Sanoatni rivojlantirish jamgʻarmasi faoliyatini tashkil etish tartibi toʻgʻrisida (PQ-397-son)

18.12.2023

Oʻzbekiston Respublikasi Prezidentining

Qarori

Respublika sanoatini jadal rivojlantirishda yangi zamonaviy mexanizmlarni joriy qilish orqali ishlab chiqarish quvvatlarini kengaytirish va qoʻshimcha zaxiralarni yaratish maqsadida:

1. Oʻzbekiston Respublikasi Prezidentining 2023-yil 21-iyuldagi “Maʼmuriy islohotlar doirasida investitsiyalar, sanoat va savdo sohasida davlat boshqaruvini samarali tashkil qilish chora-tadbirlari toʻgʻrisida”gi PF-111-son Farmoni bilan:

sanoat tarmoqlarini tubdan rivojlantirish maqsadida Tiklanish va taraqqiyot jamgʻarmasi huzurida Sanoatni rivojlantirish jamgʻarmasi (keyingi oʻrinlarda — Jamgʻarma) tashkil etilganligi;

Jamgʻarmaga 1 mlrd AQSH dollari ekvivalenti miqdorida mablagʻ jalb qilinishi, shu jumladan 2023-2024-yillarda Tiklanish va taraqqiyot jamgʻarmasidan 200 mln AQSH dollari ekvivalenti miqdoridagi mablagʻlar ajratilishi belgilanganligi maʼlumot uchun qabul qilinsin.

2. Jamgʻarmaning asosiy vazifalari etib quyidagilar belgilansin:

sanoat tarmoqlarida yangi turdagi mahsulotlar ishlab chiqarish, sohaga zamonaviy texnologiyalar va bilimlarni olib kirish hamda mehnat unumdorligi va ishlab chiqarish samaradorligini oshirishga koʻmaklashish;

yuqori qoʻshilgan qiymatli eksportbop mahsulotlar ishlab chiqarishni ragʻbatlantirish, xususiy sektor korxonalarida mahsulot tannarxini pasaytirish imkoniyatlarini yaratish hamda ularni eksport faoliyatiga jalb qilish va yangi bozorlarni oʻzlashtirishda ishtirok etish;

yuqori qoʻshilgan qiymatli va yangi yuqori texnologik mahsulotlar ishlab chiqarishga qaratilgan va eksportbop investitsiya loyihalarini, shu jumladan sanoat ipotekasi tizimi orqali moliyalashtirish.

3. Jamgʻarmaning moliyalashtirish manbalari etib quyidagilar belgilansin:

Tiklanish va taraqqiyot jamgʻarmasidan ajratiladigan mablagʻlar;

2024-yildan boshlab har yili Davlat budjeti mablagʻlari hisobidan Jamgʻarma tomonidan taqdim etiladigan kompensatsiya xarajatlari uchun 15 mln AQSH dollari ekvivalentidagi mablagʻlar;

qonunchilik hujjatlarida taqiqlanmagan boshqa manbalar.

4. Belgilansinki, loyiha qiymati 4 mln AQSH dollaridan yuqori boʻlgan sanoat loyihalariga Jamgʻarma tomonidan:

a) tijorat banklariga:

yangi turdagi mahsulotlar ishlab chiqarish va mavjud quvvatlarni kengaytirishga qaratilgan sanoat loyihalari uchun import qilinadigan asbob-uskuna xarid qilish, shu jumladan avans toʻlovlarini qoplab berish maqsadida, xorijiy valyutada yillik 5 foiz va milliy valyutada yillik 10 foiz stavkada 10 yil muddatgacha, shundan 3 yilgacha imtiyozli davr bilan kredit mablagʻlari;

ishlab chiqarishni tashkil etish maqsadida bino-inshootlar xarid qilish uchun 7 yil muddatgacha, shundan 2 yilgacha imtiyozli davr bilan milliy valyutada yillik 10 foiz stavkada sanoat ipotekasi tizimi asosida;

sanoat korxonalariga xomashyo materiallarini xarid qilish uchun aylanma mablagʻlarni shakllantirish maqsadida 1 yil muddatgacha xorijiy valyutada yillik 4 foiz hamda milliy valyutada yillik 10 foiz stavkada kredit yoki subordinar qarz mablagʻlari ajratiladi.

Bunda:

bir loyiha doirasida kredit mablagʻlari 1 mln AQSH dollaridan 10 mln AQSH dollari ekvivalentigacha miqdorda ajratiladi;

loyiha tashabbuskorining loyihadagi ulushi loyiha qiymatining 30 foizidan kam boʻlmagan miqdorda, shu jumladan kapital qoʻyilmalar qiymatining 15 foizidan kam boʻlmagan miqdorda (kredit mablagʻi ajratilgunga qadar) pul mablagʻlari bilan ishtiroki talab etiladi (aylanma mablagʻlarini shakllantirish maqsadida ajratiladigan kreditlar bundan mustasno);

b) quyidagi tartibga muvofiq 2024-yildan boshlab Davlat budjeti hisobidan ajratiladigan mablagʻlar doirasida kompensatsiya toʻlovlari uch tomonlama shartnoma asosida talab yuqori boʻlgan mahsulotlar ishlab chiqarishni oʻzlashtirishga qaratilgan loyihalarning marketing tadqiqotlari, loyiha hujjatlarini ishlab chiqish, xorijiy mutaxassislar jalb qilish, ishlab chiqariladigan mahsulotlarni sertifikatlashtirish bilan bogʻliq boʻlgan xarajatlarning 50 foizigacha, lekin 20 ming AQSH dollaridan koʻp boʻlmagan miqdorda ajratiladi;

v) sanoat korxonalari bilan taʼsis qilinadigan qoʻshma korxonaning (SPV) ustav kapitalida 25 foizgacha ulush Tiklanish va taraqqiyot jamgʻarmasining shuʼba korxonasi orqali ishtirokchi (taʼsischi) sifatida ishtirok etishi mumkin;

g) Jamgʻarmaga sanoat korxonalari tomonidan, oʻrnatilgan tartibda 5 yildan yuqori boʻlmagan muddatlarda emissiya qilingan obligatsiyalarni (bir loyiha doirasida 10 mln AQSH dollari ekvivalenti miqdorigacha) quyidagi shartlarda:

kapital rentabelligi (ROE) 15 foizdan kam boʻlmagan;

obligatsiyalarning toʻlanadigan yillik daromad miqdori milliy valyutada, qarz oluvchining xatarlarini hisobga olgan holda, Oʻzbekiston Respublikasining milliy valyutadagi suveren obligatsiyalari stavkasidan past boʻlmagan miqdorda Jamgʻarma tomonidan sotib olinadi.

5. Belgilansinki, Jamgʻarma mablagʻlaridan foydalanish Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasining (keyingi oʻrinlarda — Hukumat komissiyasi) qarorlari asosida amalga oshiriladi.

Bunda:

Jamgʻarma mablagʻlari hisobidan moliyalashtirilishi koʻzda tutilgan loyihaning texnik-iqtisodiy asoslari tegishli tarmoqning ilmiy-texnik kengashi tomonidan va loyiha doirasidagi import kontarktlari “Loyihalarni va import kontraktlarini kompleks ekspertiza qilish markazi” DUK tomonidan ekspertizadan oʻtkaziladi;

Investitsiyalar, sanoat va savdo vazirligi tomonidan loyihalarni amalga oshirish boʻyicha takliflar tijorat banklarining ijobiy xulosalari, sanoat korxonalarining ustav kapitaliga kirish boʻyicha esa Jamgʻarmaning ijobiy xulosalari asosida Hukumat komissiyasiga koʻrib chiqish uchun kiritiladi.

6. Investitsiyalar, sanoat va savdo vazirligi Raqamli texnologiyalar vazirligi, Statistika agentligi, Soliq qoʻmitasi, Kadastr agentligi Tiklanish va taraqqiyot jamgʻarmasi bilan birgalikda 2024-yil 1-yanvardan boshlab tadbirkorlik subyektlarining Jamgʻarma mablagʻlaridan foydalanish boʻyicha arizalari Oʻzbekiston Milliy sanoat portali koʻrib chiqilishini taʼminlasin.

7. Tiklanish va taraqqiyot jamgʻarmasi ijrochi direksiyasining yangilangan tashkiliy tuzilmasi 1-ilovaga muvofiq tasdiqlansin.

8. Oʻzbekiston Respublikasi Prezidentining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

9. Mazkur qarorning ijrosini samarali tashkil qilishga masʼul va shaxsiy javobgar etib investitsiyalar, sanoat va savdo vaziri L.Sh. Qudratov hamda Tiklanish va taraqqiyot jamgʻarmasi ijrochi direktori Sh.A. Vafayev belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari J.A. Xodjayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 18-dekabr,

PQ-397-son

Oʻzbekiston Respublikasi Prezidentining 2023-yil 18-dekabrdagi PQ-397-son qaroriga 1-ILOVA

Tiklanish va taraqqiyot jamgʻarmasi ijro etuvchi direksiyasining

TASHKILIY TUZILMASI

Jamgʻarmani boshqarish kengashi Direktor yordamchisi — matbuot kotibi (1) Ijrochi direktor (1) Yuridik xizmat (2) Ijrochi direktor oʻrinbosari (1) Ijrochi direktor oʻrinbosari (1) Sanoatni rivojlantirish jamgʻarmasi rahbari — direktor oʻrinbosari (1) Buxgalteriya hisobi va aktivlarni boshqarish boʻlimi (4) Investitsiya loyihalarini ekspertizadan oʻtkazish boshqarmasi boshligʻi (1) Investitsiya loyihalarini monitoring qilish boshqarmasi boshligʻi (1) Kreditlarni rasmiylashtirish va ajratish boʻlimi (5) Axborot-kommunikatsiya texnologiyalari boʻlimi (1) Yoqilgʻi-energetika kompleksi va kimyo sanoati loyihalari ekspertizasi boʻlimi (5) Yoqilgʻi-energetika kompleksi va kimyo sanoati loyihalari monitoringi boʻlimi (3) Subsidiyalar va kompensatsiyalar ajratish boʻlimi (3) Kadrlar boʻlimi (1) Metallurgiya sanoati va mashinasozlik loyihalari ekspertizasi boʻlimi (3) Metallurgiya sanoati, mashinasozlik va infratuzilma loyihalari monitoringi boʻlimi (3) Investitsiyalarni boshqarish boʻlimi (3) Birinchi boʻlimi (1) Infratuzilma loyihalari ekspertizasi boʻlimi (2) Investitsiya loyihalarini birgalikda moliyalashtirishni tashkil etish boʻlimi (3) Maʼmuriy sektor (1)

Boshqaruv xodimlarining umumiy cheklangan soni — 47 ta shtat birligi.

Oʻzbekiston Respublikasi Prezidentining 2023-yil 18-dekabrdagi PQ-397-son qaroriga 2-ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2006-yil 16-maydagi “Oʻzbekiston Respublikasining Tiklanish va taraqqiyot jamgʻarmasi faoliyatini tashkil qilish chora-tadbirlari toʻgʻrisida”gi PQ-350-son qarori 4-bandining yettinchi xatboshisi quyidagi yangi tahrirda bayon etilsin:

“Oʻzbekiston Respublikasi Tiklanish va taraqqiyot jamgʻarmasi hisobidan kreditlar berish va kredit liniyalarini ochish, shuningdek, kreditlar va kredit liniyalar tarkibini oʻzgartirish, shu jumladan Sanoatni rivojlantirish jamgʻarmasi hisobidan kreditlar ajratish faqat Oʻzbekiston Respublikasi Prezidentining qarorlari asosida amalga oshiriladi.”.

2. Oʻzbekiston Respublikasi Prezidentining 2012-yil 9-martdagi “Oʻzbekiston Respublikasining Tiklanish va taraqqiyot jamgʻarmasi faoliyatini yanada takomillashtirish chora-tadbirlari toʻgʻrisida”gi PQ-1725-son qarorning 3-bandi hamda 1-ilovasi oʻz kuchini yoʻqotgan deb hisoblansin.

3. Oʻzbekiston Respublikasi Prezidentining 2022-yil 25-iyuldagi “Investitsiyaviy va infratuzilmaviy loyihalarning loyihaoldi, davlat xaridiga doir tender boʻyicha xarid qilish hujjatlari va texnik topshiriqlar hamda shartnomalarni ekspertizadan oʻtkazish tartibini yanada takomillashtirish chora-tadbirlari toʻgʻrisida”gi PQ-332-son qaroriga 1-ilovada:

2-band “a” kichik bandining birinchi xatboshisidagi “Tiklanish va taraqqiyot jamgʻarmasi” soʻzlaridan keyin “, shu jumladan Sanoatni rivojlantirish jamgʻarmasi” soʻzlari bilan toʻldirilsin;

3-band “g” kichik bandining birinchi xatboshisidagi “loyihalar” soʻzidan keyin “, Sanoatni rivojlantirish jamgʻarmasi mablagʻlari hisobidan amalga oshirilayotgan loyihalar bundan mustasno” soʻzlari bilan toʻldirilsin.