Oʻzbekiston Respublikasi Oliy Majlisi Qonunchilik palatasining 2023-yil ikkinchi yarim yilligidagi faoliyatini samarali tashkil etish chora-tadbirlari toʻgʻrisida (3464-IV-son)

28.08.2023

Oʻzbekiston Respublikasi Oliy Majlisi Qonunchilik palatasi KEngashining

qarori

Mamlakatimiz Prezidenti Sh.M. Mirziyoyev raisligida hududlarni ijtimoiy-iqtisodiy rivojlantirish masalalariga bagʻishlab oʻtkazilgan videoselektor yigʻilishlarida belgilab berilgan ustuvor vazifalar hamda bu borada amalga oshirilayotgan keng koʻlamli islohotlar Oʻzbekiston Respublikasi Oliy Majlisi Qonunchilik palatasining faoliyatini samarali yoʻlga qoʻyish lozimligini koʻrsatmoqda.

Jumladan, Oʻzbekiston Respublikasi Oliy Majlisi Qonunchilik palatasi va uning organlari tomonidan nazorat-tahlil tadbirlarini va ularning yakunlariga bagʻishlangan muhokamalarni asosan hududlarda tashkil etish, joylardagi tizimli muammolarni doimiy ravishda oʻrganib borish, ularni mahalliy davlat hokimiyati organlari va boshqa tashkilotlar bilan birgalikda joyida hal etishga alohida ahamiyat qaratish maqsadga muvofiq.

Oʻzbekiston Respublikasi Oliy Majlisi Qonunchilik palatasining qonun ijodkorligi va parlament nazoratiga doir faoliyati samaradorligini yanada oshirish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining 2023-yil ikkinchi yarim yilligidagi faoliyatining asosiy yoʻnalishlari ilovaga muvofiq tasdiqlansin.

2. Oʻzbekiston Respublikasi Oliy Majlisi Qonunchilik palatasi Devonining Nazorat-tahlil boʻlimi (J. Jumayev) Oʻzbekiston Respublikasi Oliy Majlisi Qonunchilik palatasining 2023-yil ikkinchi yarim yilligidagi faoliyatining asosiy yoʻnalishlarida belgilangan vazifalarning bajarilishi holati yuzasidan har oyda Oʻzbekiston Respublikasi Oliy Majlisi Qonunchilik palatasining Rahbariyatiga umumlashtirilgan maʼlumot kiritib borsin.

3. Oʻzbekiston Respublikasi Oliy Majlisi Qonunchilik palatasining Devoni Oʻzbekiston Respublikasi Oliy Majlisi Qonunchilik palatasining 2023-yil ikkinchi yarim yilligidagi faoliyatining asosiy yoʻnalishlaridagi vazifalarni bajarish bilan bogʻliq boʻlgan sarf-xarajatlar amalga oshirilishini taʼminlasin.

4. Oʻzbekiston Respublikasi Oliy Majlisi Qonunchilik palatasining 2023-yil ikkinchi yarim yilligidagi faoliyatining asosiy yoʻnalishlarida nazarda tutilgan vazifalar bajarilishini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari va oʻrinbosarlari zimmasiga yuklatilsin.

5. Oʻzbekiston Respublikasi Oliy Majlisi Qonunchilik palatasi Kengashining 2023-yil 10-iyulda qabul qilingan “Oʻzbekiston Respublikasi Oliy Majlisi Qonunchilik palatasining 2023-yil ikkinchi yarim yilligidagi faoliyatining asosiy yoʻnalishlari toʻgʻrisida”gi 3344-IV-sonli Qarori (Oʻzbekiston Respublikasi Oliy Majlisi palatalarining Axborotnomasi, 2023-yil, № 7, 606-modda) oʻz kuchini yoʻqotgan deb topilsin.

6. Ushbu Qaror tasdiqlash uchun Oʻzbekiston Respublikasi Oliy Majlisi Qonunchilik palatasining majlisiga kiritilsin.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2023-yil 28-avgust,

3464-IV-son