“Sogʻlom avlod uchun” hukumatga qarashli boʻlmagan xalqaro xayriya jamgʻarmasini davlat tomonidan qoʻllab-quvvatlash toʻgʻrisida (119-son)

05.03.1994

OʻZBEKISTON RESPUBLIKASI VAZIRLAR MAHKAMASINING

qarori

Oʻsib kelayotgan avlodni sogʻlomlashtirish kompleks dasturini amalga oshirish, shuningdek, “Sogʻlom avlod uchun” jamgʻarmasining tibbiy-ijtimoiy, investitsiya va xayriya dasturlarini davlat tomonidan qoʻllab-quvvatlash maqsadida Vazirlar Mahkamasi qaror qiladi:

1. “Sogʻlom avlod uchun” jamgʻarmasining respublikaning har bir tumanida va shahrida Jamgʻarmaning tayanch punktlarini tashkil etish toʻgʻrisidagi taklifi qabul qilinsin. Tayanch punktlar toʻgʻrisidagi Nizom ilovaga muvofiq maʼqullansin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar Jamgʻarmaga, uning boʻlimlari va tayanch punktlariga moliyaviy hamda moddiy-texnik yordam koʻrsatish chora-tadbirlarini koʻrsinlar.

2. “Sogʻlom avlod uchun” jamgʻarmasiga Vazirlar Mahkamasining zaxira jamgʻarmasidan 1 mlrd soʻm-kupon ajratilsin.

3. Vazirlar Mahkamasining Qurilish, transport, aloqa hamda Umumiqtisodiyot majmuilari (K.N. Toʻlaganov, B.S. Hamidov) Kasaba uyushmalari Federatsiyasi Kengashi, manfaatdor vazirliklar va idoralar ishtirokida Jamgʻarmaning:

Toshkent shahar Mirzo Ulugʻbek tumanida qurilayotgan poliklinika negizida — “Sogʻlom avlod uchun” jamgʻarmasining Tibbiy-ijtimoiy Markazini tashkil etish toʻgʻrisidagi;

Toshkent viloyatining Boʻstonliq tumanidagi Chorvoq suv ombori sohilida qurilishi tugallanmagan bolalarni sogʻlomlashtirish kompleksi negizida — “Sogʻlom avlod uchun” respublika davolash sogʻlomlashtirish kompleksini (“Artek”ka oʻxshash) barpo etish toʻgʻrisidagi takliflarini koʻrib chiqsinlar.

4. Oʻzbekiston Respublikasi Sogʻliqni saqlash vazirligi Davlat mulki qoʻmitasi bilan birgalikda Toshkent shahridagi ikkita dorixonani, Qoraqalpogʻiston Respublikasidagi hamda har qaysi viloyatdagi bittadan dorixonani “Sogʻlom avlod uchun” jamgʻarmasiga uning ustavdagi faoliyati doirasida foydalanish uchun belgilangan tartibda bersin.

5. Oʻzbekiston Respublikasi Sogʻliqni saqlash vazirligi, “Sogʻlom avlod uchun” jamgʻarmasi “Oʻzistiqbolstat” davlat qoʻmitasi, Mehnat vazirligi, Moliya vazirligi bilan birgalikda bolalarni uy sharoitida tibbiy-ijtimoiy kuzatib borish (patronaj) boʻyicha kadrlar tayyorlash toʻgʻrisida hukumat qarori loyihasini ikki oy muddatda tayyorlasinlar va Vazirlar Mahkamasiga kiritsinlar, bunda quyidagilarni tashkil etish nazarda tutilsin:

yirik tibbiyot muassasalari va bilim yurtlari huzuridagi kurslarda bolalarni uy sharoitida tibbiy-ijtimoiy kuzatib borish boʻyicha kadrlar tayyorlash;

sogʻlom turmush tarzini keng tushuntirish va targʻib qilish ishlarini amalga oshirish, farzand koʻrish yoshidagi ayollarni va oʻsib kelayotgan avlodni sogʻlomlashtirish;

Sogʻliqni saqlash vazirligi, Mehnat vazirligi, “Sogʻlom avlod uchun” jamgʻarmasi Moliya vazirligi va Ijtimoiy taʼminot vazirligi, Qizil yarim oy jamiyati Markaziy Qoʻmitasi, Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda sogʻliqni saqlash dastlabki boʻgʻini muassasalarida, ijtimoiy yordam boʻlimlarida, “Sogʻlom avlod uchun” jamgʻarmasining tayanch punktlarida, Qizil Yarim oy jamiyatida bolalarni uy sharoitida tibbiy-ijtimoiy kuzatib borish boʻyicha tibbiyot xodimlarini ishga joylash va ular faoliyatini mablagʻ bilan taʼminlash masalalarini hal etishni taʼminlash.

6. “Sogʻlom avlod uchun” jamgʻarmasi Oʻzbekiston Respublikasi Tashqi iqtisodiy aloqalar vazirligi bilan birgalikda bolalar oziq-ovqatlari, vaksinalar, dori-darmonlar, tibbiyot buyumlari, ona va bola uchun sanitariya va gigiyena vositalari ishlab chiqarishni tashkil etish uchun “Teksun” kompaniyasi guruhi tomonidan Jamgʻarmaga berilayotgan kreditdan foydalanish toʻgʻrisidagi takliflarni bir oy muddatda koʻrib chiqsin va belgilangan tartibda Vazirlar Mahkamasiga kiritsin.

7. Oʻzbekiston Respublikasi Davlat matbuot qoʻmitasi, “Sharq” nashriyot-matbaa konserni “Sogʻlom avlod uchun” jamgʻarmasi buyurtmasiga binoan targʻibot va axborot matbaa mahsulotlarini tayyorlashni taʼminlasinlar.

8. Oʻzbekiston Respublikasi Davlat televideniye va radioeshittirish kompaniyasi har haftada “Sogʻlom avlod uchun” dasturini tashkil etsin.

9. Mazkur qarorning bajarilishini nazorat qilish Bosh vazir oʻrinbosari M.Q. Qoraboyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 5-mart,

119-son

Vazirlar Mahkamasining 1994-yil 5-martdagi 119-son qaroriga ILOVA

“Sogʻlom avlod uchun” hukumatga qarashli boʻlmagan xalqaro xayriya jamgʻarmasining tayanch punktlari toʻgʻrisida

NIZOM

I. Umumiy qoidalar

1. “Sogʻlom avlod uchun” hukumatga qarashli boʻlmagan xalqaro jamgʻarmaning tayanch punktlari respublikaning har bir tumanida va shahrida (Vazirlar Mahkamasining 1993-yil 28-oktabrdagi 524-son qaroriga) muvofiq ochiladi.

Tayanch punktlari davlat, jamoat va xususiy tashkilotlarning onalik va bolalikni muhofaza qilish, oʻsib kelayotgan avlodni intellektual va jismoniy rivojlantirish, sogʻlom turmush tarzini qaror toptirish borasidagi faoliyatini integratsiyalash uchun tashkil etiladi. Tayanch punktlari sogʻliqni saqlash, ijtimoiy taʼminot, Qizil Yarim oy Jamiyati organlari va muassasalarining, fuqarolarning oʻzini oʻzi boshqarish organlarining aholini sogʻlomlashtirish, ijtimoiy qoʻllab-quvvatlash hamda ularga dastlabki tibbiy-ijtimoiy yordam koʻrsatish sohasidagi kuch-gʻayratlarini va ishlarini uygʻunlashtiradi.

2. Tayanch punkti oʻz faoliyatida Oʻzbekiston Respublikasi qonunchiligiga, Jamgʻarma ustaviga, mazkur Nizomga va “Sogʻlom avlod uchun” jamgʻarmasining hududiy filiallari qarorlariga amal qiladi.

3. Tayanch punkti Fond hududiy filialining ijtimoiy ishlab chiqarish boʻlinmasi hisoblanadi, uning nomidan toʻliq xoʻjalik hisobi, oʻzini oʻzi mablagʻ bilan taʼminlash va oʻz xarajatlarini oʻzi qoplash asosida faoliyat koʻrsatadi.

4. Tayanch punkti Davlat xizmatlari markazlarida davlat roʻyxatidan oʻtkazilgan vaqtdan boshlab yuridik shaxs huquqini oladi, hisob-kitob schyotiga, yumaloq muhrga, uch burchakli muhrga ega boʻladi va “Sogʻlom avlod uchun” jamgʻarmasi ramzidan foydalanishga haqlidir.

II. Tayanch punktini tashkil etish tartibi

5. Tayanch punkti uning yuqori organi hisoblanadigan Fond hududiy filiali direktorining Fond markaziy apparati bilan kelishilgan qaroriga binoan tashkil etiladi.

6. Tayanch punkti tuzilmasini Jamgʻarma direksiyasi belgilaydi va tasdiqlaydi.

7. Tayanch punktiga direktor rahbarlik qiladi.

Tayanch punkti direktori Jamgʻarmaning hududiy filiali direktori tomonidan tasdiqlanadi va tayanch punktining moliya-xoʻjalik hamda boshqa faoliyati uchun shaxsan javob beradi.

8. Shtat jadvalini, daromad va xarajatlar smetasini Jamgʻarma hududiy filiali direktori tasdiqlaydi.

9. Tuman (shahar) hokimligi tayanch punktini bino, moddiy-texnika vositalari bilan taʼminlaydi.

10. Tayanch punkti zarur asbob-uskunalar, mebel, koʻrgazmali targʻibot vositalari, ona va bolalar salomatligini muhofaza qilish, chaqaloqni ovqatlantirish, yigit va qizlarni jinsiy tarbiyalash va shu kabi masalalarga oid tegishli adabiyotlar, prospektlar, bukletlar va risolalar bilan taʼminlanadi.

11. Tayanch punkti faoliyatini nazorat qilish hokimlik tomonidan Fondning hududiy filiali direktori bilan birgalikda amalga oshiriladi.

III. Tayanch punktining asosiy maqsadlari va vazifalari

12. Tayanch punktlari hokimliklar bilan birgalikda davlat, jamoat va ishlab chiqarish tuzilmalarining Hukumatning oʻsib kelayotgan avlodni sogʻlomlashtirishga doir ijtimoiy siyosatini hayotga tatbiq etish borasidagi sayʼi-harakatlarini uygʻunlashtirib boradi.

13. Tayanch punkti oʻz maqsadlariga erishish va vazifalarini bajarish uchun viloyat sogʻliqni saqlash, xalq taʼlimi, madaniyat, jismoniy tarbiya va sport boshqarmalari va ularning tuman (shahar) boʻlinmalari, bandlikka koʻmaklashish va aholini ijtimoiy muhofaza qilish markazlari, Qizil Yarim Oy Jamiyati va fuqarolarning oʻzini oʻzi boshqarish organlari bilan mustahkam hamkorlik qiladi.

14. Sogʻlom turmush tarzini targʻib qilish va har bir oilaga dastlabki tibbiy-ijtimoiy yordam koʻrsatish boʻyicha ishlarni muvofiqlashtirib borish maqsadida tayanch punktlari sogʻliqni saqlashning dastlabki boʻgʻinlari, Qizil Yarim Oy Jamiyati hamshiralari, bandlikka koʻmaklashish va aholini ijtimoiy muhofaza qilish markazlari va fuqarolarning oʻzini oʻzi boshqarish organlari xodimlari bilan oʻzaro hamkorlik qiladi. Zarur boʻlganda muassasalarga, alohida shaxslarga xayriya yordami koʻrsatadi.

15. Tayanch punktlari huzurida quyidagi maslahat xizmatlari ochilishi mumkin:

oila va nikoh xizmati;

ishonch telefoni;

oʻsmirlar uchun maslahatlar;

“Ona va bola” uchun maslahatlar;

huquqiy maslahatlar:

bolalarni ovqatlantirish boʻyicha maslahatlar va boshqa xizmatlar.

16. Tayanch punktlari manfaatdor sogʻliqni saqlash, xalq taʼlimi tashkilotlari, bandlikka koʻmaklashish va aholini ijtimoiy muhofaza qilish markazlari bilan birgalikda oʻsib kelayotgan avlodning jismoniy, intellektual rivojlanish koʻrsatkichlarini tahlil etadilar, tahlillar va tadqiqotlarning natijalari umumlashtiriladi va koʻrib chiqish uchun Fondning hududiy filiallari direktorlariga joʻnatiladi.

IV. Moliya-xoʻjalik faoliyati

17. Tayanch punktlari oʻz faoliyatini xoʻjalik hisobi asosida tashkil etadilar.

18. Quyidagilar tayanch punkti daromadlarining manbalari hisoblanadi:

hududiy boʻlimlarning ajratmalari;

xoʻjalik tashkilotlarining, alohida fuqarolarning pul mablagʻlari, moddiy boyliklar, koʻchar va koʻchmas mulk tarzidagi ixtiyoriy badallari va xayr-ehsonlari;

“Sogʻlom avlod uchun” jamgʻarmasi manfaatini koʻzlab xayriya tadbirlarini oʻtkazishdan tushumlar.

19. Tayanch punktlarining ustav fondi Fondning hududiy filiallari badallaridan, shuningdek yuridik va jismoniy shaxslarning, shu jumladan, xorijiy yuridik va jismoniy shaxslarning xayriya badallari hisobiga shakllanadi.

20. Moliya-xoʻjalik faoliyati sohasida tayanch punktiga Oʻzbekiston Respublikasi qonunchiligida nazarda tutilgan talablarga rioya etgan holda quyidagi huquqlar beriladi:

keng tushuntirish ishlari yordamida vatandoshlar va xorijiy fuqarolarning, jamoat tashkilotlarining, davlat muassasalari va korxonalarining, banklarning hamda turli tijorat tuzilmalarining pul, moddiy, madaniy va intellektual boyliklar tarzidagi ixtiyoriy hissalarini jalb etish;

Jamgʻarmaning loyiha va dasturlarini amalga oshirish;

oʻz nomidan shartnomalar tuzish, mulkiy huquqlar olish va ular boʻyicha majburiyatlar qabul qilish;

ishlab chiqarish korxonalarini, shu jumladan, xorijiy sheriklar bilan birgalikda, tashkil etish;

aholiga savdo, savdo-vositachilik va taʼminot xizmatlari koʻrsatish;

koʻrgazmalar, savdo yarmarkalari, tovarlar, mahsulotlar va xizmatlar auksionlarini oʻtkazish.

21. Tayanch punkti har chorakda hisob raqamiga tushgan mablagʻlarning 10 foizini majburiy tartibda hisobot davridan keyingi oyning 15-kunigacha Fondning hududiy filiali hisob raqamiga oʻtkazadi. Bunda tayanch punkti tushgan mablagʻlarning 10 foizidan ortigʻini moliyaviy imkoniyatlaridan kelib chiqib, qonunchilikda belgilangan tartibda moliyaviy oʻzaro munosabatlar toʻgʻrisida tegishli shartnoma rasmiylashtirish yoʻli bilan Fondning hududiy filiali hisob raqamiga oʻtkazish huquqiga ega.

22. Jamgʻarmaning tayanch punkti Fondning hududiy filiali direktoriga hisobot choragidan keyingi oyning 15-kunigacha har choraklik xoʻjalik faoliyati balansini taqdim etadi.

V. Boshqa tashkilotlar bilan oʻzaro hamkorligi

23. Jamgʻarmaning tayanch punktlari, boʻlimlari hokimliklar bilan birgalikda aholini kompleks sogʻlomlashtirish va insonning yashashi uchun sogʻlom muhit yaratish dasturida qatnashuvchi barcha organlar va muassasalar faoliyatini uygʻunlashtirib boradilar. Shu maqsadda:

har bir oilada sogʻlom turmush tarzini qaror toptirish boʻyicha qoʻshma reja-grafiklar tuzadilar;

oʻtkazilayotgan tadbirlarning taʼsirchanligi uchun monitoring tizimini ishlab chiqadilar va joriy etadilar;

ishlarga tezda tuzatishlar kiritish maqsadida Jamgʻarmaning viloyat boʻlimlarini oʻz vaqtida xabardor qiladilar;

oʻsib kelayotgan avlodni sogʻlomlashtirishga oid chora-tadbirlarning bajarilishini har chorakda tahlil qilib boradilar va koʻrsatkichlarni yaxshilaganlik uchun ragʻbatlantirish tizimini ishlab chiqadilar.

VI. Tayanch punkti faoliyatini toʻxtatish

24. Tayanch punkti faoliyatining qoniqarli emasligi tufayli yoki sud qaroriga binoan tugatilishi mumkin.

25. Tayanch punktini tugatish amaldagi qonunchilikka muvofiq amalga oshiriladi.