Otorinolaringologiya xizmatini takomillashtirish va uning koʻlamini kengaytirish chora-tadbirlari toʻgʻrisida (PQ-255-son)

01.08.2023

Oʻzbekiston Respublikasi Prezidentining

Qarori

Otorinolaringologiya sohasida tibbiy yordam koʻrsatish sifatini yaxshilash, aholining ehtiyojmand qatlamlariga yuqori malakali ixtisoslashtirilgan tibbiy xizmatlar koʻlamini kengaytirish, sohadagi nodavlat tibbiyot tashkilotlari faoliyatini qoʻllab-quvvatlash, davlat muassasalarining moddiy-texnika bazasini mustahkamlash, tibbiy kadrlarni tayyorlash va ilm-fanni rivojlantirish maqsadida:

1. Sogʻliqni saqlash vazirligi hamda Oʻzbekiston otorinolaringologiya va bosh-boʻyin jarrohligi assotsiatsiyasining 2023-yil 1-sentabrdan yuridik shaxs maqomiga ega boʻlgan Respublika ixtisoslashtirilgan otorinolaringologiya va bosh-boʻyin kasalliklari ilmiy-amaliy tibbiyot markazini (keyingi oʻrinlarda — Markaz) tashkil qilish toʻgʻrisidagi taklifi maʼqullansin.

2. Belgilab qoʻyilsinki:

a) Markaz:

otorinolaringologiya yoʻnalishidagi ishlarni muvofiqlashtiradi hamda “Markaz — hududiy tibbiyot muassasalari — tuman (shahar) tibbiyot muassasalari” tizimi asosida oʻz faoliyatini tashkil etadi;

otorinolaringologik va bosh-boʻyin kasalliklari sohasida ixtisoslashtirilgan tibbiy yordam koʻrsatishni yoʻlga qoʻyadi, ushbu yoʻnalishlarda mutaxassislarni oʻqitish va ularning koʻnikmalarini rivojlantirish choralarini koʻradi hamda ilmiy maktabni shakllantiradi;

hududlarda otorinolaringologik va bosh-boʻyin kasalliklarini tashxislash va davolashning zamonaviy usullarini amaliyotga joriy etadi hamda yuqori texnologik amaliyotlar koʻlamini kengaytiradi;

sogʻliqni saqlash tizimining birlamchi tibbiy-sanitariya yordami muassasalarida otorinolaringologik va bosh-boʻyin kasalliklari profilaktikasi, ularni erta aniqlash va davolash dasturlarini amaliyotga joriy etadi;

nodavlat tibbiyot tashkilotlari bilan hamkorlikda otorinolaringologik va bosh-boʻyin kasalliklarini davolashning zamonaviy va yuqori texnologik usullarini davlat va nodavlat tibbiyot tashkilotlari amaliyotiga joriy etadi;

b) 2024/2025 oʻquv yilidan boshlab Markazda otorinolaringologiya ixtisosligi boʻyicha tibbiyot kadrlarini klinik ordinatura orqali tayyorlash tashkil qilinadi;

v) Qoraqalpogʻiston Respublikasi va viloyatlar koʻp tarmoqli tibbiyot markazlarining otorinolaringologiya boʻlimlari Markazning yuridik shaxs maqomiga ega boʻlmagan hududiy filiallari hisoblanadi.

Markaz va uning hududiy filiallari tibbiyot yoʻnalishidagi oliy, professional va oʻrta maxsus taʼlim muassasalarining tegishli kafedralari uchun klinik baza sifatida faoliyat yuritadi.

3. Markaz faoliyatini moliyalashtirish manbalari etib quyidagilar belgilansin:

Davlat budjetidan ajratiladigan mablagʻlar;

ilmiy faoliyatga oid davlat dasturlarini amalga oshirish doirasidagi grantlar;

pullik xizmatlar koʻrsatishdan tushadigan mablagʻlar;

qonunchilik hujjatlarida taqiqlanmagan boshqa manbalar.

4. Oʻzbekiston Respublikasi Prezidentining 2021-yil 28-iyuldagi “Sogʻliqni saqlash sohasida ixtisoslashtirilgan tibbiy yordam koʻrsatish tizimini yanada takomillashtirish chora-tadbirlari toʻgʻrisida”gi PQ-5199-son qaroriga muvofiq, imtiyozli toifaga kiruvchi shaxslarni davolash uchun ixtisoslashtirilgan muassasalarni Davlat tibbiy sugʻurtasi jamgʻarmasi bilan tuzilgan shartnomalar asosida bazaviy narxlarda moliyalashtirish tartibi Markaz uchun 2024-yil 1-yanvardan boshlab tatbiq etilsin.

5. Shunday tartib oʻrnatilsinki, unga muvofiq 2024-yil 1-yanvardan boshlab, otorinolaringologiya va yuz-jagʻ jarrohligi yoʻnalishlaridagi tibbiy xizmatlar imtiyozli toifaga kiruvchi shaxslarga Davlat budjeti mablagʻlari hisobidan nodavlat tibbiyot tashkilotlari tomonidan koʻrsatilishiga ruxsat beriladi.

6. 2023 — 2026-yillarda otorinolaringologiya xizmatini rivojlantirish boʻyicha chora-tadbirlar dasturi (keyingi oʻrinlarda — Dastur) 1-ilovaga muvofiq tasdiqlansin.

Sogʻliqni saqlash vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Dasturda nazarda tutilgan tadbirlarning oʻz vaqtida, sifatli va toʻliq bajarilishini taʼminlasin hamda Dastur ijrosi yuzasidan Vazirlar Mahkamasiga axborot kiritib borsin.

7. Sogʻliqni saqlash vazirligi Iqtisodiyot va moliya vazirligi bilan birgalikda:

a) Koreya Eksimbanki Iqtisodiy rivojlanish va hamkorlik jamgʻarmasi (EDCF) hisobidan 2023-2024-yillarda tuman (shahar) koʻp tarmoqli markaziy poliklinikalarini, Qoraqalpogʻiston Respublikasi va viloyatlar koʻp tarmoqli tibbiyot markazlari, Qoraqalpogʻiston Respublikasi va viloyatlar bolalar koʻp tarmoqli tibbiyot markazlari, Toshkent shahar shifoxonalarining otorinolaringologiya boʻlimlari va tibbiyot oliy taʼlim muassasalari klinikalarini, Respublika shoshilinch tibbiy yordam ilmiy markazi va uning hududiy filiallarini 2-ilovaga muvofiq zarur tibbiy uskunalar bilan jihozlash uchun 17 million AQSh dollarini yoʻnaltirsin;

b) 2024-2025-yillarda Davlat budjeti mablagʻlari hisobidan quyidagi tadbirlarni amalga oshirish uchun 8,6 million AQSh dollarini yoʻnaltirish choralarini koʻrsin:

Markazda “Yuqori nafas yoʻllari aʼzolari fiziologiyasi va patologiyasi”, “Eshitish va muvozanat aʼzolari fiziologiyasi va patologiyasi”, “Foniatriya va ronxopatiya” ilmiy laboratoriyalarini, simulatsion amaliy laboratoriyani, 5 ta jarrohlik blokini va 60 ta oʻrin-joylarni zamonaviy tibbiy uskunalar bilan jihozlash;

Respublika ixtisoslashtirilgan pediatriya ilmiy-amaliy tibbiyot markazida “Eshitish zaiflashuvini tashxislash, davolash va reabilitatsiya muammolari” ilmiy laboratoriyasini tashkil etish;

Toshkent tibbiyot akademiyasi koʻp tarmoqli klinikasi va Respublika ixtisoslashtirilgan pediatriya ilmiy-amaliy tibbiyot markazini zamonaviy tibbiy uskunalar bilan jihozlash.

8. Belgilansinki, 2024-yildan boshlab:

Sogʻliqni saqlash vazirligining asoslangan hisob-kitoblariga binoan audioskrining natijasi boʻyicha aniqlangan zaif eshitadigan bolalarni koxlear implantatsiya amaliyotiga tayyorgarlik davrida Davlat budjeti mablagʻlari hisobidan qoʻshimcha yiliga kamida 2 000 ta raqamli eshitish moslamalari bilan taʼminlash yoʻlga qoʻyiladi;

Andijon davlat tibbiyot instituti klinikasining vaqtincha qisqartiriladigan oʻrin-joylari va shtat birliklari hisobidan Respublika shoshilinch tibbiy yordam ilmiy markazi va uning hududiy filiallari qabul-diagnostika boʻlimida tunu kun xizmat koʻrsatadigan qoʻshimcha otorinolaringolog va yuz-jagʻ jarrohi shtat birliklari kiritiladi.

9. Sogʻliqni saqlash vazirligi Iqtisodiyot va moliya vazirligi, Kambagʻallikni qisqartirish va bandlik vazirligi bilan birgalikda otorinolaringologiya boʻyicha ambulator va statsionar sharoitda yordam koʻrsatuvchi davlat tibbiyot muassasalari uchun shtat normativlarini qayta koʻrib chiqish hamda kelgusida ehtiyojdan kelib chiqib ularga oʻzgartirishlar kiritib borish choralarini koʻrsin.

10. Iqtisodiyot va moliya vazirligi Sogʻliqni saqlash vazirligining asoslangan hisob-kitoblariga binoan ushbu qarorda belgilangan tadbirlarni amalga oshirish bilan bogʻliq xarajatlar 2024-yildan boshlab Davlat budjeti parametrlarida nazarda tutilishini taʼminlasin.

11. Oʻzbekiston Respublikasi Prezidentining 2021-yil 28-iyuldagi “Sogʻliqni saqlash sohasida ixtisoslashtirilgan tibbiy yordam koʻrsatish tizimini yanada takomillashtirish chora-tadbirlari toʻgʻrisida”gi PQ-5199-son qarori 1-bandining “b” kichik bandi quyidagi tahrirda bayon etilsin:

“b) quyidagilar:

2021-yil 1-noyabrdan koʻz mikroxirurgiyasi va urologiya;

2022-yil 1-yanvardan kardiologiya, travmatologiya va ortopediya hamda akusherlik va ginekologiya;

2022-yil 1-iyuldan xirurgiya va neyroxirurgiya;

2024-yil 1-yanvardan otorinolaringologiya va yuz-jagʻ kasalliklari yoʻnalishlaridagi tibbiy xizmatlar imtiyozli toifaga kiruvchi shaxslarga Davlat budjeti mablagʻlari hisobidan nodavlat tibbiyot tashkilotlari tomonidan koʻrsatilishiga ruxsat berilsin”.

12. Markaz Toshkent shahri, Yashnobod tumani, Maxtumquli koʻchasi, 103-uy manzilida yangidan barpo qilinayotgan koʻp tarmoqli klinika bino va inshootlarining bir qismiga tekin foydalanish huquqi asosida joylashtirilsin.

13. Sogʻliqni saqlash vazirligi Iqtisodiyot va moliya vazirligi hamda Qurilish va uy-joy kommunal xoʻjaligi vazirligi bilan birgalikda 2023-yilda Davlat budjetidan Sogʻliqni saqlash vazirligiga ajratilgan mablagʻlar hisobidan Markazda rekonstruksiya va jihozlash ishlarini amalga oshirish choralarini koʻrsin.

14. Sogʻliqni saqlash vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

15. Mazkur qarorning ijrosini samarali tashkil qilishga masʼul va shaxsiy javobgar etib sogʻliqni saqlash vaziri A.Sh. Inoyatov belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti maslahatchisining birinchi oʻrinbosari L.N. Tuychiyev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 1-avgust,

PQ-255-son

Oʻzbekiston Respublikasi Prezidentining 2023-yil 1-avgustdagi PQ-255-son qaroriga 1-ILOVA

2023 — 2026-yillarda otorinolaringologiya xizmatini rivojlantirish boʻyicha

ChORA-TADBIRLAR DASTURI

T/r Chora-tadbirlar nomi Amalga oshirish mexanizmi Ijro muddati Mablagʻ Moliyalashtirish manbalari Masʼul ijrochilar I. Otorinolaringologiya yoʻnalishida normativ-huquqiy bazani takomillashtirish 1. Respublika ixtisoslashtirilgan otorinolaringologiya va bosh-boʻyin kasalliklari ilmiy-amaliy tibbiyot markazi (keyingi oʻrinlarda — Markaz) faoliyatini yoʻlga qoʻyish. Markazning ustavi va tuzilmasini tasdiqlash. 2023-yil 1-sentabr - - Sogʻliqni saqlash vazirligi (Inoyatov) 2. Markazning ilmiy-tadqiqot ishlari bilan shugʻullanadigan tuzilmalari xodimlari mehnatiga haq toʻlash, bino va inshootlarini saqlash xarajatlarini moliyalashtirish, shuningdek joriy xarajatlarini 2024-yildan boshlab Davlat budjeti mablagʻlari hisobidan qoplash yuzasidan Vazirlar Mahkamasiga taklif kiritish. 1. Vazirlar Mahkamasining 2021-yil 26-maydagi “Davlat ilmiy tashkilotlarini Oʻzbekiston Respublikasi Davlat budjeti mablagʻlari hisobidan bazaviy moliyalashtirishga oʻtkazish toʻgʻrisida”gi 326-son qaroriga oʻzgartirish kiritish yuzasidan hujjat loyihasini ishlab chiqish. Bunda, Markazning ilmiy-tadqiqot ishlari bilan shugʻullanadigan tuzilmalari, shuningdek, Respublika ixtisoslashtirilgan pediatriya ilmiy-amaliy tibbiyot markazining “Eshitish zaiflashuvini tashxislash, davolash va reabilitatsiya muammolari” ilmiy laboratoriyasini inobatga olish. 2. Loyihani belgilangan tartibda Vazirlar Mahkamasiga kiritish. 2023-yil 1-oktabr - - Sogʻliqni saqlash vazirligi (Inoyatov), Iqtisodiyot va moliya vazirligi (Kudbiyev) 3. Bolalarda tugʻma va orttirilgan eshitish nuqsonlarini erta tashxislash va davolash ishlarini takomillashtirish. Bolalarda tugʻma va orttirilgan eshitish nuqsonlarini erta tashxislash va davolash ishlarini muvofiqlashtirish yuzasidan sogʻliqni saqlash vazirining buyrugʻini qabul qilish. Bunda: Respublika ixtisoslashtirilgan pediatriya ilmiy-amaliy tibbiyot markazi hamda uning filiallarini ushbu yoʻnalishda yetakchi muassasa ekanligini koʻzda tutish; Respublika ixtisoslashtirilgan pediatriya ilmiy-amaliy tibbiyot markazini bolalarda tugʻma va orttirilgan eshitish nuqsonlarini davolash va tashxislashga oid sohaviy kadrlarni tayyorlash hamda malakasini oshirib borishga masʼul etib belgilash. 2023-yil 1-noyabr - - Sogʻliqni saqlash vazirligi (Inoyatov) II. Otorinolaringologik kasalliklarning oldini olish, barvaqt tashxis ?oʻyish va davolash choralarini takomillashtirish 4. Otorinolaringologiya yoʻnalishi boʻyicha davolash standartlari va klinik bayonnomalarni takomillashtirish. Klinik davolash standartlari va klinik bayonnomalarni qayta koʻrib chiqish va amaliyotga joriy etish. 2024-yil yakuniga qadar - - Sogʻliqni saqlash vazirligi (Inoyatov) 5. Hududlarda otorinolaringologik kasalliklarning oldini olish choralarini koʻrish. 1. Har bir hududda kasalliklar tendensiyasini oʻz vaqtida aniqlash hamda zarur profilaktika ishlarini tashkil etish. 2. Hududlarda sayyor tibbiy koʻriklarni oʻtkazish. 2023 — 2026-yillar - - Sogʻliqni saqlash vazirligi (Inoyatov) 6. Zaif eshitadigan bolalarga tibbiy xizmat koʻrsatish sifatini oshirish. Audioskrininglar natijasi asosida aniqlangan zaif eshitadigan bolalarni koxlear implantatsiya amaliyotiga tayyorgarlik davrida yiliga qoʻshimcha kamida 2 000 ta raqamli eshitish moslamalari bilan taʼminlash. Bunda, eshitish moslamalariga qoʻyiladigan texnik talablarni Sogʻliqni saqlash vazirligi tomonidan ishlab chiqish. 2024-yildan boshlab 4,6 mlrd soʻm Davlat budjeti mablagʻlari Sogʻliqni saqlash vazirligi (Inoyatov), Oʻzbekiston Respublikasi Prezidenti huzuridagi Ijtimoiy himoya milliy agentligi (Olloyorov) 7. Otorinolaringologik kasalliklarni davolashning ilgʻor usullari va texnologiyalarini ishlab chiqish va amaliyotga tatbiq etish. 1. Yetakchi davlat tibbiyot muassasalarida kaminvaziv, endoskopik va otoneyroxirurgik jarrohlik amaliyotlarini yoʻlga qoʻyish. 2024-yildan boshlab - Davlat budjeti mablagʻlari Sogʻliqni saqlash vazirligi (Inoyatov), Iqtisodiyot va moliya vazirligi (Kudbiyev) 2. Respublika ixtisoslashtirilgan pediatriya ilmiy-amaliy tibbiyot markazi hamda Toshkent tibbiyot akademiyasi koʻp tarmoqli klinikasini navigatsion texnika va jarrohlik tibbiy uskunalari bilan taʼminlash. 2024-yil 1,8 mln dollar 3. Markaz va uning ilmiy-amaliy laboratoriyalarini zamonaviy tibbiy asbob-uskunalar, shu jumladan navigatsion texnika va jarrohlik tibbiy uskunalari bilan taʼminlash. Bunda, Markaz simulatsion amaliy laboratoriyasi uchun moʻljallangan simulatsion uskunalarning Markaz uchun xarid qilinadigan tibbiy uskunalarga muvofiqligini inobatga olish. 2025-yil 6,5 mln dollar 4. Respublika ixtisoslashtirilgan pediatriya ilmiy-amaliy tibbiyot markazining “Eshitish zaiflashuvini tashxislash, davolash va reabilitatsiya muammolari” ilmiy laboratoriyasini zamonaviy tibbiy asbob-uskunalar bilan taʼminlash. 2025-yil 300 ming dollar 8. Respublika ixtisoslashtirilgan pediatriya ilmiy-amaliy tibbiyot markazida bolalar tugʻma va orttirilgan eshitish patologiyasi boʻlimi faoliyatini takomillashtirish. Respublika ixtisoslashtirilgan pediatriya ilmiy-amaliy tibbiyot markazida bolalar tugʻma va orttirilgan eshitish patologiyasi boʻlimi uchun mavjud binoda qoʻshimcha qavat qurish va jihozlash. 2024-yil 12,5 mlrd soʻm Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida Iqtisodiyot va moliya vazirligi (Boboyev), Sogʻliqni saqlash vazirligi (Fozilkarimov), Qurilish va uy-joy kommunal xoʻjaligi vazirligi (Zakirov) 9. Otorinolaringologik va bosh-boʻyin sohasi orttirilgan va tugʻma kasalliklari toʻgʻrisida aholining xabardorlik darajasini oshirish. Ommaviy axborot vositalari (televideniye, radio, bosma va Internet nashrlari) orqali keng targʻibot ishlarini olib borish. 2023-2024-yillar (media-reja asosida) - - Sogʻliqni saqlash vazirligi (Inoyatov), Oʻzbekiston Milliy teleradiokompaniyasi (Xadjayev), Oʻzbekiston Milliy axborot agentligi (Koʻchimov) III. Otorinolaringologiya xizmatini yuqori malakali kadrlar bilan taʼminlash, sohada ilmiy tadqiqotlarni amalga oshirish 10. Otorinolaringologiya xizmati uchun kadrlarni tayyorlash tizimini takomillashtirish. Markazda: - - Sogʻliqni saqlash vazirligi (Inoyatov) otorinolaringologiya ixtisosligi boʻyicha tibbiyot kadrlarini klinik ordinatura orqali tayyorlashni tashkil qilish; 2024/2025 oʻquv yilidan boshlab otorinolaringologiya, surdologiya (klinik audiologiya), tibbiy foniatriya va boshqa tegishli ixtisosliklar boʻyicha malaka oshirish va qayta tayyorlash kurslarini joriy qilish. 2024-yildan boshlab 11. Otorinolaringologiya yoʻnalishidagi kadrlarning malakasini oshirish ishlarini jadallashtirish. 1. Tibbiyot oliy taʼlim muassasalari otorinolaringologiya kafedralari va tibbiyot markazlarida tibbiy foniatriya, surdologiya (klinik audiologiya), LOR jarrohlik va boshqa tegishli yoʻnalishlar boʻyicha mavzuli malaka oshirish kurslarini joriy qilish. 2024-yildan boshlab - - Sogʻliqni saqlash vazirligi (Inoyatov) 2. Otorinolaringologiya yoʻnalishidagi tor mutaxassislarga boʻlgan ehtiyojni aniqlash va mutaxassislarni malaka oshirish kurslarida oʻqitishni tashkil etish. 2024 — 2026-yillar (reja-jadval asosida) 12. Otorinolaringologiya yoʻnalishidagi mutaxassislarni malaka oshirish va stajirovka oʻtash uchun chet davlatlarga yuborish. Otorinolaringologiya, yuz-jagʻ jarrohligi, foniatriya va surdologiya yoʻnalishlaridagi kamida 50 nafar mutaxassislarni, shu jumladan, ehtiyojga koʻra, neyroendokrinolog, neyroreanimatolog kabi mutaxassislarni nufuzli xorijiy tibbiyot muassasalari va markazlariga malaka oshirish va stajirovka oʻtash uchun yuborish, shuningdek, tajribali xorijiy va mahalliy mutaxassislarni Markaz va davlat tibbiyot muassasalariga jalb etish, ular ishtirokida mahorat darslari, vebinarlar oʻtkazish. 2024 — 2026-yillar (reja-jadval asosida) - Iqtidorli va malakali tibbiyot mutaxassislarini qoʻllab-quvvatlash hamda tibbiyot muassasalariga jalb qilish jamgʻarmasi mablagʻlari Sogʻliqni saqlash vazirligi (Inoyatov) 13. Otorinolaringologik va bosh-boʻyin kasalliklarining oldini olish, ularga tashxis qoʻyish va davolashning ustuvor yoʻnalishlari boʻyicha fundamental, amaliy va innovatsion ilmiy tadqiqotlar olib borish. Otorinolaringologik va bosh-boʻyin kasalliklarini erta aniqlash, tashxis qoʻyish hamda davolash va bemorlarni reabilitatsiya qilish borasidagi dolzarb muammolarni tadqiq qilish boʻyicha fundamental, amaliy va innovatsion ilmiy tadqiqotlarni amalga oshirish. Otorinolaringologik va bosh-boʻyin kasalliklarining dolzarb muammolarini yechish boʻyicha ilmiy grantlarni jalb qilish. 2024 — 2026-yillar - Davlat budjetidan ilmiy faoliyatga oid davlat dasturlarini amalga oshirish uchun ajratiladigan mablagʻlar, Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari Sogʻliqni saqlash vazirligi (Inoyatov), Oliy taʼlim, fan va innovatsiyalar vazirligi (Abdurahmonov) 14. Otorinolaringologiya yoʻnalishidagi ilmiy laboratoriyalar faoliyatini takomillashtirish. 1. Markazda “Yuqori nafas yoʻllari aʼzolari fiziologiyasi va patologiyasi”, “Eshitish va muvozanat aʼzolari fiziologiyasi va patologiyasi”, �Foniatriya va ronxopatiya” ilmiy laboratoriyalari faoliyatini yoʻlga qoʻyish. 2.Respublika ixtisoslashtirilgan pediatriya ilmiy-amaliy tibbiyot markazida “Eshitish zaiflashuvini tashxislash, davolash va reabilitatsiya muammolari” ilmiy laboratoriyasi faoliyatini yoʻlga qoʻyish. 3. Xarid qilinadigan uskunalar boʻyicha texnik topshiriqni ishlab chiqish va belgilangan tartibda xarid qilish. 2024-2025-yillar Hisob-kitoblarga asosan Davlat budjeti mablagʻlari Sogʻliqni saqlash vazirligi (Inoyatov), Iqtisodiyot va moliya vazirligi (Kudbiyev) 15. Ilmiy izlanishlarni jadallashtirish va ularni xalqaro darajaga olib chiqish boʻyicha choralar koʻrish. Otorinolaringologiya, yuz jarrohligi, foniatriya, surdologiya va boshqa tegishli yoʻnalishlar boʻyicha ilmiy-tadqiqot ishlari dasturini tasdiqlash. 2023-yil yakuniga qadar - - Sogʻliqni saqlash vazirligi (Inoyatov) 16. Nodavlat tibbiyot tashkilotlari bilan otorinolaringologik va bosh-boʻyin kasalliklarining oldini olish, tashxislash va davolash borasida hamkorlikni kuchaytirish. 1. Nodavlat tibbiyot tashkilotlarida kelishuv asosida davlat tibbiyot oliy taʼlim muassasalarining klinik bazalarini tashkil etish. 2. Nodavlat tibbiyot tashkilotlari bilan hamkorlikda hududlarda profilaktika va davolash ishlarini amalga oshirish. 3. Davlat va nodavlat tibbiyot tashkilotlarining tajribali mutaxassislaridan iborat qoʻshma mobil guruhlarni shakllantirib, hududlarda shifokorlarning kasbiy mahoratini rivojlantirish va murakkab jarrohlik amaliyotlarini bajarishga tizimli oʻrgatish. 2024-2025-yillar - - Sogʻliqni saqlash vazirligi (Inoyatov), Oʻzbekiston otorinolaringologiya va bosh-boʻyin jarrohligi assotsiatsiyasi (Xasanov) IV. Otorinolaringologiya yoʻnalishidagi davlat tashkilotlarining moddiy-texnik bazasini mustahkamlash 17. Davlat tibbiyot muassasalarining moddiy-texnika bazasini mustahkamlash. 1. Toshkent shahar oilaviy poliklinikalari hamda tuman (shahar) koʻp tarmoqli markaziy poliklinikalarini kamida 473 ta “otorinolaringologning ish oʻrni” uskunasi (LOR-kombayn), kamida 473 ta LOR-instrumentlar jamlanmasi bilan taʼminlash. 2023-2024-yillar 11,6 mln dollar Koreya Eksimbanki Iqtisodiy rivojlanish va hamkorlik jamgʻarmasi (EDCF) Sogʻliqni saqlash vazirligi (Inoyatov) 2. Viloyat koʻp tarmoqli tibbiyot markazlari hamda viloyat bolalar koʻp tarmoqli tibbiyot markazlari, shuningdek, Respublika shoshilinch tibbiy yordam ilmiy markazi va uning hududiy filiallarini, davlat tibbiyot oliy taʼlim muassasalari klinikalarini, Tibbiyot xodimlarining kasbiy malakasini rivojlantirish markazi koʻp tarmoqli klinikasini hamda Toshkent shahar klinikalarini LOR-kombayn, statsionar sharoitda xizmat koʻrsatish uchun endoskopik videoqurilma, LOR-mikroskop, sheyver-mikrodebrider, LOR-instrumentlar jamlanmasi hamda jarrohlik tibbiy uskunalari toʻplami bilan taʼminlash. 2024-2025-yillar 5,4 mln dollar 18. Davlat tibbiyot oliy taʼlim muassasalari hamda Tibbiyot xodimlarining kasbiy malakasini rivojlantirish markazining moddiy-texnik bazasini mustahkamlash. Davlat tibbiyot oliy taʼlim muassasalari hamda Tibbiyot xodimlarining kasbiy malakasini rivojlantirish markazining otorinolaringologiya kafedralarini maxsus simulatsion jihozlar (kompyuterlashgan robot simulyator, fantom, mulyajlar), yuqori texnologiyali maxsus uskunalar (mikroskop, endoskopik videoqurilma, LOR-kombayn, mikrojarrohlik toʻplami va boshqalar) bilan taʼminlash. 2023 — 2025-yillar Hisob-kitoblarga asosan Budjetdan tashqari mablagʻlar Sogʻliqni saqlash vazirligi (Inoyatov), Oliy taʼlim, fan va innovatsiyalar vazirligi (Abdurahmonov) 19. Markazning moddiy-texnik bazasini mustahkamlash. Markazda rekonstruksiya va jihozlash ishlarini amalga oshirish. 2023-2024-yillar Hisob-kitoblarga asosan 2023-yilda Sogʻliqni saqlash vazirligiga ajratilgan budjet mablagʻlari doirasida Sogʻliqni saqlash vazirligi (Fozilkarimov), Iqtisodiyot va moliya vazirligi (Boboyev), Qurilish va uy-joy kommunal xoʻjaligi vazirligi (Zakirov) V. Otorinolaringologiya sohasida xalqaro hamkorlikni rivojlantirish 20. Yetakchi xorijiy ilmiy markazlar bilan hamkorlikni mustahkamlash. 1. Nufuzli xorijiy ilmiy markazlar va tibbiyot tashkilotlari bilan hamkorlik memorandumlarini tuzish. 2. Doimiy asosda oʻzaro tajriba almashishni yoʻlga qoʻyish. 2024-2025-yillar - - Sogʻliqni saqlash vazirligi (Inoyatov)

Oʻzbekiston Respublikasi Prezidentining 2023-yil 1-avgustdagi PQ-255-son qaroriga 2-ILOVA

Tibbiyot muassasalari uchun xarid qilinadigan zarur tibbiy uskunalar

ROʻYXATI

T/r Muassasa nomi “Otorinolaringologning ish oʻrni” (LOR-kombayn) (dona) LOR-instrumentlar jamlanmasi (komplekt) Endoskopik videoqurilma, sheyver-mikrodebrider va koagulyator (dona) LOR-mikroskop (dona) 1. Tuman (shahar) koʻp tarmoqli markaziy poliklinikalari 402 402 - - 2. Toshkent shahar oilaviy poliklinikalari 71 71 - - 3. Qoraqalpogʻiston Respublikasi va viloyat koʻp tarmoqli tibbiyot markazlari, Toshkent shahar 7-klinik shifoxonasi 14* 14 14 14 4. Qoraqalpogʻiston Respublikasi va viloyat bolalar koʻp tarmoqli tibbiyot markazlari, Toshkent shahar 2-bolalar klinik shifoxonasi 14* 14 14 14 5. Respublika shoshilinch tibbiy yordam ilmiy markazi va uning hududiy filiallari 15* 15 - - 6. Davlat tibbiyot oliy taʼlim muassasalari klinikalari (Toshkent tibbiyot akademiyasi, Toshkent pediatriya tibbiyot instituti, Qoraqalpogʻiston tibbiyot instituti, Samarqand davlat tibbiyot universiteti, Andijon davlat tibbiyot instituti, Buxoro davlat tibbiyot instituti, Toshkent tibbiyot akademiyasi Urganch filiali) 9* 9 9 9 7. Tibbiyot xodimlarining kasbiy malakasini rivojlantirish markazi koʻp tarmoqli klinikasi 1* 1 1 1 Jami: 526 526 38 38

Izoh: tibbiy uskunalarning yakuniy qiymati tender savdolari natijalari asosida belgilanadi. Bunda, iqtisod qilingan mablagʻlar otorinolaringologik uskunalar, shu jumladan simulatsion uskunalar xarid qilish uchun yoʻnaltiriladi.

*Mazkur muassasalar uchun koʻp funksiyali “Otorinolaringologning ish oʻrni” (LOR-kombayn) xarid qilinadi.