“Mevasabzavotbank” ixtisoslashtirilgan aksionerlik-tijorat bankini tashkil etish toʻgʻrisida (426-son)

18.08.1994

Oʻzbekiston Respublikasi Vazirlar Mahkamasining

qarori

Respublika meva-sabzavot xoʻjaligi va uning qayta ishlovchi sanoatining ishlashi hamda yanada rivojlanishini moliyaviy qoʻllab-quvvatlash maqsadida Vazirlar Mahkamasi qaror qiladi:

1. “Oʻzmevasabzavotuzumsanoat”, “Oʻzoziqovqatsanoat” davlat konsernlari va Moliya vazirligining “Mevasabzavotbank” respublika ixtisoslashgan aksionerlik-tijorat bankini tashkil etish toʻgʻrisidagi taklifiga rozilik bildirsin.

Bankning asosiy vazifalari meva-sabzavot xoʻjaligi korxonalari va tashkilotlariga, savdo, tayyorlov va qurilish sohasi tashkilotlarining qayta ishlovchi korxonalariga kredit-hisob-kitob xizmatini koʻrsatish etib belgilansin.

2. Maʼlumot uchun qabul qilinsinki, “Mevasabzavotbank” muassislari tomonidan ustav fondi 5 mln soʻm miqdorida eʼlon qilingan va ularning har birining ulushi, shu jumladan, “Oʻzmevasabzavotuzumsanoat” — 2 mln soʻm, “Oʻzoziqovqatsanoat” — 2 mln soʻm va Moliya vazirligi — 1 mln soʻmdan iborat qilib belgilangan.

3. “Mevasabzavotbank” muassislari bir oy muddatda taʼsis badallarini toʻlasinlar va bankning ustav fondini tashkil etsinlar.

4. “Mevasabzavotbank” ustav fondi bank aksiyalarini sotishdan olinadigan mablagʻlar hisobiga shakllantirilishi lozimligini hisobga olib, bank Kengashi uch oy muddatda aksiyalarning chiqarilishini va ularning aksionerlar oʻrtasida tarqatilishini taʼminlasin.

5. “Oʻzdehqonchiliksanoatbank” 1994-yil 1-sentabrgacha boʻlgan holatga koʻra boʻlish vedomostiga muvofiq aktivlar va passivlarni “Mevasabzavotbank” ka berishni 1994-yil 1-noyabrgacha belgilangan tartibda amalga oshirsin, shuningdek, asosiy fondlar va xizmat xonalarining tegishli qismini ajratsin.

6. Oʻzbekiston Respublikasi Markaziy banki: “Mevasabzavotbank”ning tashkil etilishi va faoliyat koʻrsatishi bilan bogʻliq masalalarni hal qilishda amaliy yordam koʻrsatsin;

“Oʻzdehqonchiliksanoatbank” va “Oʻzsanoatqurilishbank” bilan birgalikda bankni malakali mutaxassislar bilan butlashda yordam koʻrsatsin.

7. “Toshshaharyoʻlovchitrans” uyushmasi, Aloqa vazirligi “Mevasabzavotbank” ni uning buyurtmanomalari boʻyicha zarur miqdordagi transport va aloqa vositalari bilan taʼminlasinlar.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari “Mevasabzavotbank” ishini tashkil etish uchun zarur shart-sharoitlar yaratishda amaliy yordam koʻrsatsinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S.Hamidov va Oʻzbekiston Respublikasi Markaziy bankining raisi F.M.Mullajonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 18-avgust,

426-son