Falastinlik qochqinlarga yordam berish va ishlarni tashkil etish boʻyicha Birlashgan Millatlar Tashkilotining Yaqin Sharq agentligiga gumanitar yordam ajratish toʻgʻrisida (PQ-354-son)

01.11.2023

Oʻzbekiston Respublikasi Prezidentining

Qarori

Falastinlik qochqinlarga yordam berish va ishlarni tashkil etish boʻyicha Birlashgan Millatlar Tashkilotining Yaqin Sharq agentligi (UNRWA) tomonidan olib borilayotgan Falastin xalqi uchun gumanitar yordam koʻrsatish tadbirlarini moliyaviy qoʻllab-quvvatlash maqsadida:

1. Vazirlar Mahkamasining zaxira jamgʻarmasi hisobidan Falastinlik qochqinlarga yordam berish va ishlarni tashkil etish boʻyicha Birlashgan Millatlar Tashkilotining Yaqin Sharq agentligiga gumanitar yordam koʻrsatish uchun 1,5 million AQSh dollari ajratilsin.

2. Iqtisodiyot va moliya vazirligi (J. Qoʻchqorov) bir kun muddatda 1,5 million AQSh dollari ekvivalentiga teng boʻlgan mablagʻlarni Vazirlar Mahkamasining zaxira jamgʻarmasidan Tashqi ishlar vazirligiga oʻtkazilishini taʼminlasin.

3. Tashqi ishlar vazirligi Markaziy bank bilan birgalikda bir kun muddatda ushbu qarorning 1-bandida koʻrsatilgan mablagʻlarni Falastinlik qochqinlarga yordam berish va ishlarni tashkil etish boʻyicha Birlashgan Millatlar Tashkilotining Yaqin Sharq agentligi hisob raqamiga oʻtkazib bersin.

4. Mazkur qarorning ijrosini taʼminlash Bosh vazir oʻrinbosari J.A. Qoʻchqorov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 1-noyabr,

PQ-354-son