Oʻzbekiston Respublikasi Oliy Majlisi Qonunchilik palatasi Mehnat va ijtimoiy masalalar qoʻmitasining 2023-yil oʻn bir oyidagi faoliyati toʻgʻrisida (3767-IV-son)

11.12.2023

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Oliy Majlisi Qonunchilik palatasi Mehnat va ijtimoiy masalalar qoʻmitasining (bundan buyon matnda Qoʻmita deb yuritiladi) 2023-yil oʻn bir oyidagi faoliyati toʻgʻrisidagi axborotini koʻrib chiqib, Oʻzbekiston Respublikasi Oliy Majlisi Qonunchilik palatasining Kengashi taʼkidlaydiki, Qoʻmita tomonidan ijtimoiy sohadagi islohotlarning huquqiy asoslarini mustahkamlash, aholi bandligini taʼminlash, mehnat munosabatlarini tartibga solishga doir qonun hujjatlari ijrosini doimiy nazorat qilish, saylovchilar bilan doimiy muloqot oʻrnatish borasida muayyan ishlar amalga oshirilgan.

Xususan, hisobot davrida aholini ijtimoiy muhofaza qilish jarayonlarini takomillashtirishning huquqiy asoslarini yaratishga qaratilgan 6 ta qonun loyihasi koʻrib chiqilib, shundan 3 tasi Oʻzbekiston Respublikasi Oliy Majlisining Qonunchilik palatasi (bundan buyon matnda Qonunchilik palatasi deb yuritiladi) tomonidan qabul qilingan.

Qonun loyihalarini maromiga yetkazish hamda ularning har jihatdan pishiq va mukammal boʻlishini taʼminlash maqsadida qoʻmita masʼul boʻlgan qonun loyihalari muhokamasi boʻyicha jami 29 ta ishchi guruh va 12 ta ekspertlar guruhi yigʻilishlari tashkil etilgan.

Hisobot davrida Qoʻmita tomonidan jami 18 ta nazorat-tahlil tadbiri oʻtkazilgan. Ulardan 10 tasi vazirlik va idoralar rahbarlarining axborotini eshitishga, 8 tasi qonun hujjatlarining ijro etilish holatini oʻrganishga hamda Qonunchilik palatasi va Qoʻmita qarorlarining ijrosini monitoring qilishga oid tadbirlardir.

Bundan tashqari Qoʻmita tashabbusi bilan joriy yil 28-noyabr kuni Oʻzbekiston Respublikasi kambagʻallikni qisqartirish va bandlik vaziri B. Musayevga “Hududlarda yangi ish oʻrinlarini yaratish va aholi bandligini taʼminlash borasida amalga oshirilayotgan ishlar toʻgʻrisida” parlament soʻrovi yuborilgan.

Oʻtgan davrda Qoʻmita tomonidan qonun loyihalari muhokamasiga, mamlakatimizda ijtimoiy himoya va bandlik sohasida olib borilayotgan islohotlarning ahamiyatini saylovchilarga yetkazishga, tegishli tarmoq va sohalardagi mavjud muammolarni tahlil qilish hamda ularni bartaraf etish yuzasidan takliflar ishlab chiqishga qaratilgan 18 ta davra suhbati, 14 ta seminar va 2 ta konferensiya oʻtkazilgan.

Jismoniy va yuridik shaxslardan Qoʻmita aʼzolari nomiga kelgan jami 395 ta murojaat “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuniga muvofiq belgilangan tartibda koʻrib chiqilgan.

Qoʻmita faoliyati haqida keng jamoatchilikni xabardor qilish, nazorat-tahlil tadbirlari yakunlari hamda Qoʻmita masʼulligida koʻrib chiqilayotgan qonun loyihalarining mazmun-mohiyatini aholiga muntazam ravishda yetkazish maqsadida ommaviy axborot vositalari va ijtimoiy tarmoqlarda 2 674-marta chiqish qilingan.

Shu bilan birga oʻtgan davrda amalga oshirilgan ishlar tahlili Qoʻmita faoliyatini samarali tashkil etishda eʼtibor qaratishi lozim boʻlgan ayrim masalalar mavjudligini koʻrsatmoqda.

Jumladan, hududlarda yangi ish oʻrinlarini yaratish, aholi bandligini taʼminlash borasidagi vazifalarning bajarilish holati yuzasidan nazorat-tahlil tadbirlarini yanada kuchaytirish va ularning natijadorligini oshirish lozim.

Shuningdek Qoʻmita masʼulligida koʻrib chiqilgan va qabul qilingan qonunlarni monitoring qilgan holda ularda belgilangan qonunosti hujjatlarning oʻz vaqtida qabul qilinishi borasida vazirliklar va tashkilotlarning masʼuliyatini oshirishga qaratilgan ishlarni yanada kuchaytirish maqsadga muvofiqdir.

Oʻzbekiston Respublikasi Prezidentining farmon va qarorlari, davlat dasturlari hamda Qonunchilik palatasi qarorlaridagi Qoʻmita faoliyatiga taalluqli boʻlgan masalalarning ijro etilishi ustidan taʼsirchan parlament nazoratini amalga oshirishga alohida eʼtibor qaratish muhim ahamiyatga ega.

Qoʻmitaning jismoniy va yuridik shaxslarning murojaatlari bilan ishlash, qonun loyihalarining va nazorat-tahlil tadbirlarining mazmun-mohiyatini keng jamoatchilikka yetkazish borasidagi faoliyatini tizimli tashkil etish boʻyicha tegishli chora-tadbirlarni amalga oshirish zarur.

Yuqorida bayon etilganlardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Mehnat va ijtimoiy masalalar qoʻmitasining 2023-yil oʻn bir oyidagi faoliyati toʻgʻrisidagi axboroti maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasining Mehnat va ijtimoiy masalalar qoʻmitasiga:

respublika hududlarida yangi ish oʻrinlarini yaratish, aholi bandligini taʼminlash borasidagi vazifalar ijrosi yuzasidan nazorat-tahlil tadbirlarini kuchaytirish;

qonun loyihalarini ishlab chiqish va Qoʻmita masʼulligida boʻlgan qonun loyihalarini maromiga yetkazishda, nazorat-tahlil tadbirlarini oʻtkazishda doimiy ravishda keng jamoatchilikni, soha mutaxassislarini va ekspertlarni jalb etish;

jismoniy va yuridik shaxslarning murojaatlarida koʻtarilayotgan dolzarb muammolarni har tomonlama tahlil qilish, ularning yuzaga kelish sabablarini oʻrganish, koʻtarilgan masalalarga yechim topish borasida tegishli davlat organlari tomonidan koʻrilayotgan choralar ustidan taʼsirchan parlament nazoratini amalga oshirish;

qabul qilingan qonun hujjatlarining, shu jumladan, yangi tahrirdagi Oʻzbekiston Respublikasining Mehnat kodeksida belgilangan qonunosti hujjatlarining oʻz vaqtida qabul qilinishi borasida tegishli vazirliklar va tashkilotlarning masʼuliyatini oshirishga qaratilgan ishlarni yanada kuchaytirish;

Qoʻmita faoliyatini ommaviy axborot vositalarida keng yoritish, shuningdek koʻrib chiqilayotgan qonun loyihalarining va oʻtkazilayotgan nazorat-tahlil tadbirlarining mazmun-mohiyatini doimiy ravishda jamoatchilikka yetkazish choralarini koʻrish tavsiya etilsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari U. Inoyatov zimmasiga yuklatilsin.

4. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2023-yil 11-dekabr,

3767-IV-son