Shaxsga doir maʼlumotlar bazasining mulkdori va (yoki) operatorining shaxsga doir maʼlumotlarga ishlov berilishini hamda ularning himoya qilinishini taʼminlovchi tuzilmaviy boʻlinmasi yoki vakolatli shaxsi faoliyatini tashkil etishning namunaviy tartibini tasdiqlash haqida (3477-son)

15.11.2023

Oʻzbekiston Respublikasi Adliya vazirining

buyrugʻi

[Oʻzbekiston Respublikasi Adliya vazirligi tomonidan 2023-yil 15-noyabrda roʻyxatdan oʻtkazildi, roʻyxat raqami 3477]

Oʻzbekiston Respublikasining “Shaxsga doir maʼlumotlar toʻgʻrisida”gi Qonuniga muvofiq buyuraman:

1. Shaxsga doir maʼlumotlar bazasining mulkdori va (yoki) operatorining shaxsga doir maʼlumotlarga ishlov berilishini hamda ularning himoya qilinishini taʼminlovchi tuzilmaviy boʻlinmasi yoki vakolatli shaxsi faoliyatini tashkil etishning namunaviy tartibi ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir A. TAShKULOV

Toshkent sh.,

2023-yil 14-noyabr,

19-mh-son

Oʻzbekiston Respublikasi adliya vazirining 2023-yil 14-noyabrdagi 19-mh-son buyrugʻigaILOVA

Shaxsga doir maʼlumotlar bazasining mulkdori va (yoki) operatorining shaxsga doir maʼlumotlarga ishlov berilishini hamda ularning himoya qilinishini taʼminlovchi tuzilmaviy boʻlinmasi yoki vakolatli shaxsi faoliyatini tashkil etishning

NAMUNAVIY TARTIBI

Ushbu Namunaviy tartib shaxsga doir maʼlumotlar bazasining mulkdori va (yoki) operatorining shaxsga doir maʼlumotlarga ishlov berilishini hamda ularning himoya qilinishini taʼminlovchi tuzilmaviy boʻlinmasi (bundan buyon matnda boʻlinma deb yuritiladi) yoki vakolatli shaxsi faoliyatini tashkil etish tartibini belgilaydi.

1-bob. Umumiy qoidalar

1. Mazkur Namunaviy tartibda quyidagi asosiy tushunchalar qoʻllaniladi:

shaxsga doir maʼlumotlar — muayyan jismoniy shaxsga taalluqli boʻlgan yoki uni identifikatsiya qilish imkonini beradigan, elektron tarzda, qogʻozda va (yoki) boshqa moddiy jismda qayd etilgan axborot;

shaxsga doir maʼlumotlar subyekti (subyekt) — shaxsga doir maʼlumotlar oʻziga taalluqli boʻlgan jismoniy shaxs;

shaxsga doir maʼlumotlar bazasi — tarkibida shaxsga doir maʼlumotlar mavjud boʻlgan axborot tizimi tarzidagi maʼlumotlar bazasi;

shaxsga doir maʼlumotlarga ishlov berish — shaxsga doir maʼlumotlarni yigʻish, tizimlashtirish, saqlash, oʻzgartirish, toʻldirish, ulardan foydalanish, ularni berish, tarqatish, uzatish, egasizlantirish va yoʻq qilish boʻyicha bir harakatni yoki harakatlar majmuini amalga oshirish;

shaxsga doir maʼlumotlar bazasining operatori (operator) — shaxsga doir maʼlumotlarga ishlov berishni amalga oshiruvchi davlat organi, jismoniy va (yoki) yuridik shaxs;

shaxsga doir maʼlumotlar bazasining mulkdori (mulkdor) — shaxsga doir maʼlumotlar bazasiga egalik qilish, undan foydalanish va uni tasarruf etish huquqiga ega boʻlgan davlat organi, jismoniy va (yoki) yuridik shaxs;

vakolatli shaxs — mulkdor va (yoki) operator tomonidan tayinlangan, shaxsga doir maʼlumotlarga ishlov berilishini hamda ularning himoya qilinishini taʼminlovchi masʼul shaxs;

boʻlinma — mulkdor va (yoki) operator tomonidan tayinlangan, shaxsga doir maʼlumotlarga ishlov berilishini hamda ularning himoya qilinishini taʼminlash uchun tashkil etiladigan ikki va undan ortiq masʼul shaxslardan iborat boʻlinma;

shaxsga doir maʼlumotlarning maxfiyligi — shaxsga doir maʼlumotlar subyektining roziligisiz yoki boshqa qonuniy asos mavjud boʻlmagani holda shaxsga doir maʼlumotlarni oshkor etish va tarqatishga yoʻl qoʻyilmasligi boʻyicha rioya etilishi majburiy boʻlgan talab;

shaxsga doir maʼlumotlarni bloklash (cheklash) — shaxsga doir maʼlumotlarga ishlov berishni vaqtincha toʻxtatish (shaxsga doir maʼlumotlarni aniqlashtirish uchun ishlov berish zarur boʻlgan hollar bundan mustasno).

2-bob. Boʻlinma yoki vakolatli shaxs faoliyatini tashkil etish

2. Shaxsga doir maʼlumotlarga ishlov berilishi va ularning himoya qilinishini taʼminlash uchun vazifalar hajmi, maʼlumotlar bazalarining soni hamda ularning avtomatlashtirilganlik darajasidan kelib chiqib, mulkdor va (yoki) operator tomonidan boʻlinma tashkil etiladi yoki vakolatli shaxs tayinlanadi.

3. Boʻlinma yoki vakolatli shaxs faqat mulkdor va (yoki) operatorning qonuniy topshiriqlarini bajaradi hamda bevosita mulkdor va (yoki) operator rahbari oldida javobgar hisoblanadi.

4. Boʻlinma yoki vakolatli shaxs oʻz faoliyatini Oʻzbekiston Respublikasining “Shaxsga doir maʼlumotlar toʻgʻrisida”gi Qonuni, shaxsga doir maʼlumotlar sohasidagi boshqa qonunchilik hujjatlari, ushbu Namunaviy tartib talablariga hamda mulkdor va (yoki) operator tomonidan tasdiqlangan ichki tartib qoidalarga muvofiq amalga oshiradi.

5. Boʻlinma rahbari va xodimlari yoki vakolatli shaxs boshqa ishga oʻtkazilganda (boʻlinma tugatilganda) yoki ular bilan tuzilgan mehnat shartnomasi bekor qilinganda, ularning maʼlumotlar bazasiga kirish huquqi mulkdor va (yoki) operator tomonidan oxirgi ish kunidan kechiktirmasdan bekor qilinishi shart.

3-bob. Boʻlinma yoki vakolatli shaxsning vazifalari, huquq va majburiyatlari

6. Quyidagilar boʻlinma yoki vakolatli shaxsning asosiy vazifalari hisoblanadi:

shaxsga doir maʼlumotlarga ishlov berishda ularning himoya qilinishini, yaxlitligini va but saqlanishini hamda maxfiyligiga rioya etilishini taʼminlash;

shaxsga doir maʼlumotlarga qonunga xilof ravishda ishlov berilishining oldini olish, qonunchilikda belgilangan talablar buzilganligi aniqlangan hollarda mulkdor va (yoki) operator bilan kelishgan holda shaxsga doir maʼlumotlarni bloklash (cheklash);

mulkdor va (yoki) operatorning shaxsga doir maʼlumotlar bazasi xavfsizligini taʼminlash boʻyicha axborot xavfsizligi siyosatini tashkil etish va muvofiqlashtirish;

shaxsga doir maʼlumotlar bilan ishlovchi xodimlar uchun seminar-treninglar tashkil etish;

mulkdor va (yoki) operatorning shaxsga doir maʼlumotlar bazasi xavfsizligini taʼminlashda ularga tahdid soladigan sabablarni oʻrganish hamda mavjud kamchiliklarni bartaraf etish va ularning oldini olish boʻyicha taklif va tavsiyalar ishlab chiqish.

Boʻlinma yoki vakolatli shaxs qonunchilik hujjatlariga muvofiq boshqa vazifalarni ham amalga oshirishi mumkin. Bunda, mulkdor va (yoki) operator boʻlinma yoki vakolatli shaxs tomonidan bajariladigan har qanday vazifalarning manfaatlar toʻqnashuviga olib kelmasligini taʼminlashi kerak.

7. Boʻlinma yoki vakolatli shaxs quyidagi huquqlarga ega:

shaxsga doir maʼlumotlar bazasida aniqlangan kamchiliklar bartaraf etilgunga qadar mulkdor va (yoki) operatorning ruxsati bilan shaxsga doir maʼlumotlar bazalari ishini vaqtincha toʻxtatish;

shaxsga doir maʼlumotlar bilan ishlash jarayonida kelib chiqadigan har qanday muammo va (yoki) tushunmovchiliklar yuzasidan Oʻzbekiston Respublikasi Adliya vazirligi huzuridagi Personallashtirish agentligidan tegishli tavsiyalarni olish uchun ushbu Agentlikka murojaat qilish;

oʻz vazifalarini amalga oshirish uchun mulkdor va (yoki) operatorda mavjud shaxsga doir maʼlumotlar bazasiga cheklovlarsiz kirish;

shaxsga doir maʼlumotlarga ishlov berish maqsadlari haqida mulkdor va (yoki) operatordan maʼlumot olish.

Boʻlinma yoki vakolatli shaxs qonunchilik hujjatlari va (yoki) mulkdor yoki operator tomonidan tasdiqlangan ichki tartib qoidalariga muvofiq boshqa huquqlarga ham ega boʻlishi mumkin.

8. Boʻlinma yoki vakolatli shaxsning majburiyatlari quyidagilardan iborat:

mulkdor va (yoki) operatorning xodimlari tomonidan shaxsga doir maʼlumotlar toʻgʻrisidagi qonunchilik hujjatlariga rioya etilishi ustidan ichki nazoratni amalga oshirish;

shaxsga doir maʼlumotlar bazasi va mazkur bazada ishlovchi xodimlarning faoliyatini davriy tekshiruvlardan oʻtkazish va shaxsga doir maʼlumotlarga ishlov berish holati va amaliyotini yaxshilash;

shaxsga doir maʼlumotlarni saqlash muddati tugaganida yoki ularni yigʻish va ularga ishlov berish maqsadiga erishilgandan soʻng shaxsga doir maʼlumotlarning yoʻq qilinishini tashkil etish;

shaxsga doir maʼlumotlarni himoya qilish boʻyicha huquqiy, tashkiliy va texnik choralarni koʻrish;

shaxsga doir maʼlumotlar bazalarida ishlash huquqi berilgan xodimlar roʻyxatini shakllantirish, shaxsga doir maʼlumotlar bazalaridan foydalangan mulkdor va (yoki) operator xodimining logini, foydalanish vaqti, resurs nomi va boshqa maʼlumotlar aks ettirilgan elektron qaydlarni yuritish va tahlil qilib borish;

shaxsga doir maʼlumotlarga ruxsatsiz kirish natijasida oʻzgartirilgan yoki yoʻq qilingan shaxsga doir maʼlumotlarni qayta tiklash imkoniyatini taʼminlash;

shaxsga doir maʼlumotlar bazasidagi maʼlumotlarni saqlash, oʻzgartirish, toʻldirish, ulardan foydalanish, ularni berish, tarqatish, uzatish, egasizlantirish va yoʻq qilish, bloklash (cheklash), ruxsatsiz foydalanishga urinishlarni aniqlash, tahlil qilish hamda ularni tezkorlik bilan bartaraf etish choralarini koʻrish;

zaruratga koʻra, shaxsga doir maʼlumotlar saqlanadigan server qurilmalaridagi elektron (raqamli) maʼlumotlarni boshqa hududda nusxasining (replikatsiya) real vaqt rejimida saqlanishini taʼminlash boʻyicha ishlarni tashkillashtirish;

mehnat faoliyati davomida va undan keyingi davrda shaxsga doir maʼlumotlarning maxfiyligini taʼminlash.

Boʻlinma yoki vakolatli shaxs qonunchilik hujjatlari va (yoki) mulkdor yoki operator tomonidan tasdiqlangan ichki tartib qoidalariga muvofiq boshqa majburiyatlarni ham amalga oshirishi mumkin.

4-bob. Yakunlovchi qoida

9. Mazkur Namunaviy tartib talablarining buzilishida aybdor boʻlgan shaxslar qonunchilikda belgilangan tartibda javobgar boʻladi.