nominal saqlovchisi va depozitar bank oʻzining nominal saqlashida boʻlgan aksiyalar bilan berilgan aksiyadorning barcha huquqlarini oʻz mijozlari — chet ellik benefitsiar egalari va (yoki) qimmatli qogʻozlarning boshqa chet ellik nominal saqlovchilari nomidan va ularning manfaatlarini koʻzlab, oʻz mijozlarining topshirigʻiga binoan, bunday chet ellik benefitsiar egalari va (yoki) qimmatli qogʻozlarning boshqa chet ellik nominal saqlovchilari nomidan vakillik qilish huquqini tasdiqlovchi hech qanday ishonchnomalarsiz amalga oshirishga haqli. Agar chet ellik nominal saqlovchi yoki depozitar bankda bir emitentning bir turdagi aksiyalari bir nechta mijoz uchun nominal saqlanayotgan boʻlsa, qimmatli qogʻozlarning chet ellik nominal saqlovchisi yoki depozitar bank aksiyadorning huquqlarini bunday shaxslardan olingan alohida topshiriqlar asosida har bir mijozga tegishli aksiyalar soniga mutanosib ravishda amalga oshiradi. Bunda qimmatli qogʻozlarning chet ellik nominal saqlovchisi yoki depozitar banki, agar nominal saqlov shartnomasi shartlarida boshqacha qoida nazarda tutilmagan boʻlsa, kun tartibidagi ayni bir masala boʻyicha bunday shaxslarning har biriga tegishli aksiyalar soniga mutanosib ravishda alohida-alohida ovoz berishi mumkin;

emitent-aksiyadorlik jamiyati ustav fondini keyinchalik kamaytirish yoki aksiyalarni qayta sotish maqsadida, hisob-kitoblar va ularning yuritilishi maxsus rejim doirasida faoliyat yuritishga ruxsat etilgan kastodian orqali amalga oshirilishi sharti bilan, depozitar tilxatlar boʻyicha xorijiy benefitsiar mulkdorlarning manfaatlarida bunday aksiyalarga boʻlgan huquqlarni hisobga oluvchi xorijiy nominal saqlovchi yoki depozitar bankdan oʻz aksiyalarini toʻgʻridan toʻgʻri sotib olishga haqli. Agar amallar maxsus rejim ishtirokchisi sifatida roʻyxatga olingan kastodian orqali bajarilsa, ushbu operatsiyani amalga oshirish uchun emitent va depozitar bankning maxsus rejim ishtirokchisi sifatida roʻyxatdan oʻtishi talab qilinmaydi;

korporativ nizolarga taalluqli boʻlgan hamda emitentning qimmatli qogʻozlarini depozitar tilxatlardan foydalangan holda xorijiy bozorlarda joylashtirish va ularning muomalada boʻlishidan, shuningdek emitent, kastodian, chet ellik nominal saqlovchi, depozitar bank va depozitar tilxatlar egalarining huquq va majburiyatlarini bajarishdan kelib chiqadigan yoki emitentning boshqaruv organlari qarorlari yuzasidan nizolashish bilan bogʻliq nizolar taraflarning kelishuviga koʻra xalqaro tijorat arbitrajiga koʻrib chiqish uchun topshirilishi mumkin;

xorijiy emitentlarning qimmatli qogʻozlari muomalasini fond birjalarining tegishli savdo maydonchasi orqali yoki Oʻzbekiston Respublikasi hududida oʻz faoliyatini amalga oshirish uchun litsenziya olgan investitsiya vositachilarining elektron platformasi orqali Oʻzbekiston Respublikasining vakolatli davlat organi tomonidan belgilangan tartibda tashkil etishga ruxsat beriladi.

91. Fond birjasining savdo maydonchalariga va investitsiya vositachisining elektron platformasiga qoʻyiladigan talablar Agentlik tomonidan belgilanadi.

3-bob. Arizani taqdim etish va koʻrib chiqish

10. Maxsus rejim ishtirokchisi sifatida roʻyxatdan oʻtish uchun arizachi mazkur Nizomning 3-ilovasiga muvofiq shakldagi ariza hamda quyidagi maʼlumotlar va hujjatlarni Agentlikka taqdim etadi:

mazkur Nizomning 4-ilovasiga muvofiq shakldagi anketa;

arizachining ustavi va boshqa taʼsis hujjatlarining nusxasi;

litsenziyaning yoki ruxsat etish xususiyatiga ega tegishli hujjatning nusxasi, shuningdek mavjud boʻlgan taqdirda litsenziyalar yoki ruxsat etish xususiyatiga ega hujjatlar reyestrining tegishli rasmiy manbasiga havola;

mazkur Nizomning 5-ilovasiga muvofiq arizachining rahbariyati (rahbar, uning oʻrinbosarlari) va taʼsischilari toʻgʻrisidagi maʼlumotlar.

Ariza va hujjatlar arizachi tomonidan Agentlikka qogʻoz yoki Agentlikning elektron pochta manziliga elektron shaklda taqdim etiladi.

11. Mazkur Nizomning 10-bandida nazarda tutilgan hujjatlar arizachining rahbari tomonidan tasdiqlanishi (imzolanishi) kerak.

Elektron shaklda taqdim etilayotgan maʼlumotlar yuqori sifatda va “PDF”, “PNG” yoki “JPEG” formatlarda boʻlishi lozim.

12. Agentlik ariza kelib tushgan kundan boshlab yigirma ish kuni ichida arizachini maxsus rejim ishtirokchisi sifatida roʻyxatdan oʻtkazish yoki roʻyxatdan oʻtkazishni rad etish haqida qaror qabul qiladi.

Ariza va taqdim etilgan hujjatlarni tegishli mutaxassislarni jalb qilgan holda qoʻshimcha ravishda tekshirish talab qilingan taqdirda, ishchi organning taklifiga koʻra arizani koʻrib chiqish muddati Agentlik rahbari (oʻrinbosari) tomonidan oʻn ish kuniga uzaytirilishi mumkin. Bu haqda arizachi shu kunning oʻzida xabardor qilinadi.

13. Ishchi organ ariza va taqdim etilgan hujjatlarni oʻn besh ish kuni, qoʻshimcha oʻrganish talab etilganda, yigirma besh ish kuni ichida koʻrib chiqadi hamda koʻrib chiqish natijasi boʻyicha xulosani Agentlik rahbari (oʻrinbosari)ga taqdim etadi.

14. Ishchi organ tomonidan xulosa kiritilgan kundan boshlab besh ish kuni ichida Agentlik rahbari (oʻrinbosari) tomonidan arizachini maxsus rejim ishtirokchisi sifatida roʻyxatdan oʻtkazish yoki roʻyxatdan oʻtkazishni rad etish haqida qaror qabul qilinadi.

15. Arizachini quyidagi hollarda maxsus rejim ishtirokchisi sifatida roʻyxatdan oʻtkazish rad etiladi:

arizachi mazkur Nizomning 7 va 8-bandlarida koʻrsatilgan talablarga muvofiq boʻlmaganda;

taqdim etilgan hujjatlarda notoʻgʻri yoki buzib koʻrsatilgan maʼlumotlar mavjud boʻlganda;

arizachining mansabdor shaxslari va taʼsischilarining iqtisodiy jinoyatlarda, shuningdek jinoiy faoliyatdan olingan daromadlarni legallashtirish, terrorizm va ommaviy qirgʻin qurolini tarqatish bilan bogʻliq jinoyatlarda, shuningdek uyushgan jinoyatchilik, noqonuniy giyohvand moddalar savdosi, korrupsiya va axborot texnologiyalari sohasidagi jinoyatlarda ishtirok etganligi yoki ishtirok etishda gumonlanayotganligi haqida maʼlumotlar mavjudligi;

Oʻzbekiston Respublikasi rezidentlari boʻlgan ariza beruvchilar tomonidan maxsus rejim ishtirokchisi sifatida roʻyxatdan oʻtkazish toʻgʻrisida ariza berilgan sanadan oldingi oxirgi 2 yil mobaynida qimmatli qogʻozlar bozori sohasidagi qonunchilik hujjatlari buzilganligi;

Agentlikning asoslantirilgan mulohazasi.

16. Maxsus rejim ishtirokchisi sifatida roʻyxatdan oʻtkazish rad etilgan taqdirda, bu haqda arizachiga ishchi organ tomonidan rad etish asoslari koʻrsatilgan holda bir ish kuni ichida xabarnoma yuboriladi.

17. Arizachi rad etish asoslarini bartaraf etgan holda xabarnomani olgan kundan boshlab oʻttiz kun ichida takroran ariza berishi mumkin.

Takroran berilgan ariza boʻyicha oʻn ish kuni ichida arizachini maxsus rejim ishtirokchisi sifatida roʻyxatdan oʻtkazish yoki roʻyxatdan oʻtkazishni rad etish haqida qaror qabul qilinadi.

Mazkur bandning birinchi xatboshisida koʻrsatilgan muddat oʻtganidan soʻng takroran taqdim etilgan arizalar ushbu Nizomda belgilangan tartibda umumiy asoslarda koʻrib chiqiladi.

18. Maxsus rejim ishtirokchisi sifatida roʻyxatdan oʻtkazish toʻgʻrisida qaror qabul qilingan taqdirda, ishchi organ bir ish kuni ichida tegishli maʼlumotlarni reyestrga kiritadi va arizachiga xabarnoma yuboradi.

Ishchi organ roʻyxatdan oʻtkazish toʻgʻrisidagi qaror qabul qilingan kundan boshlab uch ish kuni ichida arizachini mazkur qaror bilan yozma ravishda tanishtiradi.

4-bob. Maxsus rejim ishtirokchisining faoliyatini monitoring qilish va ishtirokchi maqomidan mahrum qilish

20. Ishchi organ maxsus rejim ishtirokchilarining faoliyati hamda ular tomonidan maxsus rejim talablari va shartlariga rioya etilishi ustidan doimiy monitoringni amalga oshiradi.

21. Maxsus rejim ishtirokchilari har oyda Agentlik tomonidan tasdiqlangan shaklga muvofiq keyingi oyning beshinchi kunigacha Agentlikka oʻz faoliyati toʻgʻrisida hisobot taqdim etadilar.

22. Maxsus rejim ishtirokchisi maqomidan mahrum qilish uchun quyidagilar asos hisoblanadi:

maxsus rejim ishtirokchisining maxsus rejim ishtirokchisi maqomidan voz kechish toʻgʻrisidagi arizasi;

maxsus rejim ishtirokchisi sifatida roʻyxatdan oʻtkazish uchun taqdim etilgan hujjatlar boʻyicha berilgan hisobotlarda yolgʻon maʼlumotlar berilganligi;

maxsus rejim ishtirokchisining toʻlovga qobiliyatsiz deb topilishi, shuningdek uning litsenziyasi yoki tegishli ruxsat etish xususiyatiga ega hujjatining bekor qilinishi;

Oʻzbekiston Respublikasi va xorijiy davlatlarning huquqni muhofaza qiluvchi va boshqa vakolatli organlaridan arizachining mansabdor shaxslari va taʼsischilari iqtisodiy jinoyatlarda, shuningdek jinoiy faoliyatdan olingan daromadlarni legallashtirish, terrorizm, ommaviy qirgʻin qurolini tarqatish va ularni moliyalashtirish, uyushgan jinoyatchilik, giyohvand moddalarning noqonuniy muomalasi, korrupsiya hamda axborot texnologiyalari sohasidagi jinoyatlarda ishtirok etganligi yoki ishtirok etishda gumon qilinayotganligi toʻgʻrisida maʼlumotlar olinishi;

Agentlikka oʻz faoliyati toʻgʻrisidagi hisobotlarni ketma-ket ikki oy davomida taqdim etmaslik;

ushbu Nizomning 2-bobida belgilangan talab va shartlarning buzilishi;

Agentlikning asoslantirilgan mulohazasi.

23. Mazkur Nizomning 22-bandida koʻrsatilgan holatlar aniqlangan kundan boshlab uch ish kuni ichida Agentlik tomonidan maxsus rejim ishtirokchisini maqomidan mahrum qilish toʻgʻrisida qaror qabul qilinadi.

24. Ishchi organ maxsus rejim ishtirokchisi maqomidan mahrum qilish toʻgʻrisida qaror qabul qilingan kundan boshlab bir ish kuni ichida reyestrga tegishli maʼlumotlarni kiritadi hamda bu haqda tegishli yuridik shaxsni xabardor qiladi.

25. Chet ellik investitsiya vositachisi yoki chet ellik nominal saqlovchi maxsus rejim ishtirokchisi maqomidan mahrum qilinganda, ularning depo hisobvaraqlarini boshqa chet ellik investitsiya vositachisi yoki chet ellik nominal saqlovchiga oʻtkazish tartibi ular oʻrtasidagi kelishuv boʻyicha tartibga solinadi.

5-bob. Maxsus rejim ishtirokchilarining reyestrini yuritish

26. Reyestr ishchi organ tomonidan yuritiladi va unda quyidagilar koʻrsatiladi:

maxsus rejim ishtirokchisining nomi, tashkiliy-huquqiy shakli, joylashgan yeri (pochta manzili), elektron pochta manzili, telefon raqami;

maxsus rejim ishtirokchisiga qimmatli qogʻozlar bozorini tartibga solish boʻyicha xorijiy vakolatli davlat organi tomonidan berilgan litsenziya yoki ruxsat etish xususiyatiga ega hujjatlar toʻgʻrisidagi maʼlumotlar;

maxsus rejim ishtirokchisining roʻyxatdan oʻtkazish raqami va sanasi;

maxsus rejim ishtirokchisini maxsus rejim ishtirokchisi maqomidan mahrum qilish asoslari va sanasi.

27. Reyestrda mavjud boʻlgan maʼlumotlar Agentlikning rasmiy veb-saytiga joylashtiriladi.

6-bob. Yakuniy qoidalar

28. Manfaatdor shaxslar Agentlik tomonidan qabul qilingan qarorlar ustidan sudga belgilangan tartibda shikoyat qilishi mumkin.

29. Mazkur Nizom talablarining buzilishida aybdor boʻlgan shaxslar qonunchilikka muvofiq javobgar boʻladilar.

Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizomga 1-ILOVA

Kapital bozori sohasida “Tartibga solish qumdoni” maxsus huquqiy rejimi ishtirokchilarni roʻyxatdan oʻtkazish

SXEMASI

Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizomga 2-ILOVA

Kapital bozori sohasida “Tartibga solish qumdoni” maxsus huquqiy rejimi doirasida chet ellik ishtirokchilarning tan olingan xorijiy yurisdiksiyalar

ROʻYXATI

Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizomga 3-ILOVA

Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizomga 4-ILOVA

Kapital bozori sohasida “Tartibga solish qumdoni” maxsus huquqiy rejimi ishtirokchisi sifatida roʻyxatdan oʻtkazish uchun arizachining

ANKETASI

1-bob. Arizachi haqidagi maʼlumotlar

Yuridik shaxsning (arizachining) nomi Joylashgan joyi (manzili) Telefon raqami Elektron pochta manzili Rasmiy veb-sayti Yuridik shaxs (arizachi) roʻyxatdan oʻtgan davlat Doimiy faoliyat yuritish joyi Yuridik shaxsning (arizachining) davlat roʻyxatidan oʻtgan sanasi (kun/oy/yil) va raqami

2-bob. Arizachining faoliyati bilan bogʻliq maʼlumotlar

1. Arizachi toʻgʻrisidagi maʼlumotlar, shu jumladan tashkilot tuzilmasi, ilgari erishilgan yutuqlar va faoliyat profili 2. Arizachining yirik aksiyadorlari (aksiyalarining/ulushlarining kamida 25 foiziga egalik qiluvchi) va ijro organi/boshqaruv aʼzolarining (boshqaruv raisi, bosh direktor, direktorlar) sohadagi bilim va tajriba toʻgʻrisidagi maʼlumotlar 3. Arizachining moliyaviy holati toʻgʻrisidagi maʼlumotlar (oxirgi moliyaviy yil holatiga arizachining moliyaviy hisobotning xalqaro standartlariga muvofiq auditorlik tekshiruvidan oʻtkazilgan yillik moliyaviy hisoboti boʻyicha) 4. Arizachining roʻyxatdan oʻtgan tan olingan xorijiy yurisdiksiyadagi litsenziya yoki ruxsat etish xususiyatiga ega hujjatlari toʻgʻrisidagi maʼlumotlar

3-bob. Kapital bozori sohasida “Tartibga solish qumdoni” maxsus rejimi doirasida amalga oshirilishi moʻljallangan faoliyat haqidagi maʼlumotlar

1. Amalga oshirilishi moʻljallangan faoliyat haqidagi maʼlumotlar, shu jumladan, arizachining mazkur faoliyatni amalga oshirish boʻyicha boshqa bozorlardagi tajribasi va kapital bozorining rivojlanishiga yordam berishi toʻgʻrisidagi obyektiv tahlil 2. Amalga oshirilishi moʻljallangan faoliyat boʻyicha xizmatlar koʻrsatish tartibini koʻrsatib bering: arizachi, uning mijozlari va biznes sheriklari (agar mavjud boʻlsa) oʻrtasidagi oʻzaro munosabatlar va pul aylanmalari; arizachi mijozlarining mablagʻlari va qimmatli qogʻozlari joylashtiriladigan va saqlanadigan tashkilot. 3. Arizachi tomonidan faoliyatni amalga oshirish uchun foydalaniladigan texnik tizimlar va yechimlari 4. Amalga oshirilishi moʻljallangan faoliyat boshlashning taxminiy sanasi

4-bob. Deklaratsiyalash

1. Arizachi: har qanday jinoyat uchun tergovda qatnashgan, ayblanayotgan, sudlangan yoxud har qanday jinoiy taʼqib ostida boʻlganmi yoki hozirda mavjudmi yoxud soʻnggi 5 yil ichida tan olingan xorijiy yurisdiksiyadagi biron bir tartibga soluvchi yoki litsenziyalovchi organ tomonidan intizomiy javobgarlikka tortilganmi?  Xa  Yoʻq 2. Arizachi hozirda yoki oldin: bankrot, faoliyati tugatilgan yoki sud nazorati ostida boʻlganmi; unga nisbatan bankrotlik, likvidatsiya yoki sud nazorati tartib-taomillari qoʻllanilmoqdami?  Xa  Yoʻq (Yuqorida koʻrsatib oʻtilgan savollarga ijobiy javob berilgan taqdirda, quyida batafsil maʼlumotlar koʻrsatilishi lozim)

 Mazkur anketa va unga ilova qilingan hujjatlardagi maʼlumotlarning haqiqiyligi va toʻgʻriligini hamda notoʻgʻri yoki buzib koʻrsatilgan maʼlumotlar berilmaganligini tasdiqlayman.

 Arizam qanoatlantilganidan keyin taqdim etgan hujjatlarimda notoʻgʻri yoki buzib koʻrsatilgan maʼlumotlar aniqlangan taqdirda, maxsus rejim ishtirokchisi maqomidan mahrum etilishim mumkinligini tushunaman.

Vakolatli shaxsning ismi Lavozimi Telefon raqami Email Vakolatli shaxsning imzosi Sana: Qoʻshimcha aloqa uchun shaxs (agar yuqoridagidan farq qilsa) Lavozimi Telefon raqami Email

Kapital bozori sohasida “Tartibga solish qumdoni” maxsus huquqiy rejimini taqdim qilish tartibi toʻgʻrisidagi nizomga 5-ILOVA

Yuridik shaxsning (arizachining) rahbariyati (rahbari va oʻrinbosarlari) va taʼsischilari haqidagi

MAʼLUMOT

1-jadval T/r Yuridik shaxsning rahbariyati (rahbari va oʻrinbosarlari) Lavozimi Familiyasi, ismi Fuqaroligi Shaxsini tasdiqlovchi hujjat Hujjat turi Seriya va raqami Berilgan vaqti va amal qilish muddati Kim tomonidan berilgan 1 2 3 4 5 6 7

2-jadval T/r Yuridik shaxsning taʼsischilari Familiyasi, ismi yoki yuridik shaxs nomi Ulush miqdori Fuqaroligi (jismoniy shaxslar uchun) yoki davlat roʻyxatidan oʻtgan joyi (yuridik shaxslar uchun) Shaxsini tasdiqlovchi hujjat yoki davlat roʻyxatdan oʻtkazilganligi haqidagi guvohnoma Hujjat turi Seriya va raqami Berilgan vaqti va amal qilish muddati Kim tomonidan berilgan 1 2 3 4 5 6 7