Oʻzbekiston Respublikasi Sport vazirligi tizimidagi sport-taʼlim tashkilotlarida xizmatlar koʻrsatishni autsorsing asosida tashkil etish tartibi toʻgʻrisidagi nizomni tasdiqlash haqida (598-son)

15.11.2023

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Maʼmuriy islohotlar doirasida yoshlar siyosati va sport sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 7-apreldagi PQ-114-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2023-yil 7-apreldagi PQ-114-son qarori bilan tasdiqlangan Yoshlar siyosati va sport sohasida islohotlarni chuqurlashtirish va tizim faoliyatini transformatsiya qilish boʻyicha “yoʻl xaritasi”ning 15-bandida davlat sport-taʼlim muassasalarida xoʻjalik, jumladan, sportchi-oʻquvchilarni ovqatlantirish xizmatlarini autsorsing asosida amalga oshirishni yoʻlga qoʻyish belgilanganligi maʼlumot uchun qabul qilinsin.

2. Quyidagilar:

Oʻzbekiston Respublikasi Sport vazirligi tizimidagi sport-taʼlim tashkilotlarida autsorsingga oʻtkaziladigan xizmatlar roʻyxati 1-ilovaga muvofiq;

Oʻzbekiston Respublikasi Sport vazirligi tizimidagi sport-taʼlim tashkilotlarida xizmatlar koʻrsatishni autsorsing asosida tashkil etish tartibi toʻgʻrisidagi nizom 2-ilovaga muvofiq tasdiqlansin.

3. Belgilab qoʻyilsinki:

sport-taʼlim tashkilotlarida xizmatlar autsorsing asosida mazkur qarorga 1-ilovada keltirilgan roʻyxatga muvofiq koʻrsatiladi;

sport-taʼlim tashkilotlarida autsorsing asosida ovqatlantirishni tashkil etishda autsorser vaqtincha foydalanadigan oshxonaning ishlab chiqarish xonalari, asbob-uskunalari, idish-tovoqlari va mebel jihozlari tekin foydalanish shartnomasi asosida beriladi;

xizmatlar koʻrsatilishi autsorsing asosida tashkil etilishi munosabati bilan tejalgan Davlat budjeti mablagʻlari, birinchi navbatda, sport-taʼlim tashkilotlarining moddiy-texnik bazasini yaxshilashga yoʻnaltiriladi.

4. Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi Sport vazirligi bilan birgalikda:

sport-taʼlim tashkilotlarida autsorsing asosida ovqatlantirishni tashkil etish boʻyicha oziq-ovqat mahsulotlari va tayyorlanayotgan taomlar, shuningdek, ularda foydalaniladigan texnologik jihozlarning sanitariya qoidalari, normalari va gigiyena normativlariga mosligi;

oshxonalar xodimlari tomonidan sanitariya-gigiyena tadbirlari bajarilishiga qatʼiy rioya etilishi ustidan nazorat olib borsin.

5. Oʻzbekiston Respublikasi Yoshlar siyosati va sport vazirligi:

2024-yil 1-yanvarga qadar kamida 10 ta sport-taʼlim tashkilotlarida ovqatlantirishni autsorsing asosida tashkil etsin;

mazkur qarorga 1-ilovada keltirilgan autsorsingga oʻtkaziladigan xizmatlarni sport-taʼlim tashkilotlarida joriy qilish choralarini koʻrsin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi yoshlar siyosati va sport vaziri A.I. Ikramov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2023-yil 15-noyabr,

598-son

Vazirlar Mahkamasining 2023-yil 15-noyabrdagi 598-son qaroriga 1-ILOVA

Oʻzbekiston Respublikasi Sport vazirligi tizimidagi sport-taʼlim tashkilotlarida autsorsingga oʻtkaziladigan xizmatlar

ROʻYXATI

T/r Xizmat turi 1. Sportchi-oʻquvchilarni ovqatlantirish 2. Kir yuvish 3. Bino va inshootlarni saqlab turish, shuningdek, ularning muhandislik-texnik tizimlariga xizmat koʻrsatish va ularni taʼmirlash

Vazirlar Mahkamasining 2023-yil 15-noyabrdagi 598-son qaroriga 2-ILOVA

Oʻzbekiston Respublikasi Sport vazirligi tizimidagi sport-taʼlim tashkilotlarida xizmatlar koʻrsatishni autsorsing asosida tashkil etish tartibi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Sport vazirligi (keyingi oʻrinlarda — Vazirlik) tizimidagi sport-taʼlim tashkilotlarida xizmatlar koʻrsatishni autsorsing asosida tashkil etish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

autsorsing — Vazirlik tizimidagi sport-taʼlim tashkilotlarining ayrim funksiya va xizmatlarini shartnoma asosida tadbirkorlik subyektiga oʻtkazish;

autsorser — Vazirlik tizimidagi sport-taʼlim tashkilotlariga shartnoma asosida xoʻjalik faoliyati bilan bogʻliq ishlarni bajarish xizmatini koʻrsatuvchi tadbirkorlik subyekti;

buyurtmachi — Vazirlik tizimidagi sport-taʼlim tashkilotlari;

talabgor — sport-taʼlim tashkilotlariga autsorsing asosida xizmat koʻrsatish hamda ushbu Nizomga muvofiq tanlashda ishtirok etish istagini bildirgan tadbirkorlik subyekti.

3. Buyurtmachi xizmatlarini autsorsingga oʻtkazishda quyidagi shartlarga rioya qilishi shart:

autsorserni qonunchilik hujjatlari asosida tanlab olish hamda unga oʻtkaziladigan ishlar (xizmatlar) sifatini oshirish;

buyurtmachining autsorserga oʻtkaziladigan ishlar (xizmatlar)ni bajarish bilan band boʻlgan xodimlar sonini (shtatini) qisqartirish.

Buyurtmachi xizmatlarni autsorserga oʻtkazishda ularning iqtisodiy samaradorligini oshirish va xoʻjalik faoliyati xarajatlarini qisqartirish hamda autsorserga oʻtkazilgan ishlar (xizmatlar)ning sifatini oshirishi lozim.

4. Autsorser xodimlarining buyurtmachiga tegishli hududga belgilangan tartibda oldindan taqdim etilgan roʻyxat asosida kirishiga ruxsat beriladi.

5. Autsorsing xizmatini koʻrsatish jarayonida maxfiylik tartibiga rioya etish buyurtmachi tomonidan taʼminlanadi.

2-bob. Autsorsing xizmatlariga narx belgilash tartibi

6. Autsorsing xizmatlariga haq toʻlash miqdorlari buyurtmachi tomonidan tegishli xizmat uchun sarflanadigan barcha xarajatlar (ish haqi, ish haqiga ajratma, moddiy va boshqa xarajatlar) summasidan kelib chiqib belgilanadi.

Bunda buyurtmachining xizmatlarni autsorserga oʻtkazishda ularning iqtisodiy samaradorligini oshirish maqsadida autsorserga toʻlanadigan haq miqdori ushbu xizmat uchun buyurtmachi tomonidan budjet va budjetdan tashqari mablagʻlari hisobidan sarflanadigan barcha xarajatlaridan oshib ketmasligi kerak.

3-bob. Autsorserni tanlash, shartnoma tuzish va hisob-kitoblarni amalga oshirish tartibi

7. Autsorser Oʻzbekiston Respublikasining “Davlat xaridlari toʻgʻrisida”gi Qonuni va boshqa qonunchilik hujjatlariga muvofiq tanlanadi.

8. Oʻzbekiston Respublikasi Prezidentining “Oʻzbekiston Respublikasining “Davlat xaridlari toʻgʻrisida”gi Qonunini amalga oshirish chora-tadbirlari toʻgʻrisida” 2018-yil 27-sentabrdagi PQ-3953-son qaroriga muvofiq davlat buyurtmachilari tomonidan toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar) roʻyxatida nazarda tutilgan ishlar yoki xizmatlar boʻyicha autsorser buyurtmachi huzurida faoliyat koʻrsatadigan Xarid komissiyasi (keyingi oʻrinlarda — Xarid komissiyasi) tomonidan katta ish tajribasiga, tegishli moliyaviy va moddiy-texnik bazasiga ega boʻlgan talabgorlarga ustunlik bergan holda ularning narxlarni oʻrganish orqali aniqlanadi.

9. Talabgorlarga nisbatan quyidagi talablar qoʻyiladi:

shartnoma tuzish uchun qonuniy huquqqa egaligi;

shartnomani bajarish uchun zarur texnik, moddiy, kadrlar resurslarining hamda boshqa resurslarning mavjudligi;

autsorsing xizmati boʻyicha kamida uch oylik shartnoma summasiga teng aylanma mablagʻlarga ega boʻlishi;

soliqlar va yigʻimlarni toʻlash boʻyicha muddati oʻtgan qarzdorlikning mavjud emasligi;

oʻziga nisbatan joriy etilgan bankrotlik tartib-taomillarining mavjud emasligi;

insofsiz ijrochilarning yagona reyestrida qayd etilmaganligi;

qonunchilik hujjatlariga muvofiq xabardor etish, litsenziya yoki ruxsat berish talab etiladigan faoliyat turlari boʻyicha vakolatli organni xabardor qilgan, tegishli litsenziya yoki ruxsat olgan boʻlishi.

10. Buyurtmachi tomonidan autsorser ushbu Nizomga ilovaga muvofiq sxema asosida tanlanadi.

11. Autsorserni tanlashda buyurtmachi tomonidan toq sonli va kamida besh nafar aʼzodan iborat tarkibda Xarid komissiyasi tuziladi.

Buyurtmachi Xarid komissiyasining har bir aʼzosiga va masʼul kotibiga oʻz vazifalarini amalga oshirish uchun davlat xaridlarining elektron tizimida shaxsiy kabinet ochadi.

12. Buyurtmachi tomonidan autsorserni tanlash toʻgʻrisidagi qaror qabul qilinadi.

13. Autsorserni tanlash toʻgʻrisida qaror qabul qilinganidan soʻng uch kun ichida buyurtmachining masʼul tarkibiy boʻlinmasi tomonidan xarid hujjatlari, shartnoma va tanlash haqidagi eʼlonning matni ishlab chiqilib, Xarid komissiyasiga kelishish uchun elektron shaklda taqdim etiladi.

14. Xarid komissiyasi tomonidan xarid hujjatlari, shartnoma va tanlash haqidagi eʼlonning matni uch kun ichida koʻrib chiqilib, kelishiladi hamda buyurtmachiga yuboriladi.

15. Buyurtmachi bir kun ichida Xarid komissiyasi bilan kelishilgan xarid hujjatlarini elektron raqamli imzo bilan tasdiqlaydi.

16. Tasdiqlangan xarid hujjatlari, shartnoma loyihasi, shuningdek, autsorserni tanlash haqidagi eʼlon talabgorlarning takliflarini qabul qilish muddati tugashidan kamida besh ish kunidan oldin buyurtmachi tomonidan davlat xaridlarining elektron tizimiga joylashtiriladi.

17. Talabgorlar takliflarini oʻzlarining shaxsiy kabinetlari orqali eʼlonda koʻrsatilgan muddatdan kechiktirmay taqdim etadilar.

18. Takliflarni ochish muddati kelgunga qadar takliflar talabgorlar, shuningdek, Xarid komissiyasi masʼul kotibi va aʼzolar tomonidan koʻrilishiga yoʻl qoʻyilmaydi (ushbu takliflarni taqdim etgan talabgorlar bundan mustasno).

19. Davlat xaridlarining elektron tizimi talabgor taklif etgan narxning boshlangʻich narxga muvofiqligini va elektron maydonlarning toʻldirilganligini hamda biriktirilgan fayllarning mavjudligini tekshiradi.

Talabgor tomonidan taklif etilgan narx boshlangʻich narxdan yuqori boʻlsa, shuningdek, toʻldirilishi majburiy boʻlgan maydonlar toʻldirilmagan boʻlsa yoki biriktirilishi majburiy boʻlgan fayllar mavjud boʻlmasa, davlat xaridlarining elektron tizimida rad etish sababi koʻrsatilgan holda talabgorning taklifi rad etiladi.

Biriktirilgan fayllardagi maʼlumotlarning talabgor taklifida koʻrsatilgan maʼlumotlarga muvofiqligi Xarid komissiyasining masʼul kotibi tomonidan tekshiriladi.

20. Agar taklif Oʻzbekiston Respublikasining “Davlat xaridlari toʻgʻrisida”gi Qonuni va xarid hujjatlari talablariga muvofiq boʻlsa, u Xarid komissiyasi tomonidan rasmiylashtirilgan deb topiladi.

Talabgorning taklifi talablarga mos kelmaganligi toʻgʻrisidagi qaror ushbu qaror qabul qilingan kunda talabgorning shaxsiy kabinetiga yuboriladi.

21. Gʻolib xarid hujjatlarida belgilangan mezonlar va usul asosida aniqlanadi.

Taklifning miqdoriy koʻrsatkichlari, shu jumladan, narx qismi davlat xaridlarining elektron tizimi tomonidan avtomatik tarzda baholanadi.

22. Takliflarni koʻrib chiqish hamda baholash natijalari davlat xaridlarining elektron tizimida avtomatik tarzda shakllangan dastlabki elektron bayonnomada qayd etiladi va uni oʻtkazish boʻyicha Xarid komissiyasi aʼzolari tomonidan elektron raqamli imzodan foydalangan holda imzolanadi.

23. Dastlabki elektron bayonnoma rasmiylashtirilgan kunda davlat xaridlarining elektron tizimida muhokama qilish uchun ikki ish kuniga joylashtiriladi.

Ikki ish kuni ichida talabgorlar tomonidan natijalar boʻyicha eʼtirozlar tushmagan boʻlsa, bu toʻgʻrisida Xarid komissiyasining tegishli majlisining elektron bayonnomasi rasmiylashtiriladi va davlat buyurtmachisi bilan gʻolib deb topilgan talabgor oʻrtasida shartnoma tuziladi.

24. Autsorserni tanlash natijalari boʻyicha talabgorlardan eʼtirozlar tushganda, Xarid komissiyasi eʼtirozlarni ikki ish kuni ichida koʻrib chiqadi va tegishli qaror qabul qiladi.

25. Buyurtmachi tomonidan Xarid komissiyasiga taqdim etilgan muhokama natijalari toʻgʻrisidagi axborot asosida Xarid komissiyasining tegishli majlisining elektron bayonnomasi rasmiylashtiriladi va bayonnoma imzolangan kundan boshlab uch ish kuni ichida davlat xaridlarining elektron tizimiga joylashtiriladi.

26. Autsorserni tanlash natijalariga doir shartnoma xarid hujjatlarida va oʻzi bilan shartnoma tuzilayotgan talabgor tomonidan taqdim etilgan taklifda nazarda tutilgan shartlar asosida gʻolib aniqlangan vaqtdan boshlab oʻn ish kunidan kechiktirmasdan tuziladi.

Bunda shartnoma moliya yili boshida yilning birinchi choragi uchun buyurtmachining vaqtincha xarajatlar smetasida ushbu xizmatlar uchun ajratilgan mablagʻlar doirasida, yilning 1-aprel holatiga koʻra esa, asosiy xarajatlar smetasida ajratilgan yillik mablagʻlar doirasida joriy moliya yili oxiriga qadar (kalendar yil uchun oʻquvchi-sportchilarga beriladigan taʼtillarni inobatga olgan holda) amal qilinishini nazarda tutgan holda tuziladi.

27. Autsorserni tanlash natijalariga koʻra shartnoma elektron shaklda tuziladi hamda Shartnomalarning yagona reyestriga kiritiladi.

28. Koʻrsatilgan xizmatlar hisob-kitobi shartnoma oylik summasining 15 foizi oldindan oʻtkazib berilganidan, qolgan 85 foizi haqiqatda koʻrsatilgan xizmatlar summasidan kelib chiqib har 10 kunda, yakuniy hisob- kitob esa — keyingi oyning 10-sanasiga qadar amalga oshiriladi.

29. Uquv yili davomida oʻquvchi-sportchilar soni oʻzgarganda hamda Oʻzbekiston Respublikasi Prezidenti va Vazirlar Mahkamasining qarorlariga asosan kiritilgan oʻzgartirish va qoʻshimchalar asosida tasdiqlangan oʻrtacha bozor narxlari keskin oʻzgarganda, autsorser va buyurtmachi tomonidan shartnoma boʻyicha umumiy boshlangʻich summaning 10 foizidan oshmagan miqdorda qoʻshimcha shartnoma tuzilishi mumkin.

4-bob. Autsorser va buyurtmachining huquqlari va majburiyatlari

30. Autsorser quyidagi huquqlarga ega:

foydalaniladigan kommunal xizmatlar qiymati belgilangan limit va tashkilotga ajratilgan budjet mablagʻlari doirasida qoplanishini talab qilish;

koʻrsatgan xizmatlari uchun toʻlovni shartnomada belgilangan miqdor va muddatda talab qilish;

xizmatlar tannarxining oʻzgarishi munosabati bilan shartnomaga oʻzgartirish kiritish taklifi bilan chiqish;

buyurtmachidan shartnoma shartlarining bajarilishini talab qilish.

Autsorser qonunchilik hujjatlariga hamda shartnomaga muvofiq boshqa huquqlarga ham ega boʻlishi mumkin.

31. Autsorser:

ijaraga olingan bino va inshootlar, jihozlardan maqsadli hamda oqilona foydalanishi, saqlashi, nosoz holga kelganda ularni oʻz hisobidan taʼmirlashi;

autsorsing xizmatini koʻrsatishda texnika, yongʻin, mehnat muhofazasi hamda sanitariya qoidalari, normalari va gigiyena normativlariga qatʼiy rioya etishi;

tovar (ishlar, xizmatlar)ning sifatli ishlab chiqarilishini va buyurtmachiga yetkazilishini taʼminlashi;

maxfiylik tartibiga qatʼiy rioya qilishi;

shartnomani bekor qilish haqida buyurtmachini ikki oy oldin yozma ravishda ogohlantirishi, ushbu muddat tugaguniga qadar esa buyurtmachining tegishli xizmatlarini uzluksiz tashkil etishni taʼminlashi lozim.

Autsorser zimmasiga qonunchilik hujjatlariga va shartnomaga muvofiq boshqa majburiyatlar ham yuklanishi mumkin.

32. Buyurtmachi quyidagi huquqlarga ega:

tovarlar (ishlar, xizmatlar) sifatli ishlab chiqarilishi (bajarilishi, koʻrsatilishi)ni talab qilish;

ijara shartnomasi doirasida autsorserga vaqtincha foydalanishga beriladigan texnologik jihozlar, oshxona va omborxonalar, asbob- uskunalar, idish-tovoqlar va mebellardan foydalanish uchun nol stavkada topshirish va ularning ishchi holatda saqlanishini nazorat qilish;

autsorserning faoliyatiga aralashmagan holda, shartnoma shartlarining bajarilishini nazorat qilish.

Buyurtmachi qonunchilik hujjatlariga hamda shartnomaga muvofiq boshqa huquqlarga ham ega boʻlishi mumkin.

33. Buyurtmachi shartnomaga muvofiq belgilangan muddat va shartlar asosida autsorserga koʻrsatilgan xizmatlar uchun, shuningdek, foydalaniladigan kommunal xizmatlar xarajatlari boʻyicha toʻlovlarni belgilangan normalar asosida sport-taʼlim tashkilotlariga ajratilgan budjet mablagʻlari doirasida oʻz vaqtida amalga oshirishi lozim.

Buyurtmachi zimmasiga qonunchilik hujjatlari va shartnomaga muvofiq boshqa majburiyatlar ham yuklanishi mumkin.

34. Autsorsing xizmatlarini tashkil etishda qonunchilik hujjatlari talablariga rioya etilishi boʻyicha buyurtmachi va autsorser masʼul hisoblanadi.

5-bob. Autsorsing xizmati koʻrsatilishi yuzasidan nazorat va monitoringni amalga oshirish

35. Autsorsing xizmati koʻrsatilishi yuzasidan nazorat va monitoring buyurtmachi tomonidan shartnomada belgilangan shartlarda va muddatlarda amalga oshiriladi.

36. Autsorsing xizmati koʻrsatilishi yuzasidan monitoring buyurtmachi tashkil etadigan komissiya (keyingi oʻrinlarda — komissiya) tomonidan amalga oshiriladi.

37. Komissiya tarkibi sport-taʼlim tashkilotlari pedagogik kengashining qaroriga asosan tasdiqlanadi.

Komissiya tarkibiga sport-taʼlim tashkilotlari oʻquvchi- sportchilarining kamida uch nafar ota-onalari kiritilishi lozim.

38. Komissiya:

autsorsing xizmati koʻrsatilishi yuzasidan doimiy monitoring olib boradi, jumladan, sport-taʼlim tashkiloti xodimlari va oʻquvchi- sportchilari oʻrtasida soʻrovnomalar oʻtkazadi;

monitoring natijalaridan kelib chiqib, buyurtmachi va autsorserga tegishli taklif va tavsiyalar kiritadi;

oshxona va omborlarda sanitariya qoidalari, normalari va gigiyena normativlariga rioya qilinishi hamda epidemiyaga qarshi tadbirlar talablarining buzilish holatlarini bartaraf etish choralarini koʻradi;

tayyor taom va oziq-ovqat mahsulotlarining belgilangan kunlik meʼyorlarga mos boʻlishini hamda sifatini oʻrganadi, zarur holatlarda chetdan mutaxassislar jalb etadi.

Komissiya buyurtmachi tomonidan yuklangan boshqa vakolatlarni ham amalga oshirishi mumkin.

39. Autsorser tomonidan tashkil etilgan xizmatlarning sanitariya qoidalari, normalari va gigiyena normativlariga, shuningdek, texnik tartibga solish sohasidagi boshqa normativ hujjatlar talablariga toʻliq muvofiqligi vakolatli davlat organlari hamda Vazirlikning tegishli boʻlinmalari tomonidan nazorat qilinadi.

6-bob. Yakunlovchi qoidalar

40. Ushbu Nizomda nazarda tutilgan talablarning buzilishi buyurtmachi va autsorser oʻrtasida tuzilgan shartnomaning belgilangan tartibda bekor qilinishiga asos boʻladi.

41. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Oʻzbekiston Respublikasi Sport vazirligi tizimidagi sport-taʼlim tashkilotlarida xizmatlar koʻrsatishni autsorsing asosida tashkil etish tartibi toʻgʻrisidagi nizomga ILOVA

Buyurtmachi tomonidan autsorserni tanlash

SXEMASI

Bosqichlar Subyektlar Chora-tadbirlar Muddatlar 1-bosqich Buyurtmachi 1. Toq sonli va kamida besh nafar aʼzodan iborat tarkibda xarid komissiyasini tuzadi. 2. Autsorserni tanlash toʻgʻrisida qaror qabul qiladi. Zaruratga koʻra 2-bosqich Buyurtmachi Xarid hujjatlari, shartnoma va autsorserni tanlash haqidagi eʼlonning matnini ishlab chiqib, Xarid komissiyasiga kelishish uchun elektron shaklda taqdim etadi. Autsorserni tanlash toʻgʻrisida qaror qabul qilinganidan soʻng uch kun ichida 3-bosqich Xarid komissiyasi Xarid hujjatlari, shartnoma va autsorserni tanlash haqidagi eʼlonning matnini koʻrib chiqadi va kelishilgan hujjatlarni buyurtmachiga yuboradi. Uch kun ichida 4-bosqich Buyurtmachi 1. Xarid komissiyasi bilan kelishilgan xarid hujjatlarini elektron raqamli imzo bilan tasdiqlaydi. 1. Bir kun ichida 2. Xarid hujjatlari, shuningdek, autsorserni tanlash haqidagi eʼlonni davlat xaridlarining elektron tizimiga joylashtiradi. 2. Talabgorlarning takliflarini qabul qilish muddati tugashidan kamida besh ish kunidan oldin 5-bosqich Talabgor Elektron taklifni oʻzining shaxsiy kabineti orqali taqdim etadi. Eʼlonda koʻrsatilgan muddatdan kechiktirmay 6-bosqich Davlat xaridlarining elektron tizimi 1. Talabgor taklif etayotgan narxning boshlangʻich narxga muvofiqligini va elektron maydonlarning toʻldirilganligini hamda biriktirilgan fayllarning mavjudligini tekshiradi. Takliflarni qabul qilish muddati tugaguniga qadar 2. Talabgor tomonidan taklif etilayotgan narx boshlangʻich narxdan yuqori boʻlsa, shuningdek, toʻldirilishi majburiy boʻlgan maydonlar toʻldirilmagan boʻlsa yoki biriktirilishi majburiy boʻlgan fayllar mavjud boʻlmasa, rad etish sababini koʻrsatgan holda talabgorning taklifini rad etadi. 3. Taklif talablarga mos kelmaganligi toʻgʻrisidagi qarorni talabgorning shaxsiy kabinetiga yuboradi. Qaror qabul qilingan kunda 7-bosqich Davlat xaridlarining elektron tizimi 1. Tanlash toʻgʻrisidagi taklifning miqdoriy koʻrsatkichlarini, shu jumladan, narx qismini baholaydi. 1. Takliflar berish tugagan paytdan eʼtiboran oʻn ish kunidan koʻp boʻlmagan muddatda 2. Takliflarni koʻrib chiqish hamda baholash natijalari boʻyicha dastlabki elektron bayonnomani shakllantiradi. 2. Avtomatik tarzda 8-bosqich Xarid komissiyasi aʼzolari Dastlabki elektron bayonnomani elektron raqamli imzodan foydalangan holda imzolaydi. Takliflar berish tugagan paytdan eʼtiboran oʻn ish kunidan koʻp boʻlmagan muddatda 9-bosqich Davlat xaridlarining elektron tizimi 1. Dastlabki elektron bayonnomani muhokama uchun joylashtiradi. 1. Avtomatik tarzda 2. Elektron bayonnoma muhokamasini oʻtkazadi. 2. Ikki ish kuni ichida 10-bosqich Xarid komissiyasi Talabgorlar tomonidan tanlov oʻtkazish natijalari boʻyicha eʼtirozlar tushmagan boʻlsa, bu toʻgʻrisida tegishli elektron bayonnomani rasmiylashtiradi. Ikki ish kuni ichida 11-bosqich Buyurtmachi Gʻolib deb topilgan talabgor bilan elektron shaklda shartnoma tuzadi. Un ish kuni ichida 12-bosqich Davlat xaridlarining elektron tizimi Tuzilgan shartnoma toʻgʻrisidagi maʼlumotlarni Shartnomalarning yagona reyestriga joylashtiradi. Avtomatik tarzda