“Umra” tadbirlarini tashkil etish va oʻtkazishda ziyoratchilarning manfaatlarini samarali himoya qilish boʻyicha qoʻshimcha chora-tadbirlar toʻgʻrisida (345-son)
08.08.2023
Oʻzbekiston Respublikasi Vazirlar Mahkamasining
qarori
Mamlakatimizda fuqarolarning vijdon erkinligi va diniy eʼtiqodga oid konstitutsiyaviy huquqlarini taʼminlash hamda ularni davlat tomonidan qoʻllab-quvvatlash tizimi takomillashtirilib, fuqarolarga “Umra” ziyorati uchun keng imkoniyatlar yaratilmoqda.
Shu bilan birga, xususiy sektor tomonidan “Umra” tadbirlarini tashkil etish va amalga oshirishning aniq huquqiy mexanizmlari yaratilmaganligi ziyoratchilar huquqlarini toʻliq himoya qilish imkonini bermayapti. Bu esa hamyurtlarimizning chet elda sarson boʻlishiga, firibgarlarga va ziyoratga noqonuniy yoʻllar bilan yuboruvchi “vositachilar”ga aldanib qolishiga, yetarli malakaga ega boʻlmagan shaxslarning guruh rahbari (ellikboshi) sifatida jalb qilinishi oqibatida “Umra” amallarining mukammal ado etilmasligiga hamda turli destruktiv kuchlar taʼsiri ostiga tushib qolishiga sabab boʻlmoqda.
Ziyoratchilar “Umra” amallarini munosib va xavfsiz bajarishlari uchun munosib shart-sharoitlar yaratish, xorijda ularning huquqlari va qonuniy manfaatlarini himoya qilish va kafolatlangan xizmatlardan foydalanishini taʼminlash maqsadida Vazirlar Mahkamasi qaror qiladi:
1. Fuqarolarga “Umra” tadbirlarini tashkil etish va oʻtkazishga oid xizmatlarni (keyingi oʻrinlarda — “Umra” xizmatlari) koʻrsatish bilan bogʻliq turistik faoliyatni amalga oshirish litsenziyasi chiqish turizmi kichik turining alohida faoliyat yoʻnalishi hisoblansin hamda mazkur faoliyat faqat mahalliy turoperator tomonidan amalga oshirilishi belgilansin.
2. Turistik faoliyatni amalga oshirish litsenziyasi chiqish turizmi kichik turining “Umra” xizmatlarini koʻrsatish faoliyati boʻyicha quyidagi qoʻshimcha litsenziya talablari va shartlari joriy etilsin:
100 ming AQSh dollari ekvivalentidan kam boʻlmagan miqdordagi mablagʻlarni Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilib qoʻyish hamda ushbu mablagʻlarning yetarli miqdorini taʼminlab borish;
“Umra” xizmatlari davomida ziyoratchilarning guruh rahbari etib Oʻzbekiston musulmonlari idorasi bilan tuziladigan shartnoma asosida uning diniy bilim va koʻnikmalarga ega boʻlgan mutaxassislarini tayinlash;
“Umra” xizmatlarini koʻrsatuvchi turoperator shtatida diniy (islomiy) taʼlim yoʻnalishlari boʻyicha respublika taʼlim muassasasi yoki Oʻzbekiston xalqaro islom akademiyasining tegishli bakalavriat taʼlim yoʻnalishi yoxud magistratura mutaxassisligi bitiruvchisi boʻlgan kamida bir nafar mutaxassisning boʻlishi;
“Umra” xizmatlarini voyaga yetmagan fuqarolarga koʻrsatmaslik;
“Umra” xizmatlarini Saudiya Arabistoni Podshohligidagi hamkor tashkilot oʻrtasida imzolanadigan shartnomaga muvofiq amalga oshirish.
3. Belgilansinki:
tegishli turoperator tomonidan Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilib qoʻyiladigan 100 ming AQSh dollari ekvivalenti miqdoridagi mablagʻlardan uning “Umra” xizmatlarini sifatsiz koʻrsatishidan jabr koʻrgan ziyoratchilarga yetkazilgan moddiy va maʼnaviy zarar oʻrnini qoplash uchun sud qaroriga muvofiq foydalaniladi;
turistik faoliyatning “Umra” xizmatlarini koʻrsatish yoʻnalishi uchun litsenziya berish masalasi Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonunida belgilangan litsenziyalash sohasidagi tegishli vakolatli organlar tomonidan Oʻzbekiston Respublikasi Din ishlari boʻyicha qoʻmitasi bilan kelishiladi. Bunda, ariza 10 ish kuni davomida koʻrib chiqiladi.
4. Oʻzbekiston musulmonlari idorasi va Oʻzbekiston Respublikasi Din ishlari boʻyicha qoʻmitasining “Umra” xizmatlarini koʻrsatuvchi turoperator murojaati asosida Oʻzbekiston musulmonlari idorasi mutaxassisini ziyoratchilarga guruh rahbari (ellikboshi) sifatida jalb etish boʻyicha quyidagi tartibni joriy etish toʻgʻrisidagi taklifiga rozilik berilsin:
mutaxassisning ziyoratchilar guruhlariga rahbarlik qilishi bilan bogʻliq xizmati begʻaraz amalga oshiriladi, uning safar xarajatlari (transport, mehmonxona, oziq-ovqat, sugʻurta, viza toʻlovlari va boshqalar) “Umra” xizmatlarini koʻrsatuvchi turoperator tomonidan qoplanadi;
mutaxassis “Umra” xizmatlarini koʻrsatuvchi turoperatorning soʻroviga koʻra Oʻzbekiston musulmonlari idorasi tomonidan uch ish kunida ajratiladi;
1 nafar guruh rahbariga 50 nafardan oshmagan ziyoratchilar guruhi biriktiriladi.
5. “Umra” xizmatlarini koʻrsatish bilan bogʻliq faoliyat ustidan jamoatchilik nazoratini kuchaytirish maqsadida Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi:
ikki oy muddatda oʻz rasmiy veb-saytida “Umra” xizmatlarini koʻrsatuvchi turoperatorlar reytingini shakllantirish uchun tegishli axborot modulining ishga tushirilishini;
Oʻzbekiston Respublikasi Din ishlari boʻyicha qoʻmitasi bilan birgalikda 2023-yil 1-oktabrdan boshlab “Umra” xizmatlarini koʻrsatuvchi turoperatorlar faoliyatini reyting asosida baholash tizimi joriy etilishini taʼminlasin.
Belgilansinki, ushbu reytingdagi “Umra” xizmatlarini koʻrsatuvchi turoperatorlarning oʻrni jamoatchilik tomonidan ochiq ovoz berish, ushbu tashkilotlar xizmatlaridan avval foydalangan fuqarolar (sayyohlar) bilan oʻrnatilgan qayta aloqa (jumladan, ijtimoiy tarmoqlar orqali) natijalariga koʻra aniqlanadi.
6. Oʻzbekiston Respublikasi Adliya vazirligi Raqamli texnologiyalar vazirligi bilan birgalikda bir hafta muddatda Oʻzbekiston Respublikasi Yagona interaktiv davlat xizmatlari portali va “Litsenziya” axborot tizimini ushbu qaror talablari asosida takomillashtirsin.
Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi turistik faoliyatni amalga oshirish litsenziyasining chiqish turizmi kichik turini rasmiylashtirishda turoperatorlarning “Umra” tadbirini tashkil etish va oʻtkazishga oid xizmatlarni koʻrsatish huquqi litsenziyada alohida aks ettirilishini taʼminlasin.
7. Oʻzbekiston Respublikasi Din ishlari boʻyicha qoʻmitasi Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi bilan birgalikda bir oy muddatda:
ushbu qaror mazmun-mohiyatini keng jamoatchilikka va tadbirkorlik subyektlariga yetkazilishini taʼminlasin hamda “Umra” tadbirlarini tashkil etish va diniy tadbirlar (ziyoratlar)ni amalga oshirish boʻyicha videoroliklar ishlab chiqib, ommaviy axborot vositalari va ijtimoiy tarmoqlar orqali keng yoritish choralarini koʻrsin;
“Umra” xizmatlarini koʻrsatuvchi turoperatorlar uchun ziyoratchilarni oldindan tanishtirish maqsadida tavsiyaviy yoʻriqnoma ishlab chiqsin va oʻzlarining rasmiy veb-saytlariga joylashtirsin;
fuqarolardan “Umra” xizmatlarini koʻrsatish masalalari yuzasidan kelib tushadigan murojaatlar bilan ishlash yuzasidan nazoratni kuchaytirsin.
8. Belgilansinki, mazkur qaror kuchga kirgunga qadar chiqish turizmi kichik turi boʻyicha turistik faoliyatni amalga oshirish litsenziyasi mavjud tashkilotlarga nisbatan ushbu qarorning 2-bandida belgilangan qoʻshimcha litsenziya talab va shartlari 2023-yil 1-noyabrdan boshlab qoʻllaniladi hamda ulardan litsenziyani qayta rasmiylashtirishda arizani koʻrib chiqish uchun toʻlanadigan yigʻim va litsenziya uchun davlat boji undirilmaydi.
9. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar kiritilsin.
Bunda mazkur qarorga ilovaning 2-bandi 2023-yil 1-noyabrdan boshlab amalga kiritiladi.
10. Ushbu qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduhakimov hamda Oʻzbekiston Respublikasi Din ishlari boʻyicha qoʻmitasi raisi S.D. Toshboyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 8-avgust,
345-son
Vazirlar Mahkamasining 2023-yil 8-avgustdagi 345-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar
1. Vazirlar Mahkamasining 2017-yil 7-iyundagi 364-son qarori bilan tasdiqlangan “Haj” va “Umra” tadbirlarini tashkil etish va oʻtkazish tartibi toʻgʻrisidagi nizomning 2-bandi quyidagi tahrirda bayon etilsin:
“2. Oʻzbekiston Respublikasi fuqarolari uchun “Haj” tadbiri Oʻzbekiston Respublikasi Din ishlari boʻyicha qoʻmita va Saudiya Arabistoni Podshohligi (keyingi oʻrinlarda Saudiya Arabistoni deb ataladi) Haj va umra vazirligi oʻrtasida har yili imzolanadigan shartnoma asosida Oʻzbekiston musulmonlari idorasi tomonidan amalga oshiriladi hamda bunday faoliyat bilan boshqa tashkilotlarning shugʻullanishiga yoʻl qoʻyilmaydi.
“Umra” tadbiri Oʻzbekiston musulmonlari idorasi va tegishli litsenziyaga ega mahalliy turoperatorlar tomonidan amalga oshirilishi mumkin.
Oʻzbekiston musulmonlari idorasi tomonidan tashkil etiladigan “Umra” tadbiri uning Saudiya Arabistonidagi hamkor tashkiloti oʻrtasida Oʻzbekiston Respublikasi Prezidentining “Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashini tashkil etish toʻgʻrisida” 2006-yil 28-avgustdagi PF-3793-son Farmoni bilan tashkil qilingan Har yilgi “Haj” va “Umra” tadbirlarini tashkil etish va oʻtkazish masalalari boʻyicha jamoatchilik kengashi (keyingi oʻrinlarda Jamoatchilik kengashi deb ataladi) bilan kelishgan holda har yili imzolanadigan shartnomaga muvofiq Ushbu Nizom talablari asosida amalga oshiriladi.
Tadbirkorlik subyektlari tomonidan “Umra” tadbirini tashkil etish bilan bogʻliq faoliyat Oʻzbekiston Respublikasi Vazirlar Mahkamasining alohida qarori bilan tartibga solinadi”.
2. Vazirlar Mahkamasining 2022-yil 21-fevraldagi 80-son qarori bilan tasdiqlangan Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomga 5-ilovaning matni quyidagi tahrirda bayon etilsin:
“Turizm faoliyatini litsenziyalash
PASPORTI
1. Litsenziya nomi: turistik faoliyatni amalga oshirish uchun litsenziya 2. Litsenziyalanadigan faoliyatning kichik turlari: a) ichki turizm faoliyati (Oʻzbekiston Respublikasi ichkarisida turistik faoliyatni amalga oshirish); b) chiqish turizmi faoliyati: Oʻzbekiston Respublikasidan tashqarida turistik faoliyatni (shu jumladan tibbiy va taʼlim turizmini) amalga oshirish; Oʻzbekiston Respublikasidan tashqarida turistik faoliyatni (“Umra” tadbirini tashkil etishva oʻtkazishga oid xizmatlarni koʻrsatish) amalga oshirish); v) kirish turizmi faoliyati (Oʻzbekiston Respublikasiga chet el fuqarolarini jalb etishga oid turistik faoliyatni amalga oshirish). 3. Ariza beruvchilar toifasi: Jismoniy va yuridik shaxslar 4. Litsenziyalovchi organ: Qoraqalpogʻiston Respublikasi, viloyatlar va Toshkent shahar turizm boshqarmalari 5. Litsenziyani olish uchun taqdim qilinadigan hujjatlar: Turoperatorlik faoliyatini amalga oshirish uchun: a) ariza; arizada quyidagi maʼlumotlar koʻrsatiladi: yuridik shaxsning nomi va tashkiliy-huquqiy shakli, joylashgan yeri (pochta manzili), faoliyatni amalga oshirish joyining manzili, STIR, bank muassasasining nomi va bank hisobvaragʻi, faoliyatning litsenziyalanayotgan turi, litsenziya talabgorining litsenziya talablari va shartlariga rioya qilishga roziligi, ariza toʻldirish sababi (yangi litsenziya olish, qayta rasmiylashtirish); b) talabgorning kamida ikki chet tilidagi, elektron toʻlovlar, bron qilish xizmatlarini koʻrsatadigan veb-saytga ega boʻlishi (ushbu talabning chet tillari boʻyicha qismi “ichki turizm” yoʻnalishidagi litsenziatlarga taalluqli emas) toʻgʻrisidagi maʼlumotlar; v) yuridik shaxs shtatida “turizm” yoʻnalishi boʻyicha oliy yoki oʻrta maxsus, kasb-hunar, professional maʼlumotga yoki malaka sertifikatiga ega boʻlgan kamida bir nafar mutaxassisning boʻlishi, “Umra” tadbirini tashkil etish va oʻtkazish xizmatlarini koʻrsatish uchun qoʻshimcha ravishda diniy (islomiy) taʼlim yoʻnalishlari boʻyicha taʼlim muassasasi yoki Oʻzbekiston xalqaro islom akademiyasining “Dinshunoslik”, “Islomshunoslik”, “Islom tarixi va manbashunosligi”, “Ziyorat turizmi” va “Islom huquqi” taʼlim yoʻnalishlari (mutaxassisliklar) bitiruvchisi boʻlgan kamida bir nafar mutaxassisning mavjudligi toʻgʻrisidagi maʼlumot; g) turoperatorlarning fuqarolik javobgarligini sugʻurtalashni tasdiqlovchi sugʻurta polisining mavjudligini tasdiqlovchi hujjatlarning elektron nusxalari; d) rahbarning familiyasi, ismi va otasining ismi, tugʻilgan yili, pasport (identifikatsiyalovchi ID-karta) maʼlumotlari, uy manzili, maʼlumoti, aloqa telefonlari koʻrsatilgan maʼlumotlar; e) litsenziyalovchi organ “chiqish turizmi” yoʻnalishi boʻyicha turizm faoliyatini amalga oshirish uchun litsenziya talabgorlariga 15 ming AQSh dollari ekvivalenti miqdoridagi, basharti “Umra” tadbirini tashkil etish va oʻtkazishga oid turizm xizmatlarini koʻrsatmoqchi boʻlgan taqdirda, litsenziya talabgori 100ming AQSh dollari ekvivalentidan kam boʻlmagan miqdordagi mablagʻlarni Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilinganligi haqidagi maʼlumotni oʻzi mustaqil tarzda oladi. Turagentlik faoliyatini amalga oshirish uchun: a) ariza; yuridik shaxslar uchun: yuridik shaxsning nomi va tashkiliy-huquqiy shakli, joylashgan yeri (pochta manzili), faoliyatni amalga oshirish joyining manzili, bank muassasasining nomi va bank hisobvaragʻi, STIR, faoliyatning litsenziyalanayotgan turi, litsenziya talabgorining litsenziya talablari va shartlariga rioya qilishga roziligi, ariza toʻldirish sababi (yangi litsenziya olish, qayta rasmiylashtirish); jismoniy shaxslar uchun: familiyasi, ismi, otasining ismi, JSHSHIR (mavjud boʻlsa), faoliyatni amalga oshirish joyi, yashash joyi, elektron pochta manzili (mavjud boʻlsa), telefon raqami, litsenziya talabgorining litsenziya talablari va shartlariga rioya qilishga roziligi, litsenziya toifalari boʻyicha tanlash, ariza toʻldirish sababi (yangi litsenziya olish, qayta rasmiylashtirish). b) mijozga litsenziatning ish rejimi, joylashgan yeri (pochta manzili), tegishli litsenziya, litsenziatning familiyasi, ismi, otasining ismi toʻgʻrisida toʻliq va batafsil maʼlumot berish, jumladan, ushbu koʻrsatilgan maʼlumotlarni oʻzining Internet jahon axborot tarmogʻidagi rasmiy veb-saytiga joylashtirilganligi toʻgʻrisida maʼlumotlar; v) talabgorning kamida ikki chet tilidagi, elektron toʻlovlar, bron qilish xizmatlarini koʻrsatadigan veb-saytga ega boʻlishi (ushbu talabning chet tillari boʻyicha qismi “ichki turizm” yoʻnalishidagi litsenziatlarga taalluqli emas) toʻgʻrisidagi maʼlumotlar. g) litsenziyalovchi organ “chiqish turizmi” yoʻnalishi boʻyicha turizm faoliyatini amalga oshirish uchun litsenziya talabgorlariga 15 ming AQSh dollari ekvivalenti miqdoridagi mablagʻlarni Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilinganligini haqidagi maʼlumotni oʻzi mustaqil tarzda oladi. 6. Arizani koʻrib chiqish uchun toʻlanadigan yigʻim miqdori: bazaviy hisoblash miqdorining 2,5 baravari 7. Litsenziya berilganligi uchun davlat boji miqdori: “Ichki turizm” yoʻnalishi boʻyicha turizm faoliyati uchun bazaviy hisoblash miqdorining 2 baravari; “chiqish turizmi” yoki “kirish turizmi” yoʻnalishi boʻyicha turizm faoliyati yoxud bittadan ortiq yoʻnalish turi boʻyicha turizm faoliyatini amalga oshirish uchun bazaviy hisoblash miqdorining 5 baravari. 8. Arizani koʻrib chiqish muddatlari: 5 kun, basharti ariza “Umra” tadbirini tashkil etish va oʻtkazishga oid boʻlsa, 10 kun. 9. Litsenziya talablari va shartlari: Turoperatorlar faoliyatini amalga oshirish uchun litsenziyalash talablari va shartlari quyidagilardan iborat: a) turizm toʻgʻrisidagi qonunchilik hujjatlariga qatʼiy rioya qilish; b) yuridik shaxs shtatida “turizm” yoʻnalishi boʻyicha oliy yoki oʻrta maxsus, kasb-hunar maʼlumotiga yoki malaka sertifikatiga ega boʻlgan kamida bir nafar mutaxassisning boʻlishi, “Umra” tadbirini tashkil etish va oʻtkazish xizmatlarini koʻrsatuvchi tashkilot shtatida qoʻshimcha ravishda diniy (islomiy) taʼlim yoʻnalishlari boʻyicha taʼlim muassasasi yoki Oʻzbekiston xalqaro islom akademiyasining “Dinshunoslik”, “Islomshunoslik”, “Islom tarixi va manbashunosligi”, “Ziyorat turizmi” va “Islom huquqi” taʼlim yoʻnalishlari (mutaxassisliklar) bitiruvchisi boʻlgan kamida bir nafar mutaxassisning mavjudligi;* v) yuridik shaxs xodimlari (gidlar (gid-tarjimonlar), ekskursiya yetakchilari va yoʻriqchi-yoʻl boshlovchilar) uch yilda kamida bir marta belgilangan tartibda malaka sertifikatini olishi;* g) “chiqish turizmi” yoʻnalishi boʻyicha turizm faoliyatini amalga oshirish uchun litsenziya talabgorlariga 15 ming AQSh dollari ekvivalenti miqdoridagi mablagʻlarni, basharti “Umra” tadbirini tashkil etish va oʻtkazishga oid turizm xizmatlarini koʻrsatmoqchi boʻlgan taqdirda, litsenziya talabgori 100ming AQSh dollari ekvivalentidan kam boʻlmagan miqdordagi mablagʻlarni Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilishi;* d) turizm mahsuloti buyurtmachisi bilan, shu jumladan, Oʻzbekiston Respublikasining turizm xizmatlarini koʻrsatish toʻgʻrisidagi qonunchilik hujjatlari talablariga javob beradigan elektron tijorat shartnomasi tuzilganidan keyin turizm xizmatlarini koʻrsatish; e) har bir turistga va ekskursantga turistik sayohat vaqtida Oʻzbekiston Respublikasiga hamda chet davlatlarga kirish, ulardan chiqish va ularda boʻlishning oʻziga xos xususiyatlari toʻgʻrisidagi axborotni yetkazish; j) mijozga litsenziatning ish rejimi, uning joylashgan joyi (pochta manzili), tegishli litsenziya, turizm xizmatlari sertifikatining mavjudligi (agar mavjud boʻlsa), turizm faoliyatining aniq yoʻnalishlari uchun masʼul boʻlgan litsenziatning mutaxassislari familiyasi, ismi, otasining ismi toʻgʻrisida toʻliq va batafsil maʼlumot berish, jumladan, ushbu koʻrsatilgan maʼlumotlarni oʻzining Internet jahon axborot tarmogʻidagi rasmiy veb-saytiga joylashtirish; z) litsenziat kamida ikki chet tilidagi, elektron toʻlovlar, bron qilish xizmatlarini koʻrsatadigan veb-saytga ega boʻlishi (ushbu talabning chet tillari boʻyicha qismi “ichki turizm” yoʻnalishidagi litsenziatlarga taalluqli emas); i) turoperatorlarning fuqarolik javobgarligini sugʻurtalashni tasdiqlovchi sugʻurta polisining mavjudligi;* y) xorijiy mamlakatlardagi taʼlim va (yoki) tibbiyot muassasasi tomonidan berilgan belgilangan faoliyat bilan shugʻullanish huquqini tasdiqlovchi hujjat nusxasining mavjudligi (“chiqish turizmi” yoʻnalishi boʻyicha taʼlim va (yoki) tibbiyot turizmi faoliyatini amalga oshirish uchun);* k) xorijiy mamlakatlardagi taʼlim va (yoki) tibbiyot muassasasi bilan hamkorligini tasdiqlovchi hujjatning mavjudligi (“chiqish turizmi” yoʻnalishi boʻyicha taʼlim va (yoki) tibbiyot turizmi faoliyatini amalga oshirish uchun);* l) faoliyatni faqat litsenziyada koʻrsatilgan yoʻnalish(lar) boʻyicha amalga oshirish;* m) mijozlar va chet ellik hamkorlar bilan tuzilgan tegishli shartnomasiz turizm xizmatlarini koʻrsatmaslik;* n)turizm xizmatlari sertifikati bilan tasdiqlangan turistlar va ekskursiyachilarning hayoti, sogʻligʻi va mol-mulki uchun xavfsizlikni taʼminlash tizimining litsenziatda mavjudligi. “Umra” tadbirini tashkil etish va oʻtkazish xizmatlarini koʻrsatuvchi turoperatorlarga qoʻyiladigan qoʻshimcha litsenziyalash talab va shartlari quyidagilardan iborat: a) “chiqish turizmi” faoliyati doirasida “Umra” tadbirini tashkil etish va oʻtkazishga oid turizm xizmatlarini koʻrsatish uchun litsenziya talabgori 100 ming AQSh dollari ekvivalentidan kam boʻlmagan miqdordagi mablagʻlarni Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilishi;* b) “Umra” tadbirlari davomida ziyoratchilarning guruh rahbari etib Oʻzbekiston musulmonlari idorasi bilan tuziladigan shartnoma asosida uning diniy bilim va koʻnikmalarga ega boʻlgan mutaxassislarini tayinlash hamda bir nafar guruh rahbariga ellik nafardan oshmagan miqdorda ziyoratchilarni biriktirish;* v) “Umra” tadbirini tashkil etish va oʻtkazish xizmatlarini koʻrsatuvchi tashkilot shtatida diniy (islomiy) taʼlim yoʻnalishlari boʻyicha taʼlim muassasasi yoki Oʻzbekiston xalqaro islom akademiyasining “Dinshunoslik”, “Islomshunoslik”, “Islom tarixi va manbashunosligi”, “Ziyorat turizmi” va “Islom huquqi” taʼlim yoʻnalishlari (mutaxassisliklar) bitiruvchisi boʻlgan kamida bir nafar mutaxassisning mavjudligi;* g) “Umra” tadbiriga voyaga yetgan fuqarolarni yuborish; d) “Umra” tadbirini Saudiya Arabistoni Podshohligidagi hamkor tashkilot oʻrtasida imzolanadigan shartnonaga muvofiq amalga oshirish.* Turagentlar faoliyatini litsenziyalash talablari va shartlari quyidagilardan iborat: a) turizm toʻgʻrisidagi qonunchilik hujjatlariga qatʼiy rioya qilish; b) turizm faoliyatining “chiqish turizmi” yoʻnalishidagi faoliyatni faqat yuridik shaxs tashkil etgan holda amalga oshirish;* v) “chiqish turizmi” yoʻnalishi boʻyicha turizm faoliyatini amalga oshirish uchun litsenziya talabgorlariga 15 ming AQSh dollari ekvivalenti miqdoridagi mablagʻlarni Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasining Xavfsiz turizm jamgʻarmasiga zaxira qilishi;* g) turoperator bilan shartnoma tuzilgandan soʻng turoperatorlar tomonidan yaratilgan turizm mahsulotini targʻib va realizatsiya qilish;* d) har bir turistga va ekskursiyachiga turistik sayohat vaqtida Oʻzbekiston Respublikasiga hamda chet davlatlarga kirish, ulardan chiqish va ularda boʻlishning oʻziga xos xususiyatlari toʻgʻrisidagi axborotni yetkazish; e) litsenziat kamida ikki chet tilidagi, elektron toʻlovlar, bron qilish xizmatlarini koʻrsatadigan veb-saytga ega boʻlishi (ushbu talabning chet tillari boʻyicha qismi “ichki turizm” yoʻnalishidagi litsenziatlarga taalluqli emas);* j) mijozga litsenziatning ish rejimi, joylashgan yeri (pochta manzili), tegishli litsenziya, litsenziatning familiyasi, ismi, otasining ismi toʻgʻrisida toʻliq va batafsil maʼlumot berish, jumladan, ushbu koʻrsatilgan maʼlumotlarni oʻzining Internet jahon axborot tarmogʻidagi rasmiy veb-saytiga joylashtirish. 10. Litsenziya berishda kelishiladigan organlar: mavjud emas (“Umra” tadbirini tashkil etish va oʻtkazishga oid xizmatlarni koʻrsatish boʻyicha arizalar Oʻzbekiston Respublikasi Din ishlari boʻyicha qoʻmitasi bilan kelishiladi). 11. Litsenziyaning amal qilish muddati: cheklanmagan 12. Izoh. * Qoʻpol ravishda buzish deb hisoblanadigan talab va shartlar. ”.