Osiyo infratuzilma investitsiyalari banki ishtirokida “Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasini amalga oshirish chora-tadbirlari toʻgʻrisida (PQ-266-son)

07.08.2023

Oʻzbekiston Respublikasi Prezidentining

Qarori

Buxoro viloyatida aholi va tadbirkorlik subyektlarining ichimlik suv va oqova suv xizmatlari bilan taʼminlanganlik darajasini oshirish, viloyatning sanitariya-epidemiologik hamda ekologik holatini yanada yaxshilash, shuningdek, Osiyo infratuzilma investitsiyalari banki bilan hamkorlikni kengaytirish maqsadida:

1. Osiyo infratuzilma investitsiyalari banki (keyingi oʻrinlarda — OIIB) tomonidan Oʻzbekiston Respublikasiga “Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasini (keyingi oʻrinlarda — loyiha) amalga oshirish doirasida:

a) 5 yillik imtiyozli davrni oʻz ichiga olgan 25 yilda qaytarish sharti bilan 248,40 million AQSh dollari miqdoridagi qarz ajratilishi maʼqullanganligi;

b) loyihaning umumiy qiymati 281,25 million AQSh dollarini, shu jumladan:

OIIB qarzi — 248,40 million AQSh dollarini;

loyihani amalga oshirishda Oʻzbekiston Respublikasining ulushi — qoʻshilgan qiymat soligʻini qoplash va bojxona imtiyozlari koʻrinishida — 32,85 million AQSh dollarini tashkil etishi;

v) loyihani amalga oshirish davri 5 yil (2023 — 2027-yillar) etib belgilanganligi;

g) loyihani amalga oshirish davrida foizlar, majburiyatlar uchun vositachilik haqi hamda bir martalik vositachilik haqi koʻrinishidagi moliyaviy xarajatlar OIIB qarzi hisobidan amalga oshirilishi;

d) Buxoro viloyati hokimligi, “Oʻzsuvtaʼminot” AJ, Bosh prokuratura hamda Investitsiyalar, sanoat va savdo vazirligi huzuridagi “Loyihalar va import kontraktlarini kompleks ekspertiza qilish markazi” DUK tomonidan oʻtkazilgan oʻrganish natijasi boʻyicha xarajatlar (74,5 million AQSh dollar) iqtisod qilinishi mumkinligi aniqlanganligi maʼlumot uchun qabul qilinsin.

2. Belgilab qoʻyilsinki:

a) “Oʻzsuvtaʼminot” AJ loyihaning sifatli amalga oshirilishi uchun zarur tashkiliy-texnik tadbirlarning oʻz vaqtida oʻtkazilishi hamda OIIBning qarzidan maqsadli va samarali foydalanilishini taʼminlash uchun masʼul ijro etuvchi organ hisoblanadi;

b) Buxoro viloyati hokimligi “Oʻzsuvtaʼminot” AJ bilan birgalikda loyihaning sifatli amalga oshirilishi, belgilangan koʻrsatkichlarga erishilishi va OIIB qarzlarining oʻz vaqtida qaytarilishi uchun javobgar hisoblanadi.

3. Quyidagilar:

“Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasini texnik-iqtisodiy asoslashning asosiy texnik-iqtisodiy parametrlari 1-ilovaga muvofiq;

“Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasi boʻyicha OIIBning asosiy qarzini, majburiyatlar uchun vositachilik haqi hamda bir martalik vositachilik haqini toʻlashning prognoz jadvali 2-ilovaga muvofiq;

“Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasi doirasida OIIB qarz mablagʻlariga xizmat koʻrsatish xarajatlarini qoplash boʻyicha ulushlar taqsimotining prognozi 3-ilovaga muvofiq;

“Buxoro suv taʼminoti” MChJni moliyaviy sogʻlomlashtirish boʻyicha “yoʻl xaritasi” 4-ilovaga muvofiq tasdiqlansin.

4. Buxoro viloyati hokimligi, “Oʻzsuvtaʼminot” AJ, Bosh prokuratura hamda Investitsiyalar, sanoat va savdo vazirligining loyiha doirasida iqtisod qilingan mablagʻlar hisobidan 5-ilovaga muvofiq Buxoro viloyatining loyiha bilan qamrab olinmagan hududlarida jami 1 157,2 km ichimlik suv va 117,3 km oqova suv tarmoqlarini, jumladan Jondor tumanida 409,3 km, Peshku tumanida 305,9 km va Romitan tumanida 442 km ichimlik suv tarmoqlari hamda Buxoro shahrida 117,3 km oqova suv tarmoqlarini qurish boʻyicha yangi loyihalarni amalga oshirish toʻgʻrisidagi taklifi maʼqullansin.

5. Oʻzbekiston Respublikasi iqtisodiyot va moliya vaziriga:

Oʻzbekiston Respublikasi nomidan OIIB bilan loyihani amalga oshirish uchun qarz bitimini imzolash, zarur hollarda, ushbu bitimga oʻzgartirish va qoʻshimchalar kiritish;

Oʻzbekiston Respublikasi nomidan Buxoro viloyati hokimligi, “Oʻzsuvtaʼminot” AJ va “Buxoro suv taʼminoti” MChJ bilan OIIB qarz mablagʻlarini qayta kreditlash toʻgʻrisidagi bitimni imzolash, zarur hollarda, ushbu bitimga oʻzgartirish va qoʻshimchalar kiritish vakolati berilsin.

6. Adliya vazirligi Oʻzbekiston Respublikasi va OIIB oʻrtasida tuziladigan qarz bitimi va qayta kreditlash toʻgʻrisidagi bitimga, zarur hollarda, ushbu bitimlarga oʻzgartirish va qoʻshimchalar kiritish boʻyicha belgilangan tartibda yuridik xulosalar bersin.

7. Oʻzbekiston Respublikasining xalqaro shartnomalari boʻyicha xalqaro moliya institutlari va xorijiy hukumat moliya tashkilotlarining mablagʻlar (qarzlari, kreditlari) hisobidan amalga oshiriladigan loyihalar doirasida yuridik shaxslar tomonidan olinadigan tovarlar bojxona bojidan ozod qilinganligi maʼlumot uchun qabul qilinsin.

Belgilansinki, loyihani amalga oshirish doirasida:

hosil boʻladigan qoʻshilgan qiymat soligʻi summasi xoʻjalik yurituvchi subyektlar mablagʻlari hisobidan toʻlanadi yoki qonunchilikda belgilangan tartibda respublika budjeti mablagʻlari hisobidan qoplab beriladi;

olib kiriladigan tovarlarni bojxona bojidan ozod qilish va qoʻshilgan qiymat soligʻi summasini respublika budjeti mablagʻlari hisobidan qoplab berish Oʻzbekiston Respublikasining loyihani amalga oshirishdagi ulushi deb hisoblanadi.

8. Belgilansinki, “Oʻzsuvtaʼminot” AJ boshqaruvi raisi v.b. D. Azimov zimmasiga:

“Buxoro suv taʼminoti” MChJ tomonidan qayta kreditlash toʻgʻrisidagi bitim shartlariga muvofiq OIIB qarzini qaytarish va foizlarni toʻlash uchun zarur boʻlgan mablagʻlar oʻz vaqtida jamlanib borilishini taʼminlash;

“Oʻzsuvtaʼminot” AJ tarkibidagi OIIB Loyihalarni muvofiqlashtirish guruhiga Buxoro viloyati hokimligi tomonidan tavsiya etilgan qoʻshimcha malakali mutaxassislarni jalb qilgan holda loyihani muvofiqlashtirish va boshqarish;

loyihani amalga oshirish davrida OIIB Loyihalarni muvofiqlashtirish guruhi faoliyatini moliyalashtirish boʻyicha yillik xarajatlar smetasi hamda shtatlar jadvalini Iqtisodiyot va moliya vazirligi bilan kelishish funksiyalari yuklanadi.

9. Iqtisodiyot va moliya vazirligi Buxoro viloyati hokimligi bilan birgalikda 2028-yildan boshlab Buxoro viloyati mahalliy budjeti parametrlarida OIIB qarzi boʻyicha foizlarni va asosiy qarzni qaytarish uchun “Buxoro suv taʼminoti” MChJ tomonidan ushbu maqsadlarga yoʻnaltiriladigan mablagʻni hisobga olgan holda toʻlovning qolgan qismiga zarur mablagʻlarni ajratishni nazarda tutsin.

10. Investitsiyalar, sanoat va savdo vazirligi Iqtisodiyot va moliya vazirligi bilan birgalikda belgilangan tartibda Oʻzbekiston Respublikasining investitsiya dasturlarida har bir yil uchun asosiy koʻrsatkichlarni aniqlashtirib va yangilab borgan holda, loyiha doirasida ajratiladigan mablagʻlarni inobatga olsin.

11. Loyiha doirasida:

“Oʻzsuvtaʼminot” AJ tomonidan xalqaro moliya institutlari va xorijiy moliya tashkilotlari ishtirokida amalga oshirilayotgan loyihalar doirasida tovar, ish va xizmatlarni sotib olish boʻyicha tasdiqlangan xarid komissiyasi tarkibiga Buxoro viloyati hokimligining 2 ta vakili kiritilsin;

“Oʻzsuvtaʼminot” AJ loyihalashtirish jarayonlarida eng toʻgʻri va optimal loyiha (texnik) takliflari qabul qilinishi ustidan nazorat oʻrnatsin;

Korrupsiyaga qarshi kurashish agentligi loyihaga ajratilayotgan mablagʻlarning maqsadli ishlatilishi jarayonida ochiqlik va oshkoralikni taʼminlash ustidan doimiy nazorat oʻrnatsin;

Hisob palatasi va Bosh prokuratura loyihaga ajratilayotgan mablagʻlarning maqsadli va samarali sarflanishi hamda pudrat ishlari oʻz vaqtida va sifatli amalga oshirilishi ustidan tizimli nazorat oʻrnatsin;

Kambagʻallikni qisqartirish va bandlik vazirligi Adliya vazirligi, Buxoro viloyati hokimligi va “Oʻzsuvtaʼminot” AJ bilan birgalikda mazkur qarorning mazmuni va ahamiyatini aholi hamda tadbirkorlik subyektlariga yetkazish, ularga ichimlik suv va oqova suv tizimi bilan taʼminlanadigan hududlar toʻgʻrisida maʼlumot berib borish hamda qurilish-montaj ishlari ustidan jamoatchilik nazoratini oʻrnatish choralarini koʻrsin.

12. Quyidagilar:

Bosh vazir oʻrinbosari — iqtisodiyot va moliya vaziri J. Qoʻchqorov — loyiha boʻyicha qarz bitimini imzolashga va mazkur bitimga asosan qarz mablagʻlarini oʻz vaqtida jalb qilishga;

“Oʻzsuvtaʼminot” AJ boshqaruvi raisi v.b. D. Azimov hamda Buxoro viloyati hokimi B. Zaripov — loyiha boʻyicha mablagʻlarning samarali yoʻnaltirilishiga, qurilish-montaj ishlari sifatli va oʻz vaqtida bajarilishini taʼminlashga, obyektlar va ishlab chiqarish quvvatlarini belgilangan muddatlarda ishga tushirishga;

investitsiyalar, sanoat va savdo vaziri oʻrinbosari S. Xamidov — loyihaning amalga oshirilishini muvofiqlashtirishga, natijadorligini taʼminlashga, tasdiqlangan prognoz parametrlari bajarilishini tizimli muhokama qilib borishga, loyihalarni amalga oshirishda yuzaga keladigan muammoli masalalarni tezkor hal etib borishga;

“Oʻzsuvtaʼminot” AJ boshqaruvi raisi v.b. D. Azimov va Buxoro viloyati hokimi B. Zaripov — “Buxoro suv taʼminoti” MChJni moliyaviy sogʻlomlashtirish boʻyicha “Yoʻl xaritasi”da belgilangan chora-tadbirlarning oʻz vaqtida bajarilishini taʼminlashga, tuzilgan bitim shartlariga muvofiq qarz mablagʻlarini oʻz vaqtida qaytarishga shaxsan masʼul va javobgar ekanligi belgilab qoʻyilsin.

13. Mazkur qarorning ijrosini nazorat qilish Bosh vazir oʻrinbosarlari A.J. Ramatov va J.A. Xodjayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 7-avgust,

PQ-266-son

Oʻzbekiston Respublikasi Prezidentining 2023-yil 7-avgustdagi PQ-266-son qaroriga 1-ILOVA

“Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasini texnik-iqtisodiy asoslashning

ASOSIY TEXNIK-IQTISODIY PARAMETRLARI

* Loyihaning yakuniy qiymat koʻrsatkichlari loyiha-smeta hujjatlari batafsil ishlab chiqilganidan keyin hamda tovarlar yetkazib berish (ishlarni bajarish va xizmatlar koʻrsatish) boʻyicha tenderlar natijalariga koʻra belgilanadi.

Oʻzbekiston Respublikasi Prezidentining 2023-yil 7-avgustdagi PQ-266-son qaroriga 2-ILOVA

“Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasi boʻyicha OIIBning asosiy qarzini, majburiyatlar uchun vositachilik haqi hamda bir martalik vositachilik haqini toʻlashning

PROGNOZ JADVALI

* Qarz berilishi muddati moliyaviy bitim imzolanishi sanasiga bogʻliq.

Oʻzbekiston Respublikasi Prezidentining 2023-yil 7-avgustdagi PQ-266-son qaroriga 3-ILOVA

“Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasi doirasida OIIB qarz mablagʻlariga xizmat koʻrsatish xarajatlarini qoplash boʻyicha ulushlar taqsimotining

PROGNOZI

Oʻzbekiston Respublikasi Prezidentining 2023-yil 7-avgustdagi PQ-266-son qaroriga 4-ILOVA

“Buxoro suv taʼminoti” MChJni moliyaviy sogʻlomlashtirish boʻyicha

“YOʻL XARITASI”

T/rChora-tadbirlar nomiAmalga oshirish mexanizmiIjro muddatiMasʼul ijrochilar1. Isteʼmolchilar soni va xizmat koʻrsatish hajmlarini oshirish1.Isteʼmolchilar sonini 254 ming nafardan 264 ming nafarga oshirish (qoʻshimcha 10 ming nafar isteʼmolchini qamrab olish).1. Isteʼmolchilarni toʻliq xatlovdan oʻtkazish boʻyicha har bir tuman (shahar)da ishchi guruhlar tashkil qilish.2023-yil 1-sentabrBuxoro viloyati hokimligi,“Buxoro suv taʼminoti” MChJ2. Ichimlik va oqova suv taʼminotiga ulanmagan yoki noqonuniy ulangan isteʼmolchilarni aniqlash.2023-yil 25-dekabr3. Suv taʼminotiga noqonuniy ulangan isteʼmolchilar oʻrtasida tushuntirish ishlarini olib borish va ular bilan shartnoma rasmiylashtirish.2023-yil 25-dekabr4. Suv taʼminotiga ulanmagan isteʼmolchilar bilan shartnoma rasmiylashtirish yoʻli bilan ularni suv taʼminotiga ulash.2023-yil 25-dekabr2.Ichimlik suv tarmoqlarini suvni tashib ichuvchi isteʼmolchilar uy xoʻjaligigacha olib kirish.1. Har bir tuman (shahar)da ichimlik suv tarmoqlari koʻcha boshigacha yetkazib berilgan isteʼmolchilarni toʻliq xatlovdan oʻtkazish.2023-yil 1-sentabrBuxoro viloyati hokimligi,“Buxoro suv taʼminoti” MChJ2. “Buxoro suv taʼminoti” MChJning oʻz mablagʻlari hisobidan har bir mahallada uy egalari bilan birgalikda ularning xonadonini suv taʼminotiga ulash va aholi hisobidan suv hisoblagichlarini oʻrnatish choralarini koʻrish.2023-yil 31-dekabr2. Ichki imkoniyatlardan foydalanish3.Isteʼmolchilarning koʻrsatilgan xizmatlar boʻyicha mavjud debitor qarzdorliklarini qisqartirish.1. Tuman (shahar) hokimliklari va fuqarolarning oʻzini oʻzi boshqarish organlari bilan hamkorlikda aholi oʻrtasida tushuntirish ishlarini olib borish.DoimiyBuxoro viloyati hokimligi,tuman (shahar) hokimliklari,Majburiy ijro byurosi,“Buxoro suv taʼminoti” MChJ2. Qarzdor isteʼmolchilarga ogohlantirish xatlarini yuborgan holda talablarni bajarmagan qarzdorlarni tarmoqdan uzish choralarini koʻrish.2023-yil 1-sentabr3. Qarzdorlik boʻyicha ishlarni tegishliligi boʻyicha fuqarolik va iqtisodiy sudlarga topshirish.2023-yil 1-dekabrgacha4. Sud qarori chiqqan 100 ta ijro varaqalari boʻyicha 673 mln soʻm qarzdorlikni undirish choralarini koʻrish.2023-yil 1-sentabr5. Ijro varaqalari boʻyicha isteʼmolchilar bank hisob raqamlariga inkasso topshiriqnomalarini qoʻyish.2023-yil 1-dekabrgacha3. Suv yoʻqotishlarini qisqartirish4.Suv hisoblagichi mavjud boʻlmagan 15 ming aholi isteʼmolchilariga suv hisoblagichlarini oʻrnatish choralarini koʻrish orqali isteʼmolchilarning ichimlik suvdan oqilona foydalanishini taʼminlash hamda suv hisoblagich bilan taʼminlanganlik darajasini 94 foizdan 96 foizga yetkazish.1. Aholi oʻrtasida hisoblagich oʻrnatishning qulayliklari toʻgʻrisida targʻibot-tashviqot ishlarini olib borish.DoimiyBuxoro viloyati hokimligi,“Buxoro suv taʼminoti” MChJ2. Suv hisoblagich bilan taʼminlanmagan barcha isteʼmolchilarga belgilangan tariflarga 1,5 orttiriluvchi koeffitsiyent qoʻllanilishini taʼminlash.Doimiy3. Suv hisoblagichini oʻrnatish boʻyicha isteʼmolchilar bilan ikki tomonlama shartnomalar tuzish.2023-yil 31-dekabr5.Suv inshootlariga suv hisoblagichlarini oʻrnatish orqali suv yoʻqotishlar darajasini qisqartirish.1. Suv inshootlariga suv hisoblagichlarini oʻrnatish boʻyicha reja-grafik ishlab chiqish hamda tasdiqlash.2023-yil 15-sentabr“Buxoro suv taʼminoti” MChJ,Buxoro viloyati hokimligi2. Suv inshootlariga suv hisoblagichlarini oʻrnatish choralarini koʻrish.Reja-grafik boʻyicha3. Inshootlardagi suv hisoblagichlari va billing tizimida hisoblangan koʻrsatkichlar oʻrtasidagi tafovutni aniqlash va ularni bartaraf etish ustidan monitoring olib borish.Doimiy6.Dispetcherlik va avariya xizmati faoliyatini takomillashtirish.1. Taʼmirtalab holatdagi 2 ta texnikani taʼmirlash.2023-yil 1-sentabrBuxoro viloyati hokimligi,“Oʻzsuvtaʼminot” AJ,“Buxoro suv taʼminoti” MChJ2. Informatsion texnologiyalarni qoʻllagan holda maxsus texnikalarni GPS tizimiga ulash choralarini koʻrish.2023-yil 15-sentabr4. Mavjud quvvatlarni modernizatsiya qilish va texnik jihozlash7.2023-yil davlat dasturlari doirasida 9 ming aholining ichimlik suv taʼminotini yaxshilash orqali korxona isteʼmolchilari sonini koʻpaytirish va qoʻshimcha 780 mln soʻm daromad olish.1. Davlat dasturlari doirasida 360 km ichimlik va oqova suv tarmoqlarini hamda 1 ta suv inshootini qurish va rekonstruksiya qilish ishlarini yakunlash va obyektlarni foydalanishga topshirish.2023-yil 1-dekabrBuxoro viloyati hokimligi,“Buxoro suv taʼminoti” MChJ2. Isteʼmolchilarni roʻyxatdan oʻtkazib, shartnomalar tuzish.2023-yil 31-dekabr8.Korxona mablagʻlari hisobiga 9 ming aholining ichimlik suv taʼminotini yaxshilash orqali korxona isteʼmolchilari sonini koʻpaytirish va qoʻshimcha 395 mln soʻm daromad olish.1. Korxonaning oʻz mablagʻlari hisobidan amalga oshiriladigan rekonstruksiya ishlari dasturini (reja-grafigini) ishlab chiqish va tasdiqlash.2023-yil 1-sentabr“Buxoro suv taʼminoti” MChJ2. Mavjud 34 km ichimlik va oqova suv tarmoqlarini hamda taʼmirtalab 76 ta nasos uskunalarini joriy va mukammal taʼmirlash.Reja-grafik boʻyicha3. Isteʼmolchilarni xatlovdan oʻtkazib, shartnomalar tuzish.2023-yil 31-dekabr5. Jamoatchilik nazoratini oʻrnatish9.Suv taʼminoti sohasida amalga oshirilgan ishlar boʻyicha jamoatchilik nazoratini oʻrnatish.1. Tegishliligi boʻyicha xalq deputatlari tuman va shahar Kengashlariga aholini ichimlik va oqova suv bilan taʼminlash darajasini oshirish boʻyicha amalga oshirilgan ishlar hamda kelgusidagi rejalar toʻgʻrisida hisobot berib borish.Har chorakdaBuxoro viloyati hokimligi,“Buxoro suv taʼminoti” MChJ2. Xalq deputatlari viloyat Kengashiga aholini ichimlik va oqova suv bilan taʼminlash darajasini oshirish boʻyicha amalga oshirilgan ishlar hamda kelgusidagi rejalar toʻgʻrisida hisobot berib borish.Har yarim yilda10.Ichimlik va oqova suv xizmatlari tariflarini qayta koʻrib chiqish orqali isteʼmolchilarga koʻrsatiladigan xizmatlar sifatini oshirish hamda korxona majburiyatlarini oʻz vaqtida bajarishning moliyaviy manbalarini shakllantirish.1. Koʻrsatiladigan xizmatlar tannarxini toʻliq qoplashni nazarda tutuvchi, shuningdek, korxonani rivojlantirish hamda modernizatsiya qilish xarajatlarini inobatga olib ichimlik va oqova suv tariflarini ishlab chiqish.Har yili 1-iyulBuxoro viloyati hokimligi,Buxoro viloyati moliya boshqarmasi,“Buxoro suv taʼminoti” MChJ,Xalq deputatlari Buxoro viloyat Kengashi2. Narxlarni (tariflarni) tartibga solish organlaridan ishlab chiqilgan tariflar boʻyicha tegishli xulosalar olish.Har yili 1-iyul3. Ichimlik va oqova suv tariflarini xalq deputatlari viloyat Kengashiga tasdiqlash uchun kiritish.Har yili 1-iyul6. Vakolatli vazirlik va mahalliy hokimliklar tomonidan amalga oshiriladigan ishlar11.Ichimlik va oqova suv inshootlari kadastr roʻyxatlarini shakllantirish.Mahalliy budjet mablagʻlari hisobidan ichimlik va oqova suv inshootlarining kadastr hujjatlarini rasmiylashtirish choralarini koʻrish.2023-yil 1-oktabrBuxoro viloyati hokimligi,“Buxoro suv taʼminoti” MChJ12.Muddati oʻtgan tashqi qarz majburiyatlarini qoplash.“Buxoro viloyatini ichimlik suvi bilan taʼminlashni yaxshilash” loyihasi (Vazirlar Mahkamasining 2002-yil 26-fevraldagi 67-son qarori) boʻyicha yuzaga kelgan muddati oʻtgan qarzdorliklarini Respublika budjeti mablagʻlari hisobidan qoplash.2023-yil 1-oktabrIqtisodiyot va moliya vazirligi,Markaziy bank,“Asakabank” AJ,“Oʻzsuvtaʼminot” AJ13.Isteʼmolchilar sonini va xizmat koʻrsatish hajmlarini oshirish, debitor qarzdorliklarni kamaytirish, suv yoʻqotishlari hajmini qisqartirish hamda mavjud quvvatlarni modernizatsiya qilish va texnik jihozlash, shuningdek, toʻlov intizomini mustahkamlash boʻyicha ishlarni tashkil qilish.1. Mazkur “yoʻl xaritasi”da koʻzda tutilgan chora-tadbirlarni amalga oshirish boʻyicha tuman va shaharlar kesimida tegishli hokim tomonidan chora-tadbirlar rejasi tasdiqlanishini taʼminlash.Har yiliBuxoro viloyati hokimligi2. Tuman va shaharlar kesimida tasdiqlangan chora-tadbirlar rejasi boʻyicha har chorakda hokimlar tomonidan xalq deputatlari viloyat Kengashiga hisobot berilishini taʼminlash.Har chorakda14.Mahalliy pudratchilarni loyiha doirasida amalga oshiriladigan qurilish ishlariga keng jalb qilish.Mahalliy pudratchilar orasida tegishli trening va seminarlar oʻtkazish.Doimiy ravishdaInvestitsiyalar, sanoat va savdo vazirligi,“Oʻzsuvtaʼminot” AJ,Buxoro viloyati hokimligi15.Loyiha boʻyicha Vazirlar Mahkamasiga hisobot berish.Loyiha boʻyicha ishlarning oʻz vaqtida amalga oshirilishi, ajratilgan mablagʻlar oʻzlashtirilishi hamda mazkur “yoʻl xaritasi”da koʻzda tutilgan tadbirlar amalga oshirilishi boʻyicha Qurilish va uy-joy kommunal xoʻjaligi vaziri tomonidan Vazirlar Mahkamasiga hisobot berish.Har yiliQurilish va uy-joy kommunal xoʻjaligi vazirligi

Oʻzbekiston Respublikasi Prezidentining 2023-yil 7-avgustdagi PQ-266-son qaroriga 5-ILOVA

Osiyo infratuzilma investitsiyalari banki ishtirokidagi “Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish (2-bosqich)” loyihasi doirasida iqtisod qilingan mablagʻlar hisobidan Buxoro viloyatining loyiha bilan qamrab olinmagan hududlarida ichimlik suv hamda oqova suv tarmoqlarini qurish boʻyicha yangi loyihalar

roʻyxati*

* Ushbu roʻyxatga Buxoro viloyati hokimligi va “Oʻzsuvtaʼminot” AJ taklifiga asosan Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasi tomonidan oʻzgartirishlar kiritilishi mumkin.