Respublikada milliy askiya va qiziqchilik sanʼatini yanada rivojlantirish chora-tadbirlari toʻgʻrisida (PQ-222-son)

11.07.2023

Oʻzbekiston Respublikasi Prezidentining

Qarori

[Koʻchirma]

Mamlakatimizda milliy qadriyatlarimizni, shu jumladan milliy askiya va qiziqchilik sanʼatini asrab-avaylash, keng targʻib etish va kelgusi avlod uchun nomoddiy madaniy meros sifatida yetkazish maqsadida:

1. Margʻilon shahrida Madaniyat vazirligi tizimida davlat muassasasi shaklida Yusufjon qiziq Shakarjonov nomidagi respublika askiya va qiziqchilik sanʼati markazi (keyingi oʻrinlarda — Markaz) tashkil etilsin.

Quyidagilar Markazning asosiy vazifalari etib belgilansin:

askiya va qiziqchilik ijrochiligi yoʻnalishida “ustoz-shogird” anʼanalarini rivojlantirish, isteʼdodli yoshlarni tarbiyalash, ularning ijodiy salohiyatini qoʻllab-quvvatlash, madaniyat va taʼlim muassasalarida askiya va qiziqchilik sanʼati toʻgaraklarini tashkil etish;

oʻzbek xalq ogʻzaki ijodining askiya va qiziqchilik sanʼatini saqlash va targʻib etish boʻyicha ilmiy tadqiqotlar olib borish, bu borada, ijodkorlar, folklorshunos olimlar, oʻqituvchi va mutaxassislarning ijodiy va ilmiy faoliyatini qoʻllab-quvvatlash;

askiya va qiziqchilik bilan shugʻullanuvchi ijodkorlarga har tomonlama koʻmaklashish, ommaviy bayramlar va madaniy tadbirlarda ularning faol ishtirokini taʼminlash, mamlakatimizda va xorijiy davlatlarda gastrol faoliyatini amalga oshirish, festival, koʻrik-tanlov, ijodiy kechalar, askiya va qiziqchilik tomoshalarini tashkil etish;

askiya va qiziqchilik sanʼatining payrov, qofiya, bahri-bayt, afsona, radif, aytishuv, rabbiya kabi noyob shakllarini asrash va targʻib etish, sahnaviy sujetlarini rivojlantirish hamda isteʼdodli soʻz ustalarining ijod fondini va maxsus adabiyotlarni yaratish.

2. Quyidagilar:

har yili soʻz ustalari va qiziqchilar oʻrtasida “Xush kayfiyat” respublika koʻrik-tanlovi hamda askiya kechalari;

askiya va milliy qiziqchilik sanʼatimizni jahon miqyosida targʻib qilish maqsadida har ikki yilda bir marta “Tabassum” xalqaro kulgi festivali;

har yili askiya va qiziqchilar jamoalarining mahalliy gastrol safarlari;

respublikadagi madaniyat markazlari, madaniyat va sanʼat yoʻnalishidagi taʼlim tashkilotlarida askiya va qiziqchilik sanʼati toʻgaraklari va ijodiy jamoalari hamda ularning jamoatchilik uchun har yili hisobot konsertlari tashkil etilsin.

3. Askiya va qiziqchilik sanʼati bilan shugʻullanuvchi ijodiy jamoalar va yozuvchi-dramaturglar tomonidan birgalikda yaratilgan hajviy asarlarni sahnalashtirish, ushbu yoʻnalishda ilmiy tadqiqotlar olib borish va aholiga xush kayfiyat ulashishga qaratilgan konsert-tomosha tadbirlarini qoʻllab-quvvatlash maqsadida:

har yili kamida 3 ta ilmiy-tadqiqot ishlariga davlat buyurtmasini tanlovlar asosida shakllantirish;

har yili kamida 5 ta sahnada namoyish etishga moʻljallangan hajviy asar uchun davlat buyurtmasini berish;

ijodiy tanlov asosida erkin ijodkor va jamoalar tomonidan har yili kamida 10 ta konsert-tomosha tadbiri va askiya kechalariga tayyorgarlik koʻrish va ularni oʻtkazish bilan bogʻliq xarajatlarni qoplab berish;

har yili kamida 25 ta yuksak badiiy saviyadagi Internet va ijtimoiy tarmoqlar uchun moʻljallangan audiovizual asarlar yaratish uchun davlat buyurtmasini berish, bunda eng keng ommalashgan 5 ta audiovizual asar ijodkorlarini Madaniyat vazirligi hayʼatining qarori bilan bazaviy hisoblash miqdorining 50 baravari miqdorida bir martalik pul mukofoti bilan taqdirlash belgilansin.

Ushbu bandning ikkinchi xatboshisida belgilangan chora-tadbirlarni amalga oshirish bilan bogʻliq xarajatlar davlat ilmiy dasturlari doirasida ajratilgan mablagʻlar hisobidan, uchinchi — beshinchi xatboshilarida belgilangan chora-tadbirlarni amalga oshirish bilan bogʻliq xarajatlar Madaniyat vazirligiga ajratilgan Davlat budjeti mablagʻlari hisobidan qoplanadi.

4. Quyidagilar:

Yusufjon qiziq Shakarjonov nomidagi respublika askiya va qiziqchilik sanʼati markazining Vasiylik kengashi tarkibi 1-ilovaga muvofiq;

Askiya va qiziqchilik sanʼati sohasidagi taniqli ijodkorlar tomonidan tashkil etilayotgan mahorat maktablari roʻyxati 2-ilovaga muvofiq;

Askiya va qiziqchilar jamoalarining 2023-2024-yillarga moʻljallangan mahalliy gastrol safarlari rejasi 3-ilovaga muvofiq;

Askiya va qiziqchilar jamoalarining 2023-2024-yillarga moʻljallangan korxona va tashkilotlarga gastrol safarlarini tashkil etish rejasi 4-ilovaga* muvofiq;

* 4-ilova berilmaydi.

Respublikada askiya va qiziqchilik sanʼatini rivojlantirish va ilmiy-oʻrganish hamda targʻib etishni qoʻllab-quvvatlash boʻyicha 2023-2024-yillarga moʻljallangan “yoʻl xaritasi” 5-ilovaga muvofiq tasdiqlansin.

5. Davlat organlari, muassasalari va korxonalari har chorakda kamida bir marotaba budjetdan tashqari mablagʻlari hamda kasaba uyushmalari mablagʻlari hisobidan oʻz xodimlarining madaniy-estetik hordiq chiqarishlari uchun ommaviy-madaniy va konsert-tomosha tadbirlarini tashkil etish, shuningdek, konsert, sirk va teatrlarga, askiya, qiziqchilik va soʻz sanʼati tomoshalariga kirish uchun chipta va abonementlarni xarid qilish amaliyotini yoʻlga qoʻysin.

Davlat aktivlarini boshqarish agentligi (A. Ortiqov), xoʻjalik jamiyatlari muassisi boʻlgan boshqa davlat organlari bir oy muddatda ustav fondida (kapitalida) davlat ulushi 50 foiz va undan ortiq boʻlgan xoʻjalik jamiyatlari hamda davlat korxonalarining boshqaruv organlari yigʻilishlarida ushbu tashkilotlar buyurtmasi asosida xodimlar va ularning oila aʼzolari uchun ommaviy-madaniy va konsert-tomosha tadbirlarini oʻtkazish vazifasini biznes-rejaga kiritish boʻyicha tashabbus bilan chiqsin.

Madaniyat vazirligi (O. Nazarbekov) har oyning 25-sanasiga qadar kelgusi oyda tashkil etiladigan ommaviy-madaniy va konsert-tomosha, shu jumladan askiya va qiziqchilik tomoshalari haqida davlat boshqaruvi organlari, muassasalari, korxonalari va xoʻjalik jamiyatlarini xabardor qilib borsin.

6. Belgilansinki:

askiya va qiziqchilik sanʼati sohasida taniqli ijodkorlarning mahorat maktablari faoliyati yoʻlga qoʻyiladi;

ushbu qarorda belgilangan tartibda oʻzining mahorat maktabini yaratgan ijodkorlar Davlat budjeti mablagʻlari hisobidan asosiy ish joyi orqali har oyda mehnatga haq toʻlash eng kam miqdorining 5 baravari miqdorida qoʻshimcha ragʻbatlantirib boriladi;

mahorat maktablariga ular faoliyat yuritadigan muassasaning obyektlaridan tekin foydalanish huquqi berilib, ularga ushbu muassasa tomonidan alohida xona ajratiladi va boshqa zarur shart-sharoitlar yaratiladi.

7. Markazning moddiy-texnika bazasini mustahkamlash va ijodkorlari ijtimoiy sharoitini yaxshilash maqsadida:

Fargʻona viloyati hokimligi tomonidan Markazni saqlash va uning faoliyatini qoʻllab-quvvatlash uchun mahalliy budjetdan 2023-yilda 2,3 milliard soʻm, 2024-yildan boshlab esa Markaz talabnomasi asosida zarur mablagʻlar ajratiladi;

“Oʻzbektelekom” AKning doimiy ravishda homiylik yordami koʻrsatishni nazarda tutuvchi “Doʻstlar klubi”ni tashkil etish hamda 2023-yil uchun 5 milliard soʻm homiylik xayriyasi hamda kelgusi yillarda ham homiylik xayriyalari ajratib borish toʻgʻrisidagi taklifi qoʻllab-quvvatlansin.

Markaz Fargʻona viloyati, Margʻilon shahri, Mustaqillik koʻchasi, 470a-uy manzilida joylashgan Margʻilon madaniyat markazi binosiga tekin foydalanish huquqi asosida joylashtirilsin.

8. Madaniyat vazirligi (O. Nazarbekov):

a) ikki oy muddatda:

Markaz ustavi va tuzilmasini tasdiqlasin hamda uning samarali faoliyat olib borishini yoʻlga qoʻysin, shuningdek, davlat madaniyat tashkilotlari shtat birliklarining sonini maqbullashtirish hisobiga Markazga 12 ta shtat birligi ajratilishini taʼminlasin;

ijodiy jamoalar va yozuvchi-dramaturglar tomonidan birgalikda yaratilgan hajviy asarlarni sahnalashtirish uchun davlat buyurtmalarini berish hamda ushbu qarorning 6-bandida nazarda tutilgan mahorat maktablari faoliyati natijadorligini baholash tartiblarini tasdiqlasin;

b) Fanlar akademiyasi (B. Yuldashev), Yoshlar siyosati va sport vazirligi (A. Ikramov), Respublika Maʼnaviyat va maʼrifat markazi (M. Xojimatov), Yozuvchilar uyushmasi (S. Saidov) hamda boshqa vazirlik va idoralar bilan birgalikda ushbu qarorning 2-bandida nazarda tutilgan tadbirlarni yuqori saviyada oʻtkazib borsin.

Bunda, ushbu qarorning 2-bandida nazarda tutilgan tadbirlarni tashkil etish bilan bogʻliq xarajatlar Madaniyat vazirligiga ajratilgan Davlat budjeti hamda tegishli mahalliy budjet mablagʻlari hisobidan teng ulushda qoplanadi;

v) Maktabgacha va maktab taʼlimi vazirligi (H. Umarova) hamda Oliy taʼlim, fan va innovatsiyalar vazirligi (I. Abduraxmonov) bilan birgalikda:

2024/2025 oʻquv yilidan boshlab Karim Zaripov nomidagi Respublika estrada va sirk kolleji hamda Fargʻona ixtisoslashtirilgan sanʼat maktabida “askiya va qiziqchilik sanʼati” yoʻnalishi ochilishini tashkil qilsin, shuningdek, ularni ushbu yoʻnalishlar boʻyicha yuqori malakali pedagog kadrlar bilan toʻldirishni taʼminlasin;

“askiya va qiziqchilik sanʼati” yoʻnalishi boʻyicha oʻquv dasturlarini ishlab chiqsin va belgilangan tartibda tasdiqlasin;

g) Oʻzbekiston Milliy teleradiokompaniyasi hamda Axborot va ommaviy kommunikatsiyalar agentligi bilan birgalikda askiya va qiziqchilik sanʼatiga doir tadbirlarni ommaviy axborot vositalarida yoritish ishlari alohida ishlab chiqilgan media-reja asosida muntazam tashkil etilishini taʼminlasin.

9. Mazkur qarorning ijrosini samarali tashkil qilishga masʼul va shaxsiy javobgar etib madaniyat vaziri O.A. Nazarbekov belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining maslahatchisi O.Q. Abduraxmanov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 11-iyul,

PQ-222-son

Oʻzbekiston Respublikasi Prezidentining 2023-yil 11-iyuldagi PQ-222-son qaroriga 1-ILOVA

Yusufjon qiziq Shakarjonov nomidagi respublika askiya va qiziqchilik sanʼati markazining Vasiylik kengashi tarkibi

N. Xasanov — “Oʻzbektelekom” AK boshqaruvi raisi, Vasiylik kengashi raisi B. Axmedov — madaniyat vazirining birinchi oʻrinbosari, Vasiylik kengashi raisi oʻrinbosari N. Sayfullayev — Oʻzbekiston Respublikasi Prezidenti Administratsiyasi Madaniyat va sanʼatni rivojlantirish shuʼbasi mudiri Gʻ. Rejabov — Oʻzbekiston Respublikasi Prezidenti Administratsiyasi masʼul xodimi X. Ahmedov — Fargʻona viloyati hokimining oʻrinbosari Z. Ivatov — Oʻzbekiston Respublikasi Hisob palatasi shuʼba mudiri X. Sagdiyev — Oʻzbekiston davlat satira teatri badiiy rahbari, Oʻzbekiston Respublikasi xalq artisti I. Sultonov — Oʻzbekiston Respublikasi xalq yozuvchisi O. Salimov — Oʻzbekiston davlat drama teatri bosh rejissori, Oʻzbekiston Respublikasi sanʼat arbobi S. Mannopov — Fargʻona davlat universiteti professori, Oʻzbekiston Respublikasi xalq artisti M. Matchonov — Oʻzbekiston kino arboblari ijodiy uyushmasi raisi, Oʻzbekiston Respublikasida xizmat koʻrsatgan artist M. Sherayev — Oʻzbekiston Respublikasida xizmat koʻrsatgan artist, soʻz ustasi X. Xakimjonov — Oʻzbekiston Respublikasida xizmat koʻrsatgan madaniyat xodimi, soʻz ustasi T. Azizov — soʻz ustasi N. Toshmatov — “Mushtum” hajviy jurnali bosh muharriri Lavozimiga koʻra — Yusufjon qiziq Shakarjonov nomidagi respublika askiya va qiziqchilik sanʼati markazi direktori, Vasiylik kengashi kotibi

Izohlar:

Vasiylik kengashi raisiga Vasiylik kengashi faoliyatiga boshqa homiylar, metsenat va tadbirkorlik subyektlarini ularning tashabbusi asosida jalb etish, shuningdek, uning tarkibiga Oʻzbekiston Respublikasi Prezidenti Administratsiyasi bilan kelishgan holda oʻzgartirish kiritish huquqi beriladi.

Vasiylik kengashining tegishli aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli vazifalarni bajarish yuklangan shaxslar kiritiladi.

Oʻzbekiston Respublikasi Prezidentining 2023-yil 11-iyuldagi PQ-222-son qaroriga 2-ILOVA

Askiya va qiziqchilik sanʼati sohasida taniqli ijodkorlarning tashkil etilayotgan mahorat maktablari

ROʻYXATI

T/r Ijodkorlar Mahorat maktablari tashkil etilayotgan joy 1. Oʻzbekiston Respublikasida xizmat koʻrsatgan artist Mamasiddiq Sherayev Yusufjon qiziq Shakarjonov nomidagi respublika askiya va qiziqchilik sanʼati markazi 2. Oʻzbekiston Respublikasida xizmat koʻrsatgan madaniyat xodimi Xotamjon Xakimjonov Fargʻona shahar madaniyat markazi 3. Soʻz ustasi Toʻxtamurod Azizov Uchtepa tumani madaniyat markazi 4. Soʻz ustasi Abdulla Akbarov Oltiariq tumani madaniyat markazi 5. Soʻz ustasi Akram Anvarov Qoʻqon shahar 7-son bolalar musiqa va sanʼat maktabi 6. Soʻz ustasi Mansur Oxunov Uchkoʻprik tumani madaniyat markazi 7. Soʻz ustasi Bahodir Shokirov Bagʻdod tumani madaniyat markazi 8. Soʻz ustasi Anvar Neʼmataliyev Rishton tumani madaniyat markazi 9. Soʻz ustasi Mamasiddiq Alixonov Qoʻrgʻontepa tumani madaniyat markazi 10. Soʻz ustasi Jumaboy Xuraliyev Asaka tumani madaniyat markazi 11. Soʻz ustasi, sanʼatshunoslik fanlari nomzodi Ortiq Sultonov Samarqand viloyati qoʻgʻirchoq teatri

Izoh: Madaniyat vazirligiga, zaruratga koʻra, Oʻzbekiston Respublikasi Prezidenti Administratsiyasi bilan kelishgan holda ushbu rejaga Madaniyat vazirligi hayʼati qarori bilan oʻzgartirish kiritish huquqi beriladi. Bunda, yangi mahorat maktablari tashkil etilgan ijodkorlarga ham Oʻzbekiston Respublikasi Prezidentining 2023-yil 11-iyuldagi PQ-222-son qarorida nazarda tutilgan qoʻshimcha ragʻbatlantirish tatbiq etiladi.

Oʻzbekiston Respublikasi Prezidentining 2023-yil 11-iyuldagi PQ-222-son qaroriga 3-ILOVA

Askiya va qiziqchilar jamoalarining 2023-2024-yillarga moʻljallangan mahalliy gastrol safarlari

REJASI

T/r Gastrol safarlari tashkil etiladigan hudud Muddati Masʼullar 1. Buxoro viloyati 2023-yil sentyabr, 2024-yil sentyabr Buxoro viloyati hokimligi (B. Zaripov), Madaniyat vazirligi (O. Nazarbekov) 2. Navoiy viloyati Navoiy viloyati hokimligi (N. Tursunov), Madaniyat vazirligi (O. Nazarbekov) 3. Jizzax viloyati 2023-yil oktyabr, 2024-yil oktyabr Jizzax viloyati hokimligi (E. Saliyev), Madaniyat vazirligi (O. Nazarbekov) 4. Samarqand viloyati Samarqand viloyati hokimligi (E. Turdimov), Madaniyat vazirligi (O. Nazarbekov) 5. Sirdaryo viloyati 2023-yil noyabr, 2024-yil noyabr Sirdaryo viloyati hokimligi (A. Maxmudaliyev), Madaniyat vazirligi (O. Nazarbekov) 6. Toshkent shahri Toshkent shahri hokimligi (Sh. Umurzakov), Madaniyat vazirligi (O. Nazarbekov) 7. Surxondaryo viloyati 2023-yil dekabr, 2024-yil dekabr Surxondaryo viloyati hokimligi (U. Qosimov), Madaniyat vazirligi (O. Nazarbekov) 8. Qashqadaryo viloyati Qashqadaryo viloyati hokimligi (M. Azimov), Madaniyat vazirligi (O. Nazarbekov) 9. Toshkent viloyati 2024-yil yanvar, iyun Toshkent viloyati hokimligi (Z. Mirzayev), Madaniyat vazirligi (O. Nazarbekov) 10. Andijon viloyati 2024-yil fevral, iyul Andijon viloyati hokimligi (Sh. Abduraxmonov), Madaniyat vazirligi (O. Nazarbekov) 11. Namangan viloyati Namangan viloyati hokimligi (Sh. Abdurazzakov), Madaniyat vazirligi (O. Nazarbekov) 12. Xorazm viloyati 2024-yil mart, avgust Xorazm viloyati hokimligi (J. Raximov), Madaniyat vazirligi (O. Nazarbekov) 13. Qoraqalpogʻiston Respublikasi Qoraqalpogʻiston Respublikasi Vazirlar Kengashi (F. Ermanov), Madaniyat vazirligi (O. Nazarbekov)

Izohlar:

Gastrol safarlarini tashkil etish bilan bogʻliq sarf-xarajatlar mahalliy hokimliklar tomonidan qoplanadi.

Gastrol safarlariga yuboriladigan askiya va qiziqchilik ijodiy jamoalarining roʻyxati Madaniyat vazirligi tomonidan tasdiqlanadi hamda tadbir boshlanishidan kamida ikki hafta oldin hududlarga yetkaziladi.

Madaniyat vazirligiga, zaruratga koʻra, Vazirlar Mahkamasi bilan kelishgan holda ushbu rejaga oʻzgartirish kiritish huquqi beriladi.

2025-yildan boshlab gastrol safarlar rejasi Vazirlar Mahkamasi tomonidan tasdiqlanadi.

Oʻzbekiston Respublikasi Prezidentining 2023-yil 11-iyuldagi PQ-222-son qaroriga 5-ILOVA

Respublikada askiya va qiziqchilik sanʼatini rivojlantirish va ilmiy-oʻrganish hamda targʻib etishni qoʻllab-quvvatlash boʻyicha 2023-2024-yillarga moʻljallangan

“YOʻL XARITASI”

T/r Chora-tadbirlar nomi Amalga oshirish shakli Ijro muddati Moliyalashtirish manbalari Masʼul ijrochilar 1. Respublika askiya va qiziqchilik sanʼati markazining ustavi, shtatlar jadvali, xodimlari mehnatiga haq toʻlash tartibi hamda lavozim yoʻriqnomalarini ishlab chiqish. Madaniyat vaziri buyrugʻi 2023-yil iyul - Madaniyat vazirligi (O. Nazarbekov), tegishli vazirlik va idoralar 2. Askiya va qiziqchilik sanʼatiga doir tadbirlarni ommaviy axborot vositalarida yoritish ishlarini alohida ishlab chiqilgan media-reja asosida muntazam tashkil etish. Amaliy chora-tadbirlar 2023-yil avgustdan boshlab, reja asosida Respublika budjeti mablagʻlari va homiylik xayriyalari Madaniyat vazirligi (O. Nazarbekov), MTRK (A. Xadjayev), Axborot va ommaviy kommunikatsiyalar agentligi (A. Xodjayev), Milliy media assotsiatsiyasi (Sh. Qudratxoʻja) 3. Askiya va qiziqchilik bilan shugʻullanuvchi ijodkorlarga har tomonlama koʻmaklashish, ommaviy bayramlar va madaniy tadbirlarda ularning faol ishtirokini taʼminlash. Amaliy chora-tadbirlar 2023-yil avgustdan boshlab, belgilangan muddatlarda - Madaniyat vazirligi (O. Nazarbekov) 4. Respublika askiya va qiziqchilik sanʼati markazi moddiy-texnik bazasini mustahkamlash va boshqa zarur shart-sharoitlar yaratish. Fargʻona viloyati hokimi farmoyishi 2023-yil sentyabr Mahalliy budjet mablagʻlari va homiylik xayriyalari Fargʻona viloyati hokimligi (H. Bozarov) 5. Ijodiy jamoalar va yozuvchi-dramaturglar tomonidan birgalikda yaratilgan hajviy asarlarni sahnalashtirish uchun davlat buyurtmalarini berish tartibini tasdiqlash. Madaniyat vaziri buyrugʻi 2023-yil sentyabr - Madaniyat vazirligi (O. Nazarbekov), tegishli vazirlik va idoralar 6. Askiya va qiziqchilik sanʼati sohasida taniqli ijodkorlarning mahorat maktablari faoliyatini yoʻlga qoʻyish. Madaniyat vaziri buyrugʻi, zaruratga koʻra Madaniyat vazirligi hayʼati qarori 2023-yil sentyabr Respublika budjeti mablagʻlari va homiylik xayriyalari Madaniyat vazirligi (O. Nazarbekov) 7. Askiya va qiziqchilik sanʼatining payrov, qofiya, bahri-bayt, afsona, radif, aytishuv, rabbiya kabi noyob shakllarini asrash va targʻib etish, sahnaviy sujetlarini rivojlantirish hamda isteʼdodli soʻz ustalarining ijod fondini va maxsus adabiyotlarni yaratish. Amaliy chora-tadbirlar 2023-yil oktyabrdan boshlab, reja asosida Respublika budjeti mablagʻlari va homiylik xayriyalari Madaniyat vazirligi (O. Nazarbekov), Yozuvchilar uyushmasi (S. Saidov), tegishli vazirlik va idoralar 8. “Xush kayfiyat” respublika koʻrik-tanlovi hamda askiya kechalarini va mahalliy gastrol safarlarini tashkil etish. Madaniyat vaziri buyrugʻi Gastrol safarlari 2023-yildan, koʻrik-tanlov — 2024-yildan boshlab, har yili reja asosida Madaniyat vazirligiga madaniy tadbirlarni oʻtkazish uchun ajratiladigan mablagʻlar Madaniyat vazirligi (O. Nazarbekov), Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari 9. Askiya va milliy qiziqchilik sanʼatimizni jahon miqyosida targʻib qilish maqsadida har yili ikki marta “Tabassum” xalqaro kulgi festivali oʻtkazish. Vazirlar Mahkamasi qarori loyihasi Qaror loyihasini kiritish — 2023-yil dekabr, oʻtkazish — har ikki yilda Hukumat qarorida belgilangan muddatda Respublika budjeti mablagʻlari va homiylik xayriyalari Madaniyat vazirligi (O. Nazarbekov), Fargʻona viloyati hokimligi (H. Bozarov) 10. Quyidagilarni: har yili kamida 3 ta ilmiy-tadqiqot ishlariga davlat buyurtmasini tanlovlar asosida shakllantirish; har yili kamida 5 ta sahnada namoyish etishga moʻljallangan hajviy asar uchun davlat buyurtmasini berish; ijodiy tanlov asosida erkin ijodkor va jamoalar tomonidan har yili kamida 10 ta konsert-tomosha tadbiri va askiya kechalariga tayyorgarlik koʻrish va ularni oʻtkazish bilan bogʻliq xarajatlarni qoplab berish; har yili kamida 25 ta yuksak badiiy saviyadagi Internet va ijtimoiy tarmoqlar uchun moʻljallangan audiovizual asarlar yaratish uchun davlat buyurtmasini berish, bunda eng keng ommalashgan 5 ta audiovizual asar ijodkorlarini Madaniyat va turizm vazirligi hayʼatining qarori bilan bazaviy hisoblash miqdorining 50 baravari miqdorida bir martalik pul mukofoti bilan taqdirlash. Amaliy chora-tadbirlar Har yili reja asosida Respublika budjeti mablagʻlari, homiylik xayriyalari, davlat ilmiy dasturlari doirasida ajratilgan mablagʻlar Madaniyat vazirligi (O. Nazarbekov), Oliy taʼlim, fan va innovatsiyalar vazirligi (I. Abduraxmonov), tegishli vazirlik va idoralar 11. Madaniyat markazlarini askiya va qiziqchilik sanʼatiga doir adabiyotlar bilan taʼminlash. Madaniyat vaziri buyrugʻi 2024-yildan boshlab, reja asosida Madaniyat vazirligiga ajratiladigan budjet mablagʻlari Madaniyat vazirligi (O. Nazarbekov), tegishli vazirlik va idoralar 12. Askiya va qiziqchilik sanʼatini ilmiy-tadqiq etish boʻyicha respublika va xalqaro ilmiy amaliy konferensiyalar tashkil etish. Amaliy chora-tadbirlar 2024-yildan boshlab reja asosida har yili ikki marotaba Madaniyat vazirligiga ajratiladigan budjet mablagʻlari Madaniyat vazirligi (O. Nazarbekov), Oliy taʼlim, fan va innovatsiyalar vazirligi (I. Abduraxmonov), Fanlar akademiyasi (B. Yuldashev), tegishli vazirlik va idoralar 13. Hajviy dramaturgiya yoʻnalishida xalqaro hamkorlikni kuchaytirish orqali xorijiy davlatlar bilan oʻzaro tajriba almashishni yoʻlga qoʻyish. Amaliy chora-tadbirlar 2024-yildan boshlab, kelishilgan muddatlarda Madaniyat vazirligiga ajratiladigan budjet mablagʻlari Madaniyat vazirligi (O. Nazarbekov), tegishli vazirlik va idoralar 14. Askiya va qiziqchilik ijrochiligi yoʻnalishida ustoz-shogird anʼanalarini rivojlantirish, isteʼdodli yoshlarni tarbiyalash, ularning ijodiy salohiyatini qoʻllab-quvvatlash, madaniyat va taʼlim muassasalarida askiya va qiziqchilik sanʼati toʻgaraklarini tashkil etish. Amaliy chora-tadbirlar 2024-yil fevral Madaniyat vazirligiga ajratiladigan budjet mablagʻlari Madaniyat vazirligi (O. Nazarbekov), tegishli vazirlik va idoralar 15. Oʻzbek xalq ogʻzaki ijodiyotini jahonga targʻib etish maqsadida askiya va qiziqchilik sanʼatiga oid veb-saytni tashkil etish. Madaniyat vaziri buyrugʻi 2024-yil aprel Respublika budjeti mablagʻlari va homiylik xayriyalari Madaniyat vazirligi (O. Nazarbekov), Raqamli texnologiyalar vazirligi (Sh. Shermatov) 16. Respublika askiya va qiziqchilik sanʼati markazida mazkur sanʼat turiga oid zamonaviy ekspozitsiya tashkil etish. Madaniyat vaziri buyrugʻi 2024-yil may Madaniyat vazirligiga ajratiladigan budjet mablagʻlari Madaniyat vazirligi (O. Nazarbekov) 17. 2024/2025 oʻquv yilidan boshlab Karim Zaripov nomidagi Respublika estrada va sirk kolleji hamda Fargʻona ixtisoslashtirilgan sanʼat maktabida “askiya va qiziqchilik sanʼati” yoʻnalishi ochilishini tashkil etish, ushbu yoʻnalishlar boʻyicha yuqori malakali pedagog kadrlar bilan taʼminlash hamda oʻquv dasturlarini ishlab chiqish va belgilangan tartibda tasdiqlash. Ijrochilarning qoʻshma qarori 2024-yil iyun Respublika budjeti mablagʻlari va ho�iylik xayriyalari Madaniyat vazirligi (O. Nazarbekov), Oliy taʼlim, fan va innovatsiyalar vazirligi (I. Abduraxmonov) 18. “Oʻzbekiston soʻz ustalari” kitob-albomining birinchi tomini nashrga tayyorlash va chop etish. Amaliy chora-tadbirlar 2024-yil iyun Madaniyat vazirligiga ajratiladigan budjet mablagʻlari Madaniyat vazirligi (O. Nazarbekov), Axborot va ommaviy kommunikatsiyalar agentligi (A. Xodjayev) 19. Oʻzbek xalqining koʻp asrlik qadriyatlari va anʼanalarini, xususan, askiya va qiziqchilik sanʼatini aks ettirgan holda taniqli soʻz ustalari va boshqa sanʼatkorlar ishtirokida komediya janrida toʻliq metrajli badiiy film hamda soʻz ustalarining hayoti va ijodlariga bagʻishlangan hujjatli filmlar yaratish. Amaliy chora-tadbirlar 2024-yil noyabr Respublika budjeti mablagʻlari va homiylik xayriyalari Madaniyat vazirligi (O. Nazarbekov), Kinematografiya agentligi (F. Abduxalikov) tegishli vazirlik va idoralar