Oʻzbekiston Respublikasi Ichki ishlar vazirligining akademiyasini tashkil etish toʻgʻrisida (447-son)

02.09.1994

Oʻzbekiston Respublikasi Vazirlar Mahkamasining

qarori

Oʻquv yurtlari tizimini takomillashtirish, Oʻzbekiston Respublikasi Ichki ishlar vazirligi organlari va boʻlinmalari uchun yuqori malakali kadrlar tayyorlashning kompleks tizimini tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Ichki ishlar vazirligining Oliy va oʻrta maxsus militsiya maktablari negizida ichki ishlar organlari mutaxassislarini tayyorlash va boshliqlar tarkibi xodimlarining malakasini oshirish boʻyicha Oʻzbekiston Respublikasi Ichki ishlar vazirligining Akademiyasi tashkil etilsin.

Oʻzbekiston Respublikasi Ichki ishlar vazirligining Akademiyasini tashkil etish birlashtirilayotgan oʻquv yurtlari doimiy va oʻzgaruvchan tarkibining mavjud umumiy soni doirasida amalga oshirilsin.

2. Akademiyaning asosiy vazifalari etib quyidagilar belgilansin:

ichki ishlar organlarining oliy boshliqlar tarkibini tayyorlash;

tanlov asosida ikki bosqichda ichki ishlar organlarining oliy va oʻrta yuridik maʼlumotli boshliqlar tarkibini tayyorlash;

huquq-tartibotni muhofaza qilish muammolarini tadqiq etish;

ilmiy va ilmiy-pedagogik kadrlar tayyorlash.

3. Oʻzbekiston Respublikasi Ichki ishlar vazirligi Oʻzbekiston Respublikasi Oliy va oʻrta maxsus taʼlim vazirligi bilan kelishgan holda bir oy muddatda Oʻzbekiston Respublikasi Ichki ishlar vazirligining Akademiyasi Ustavini va tuzilmasini ishlab chiqsin hamda tasdiqlasin.

Vazirlar Mahkamasining Raisi I. KARIMOV

Toshkent sh.,

1994-yil 2-sentabr

447-son