Vazirlar Mahkamasining ijro etuvchi tuzilmasini takomillashtirishga doir qoʻshimcha chora-tadbirlar belgilanganligi munosabati bilan Insonparvarlik yordami yuklarini qabul qilish, hisobga olish, manzilli taqsimlash va maqsadli foydalanish ustidan nazorat qilish hamda insonparvarlik yordami loyihalarini monitoring qilish tartibi toʻgʻrisidagi nizomga oʻzgartirish va qoʻshimchalar kiritish haqida (281-son)

11.07.2023

Oʻzbekiston Respublikasi Vazirlar Mahkamasining

qarori

Insonparvarlik yordami yuklarini qabul qilish, hisobga olish, manzilli taqsimlash va ulardan maqsadli foydalanishni nazorat qilish hamda insonparvarlik yordami loyihalarini monitoring qilish tartibini takomillashtirish, shuningdek, Oʻzbekiston Respublikasi Prezidentining “Vazirlar Mahkamasining ijro etuvchi tuzilmasini takomillashtirishga doir qoʻshimcha chora-tadbirlar toʻgʻrisida” 2023-yil 16-iyundagi PF-97-son Farmoni ijrosini taʼminlash maqsadida Vazirlar Mahkamasi qaror qiladi:

1. Vazirlar Mahkamasining 2021-yil 29-dekabrdagi 786-son qarori bilan tasdiqlangan Insonparvarlik yordami yuklarini qabul qilish, hisobga olish, manzilli taqsimlash va maqsadli foydalanish ustidan nazorat qilish hamda insonparvarlik yordami loyihalarini monitoring qilish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Iqtisodiyot va moliya vazirligi:

insonparvarlik yordami yuklaridan maqsadli foydalanilishi va ularning aniq yoʻnaltirilgan tarzda taqsimlanishi boʻyicha tekshirishlar belgilangan tartibda tasdiqlagan jadval boʻyicha oʻtkazilishini hamda amalga oshirilgan ishlar yuzasidan batafsil maʼlumotlar ommaviy axborot vositalarida keng yoritilishini taʼminlasin;

manfaatdor vazirlik hamda idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi iqtisodiyot va moliya vaziri Sh.D. Kudbiyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2023-yil 11-iyul,

281-son

Vazirlar Mahkamasining 2023-yil 11-iyuldagi 281-son qaroriga ILOVA

Vazirlar Mahkamasining 2021-yil 29-dekabrdagi 786-son qarori bilan tasdiqlangan Insonparvarlik yordami yuklarini qabul qilish, hisobga olish, manzilli taqsimlash va maqsadli foydalanish ustidan nazorat qilish hamda insonparvarlik yordami loyihalarini monitoring qilish tartibi toʻgʻrisidagi nizomga kiritilayotgan oʻzgartirishlar

1. 2-bandda:

ikkinchi xatboshi quyidagi tahrirda bayon etilsin:

“vakolatli organ — Oʻzbekiston Respublikasi Iqtisodiyot va moliya vazirligi”;

toʻrtinchi xatboshi quyidagi tahrirda bayon etilsin:

“Departament — Oʻzbekiston Respublikasi Bosh vaziri kotibiyatining Axborot-tahlil va yuridik taʼminlash departamenti”;

qoʻyidagi mazmundagi beshinchi xatboshi bilan toʻldirilsin:

“Boʻlim — Oʻzbekiston Respublikasi Bosh vaziri kotibiyatining Axborot-tahlil va yuridik taʼminlash departamentining Insonparvarlik yordami yuklarini qabul qilish, hisobga olish va taqsimlash ishlarini muvofiqlashtirish boʻlimi”;

beshinchi — yettinchi xatboshilar tegishlicha oltinchi — sakkizinchi xatboshilar deb hisoblansin.

2. 7 — 10-bandlar quyidagi tahrirda bayon etilsin:

“7. Insonparvarlik yordami sifatida Oʻzbekiston Respublikasiga keltiriladigan yuklarning insonparvarlik yordamiga mansubligini koʻrib chiqish va tahlil qilish uchun insonparvarlik yordamini oluvchi Departamentga quyidagi hujjatlarni taqdim etadi:

donorlar bilan insonparvarlik yordami boʻyicha hamkorlik toʻgʻrisidagi bitim, kelishuv, shartnoma yoki dastur;

yukni joʻnatuvchining yuk insonparvarlik yordamiga mansubligi toʻgʻrisidagi invoysi (schyot-faktura);

insonparvarlik yordami yukini oluvchining yukdan foydalanish maqsadi toʻgʻrisidagi xati;

yoʻl-transport yuk xatlari;

zarurat boʻlganda, karantin va boshqa inspeksiya xizmatlarining qonunchilik hujjatlariga muvofiq yukning respublikaga keltirilishiga ruxsat etilgan yuklar roʻyxatiga muvofiqligi toʻgʻrisidagi xulosasi.

Taqdim etilgan hujjatlar Boʻlim tomonidan koʻrib chiqiladi va natijasi boʻyicha xulosa tayyorlanadi.

Yuklarning insonparvarlik yordamiga mansubligi toʻgʻrisida tayyorlangan xulosa Boʻlim boshligʻi tomonidan imzolanadi (tasdiqlanadi).

8. Imzolangan (tasdiqlangan) xulosa belgilangan tartibda vakolatli organga hamda Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasiga ijro uchun yuboriladi.

9. Boʻlimning xulosasi asosida yuklarning bojxona rasmiylashtiruvi qonunchilik hujjatlariga muvofiq amalga oshiriladi.

10. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi Oʻzbekiston Respublikasiga keltirilgan insonparvarlik yordami yuklari va yuklarni oluvchilar toʻgʻrisidagi maʼlumotlarni belgilangan tartibda har chorakda Departamentga hamda vakolatli organga taqdim etib boradi”.

3. 16-band “vakolatli organga” soʻzlaridan keyin “va Departamentga” soʻzlari bilan toʻldirilsin.

4. 17-band quyidagi tahrirda bayon etilsin:

“17. Insonparvarlik yordami yuklaridan maqsadli foydalanilishi va ularning aniq yoʻnaltirilgan tarzda taqsimlanishi boʻyicha oʻrganishlar belgilangan tartibda vakolatli organ tomonidan tasdiqlagan jadval boʻyicha, zarurat boʻlganda, mustaqil ekspertlarni jalb etgan holda oʻtkaziladi.

Vakolatli organ tomonidan oʻrganish natijalariga koʻra tegishli maʼlumotnoma Departamentga kiritiladi”.

5. 22-banddagi “kotibiyatga hamda vakolatli organga” soʻzlari “vakolatli organga hamda Departamentga” soʻzlari bilan almashtirilsin.

6. 23-banddagi “qonun hujjatlariga” soʻzlari “qonunchilik hujjatlariga” soʻzlari bilan almashtirilsin.

7. Nizomga ilovaning matni quyidagi tahrirda bayon etilsin:

“Insonparvarlik yordami yuklarini qabul qilish, hisobga olish, manzilli taqsimlash va maqsadli foydalanilishi ustidan nazorat qilish hamda insonparvarlik yordami loyihalarini monitoring qilish

SXEMASI

Bosqichlar Subyektlar Tadbirlar Muddatlar 1-bosqich Insonparvarlik yordamini oluvchilar Donorlar tomonidan insonparvarlik yordamini oluvchilarga insonparvarlik yuklari kelib tushadi. Zarur hollarda 2-bosqich Insonparvarlik yordamini oluvchilar Yuklarning insonparvarlik yordamiga mansubligini koʻrib chiqish va tahlil qilish uchun Oʻzbekiston Respublikasi Bosh vaziri kotibiyatining Axborot-tahlil va yuridik taʼminlash departamentiga (keyingi oʻrinlarda — Departament) zarur hujjatlarni taqdim etadi. Belgilangan muddatlarda 3-bosqich Departament 1. Taqdim etilgan hujjatlar Departamentning Insonparvarlik yordami yuklarini qabul qilish, hisobga olish va taqsimlash ishlarini muvofiqlashtirish boʻlimi (keyingi oʻrinlarda — Boʻlim) tomonidan koʻrib chiqadi va natijasi boʻyicha xulosa tayyorlanadi. 2. Yuklarning insonparvarlik yordamiga mansubligi toʻgʻrisidagi tayyorlangan xulosa Boʻlim boshligʻi tomonidan imzolanadi (tasdiqlanadi). 3. Belgilangan tartibda tasdiqlangan xulosa vakolatli organga hamda Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasiga ijro uchun yuboriladi. Belgilangan muddatlarda 4-bosqich Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi 1. Xulosaga asosan yuklarning bojxona rasmiylashtiruvini amalga oshiradi. Belgilangan muddatlarda 2. Oʻzbekiston Respublikasiga keltirilgan insonparvarlik yordami yuklari va yuklarni oluvchilar toʻgʻrisidagi maʼlumotlarni belgilangan tartibda Departamentga hamda vakolatli organga taqdim etib boradi. Har chorakda 5-bosqich Vakolatli organ 1. Insonparvarlik yordami yuklaridan maqsadli foydalanilishi va ularning aniq yoʻnaltirilgan tarzda taqsimlanishi boʻyicha oʻrganishlar belgilangan tartibda tasdiqlangan jadval boʻyicha, zarurat boʻlganda, mustaqil ekspertlarni jalb etgan holda oʻtkazadi. 2. Oʻrganish natijalariga koʻra tegishli maʼlumotnomani Departamentga kiritadi. Belgilangan muddatlarda 6-bosqich Insonparvarlik yordamini oluvchilar Insonparvarlik yuklarini hisobga oladi, saqlaydi, ulardan maqsadli va samarali foydalanilishini taʼminlaydi. Belgilangan muddatlarda 7-bosqich Insonparvarlik yordamini oluvchilar Hududiy va tarmoq komissiyalar Insonparvarlik yordami yuklari olinganligi, ulardan maqsadli foydalanilganligi hamda ularning aniq yoʻnaltirilgan holda taqsimlanishini nazorat qiladi va ular toʻgʻrisidagi maʼlumotlarni vakolatli organga kiritadi. Har chorakda 8-bosqich Hududiy va tarmoq komissiyalari Insonparvarlik loyihalari monitoringini muntazam ravishda oʻtkazadi va insonparvarlik yordami loyihalarining amalga oshirilishi toʻgʻrisidagi hisobotlarni vakolatli organ va Departamentga taqdim etadi. Har chorakda keyingi oyning 10-sanasiga qadar ”.