Toshkent shahrida voyaga yetmaganlar qarovsizligi va ular orasidagi huquqbuzarliklarning oldini olish ishlarini takomillashtirish toʻgʻrisida (301-son)

26.08.2002

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Vazirlar Mahkamasining 2001-yil 6-iyundagi qarorining bajarilishini taʼminlash, Toshkent shahrida bolalar va oʻsmirlar qarovsizligini, ular orasidagi huquqbuzarliklarning oldini olish, voyaga yetmaganlarni ijtimoiy va huquqiy himoya qilishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Xalq taʼlimi vazirligining Toshkent shahar Xalq taʼlimi bosh boshqarmasiga qarashli Voyaga yetmaganlarga ijtimoiy-huquqiy yordam koʻrsatish markazi tugatilsin va uning negizida Ichki ishlar vazirligining Toshkent shahar Ichki ishlar bosh boshqarmasi tasarrufidagi Voyaga yetmaganlarga ijtimoiy-huquqiy yordam koʻrsatish markazi tashkil etilsin.

Belgilab qoʻyilsinki, tashkil etilgan Markaz voyaga yetmaganlar oʻrtasida qarovsizlik va huquqbuzarliklarning oldini olish ishlarini amalga oshiruvchi, ularga tarbiyaviy taʼsir koʻrsatuvchi hamda Oʻzbekiston Respublikasi hududidan tashqariga joylashtirish uchun joʻnatiladigan va Oʻzbekiston Respublikasi hududida joylashtirish uchun boshqa davlatlarning shunday muassasalaridan keltiriladigan voyaga yetmaganlarni qabul qiluvchi muassasa hisoblanadi.

2. Ichki ishlar vazirligi Moliya vazirligi bilan kelishgan holda Markaz xodimlarining shtat jadvalini asoslangan hisob-kitoblar asosida ikki hafta muddatda ishlab chiqsin va tasdiqlasin.

3. Ichki ishlar vazirligi va Xalq taʼlimi vazirligi oʻn kun muddatda Toshkent shahar Xalq taʼlimi bosh boshqarmasining Voyaga yetmaganlarga ijtimoiy-huquqiy yordam koʻrsatish markazining binosi, mol-mulki va transport vositalari Toshkent shahar Ichki ishlar bosh boshqarmasi tasarrufidagi Voyaga yetmaganlarga ijtimoiy-huquqiy yordam koʻrsatish markazi balansiga berilishini taʼminlasinlar.

4. Toshkent shahar hokimligi ikki oy muddatda mahalliy budjet hisobidan Markaz binosini taʼmirlash ishlari tugallanishini, Markazga zarur boʻlgan barcha vositalar, anjomlar, buyumlar, oziq-ovqat mahsulotlari va kiyim-kechak berilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H. Karomatov zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2002-yil 26-avgust.,

301-son