Avtomobil transportida yoʻlovchi tashish faoliyati bilan shugʻullanuvchi tashuvchilar reytingini hisoblash va yuritish tartibini joriy etish chora-tadbirlari toʻgʻrisida (45-son)

22.01.2024

Oʻzbekiston Respublikasi Vazirlar Mahkamasining

qarori

Avtomobil transportida yoʻlovchilar tashish sohasida koʻrsatilayotgan xizmatlarning sifat darajasini oshirish, sogʻlom raqobat muhitini shakllantirish va insofli tashuvchilarni ragʻbatlantirish hamda Oʻzbekiston Respublikasi Prezidentining “Maʼmuriy islohotlar doirasida transport sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 14-iyundagi PF-94-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Maʼmuriy islohotlar doirasida transport sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 14-iyundagi PF-94-son Farmoniga muvofiq vazirlik va idoralar tomonidan axborot xavfsizligi talablariga rioya etgan holda, davlat xizmatlarini koʻrsatish uchun zarur boʻlgan transport sohasiga oid elektron maʼlumotlar almashinuvini tashkil etish maqsadida idoraviy axborot tizimlari va maʼlumotlar bazasi Oʻzbekiston Respublikasi Transport vazirligining axborot tizimlari bilan integratsiya qilinishi belgilanganligi maʼlumot uchun qabul qilinsin.

2. Oʻzbekiston Respublikasi Transport vazirligining 2024-yil 1-fevraldan 2024-yil 31-dekabrga qadar Avtomobil transportida yoʻlovchi tashish faoliyati bilan shugʻullanuvchi tashuvchilar reytingini yuritish tizimini joriy etish boʻyicha tajriba-sinov loyihasini amalga oshirish toʻgʻrisidagi taklifiga rozilik berilsin.

3. Oʻzbekiston Respublikasi Transport vazirligi 2024-yil 1-dekabrga qadar mazkur qarorga asosan amalga oshirilgan tajriba-sinov loyihasi natijalaridan kelib chiqib, ijobiy va salbiy holatlarni aniqlash hamda insofli tashuvchilarni ragʻbatlantirishni inobatga olgan holda, Avtomobil transportida yoʻlovchi tashish faoliyati bilan shugʻullanuvchi tashuvchilar reytingini yuritish tizimini takomillashtirish yuzasidan Vazirlar Mahkamasiga taklif kiritsin.

4. Quyidagilarni nazarda tutuvchi Avtomobil transportida yoʻlovchi tashish faoliyati bilan shugʻullanuvchi tashuvchilar reytingini hisoblash va yuritish tartibi toʻgʻrisidagi vaqtinchalik nizom ilovaga muvofiq tasdiqlansin:

reytingni hisoblashga oid maʼlumotlar bazalarini shakllantirish va yuritish tartibi;

reyting natijalarini hisoblash va eʼlon qilish tartibi;

tashuvchilarni reytingga kiritish va undan chiqarish asoslari.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va transport vaziri I.R. Maxkamov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 22-yanvar,

45-son

Vazirlar Mahkamasining 2024-yil 22-yanvardagi 45-son qaroriga ILOVA

Avtomobil transportida yoʻlovchi tashish faoliyati bilan shugʻullanuvchi tashuvchilar reytingini hisoblash va yuritish tartibi toʻgʻrisida

VAQTINCHALIK NIZOM

1-bob. Umumiy qoidalar

1. Ushbu Nizom avtomobil transportida yoʻlovchilarni muntazam yoʻnalishlarda tashish faoliyati bilan shugʻullanuvchi tashuvchilar reytingini hisoblashga oid maʼlumotlar bazasini shakllantirish va yuritish, shuningdek, reyting natijalarini hisoblash hamda eʼlon qilish tartibini belgilaydi.

2. Ushbu Nizomning amal qilishi Oʻzbekiston Respublikasi hududida roʻyxatdan oʻtgan va asosiy faoliyat turi jamoat transportida yoʻlovchilarni muntazam yoʻnalishlarda tashish xizmatlarini koʻrsatishdan iborat boʻlgan tegishli litsenziyaga ega yuridik shaxslarga (keyingi oʻrinlarda — tashuvchilar) nisbatan tatbiq etiladi.

3. Tashuvchilar reytingi (keyingi oʻrinlarda — reyting) Oʻzbekiston Respublikasi Transport vazirligi tomonidan tegishli vazirlik va idoralarning axborot tizimlaridan olingan maʼlumotlar asosida “Uztrans” yagona interaktiv axborot tizimida shakllantiriladi.

4. Quyidagilar tashuvchilar reytingini yuritish borasidagi asosiy vazifalar hisoblanadi:

yoʻlovchi tashish sohasida ishonchli, xavfsiz va sifatli xizmat koʻrsatayotgan tashuvchilar toʻgʻrisidagi maʼlumotlarning ochiqligini taʼminlash;

sohada yashirin iqtisodiyot ulushini kamaytirish va koʻrsatilayotgan xizmatlar shaffofligini oshirish;

tashuvchilar oʻrtasida sogʻlom raqobat muhitini shakllantirish va xizmatlar sifatini oshirish.

2-bob. Tashuvchilar reytingini shakllantirish va yuritish tartibi

5. Tashuvchilar reytingi mazkur Nizomga 1-ilovadagi sxemaga muvofiq shakllantiriladi va yuritiladi.

6. Quyidagi vazirlik va idoralar har chorak yakuni bilan keyingi oyning 5-sanasiga qadar maʼlumotlarni Oʻzbekiston Respublikasi Transport vazirligining “Uztrans” yagona interaktiv axborot tizimiga taqdim etib boradi:

Oʻzbekiston Respublikasi Ichki ishlar vazirligi — Jamoat xavfsizligi departamenti Yoʻl harakati xavfsizligi xizmati tomonidan roʻyxatga olingan avtotransport vositalari, texnik koʻrikdan oʻtgan avtotransport vositalari, “E-maʼmuriy ish” platformasidagi avtomobilda yoʻlovchilar tashishda aniqlangan huquqbuzarliklar va ularga koʻrilgan choralar, avtotransport vositalarini boshqarish huquqiga ega boʻlgan shaxslar hamda sodir boʻlgan yoʻl-transport hodisalari va qoidabuzarliklar toʻgʻrisidagi maʼlumotlar;

Oʻzbekiston Respublikasi Sogʻliqni saqlash vazirligi — tibbiy koʻrikdan oʻtgan haydovchilar toʻgʻrisidagi maʼlumotlar;

Oʻzbekiston Respublikasi Iqtisodiyot va moliya vazirligi huzuridagi Kadastr agentligi — transport infratuzilmalari va obyektlarini oʻz ichiga oluvchi Yagona geoaxborot maʼlumotlari.

7. Maʼlumotlarning haqqoniyligi, oʻz vaqtida taqdim etilishi va belgilangan muddatda ijrosi taʼminlanishi uchun tegishli vazirlik va idoralarning birinchi rahbarlari masʼul hisoblanadi.

8. Mazkur Nizomning 6-bandida belgilangan barcha jarayonlar Oʻzbekiston Respublikasi Transport vazirligi tomonidan muvofiqlashtirib boriladi.

9. Oʻzbekiston Respublikasi Transport vazirligi vazirlik va idoralar tomonidan taqdim etilgan tashuvchilar toʻgʻrisidagi maʼlumotlarning sir saqlanishini belgilangan tartibda taʼminlaydi.

10. Oʻzbekiston Respublikasi Transport vazirligi tomonidan “Uztrans” yagona interaktiv axborot tizimida reytingning avtomatik hisoblanishi taʼminlanadi.

3-bob. Reyting natijalarini hisoblash va eʼlon qilish tartibi

11. Tashuvchilar reytingi mazkur Nizomga 2-ilovaga muvofiq hisoblanadi.

12. Reyting ballari quyidagilardan shakllantiriladi:

tegishli reyting koʻrsatkichlari boʻyicha eng yuqori koʻrsatkichga ega boʻlgan tashuvchilar aniqlanadi;

har bir mezon boʻyicha koʻrsatkich ballar yigʻindisidan iborat boʻladi;

har bir mezon boʻyicha hisoblangan ballar yigʻindisi tashuvchilar reytingini ifodalaydi.

13. Faoliyati xavfsizlik va ochiqlikka asoslangan tashuvchilar reytingi natijalari quyidagi toifalarga boʻlinadi:

14. Tashuvchilar reytingi natijalari har chorak yakuni bilan keyingi oyning 10-sanasiga qadar Oʻzbekiston Respublikasi Transport vazirligining rasmiy veb-saytida eʼlon qilinadi.

15. Tashuvchi hamda Oʻzbekiston Respublikasi Transport vazirligi, Qoraqalpogʻiston Respublikasi Transport vazirligi, viloyatlar va Toshkent shahar transport boshqarmalari oʻrtasida belgilangan tartibda muayyan muddatga tuzilgan yoʻnalishda yoʻlovchi tashish xizmatlarini koʻrsatish huquqini beruvchi shartnoma (kontrakt)ning amal qilish muddati tugagunga qadar boʻlgan soʻnggi 1 yil davomida avtomobil transportida yoʻlovchi tashish faoliyati “A” xavfsizlik va ochiqlik toifasiga mansub boʻlgan taqdirda, tashuvchining talabiga binoan shartnoma muddati tugagan kundan boshlab yana 1 yil muddatga uzaytirishga ruxsat etiladi.

Bunda tashuvchi reyting natijalariga koʻra “A” xavfsizlik va ochiqlik toifasiga mansub boʻlgan taqdirda, Transport vazirligiga tender shartnomasi amal qilish muddati tugashidan uch oydan kechikmay, shartnoma muddatini uzaytirish boʻyicha talabnoma berishi kerak.

4-bob. Tashuvchilarni reytingga kiritish va undan chiqarish asoslari

16. Tashuvchilarni reytingga kiritish uchun Oʻzbekiston Respublikasi hududida roʻyxatdan oʻtganligi hamda asosiy faoliyat turi avtomobil transportida yoʻlovchi tashish ekanligi asosiy mezon hisoblanadi.

17. Quyidagi hollarda tashuvchilar reytingdan chiqariladi:

asosiy faoliyat turi boshqa faoliyat turiga oʻzgarganda;

amaldagi qonunchilik hujjatlariga muvofiq tashuvchi litsenziyasi bekor qilinganda;

tashuvchi korxona faoliyati tugatilganda.

Tashuvchilar reytingiga kiritilmagan va/yoki undan chiqarilgan tashuvchilar 15-bandda koʻrsatilgan imtiyozdan foydalana olmaydi.

5-bob. Yakunlovchi qoidalar

18. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

19. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Avtomobil transportida yoʻlovchi tashish faoliyati bilan shugʻullanuvchi tashuvchilar reytingini hisoblash va yuritish tartibi toʻgʻrisidagi vaqtinchalik nizomga 1-ILOVA

Tashuvchilar reytingini shakllantirish va yuritish

SXEMASI

Avtomobil transportida yoʻlovchi tashish faoliyati bilan shugʻullanuvchi tashuvchilar reytingini hisoblash va yuritish tartibi toʻgʻrisidagi vaqtinchalik nizomga 2-ILOVA

Avtomobil transportida muntazam yoʻnalishlarda faoliyat koʻrsatuvchi tashuvchilar reytingini hisoblash MEZONLARI

Izoh. Tashuvchilar reytingini hisoblash mezonlari — reytingni shakllantirish jarayonida avtobus va mikroavtobusda yoʻlovchi tashish xizmatlari koʻrsatiladigan avtotransport vositalariga nisbatan qoʻllaniladi.

1) Yoʻl harakati qoidalari, yoʻlovchi va bagaj tashish qoidalari hamda avtomobil transportida yoʻlovchi tashish faoliyatini amalga oshirishda litsenziya talab va shartlari.

Misol uchun: tashuvchining yoʻlovchi tashish xizmatlari koʻrsatiladigan avtotransport vositasi soni 20 ta boʻlsa, bir chorak davomida jami qonunchilik hujjatlari normalarining buzilishi holati 7 ta.

7/20*100=35% (qonunchilik hujjatlari normalari buzilishining jami avtotransport vositalari soniga nisbati)

Bunda: 20 ta avtotransport vositasi 100 foiz boʻlsa, 7 ta qonun buzilishi 35 foiz boʻladi va oʻz-oʻzidan 50 foizgacha, yaʼni “-10” jarima balli qoʻllanilib, jami ballar yigʻindisidan 10 ball olib tashlanadi.

2) Tashuvchi balansida tegishli texnik baza va avtotransport vositalarini saqlash yer maydoni mavjudligi toʻgʻrisida hujjat nusxasini ilova qilishi shart.

3) Yoʻlovchi tashish faoliyati bilan shugʻullanuvchi (litsenziyaga ega) tashuvchining balansida boʻlgan avtotransport vositalarining ulushi quyidagi formula orqali hisoblanadi.

Misol uchun: tashuvchining yoʻlovchi tashish xizmatlari koʻrsatiladigan avtotransport vositasi soni 20 ta boʻlsa, balansidagi avtotransport vositalari soni 7 ta.

y = korxona balansining ulushi, z = balansidagi avtotransport vositalari soni, b = jami avtotransport vositalari soni

y = 35 % balansdagi avtotransport vositalari ulushini tashkil etib, 5 ball beriladi

4) Yoʻlovchi tashish faoliyati bilan shugʻullanuvchilar (litsenziyaga ega) avtotransport vositalarining oʻrtacha ishlab chiqarilgan yili quyidagi formula orqali hisoblanadi.

Misol uchun: korxonadagi avtotransport vositalari soni 10 ta (2017-yilda ishlab chiqarilgani 3 ta, 2019-yilda ishlab chiqarilgani 2 ta, 2020-yilda ishlab chiqarilgani 5 ta)

x = 4,1 avtotransport vositasining oʻrtacha ishlab chiqarilgan yili.

Bunda korxonadagi jami avtotransport vositalarining oʻrtacha ishlab chiqarilgan yili 4,1 yilni tashkil etgan holda, yuqoridagi mezonlarning 6-bandi 1-qismidagi koʻrsatkichga asosan (5 yildan oshmasa) 25 ball beriladi.