Oʻzbekiston Respublikasi Sport vazirligi stipendiyasini tayinlash va toʻlash tartibi toʻgʻrisidagi nizomni tasdiqlash haqida (3479-son)

04.12.2023

Oʻzbekiston Respublikasi yoshlar siyosati va sport vazirining

buyrugʻi

[Oʻzbekiston Respublikasi Adliya vazirligi tomonidan 2023-yil 4-dekabrda roʻyxatdan oʻtkazildi, roʻyxat raqami 3479]

Oʻzbekiston Respublikasining “Jismoniy tarbiya va sport toʻgʻrisida”gi Qonuni, Oʻzbekiston Respublikasi Prezidentining 2023-yil 7-apreldagi PQ-114-son “Maʼmuriy islohotlar doirasida yoshlar siyosati va sport sohasida davlat boshqaruvini samarali tashkil qilish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi Sport vazirligi stipendiyasini tayinlash va toʻlash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Iqtisodiyot va moliya vazirligi hamda Oʻzbekiston Milliy paralimpiya qoʻmitasi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Vazir A. IKRAMOV

Toshkent sh.,

2023-yil 10-noyabr,

18-mh-son

Kelishildi:

Oʻzbekiston Respublikasi iqtisodiyot va moliya vaziri D. KUCHKAROV

2023-yil 31-oktabr

Oʻzbekiston Milliy paralimpiya qoʻmitasi raisi M. TASHXODJAYEV

2023-yil 12-oktabr

Oʻzbekiston Respublikasi yoshlar siyosati va sport vazirining 2023-yil 10-noyabrdagi 18-mh-son buyrugʻiga ILOVA

Oʻzbekiston Respublikasi Sport vazirligi stipendiyasini tayinlash va toʻlash tartibi toʻgʻrisidagi

NIZOM

Mazkur Nizom Oʻzbekiston Respublikasi Sport vazirligining stipendiyasini (bundan buyon matnda stipendiya deb yuritiladi) tayinlash va toʻlash tartibini belgilaydi.

1-bob. Umumiy qoidalar

1. Stipendiya har oylik toʻlov shaklida Olimpiya va Paralimpiya, Osiyo va Paraosiyo oʻyinlari dasturiga kiritilgan sport turlari boʻyicha Oʻzbekiston Respublikasining sport terma jamoalari asosiy yoki zaxira tarkibiga (bundan buyon matnda sport terma jamoalari tarkibi deb yuritiladi) kiritilgan, mazkur Nizomning ilovasida belgilangan mezonlarga mos keluvchi sportchilar hamda Respublika olimpiya va paralimpiya sport turlariga tayyorlash markazining (bundan buyon matnda Markaz deb yuritiladi) Olimpiya va Paralimpiya kolleji oʻquvchi-sportchilariga (bundan buyon matnda oʻquvchi-sportchilar deb yuritiladi) tayinlanadi.

2. Mazkur Nizom qoidalari Olimpiya va Paralimpiya oʻyinlarida sovrindor boʻlganligi uchun umrbod oylik toʻlovlar tayinlangan sportchilarga nisbatan tatbiq etilmaydi.

2-bob. Stipendiya komissiyasi faoliyatini tashkil etish va uning asosiy vazifalari

3. Oʻzbekiston Respublikasi sport vaziri buyrugʻi bilan stipendiyani tayinlash va toʻlash boʻyicha Stipendiya komissiyasi (bundan buyon matnda Stipendiya komissiyasi deb yuritiladi) tuziladi va u stipendiyaga nomzod sportchilarning roʻyxatini shakllantirish hamda stipendiya tayinlashga masʼul hisoblanadi.

4. Stipendiya komissiyasi tarkibi Oʻzbekiston Respublikasi Sport vazirligining (bundan buyon matnda Vazirlik deb yuritiladi) markaziy apparati va Vazirlik tizimidagi tashkilotlarning jismoniy tarbiya va sport sohasida amaliy ish tajribasiga ega boʻlgan xodimlari orasidan kamida yetti kishidan iborat tarkibda shakllantiriladi.

5. Stipendiya komissiyasiga yuklangan asosiy vazifalar va funksiyalarga muvofiq Stipendiya komissiyasi faoliyatini tashkil etish, shuningdek komissiya yigʻilishlarini oʻtkazish va ularga rahbarlik qilish vazir oʻrinbosari — Stipendiya komissiyasi raisi tomonidan amalga oshiriladi.

6. Stipendiya komissiyasi faoliyatini tashkiliy jihatdan taʼminlash uning kotibi zimmasiga yuklanadi.

7. Stipendiya komissiyasi stipendiyaga nomzod sportchilar maʼlumotlarini koʻrib chiqish va ularning roʻyxatini shakllantirish boʻyicha quyidagi vazifalarni bajaradi:

Sport turlarini rivojlantirish respublika markazlari, Oʻzbekiston Milliy paralimpiya qoʻmitasi (bundan buyon matnda masʼul ijrochilar deb yuritiladi) hamda Markaz tomonidan taqdim qilinadigan stipendiyaga nomzod sportchilar va oʻquvchi-sportchilarning roʻyxatini (sonini) koʻrib chiqish;

stipendiyaga nomzod sportchilar roʻyxatidagi sportchilar toʻgʻrisidagi maʼlumotlarning haqiqiyligini va mazkur Nizomning ilovasida belgilangan mezonlarga mosligini tekshirish;

oʻziga yuklangan vazifalarning bajarilishini taʼminlash uchun masʼul ijrochilardan zarur axborotlarni soʻrab olish;

stipendiya tayinlash uchun barcha zarur hujjatlar va maʼlumotlarning masʼul ijrochilar tomonidan oʻz vaqtida taqdim etilishi ustidan nazoratni amalga oshirish;

Oʻzbekiston Respublikasining sport terma jamoalari asosiy yoki zaxira tarkibiga kiritilgan sportchilar roʻyxatini doimiy ravishda monitoring qilib borish;

sportchilarga stipendiya tayinlash yoki stipendiya toʻlashni toʻxtatish toʻgʻrisida qaror qabul qilish.

8. Stipendiya komissiyasi yigʻilishlari har chorakda kamida bir marta oʻtkaziladi. Yigʻilishlarda kun tartibiga kiritilgan masalalar yuzasidan kollegial tarzda qarorlar qabul qilinadi.

9. Stipendiya komissiyasi yigʻilishlari aʼzolarning kamida uchdan ikki qismi ishtirok etganda vakolatli hisoblanadi.

10. Stipendiya komissiyasi qarorlari yigʻilishda ishtirok etayotgan aʼzolarning kamida uchdan ikki qismi tomonidan maʼqullangan taqdirda, qabul qilingan hisoblanadi.

3-bob. Stipendiyaga nomzod sportchilar roʻyxatini koʻrib chiqish, ularning maʼlumotlarini tekshirish va stipendiya tayinlash

11. Har chorak birinchi oyining 5-sanasiga qadar mazkur Nizom ilovasida belgilangan mezonlar asosida masʼul ijrochilar sport terma jamoalari tarkibidagi sportchilardan, Markaz oʻquvchi-sportchilardan stipendiyaga nomzodlar roʻyxatini tuzadi va Stipendiya komissiyasiga taqdim qiladi.

Bunda, mazkur Nizomning ilovasida belgilangan mezon talablariga mos keluvchi hamda sport terma jamoalari tarkibiga kiritilgan barcha sportchilar, shuningdek oʻquvchi-sportchilar stipendiyaga nomzodlar roʻyxatiga toʻliq kiritilganligi va ular haqidagi maʼlumotlar toʻgʻriligiga tegishliligiga koʻra masʼul ijrochilar va Markaz javobgar hisoblanadi.

12. Masʼul ijrochilar stipendiyaga nomzod sportchilar roʻyxati bilan birgalikda Stipendiya komissiyasi koʻrib chiqishi uchun mazkur Nizomning ilovasida belgilangan mezonlar asosida sportchilarning musobaqalarda erishgan natijalarini tasdiqlovchi hujjatlarni taqdim qiladi.

13. Stipendiya komissiyasi stipendiyaga nomzod sportchilar haqida boshqa zarur maʼlumotlarni (shaxsiga oid maʼlumotlar, sport terma jamoalari tarkibidagi holati boʻyicha maʼlumotlar va boshqalar) “ERP Sport” yagona elektron boshqaruv tizimi orqali oladi.

14. Stipendiya komissiyasi masʼul ijrochilar tomonidan taqdim qilingan stipendiyaga nomzod sportchilar roʻyxatini va ularning musobaqalarda erishgan natijalarini tasdiqlovchi hujjatlarni 15 kun ichida koʻrib chiqadi.

15. Hujjatlarni koʻrib chiqish jarayonida Stipendiya komissiyasi masʼul ijrochilar tomonidan taqdim qilingan stipendiyaga nomzod sportchilar roʻyxatidagi sportchilarning haqiqatdan ham sport terma jamoalari tarkibida ekanligini va ularning musobaqalarda erishgan natijalarini tasdiqlovchi hujjatlari haqiqiyligini, shuningdek mazkur Nizomning 2-bandida koʻrsatilgan holatlarni tekshiradi.

16. Stipendiya komissiyasi yigʻilishida umumiy ovoz berish yoʻli bilan stipendiya tayinlash va toʻlash toʻgʻrisida yoki stipendiya tayinlashni rad etish toʻgʻrisida qaror qabul qilinadi.

Olimpiya va Paralimpiya, Osiyo va Paraosiyo oʻyinlari dasturiga kiritilgan sport turlari boʻyicha sport terma jamoalari tarkibiga kiritilgan hamda mazkur Nizomning ilovasida belgilangan mezonlarga mos keluvchi sportchilar hamda oʻquvchi-sportchilarga stipendiya tayinlanadi.

Bunda, oʻquvchi-sportchilar orasidan sport terma jamoalari tarkibiga kiritilmagan oʻquvchi-sportchilarga stipendiya berish boʻyicha taklif Markaz tomonidan toʻgʻridan-toʻgʻri Stipendiya komissiyasiga taqdim qilinadi.

Stipendiyalar stipendiya tayinlash va toʻlash toʻgʻrisidagi qaror qabul qilingan oydan boshlab sport terma jamoalari tarkibiga kiritilgan sportchilarga bir yil muddatga, oʻquvchi-sportchilarga mazkur Nizomning 38-bandi ikkinchi xatboshisida belgilangan muddatga tayinlanadi.

17. Stipendiya komissiyasi qarori bayonnoma bilan rasmiylashtiriladi.

18. Stipendiya komissiyasi qarori Vazirlikning rasmiy veb-saytida eʼlon qilib boriladi.

4-bob. Stipendiya komissiyasi qarori yuzasidan berilgan murojaatlarni koʻrib chiqish

19. Oʻzbekiston Respublikasi sport vazirining buyrugʻi bilan Stipendiya komissiyasi qarori yuzasidan berilgan murojaatlarni koʻrib chiqish boʻyicha apellyatsiya komissiyasi (bundan buyon matnda apellyatsiya komissiyasi deb yuritiladi) tuziladi.

Apellyatsiya komissiyasi tarkibiga Vazirlikning Stipendiya komissiyasi faoliyatida ishtirok etmagan masʼul xodimlari kiritiladi.

Apellyatsiya komissiyasi aʼzolari soni toq sonda hamda kamida besh kishidan iborat tarkibda shakllantiriladi.

20. Stipendiya komissiyasi qaroridan norozi boʻlgan masʼul ijrochilar yoki stipendiyaga nomzod sportchilar yoxud ularning qonuniy vakillari (bundan buyon matnda murojaatchi deb yuritiladi) Stipendiya komissiyasining qarori qabul qilingan kundan boshlab, besh kun davomida Apellyatsiya komissiyasiga murojaat qilish huquqiga ega.

21. Apellyatsiya komissiyasi yigʻilishlari aʼzolarning kamida uchdan ikki qismi ishtirok etganda vakolatli hisoblanadi.

22. Apellyatsiya komissiyasi qarorlari yigʻilishda ishtirok etayotgan aʼzolarning kamida uchdan ikki qismi tomonidan maʼqullanganda, qabul qilingan hisoblanadi.

23. Apellyatsiya komissiyasi tomonidan kelib tushgan murojaatlar uch ish kuni ichida koʻrib chiqiladi.

24. Apellyatsiya komissiyasi yigʻilishlarida yoki qaror qabul qilinayotgan vaqtda murojaatchining ishtirok etish huquqi taʼminlanadi.

25. Apellyatsiya komissiyasi murojaatchining apellyatsiya shikoyatini koʻrib chiqish natijalari boʻyicha murojaatchining talablarini qanoatlantirish yoki qanoatlantirishni rad etish toʻgʻrisida qaror qabul qiladi.

26. Apellyatsiya komissiyasi tegishli qaror nusxasini murojaatchiga bir kun muddatda pochta orqali yoki elektron shaklda uning elektron pochta manziliga yetkazilishini, agar murojaatchi Apellyatsiya komissiyasi qarori qabul qilinayotgan vaqtda ishtirok etgan boʻlsa, shaxsan oʻziga topshirilishini taʼminlaydi.

5-bob. Stipendiyani tayinlash va toʻlash bilan bogʻliq xarajatlar

27. Stipendiya toʻlovlari uchun mablagʻlar “sportchi” lavozimi uchun belgilangan ish haqi, terma jamoalar va ularning zaxirasi, sportchilar energiya sarfini qoplash va jismoniy resurslarini tiklash uchun ajratiladigan maqsadli toʻlovlarni maqbullashtirish hisobidan qoplanadi hamda Oʻzbekiston Respublikasi Davlat budjeti parametrlarini shakllantirishda Vazirlikning xarajatlari smetasida inobatga olinadi.

28. Stipendiya toʻlovlari uchun mablagʻlar hisobi Vazirlikda ochiladigan maxsus shaxsiy gʻazna hisobvaragʻida yuritiladi.

29. Vazirlik Stipendiya komissiyasining stipendiya tayinlash va toʻlash haqidagi qarori asosida stipendiya toʻlovi uchun talab etiladigan mablagʻlarni Vazirlikning xarajatlar smetasida stipendiya toʻlovi uchun koʻzda tutilgan mablagʻlar hisobidan masʼul ijrochilarning xarajatlar smetasiga oʻzgartirish kiritish orqali ajratadi.

30. Stipendiyani toʻlash masʼul ijrochilar tomonidan sportchilarning bank kartalariga yoki depozit hisobvaraqlariga moliyaviy mablagʻlarni oʻtkazish yoʻli bilan amalga oshiriladi.

Bunda, moliya yili yakuni boʻyicha foydalanilmay qolgan mablagʻlar Oʻzbekiston Respublikasi Davlat budjetiga qaytariladi.

31. Sportchilar uchun stipendiya toʻlovlari Oʻzbekiston Respublikasi milliy valyutasi — soʻmda amalga oshiriladi.

32. Stipendiya miqdori stipendiyaga nomzod sportchilarning oxirgi bir yilda Olimpiya va Paralimpiya, Osiyo va Paraosiyo oʻyinlari dasturiga kiritilgan sport turlari boʻyicha xalqaro musobaqalarida erishgan natijalariga asosan mehnatga haq toʻlash eng kam miqdorining 3 baravarigacha miqdorda mazkur Nizomning ilovasiga muvofiq belgilanadi.

Bunda, oʻquvchi-sportchilar sport musobaqalarida mazkur Nizomning ilovasida belgilangan natijalarga erishganda ularga ushbu ilovada koʻrsatilgan miqdorda, belgilangan natijalarga erishmagan taqdirda esa mehnatga haq toʻlash eng kam miqdorining 0,5 baravari miqdorida stipendiya tayinlanadi.

33. Stipendiya komissiyasining stipendiya tayinlash va toʻlash toʻgʻrisidagi qarori qabul qilingan oydan boshlab sportchiga stipendiya hisoblanadi va toʻlab boriladi.

34. Stipendiya tayinlangan sportchilar oʻzini oʻzi band qilgan shaxslar sifatida eʼtirof etilish huquqiga ega boʻladi.

35. Masʼul ijrochilar har yarim yilda stipendiya tayinlangan sportchilarning sport natijalarini monitoring qilib boradi va Stipendiya komissiyasiga axborot kiritib boradi.

6-bob. Stipendiya toʻlashni toʻxtatish asoslari va tartibi

36. Stipendiya tayinlangan sportchilarga stipendiya toʻlash quyidagi asoslarga koʻra toʻxtatilishiga yoʻl qoʻyiladi:

1) stipendiya tayinlangan sportchilar sport terma jamoalari tarkibidan chiqarilganda;

2) stipendiya tayinlangan sportchilarga Olimpiya va Paralimpiya oʻyinlarida sovrindor boʻlganligi uchun umrbod oylik toʻlovlar tayinlanganda.

3) oʻquvchi-sportchilar oʻquvchilar safidan chiqarilganda yoki Markazning Olimpiya va Paralimpiya kollejini toʻliq tamomlaganda.

Bunda, oʻquvchi-sportchilar sport terma jamoalari tarkibidan chiqarilganda mehnatga haq toʻlash eng kam miqdorining 0,5 baravari miqdorida stipendiya olishni davom ettiradi.

37. Mazkur Nizomning 36-bandida keltirilgan holatlar aniqlangan vaqtdan boshlab uch ish kunidan kechiktirmasdan Stipendiya komissiyasi mazkur Nizomning 8 — 10-bandlarida belgilangan tartibda stipendiya toʻlashni toʻxtatish toʻgʻrisida qaror chiqaradi.

38. Stipendiya toʻlovlarini toʻlash Stipendiya komissiyasining stipendiya toʻlashni toʻxtatish toʻgʻrisidagi qarori qabul qilingan oyning oxirgi sanasidan toʻxtatiladi.

Oʻquvchi-sportchilarga stipendiya toʻlash Markaz direktorining ularni oʻquvchi-sportchilar safidan chiqarish toʻgʻrisidagi buyrugʻi qabul qilingan yoki Markazning Olimpiya va Paralimpiya kollejini tamomlaganligi toʻgʻrisidagi davlat namunasidagi diplom berilgan oyning oxirgi sanasidan toʻxtatiladi.

7-bob. Yakuniy qoida

39. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Oʻzbekiston Respublikasi Sport vazirligi stipendiyasini tayinlash va toʻlash tartibi toʻgʻrisidagi nizomga ILOVA

Oʻzbekiston Respublikasi Sport vazirligining stipendiyasiga nomzod sportchilarning oxirgi bir yilda Olimpiya va Paralimpiya, Osiyo va Paraosiyo oʻyinlari dasturiga kiritilgan sport turlari boʻyicha xalqaro musobaqalardagi ishtirokiga oid asosiy

MEZONLAR

T/rMusobaqalar nomiOʻrinlarMehnatga haq toʻlash eng kam miqdoriOlimpiya va Paralimpiya oʻyinlari dasturiga kiritilgan sport turlari boʻyicha1.Olimpiya va Paralimpiya oʻyinlari (oʻsmirlar)1 — 3 oʻrin3,0 baravari4 — 6 oʻrin2,5 baravari2.Osiyo va Paraosiyo oʻyinlari (kattalar)1 —2 oʻrin3,0 baravari3 — 4 oʻrin2,5 baravari3.Osiyo va Paraosiyo oʻyinlari (yoshlar)1-oʻrin2,5 baravari2 — 3 oʻrin2,0 baravari4.Jahon chempionati (oʻsmirlar, yoshlar, kattalar)1 — 3 oʻrin3,0 baravari4 — 6 oʻrin2,5 baravari5.Osiyo chempionati (oʻsmirlar, yoshlar, kattalar)*1-oʻrin2,5 baravari2-3 oʻrin2,0 baravari6.Markaziy Osiyo chempionati (kattalar)**1-oʻrin2,0 baravariOsiyo va Paraosiyo oʻyinlari dasturiga kiritilgan noolimpiya sport turlari boʻyicha1.Osiyo va Paraosiyo oʻyinlari (kattalar)1-2 oʻrin3,0 baravari3-oʻrin2,5 baravari2.Jahon chempionati (oʻsmirlar, yoshlar, kattalar)1 — 3 oʻrin2,5 baravari3.Osiyo chempionati (yoshlar, kattalar)1 — 3 oʻrin2,0 baravari

Izohlar:

Sport vazirligi stipendiyasi 16 yosh va undan kattalar uchun tatbiq etiladi.

Yopiq inshootlar va jang sanʼatlari boʻyicha Osiyo oʻyinlari musobaqalarida ishtirok etgan sportchilar hamda oʻquvchi-sportchilarning erishgan natijalari uchun Sport vazirligi stipendiyasi tayinlanmaydi.

* Osiyo-Okeaniya chempionati uchun ham tatbiq etiladi.

** Musobaqalarda kamida 5 ta mamlakatning vakillari va (yoki) terma jamoalari qatnashgan boʻlishi kerak.