Yoshlarga oid tadbirlarning yillik kalendar rejasini ishlab chiqish va tasdiqlash tartibi toʻgʻrisidagi nizomni tasdiqlash haqida (667-son)

15.12.2023

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Maʼmuriy islohotlar doirasida yoshlar siyosati va sport sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 7-apreldagi PQ-114-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2023-yil 7-apreldagi PQ-114-son qarorining 3-bandida 2024-yil 1-yanvardan boshlab davlat organlari va tashkilotlari tomonidan yoshlarga oid davlat siyosati sohasida oʻtkaziladigan yoshlar festivallari, forumlar, loyihalar, tanlovlar va boshqa madaniy-maʼrifiy tadbirlarni Yoshlarga oid tadbirlarning yillik kalendar rejasi asosida amalga oshirishni yoʻlga qoʻyish belgilanganligi maʼlumot uchun qabul qilinsin.

2. Quyidagilarni nazarda tutuvchi Yoshlarga oid tadbirlarning yillik kalendar rejasini ishlab chiqish va tasdiqlash tartibi toʻgʻrisidagi nizom ilovaga muvofiq tasdiqlansin:

yoshlar festivallari, forumlar, loyihalar, tanlovlar va boshqa madaniy-maʼrifiy tadbirlarni (keyingi oʻrinlarda — tadbirlar) tashkil etish va oʻtkazish hamda ularda qatnashish tartibi;

Yoshlarga oid tadbirlarning yillik kalendar rejasini (keyingi oʻrinlarda — kalendar reja) shakllantirish va tasdiqlash tartibi;

kalendar rejada nazarda tutilgan tadbirlarni moliyalashtirish.

3. Belgilab qoʻyilsinki,

kalendar reja har yili dekabr oyi yakuniga qadar davlat organlari va tashkilotlarining takliflari asosida Yoshlar ishlari agentligi (keyingi oʻrinlarda — Agentlik) tomonidan ishlab chiqiladi;

tadbirlarni tashkil etish va oʻtkazish, ishtirokchi yoshlarni ragʻbatlantirish, shuningdek, yoshlarportali.uz elektron platformasidan (keyingi oʻrinlarda — platforma) foydalanish Agentlik tomonidan belgilangan tartib asosida amalga oshiriladi;

kalendar reja doirasida oʻtkaziladigan tadbirlar toʻgʻrisidagi maʼlumotlar platformaga joylashtirib boriladi va tadbirlarda ishtirok etadigan yoshlar platforma orqali elektron roʻyxatga olinadi;

platformani takomillashtirish (funksional kengaytirish) bilan bogʻliq xarajatlar Agentlikning oʻz mablagʻlari hisobidan amalga oshiriladi.

4. Davlat organlari va tashkilotlari, shu jumladan, mahalliy ijro etuvchi hokimiyat organlari har yili noyabr oyi yakuniga qadar tadbirlar boʻyicha kalendar reja yuzasidan takliflarni asoslantiruvchi maʼlumotlar bilan birgalikda Agentlikka kiritib borsin.

5. Yoshlar ishlari agentligi:

kalendar reja doirasida oʻtkaziladigan tadbirlar toʻgʻrisidagi maʼlumotlar platformaga joylashtirib borilishini taʼminlasin;

davlat organlari va tashkilotlari tomonidan amalga oshirilgan ishlar yuzasidan monitoring yuritsin hamda uning natijasi yuzasidan har chorakda Vazirlar Mahkamasiga maʼlumot kiritib borsin;

manfaatdor vazirlik va idoralar bilan birgalikda yoshlar bilan ishlash yoʻnalishidagi faoliyat boʻyicha maʼlumotlar bazasining platformaga integratsiya qilinishini taʼminlasin;

tadbirlarda ishtirok etadigan yoshlarni ushbu tizim orqali elektron roʻyxatga olishni yoʻlga qoʻysin;

davlat organlari va tashkilotlari tasdiqlagan kalendar rejaga muvofiq oʻtkaziladigan tadbirlar toʻgʻrisidagi maʼlumotlarni davlat organlari va tashkilotlarining yoshlar masalalari boʻyicha yetakchilari tomonidan platformaga shaxsiy kabinetlar orqali kiritib borish mexanizmlarini yoʻlga qoʻysin.

6. Mazkur qarorning bajarilishini nazorat qilish Oʻzbekiston Respublikasi yoshlar siyosati va sport vaziri A.I. Ikramov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2023-yil 15-dekabr,

667-son

Vazirlar Mahkamasining 2023-yil 15-dekabrdagi 667-son qaroriga ILOVA

Yoshlarga oid tadbirlarning yillik kalendar rejasini ishlab chiqish va tasdiqlash tartibi toʻgʻrisida

NIZOM

1-bob. Umumiy qoidalar

1. Mazkur Nizom davlat organlari va tashkilotlari tomonidan yoshlarga oid davlat siyosatini amalga oshirish doirasida oʻtkaziladigan yoshlar festivallari, forumlar, loyihalar, tanlovlar va boshqa madaniy-maʼrifiy tadbirlarni tashkil etish va oʻtkazish boʻyicha yillik kalendar rejani (keyingi oʻrinlarda — kalendar reja) ishlab chiqish hamda tasdiqlash tartibini belgilaydi.

2. Quyidagilar kalendar rejani ishlab chiqish boʻyicha asosiy vazifalar hisoblanadi:

joylarda yoshlarga oid davlat siyosatini amalga oshirish doirasidagi turli tadbirlarni reja asosida oʻtkazish;

davlat organlari va tashkilotlarining yoshlar siyosati sohasidagi faoliyati toʻgʻrisidagi maʼlumotlarni toʻplash, qayta ishlash va tahlil qilish hamda ularning yoshlar siyosati sohasida oʻzaro hamkorligini taʼminlash;

yoshlarga oid tadbirlarning oʻtkazilishi haqida yoshlar, jamoatchilik va ommaviy axborot vositalarining xabardorligini taʼminlash.

3. Kalendar reja ushbu Nizomga 1-ilovadagi namunaviy jadvalga muvofiq ishlab chiqiladi.

4. Tadbirlar Yoshlar ishlari agentligining (keyingi oʻrinlarda — Agentlik) Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari bilan kelishilgan holda, mazkur Nizom talablari asosida oʻtkaziladi.

5. Kalendar reja doirasida oʻtkaziladigan tadbirlar toʻgʻrisidagi maʼlumotlar Agentlikning maxsus elektron platformasiga (keyingi oʻrinlarda — platforma) joylashtirib boriladi hamda davlat organlari va tashkilotlari tomonidan tadbirlarda ishtirok etadigan yoshlar platforma orqali elektron roʻyxatga olinadi.

2-bob. Kalendar rejani ishlab chiqish va tasdiqlash tartibi

6. Kalendar reja Agentlikning Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari tomonidan davlat organlari va tashkilotlarining takliflari asosida respublika, Qoraqalpogʻiston Respublikasi, viloyatlar, Toshkent shahri hamda tuman va shaharlar miqyosida ishlab chiqiladi.

7. Kalendar reja quyidagi turlarga boʻlinadi:

respublika kalendar rejasi — respublika darajasidagi davlat organlari va tashkilotlari hamda mahalliy ijro etuvchi hokimiyat organlarining takliflari asosida Agentlik tomonidan ishlab chiqiladi;

hududiy kalendar rejalar — mahalliy ijro etuvchi hokimiyat organlari hamda davlat organlari va tashkilotlarining hududiy boʻlinmalari takliflari asosida Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari tomonidan ishlab chiqiladi.

8. Respublika miqyosidagi tadbirlarning kalendar rejasi yuzasidan takliflar tegishliligi boʻyicha respublika darajasidagi davlat organlari va tashkilotlari tomonidan Agentlikka, hududlar miqyosidagi tadbirlarning kalendar rejasi yuzasidan takliflar esa mahalliy ijro etuvchi hokimiyat organlari hamda davlat organlari va tashkilotlarining hududiy boʻlinmalari tomonidan Qoraqalpogʻiston Respublikasi, viloyatlar va Toshkent shahar yoshlar ishlari boshqarmalariga har yili noyabr oyi yakuniga qadar (istisno tariqasida, tadbirlar oʻtkazilishidan kamida ikki oy oldin) quyidagi hujjatlar bilan birgalikda taqdim etiladi:

tadbirlarni tashkil etish va oʻtkazish boʻyicha asoslovchi hujjatlar;

tadbirlar konsepsiyasi (konsepsiyada tadbirni oʻtkazish tartibi, aniq vaqti, kuni, joyi va ishtirok etish uchun ariza topshirish muddati boʻlishi lozim);

tadbirlarning davlat organlari va tashkilotlari tomonidan tasdiqlangan moliyalashtirish manbalari va xarajatlar smetasi loyihalari.

Takliflar Agentlik va Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari tomonidan mazkur Nizom talablariga toʻliq rioya qilgan holda taqdim etilgan taqdirda qabul qilinadi.

9. Kalendar rejaga yoshlar festivallari, forumlar, loyihalar, tanlovlar va madaniy-maʼrifiy tadbirlar hamda boshqa tadbirlar kiritiladi.

10. Kalendar reja ushbu Nizomga 2-ilovadagi sxemaga muvofiq har yili quyidagi tartibda va muddatlarda ishlab chiqiladi va tasdiqlanadi:

davlat organlari va tashkilotlari tomonidan kalendar rejaga kiritiladigan tadbirlar roʻyxatini shakllantirish — oktabr oyi davomida;

davlat organlari va tashkilotlari tomonidan kalendar rejaga kiritiladigan tadbirlar roʻyxatini tegishliligi boʻyicha Agentlik hamda Qoraqalpogʻiston Respublikasi, viloyatlar va Toshkent shahar yoshlar ishlari boshqarmalariga taqdim etish — noyabr oyi davomida;

Agentlik hamda Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari tomonidan kalendar rejaga kiritiladigan tadbirlar roʻyxatini umumlashtirish hamda davlat organlari va tashkilotlar tomonidan platformaga kiritish — dekabr oyi davomida.

11. Tasdiqlangan kalendar reja har yili yanvar oyida platforma, Agentlik hamda davlat organlari va tashkilotlarining rasmiy veb-saytlari va boshqa ommaviy axborot vositalari orqali eʼlon qilinadi.

12. Yil davomida tashabbus koʻrsatgan, tadbirlarda yoshlar qamrovini yuqori koʻrsatkichga olib chiqqan, yoshlar siyosati sohasida natijadorligi yuqori boʻlgan faol davlat organlari va tashkilotlari har yili 30-iyun — Yoshlar kuni arafasida tantanali ravishda eʼlon qilinadi va sovgʻalar bilan ragʻbatlantiriladi.

Bunda mazkur chora-tadbirlar xarajatlari Agentlikning budjetdan tashqari mablagʻlari hisobidan moliyalashtiriladi.

3-bob. Tadbirlarni moliyalashtirish va kalendar rejaga oʻzgartirish kiritish tartibi

13. Respublika kalendar rejasi hamda hududiy kalendar rejalarda nazarda tutilgan tadbirlar:

davlat organlari va tashkilotlariga budjetdan ajratilgan mablagʻlar doirasida va ularning budjetdan tashqari mablagʻlari;

jismoniy va yuridik shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar hisobidan moliyalashtiriladi.

14. Kalendar rejaning yillik smetalariga tadbirlar oʻtkaziladigan vaqtdagi xizmatlar qiymatining oʻzgarishi inobatga olingan holda, oʻzgartirish va qoʻshimchalar kiritilishi mumkin.

15. Kalendar rejaga quyidagi hollarda oʻzgartirish va qoʻshimchalar kiritilishi mumkin:

tadbirlarni oʻtkazish muddatlari va (yoki) joylari oʻzgarganda;

kalendar rejaga qoʻshimcha tadbir kiritish zarurati yuzaga kelganda;

tadbirlarning badiiy qismiga oʻzgartirish va qoʻshimchalar kiritilganda;

tadbir qatnashchilarining tarkibi yoki soni oʻzgarganda;

davlat organlari va tashkilotlarining moliyaviy imkoniyati va shartlari oʻzgarganda;

davlat organlari va tashkilotlarining faoliyati tugatilganda;

tadbirlar uchun nazarda tutilgan mablagʻlar yetishmaganda.

Agentlik va Qoraqalpogʻiston Respublikasi, viloyatlar va Toshkent shahar yoshlar ishlari boshqarmalari tomonidan tegishli davlat organlari va tashkilotlari bilan kelishilgan holda, kalendar rejaga oʻzgartirish va qoʻshimchalar kiritilishi mumkin.

Bunda tadbirlar uchun zarur boʻladigan qoʻshimcha xarajatlar davlat organlari va tashkilotlarining mablagʻlari hisobidan amalga oshiriladi.

4-bob. Yakunlovchi qoida

16. Ushbu Nizom talablarini buzgan shaxslar qonunchilik hujjatlariga muvofiq javobgar boʻladi.

Yoshlarga oid tadbirlarning yillik kalendar rejasini ishlab chiqish va tasdiqlash tartibi toʻgʻrisidagi nizomga 1-ILOVA

Yoshlarga oid tadbirlarning yillik kalendar rejasini ishlab chiqish va tasdiqlash tartibi toʻgʻrisidagi nizomga 2-ILOVA

Yoshlarga oid tadbirlarning yillik kalendar rejasini ishlab chiqish va tasdiqlash

SXEMASI