BMT Inson huquqlari kengashining Terrorizmga qarshi kurashish sharoitida inson huquqlari va asosiy erkinliklarini ragʻbatlantirish va himoya qilish boʻyicha maxsus maʼruzachisining Oʻzbekistonga tashrifi yakunlari yuzasidan tavsiyalarini amalga oshirish boʻyicha Milliy harakatlar rejasi haqida (3266-IV-son)

06.06.2023

Oʻzbekiston Respublikasi Oliy Majlisi Qonunchilik palatasi Kengashining va Oʻzbekicton Respublikasi Oliy Majlisi Senati Kengashining

Qoʻshma qarori

BMT Inson huquqlari kengashining Terrorizmga qarshi kurashish sharoitida inson huquqlari va asosiy erkinliklarini ragʻbatlantirish va himoya qilish boʻyicha maxsus maʼruzachisining Oʻzbekistonga tashrifi yakunlari yuzasidan tavsiyalarini amalga oshirish, shuningdek inson huquqlari va erkinliklarini himoya qilish boʻyicha xalqaro hamkorlikni yanada rivojlantirish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Quyidagilar:

2. Oʻzbekiston Respublikasi Vazirlar Mahkamasi BMT Inson huquqlari kengashining Terrorizmga qarshi kurashish sharoitida inson huquqlari va asosiy erkinliklarini ragʻbatlantirish va himoya qilish boʻyicha maxsus maʼruzachisining Oʻzbekistonga tashrifi yakunlari yuzasidan tavsiyalarini amalga oshirish boʻyicha Milliy harakatlar rejasi “Yoʻl xaritasi”ning ijrosini taʼminlash choralarini koʻrsin.

3. Inson huquqlari sohasida Oʻzbekiston Respublikasining xalqaro majburiyatlariga rioya etilishi boʻyicha Parlament komissiyasi BMT Inson huquqlari kengashining Terrorizmga qarshi kurashish sharoitida inson huquqlari va asosiy erkinliklarini ragʻbatlantirish va himoya qilish boʻyicha maxsus maʼruzachisining Oʻzbekistonga tashrifi yakunlari yuzasidan tavsiyalarini amalga oshirish boʻyicha Milliy harakatlar rejasi “Yoʻl xaritasi”ning bajarilishi ustidan tizimli monitoring oʻrnatsin.

4. Mazkur Qoʻshma qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov va Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklatilsin.

5. Ushbu Qoʻshma qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2023-yil 6-iyun,

3266-IV-son

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2023-yil 6-iyun,

KQ-517-IV-son

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2023-yil 6-iyundagi 3266-IV/KQ-517-IV-sonli Qoʻshma qaroriga 1-ILOVA

MILLIY HARAKATLAR REJASI

I. UMUMIY QOIDALAR

BMT Inson huquqlari kengashining Terrorizmga qarshi kurashish sharoitida inson huquqlari va asosiy erkinliklarini ragʻbatlantirish va himoya qilish boʻyicha maxsus maʼruzachisi Fionnuala Ni Aolaynning (bundan buyon matnda maxsus maʼruzachi deb yuritiladi) 2021-yil 29-noyabr — 7-dekabr kunlari Oʻzbekistonga tashrifi boʻlib oʻtgan edi. 2022-yilning 15-mart kuni BMT Inson huquqlari kengashining 49-sessiyasi doirasida maxsus maʼruzachining Oʻzbekistonga tashrifi yakunlari yuzasidan hisoboti taqdim etildi.

BMT Inson huquqlari kengashining Terrorizmga qarshi kurashish sharoitida inson huquqlari va asosiy erkinliklarini ragʻbatlantirish va himoya qilish boʻyicha maxsus maʼruzachisining Oʻzbekistonga tashrifi yakunlari yuzasidan tavsiyalarini amalga oshirish boʻyicha Milliy harakatlar rejasi (bundan buyon matnda Milliy harakatlar rejasi deb yuritiladi) davlat organlari, tashkilotlari va fuqarolik jamiyati institutlarining saʼy-harakatlarini birlashtirish asosida maxsus maʼruzachining tavsiyalarini amalga oshirish uchun zarur shart-sharoit va mexanizmlarni yaratishni taʼminlashga qaratilgan hujjat hisoblanadi.

Milliy harakatlar rejasi BMTning terrorizmga qarshi kurashish boʻyicha xalqaro hujjatlariga, Oʻzbekiston Respublikasi Konstitutsiyasiga va Oʻzbekiston Respublikasi tomonidan ratifikatsiya qilingan inson huquqlari boʻyicha xalqaro shartnomalar va boshqa qonun hujjatlari qoidalariga asoslanadi.

Maxsus maʼruzachining tavsiyalari ekstremizm, terrorizm va milliy xavfsizlik bilan bogʻliq jinoyatlarni tergov qilishning xalqaro huquqiy standartlari, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish sohasidagi mavjud xalqaro mexanizmlar, jazoni ijro etish muassasalarida Mahbuslar bilan muomalada boʻlishning Minimal standart qoidalariga muvofiq shart-sharoitlarni yaratish, jazoni ijro etish muassasalaridagi tibbiyot xodimlarining mustaqilligini taʼminlash, qiynoqqa solish va boshqa shafqatsiz, gʻayriinsoniy yoki qadr-qimmatni kamsituvchi muomala hamda jazo turlarini qoʻllashning oldini olish (bundan buyon matnda qiynoqlarning oldini olish deb yuritiladi) boʻyicha aniq mexanizmlarni ishlab chiqish uchun tegishli choralar koʻrishni belgilaydi.

Milliy harakatlar rejasining amalga oshirilishi — terrorizmga hamda ekstremizmga qarshi kurashish sohasidagi milliy qonunchilikni xalqaro standartlarga muvofiq takomillashtirish, bu boradagi jinoyatlarni tergov qilishning va mazkur jinoyatlar boʻyicha sud muhokamasini olib borishning samarali vositalarini qoʻllash, BMTning tegishli xalqaro konvensiyalarini ratifikatsiya qilish va ularni milliy qonunchilikka implementatsiya qilish boʻyicha hamkorlikni kuchaytirish, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha zamonaviy vosita va mexanizmlarni milliy darajada joriy qilishga doir choralarni koʻrish imkonini beradi.

II. ASOSIY TUShUNChALAR

Ushbu Milliy harakatlar rejasida quyidagi asosiy tushunchalar qoʻllaniladi:

Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi (EOG) — FATF tavsiyalariga hamda aʼzo davlatlar ishtirokchisi boʻlgan boshqa xalqaro tashkilotlarning jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashishga oid standartlariga muvofiq jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish xalqaro tizimida aʼzo davlatlarning integratsiyasini, mintaqaviy darajadagi hamkorligini va samarali birgalikdagi faoliyatini taʼminlash boʻyicha faoliyat olib boruvchi FATFga oʻxshagan mintaqaviy guruh. Uning ishtirokchi davlatlari: Belarus, Hindiston, Qozogʻiston, Xitoy, Qirgʻiziston, Rossiya, Tojikiston, Turkmaniston va Oʻzbekiston. Yevroosiyo guruhida 15 ta davlatga hamda 22 ta xalqaro va mintaqaviy tashkilotga kuzatuvchi maqomi berilgan;

Jinoiy faoliyatdan olingan daromadlarni legallashtirishga qarshi kurashish boʻyicha moliyaviy choralar ishlab chiquvchi guruh (FATF) — jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish sohasida jahon standartlarini ishlab chiqish bilan shugʻullanuvchi, shuningdek milliy tizimlarning ushbu standartlarga muvofiqligini baholashni amalga oshiruvchi hukumatlararo tashkilot;

terrorizm — siyosiy, diniy, mafkuraviy va boshqa maqsadlarga erishish uchun shaxsning hayoti, sogʻligʻiga xavf tugʻdiruvchi, mol-mulk va boshqa moddiy obyektlarning yoʻq qilinishi (shikastlantirilishi) xavfini keltirib chiqaruvchi hamda davlatni, xalqaro tashkilotni, jismoniy yoki yuridik shaxsni biron-bir harakatlar sodir etishga yoki sodir etishdan tiyilishga majbur qilishga, xalqaro munosabatlarni murakkablashtirishga, davlatning suverenitetini, hududiy yaxlitligini buzishga, xavfsizligiga putur yetkazishga, qurolli mojarolar chiqarishni koʻzlab igʻvogarliklar qilishga, aholini qoʻrqitishga, ijtimoiy-siyosiy vaziyatni beqarorlashtirishga qaratilgan, Oʻzbekiston Respublikasining Jinoyat kodeksida javobgarlik nazarda tutilgan zoʻrlik, zoʻrlik ishlatish bilan qoʻrqitish yoki boshqa jinoiy qilmishlar;

terrorizmni moliyalashtirish — terrorchilik tashkilotining mavjud boʻlishini, faoliyat koʻrsatishini, moliyalashtirilishini, terrorchilik faoliyatida ishtirok etish uchun xorijga chiqib ketishni yoki Oʻzbekiston Respublikasi hududi orqali harakatlanishni taʼminlashga, terrorchilik harakatini tayyorlash va sodir etishga, terrorchilik tashkilotlariga yoxud terrorchilik faoliyatiga koʻmaklashayotgan yoki bunday faoliyatda ishtirok etayotgan shaxslarga bevosita yoki bilvosita har qanday mablagʻ-vositalarni, resurslarni berishga yoki yigʻishga, boshqa xizmatlar koʻrsatishga qaratilgan faoliyat;

fuqaroligi boʻlmagan shaxs — Oʻzbekiston Respublikasi hududida doimiy yashab turgan, Oʻzbekiston Respublikasining fuqarosi boʻlmagan va oʻzining chet davlat fuqaroligiga mansubligiga doir dalilga ega boʻlmagan shaxs;

ekstremizm — ijtimoiy-siyosiy vaziyatni beqarorlashtirishga, Oʻzbekiston Respublikasining konstitutsiyaviy tuzumini zoʻrlik bilan oʻzgartirishga, hokimiyatni zoʻrlik ishlatib egallashga va uning vakolatlarini oʻzlashtirib olishga, milliy, irqiy, etnik yoki diniy adovat qoʻzgʻatishga qaratilgan harakatlarning ashaddiy shakllari ifodasi.

III. OʻZBEKISTON RESPUBLIKASIDA TERRORIZMGA VA EKSTREMIZMGA QARShI KURAShISh MASALALARI BOʻYIChA MAVJUD VAZIYAT

Oʻzbekiston Respublikasida xalqaro, mintaqaviy va ikki tomonlama munosabatlar doirasida terrorizmga va ekstremizmga qarshi kurashish boʻyicha samarali milliy tizim yaratildi. Shuningdek terrorizm va ekstremizmning barvaqt oldini olish, aniqlash va bartaraf etish tizimi doimiy takomillashtirib borilmoqda.

Birinchidan, Oʻzbekiston xalqaro terrorizmga qarshi kurashishning faol ishtirokchilaridan biridir. Oʻzbekiston Respublikasi BMTning terrorizmga qarshi global strategiyasini qabul qilishni qoʻllab-quvvatladi, terrorizmga hamda diniy ekstremizmga qarshi kurashish boʻyicha 14 ta Xalqaro konvensiya va protokollarni ratifikatsiya qildi.

Oʻzbekistonda terrorizmga va ekstremizmga qarshi kurashish masalalari Oʻzbekiston Respublikasining Konstitutsiyasi, “Terrorizmga qarshi kurash toʻgʻrisida”gi, “Ekstremizmga qarshi kurashish toʻgʻrisida”gi, “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisida”gi qonunlar va Oʻzbekiston Respublikasining Jinoyat kodeksi bilan tartibga solinadi.

Ikkinchidan, “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishlari boʻyicha Harakatlar strategiyasi”ga binoan jinoyatchilikka qarshi kurashish va huquqbuzarliklarning oldini olish tizimi takomillashtirildi, shu jumladan terrorizmga va ekstremizmga qarshi kurashish boʻyicha tashkiliy-amaliy choralar kuchaytirildi.

Uchinchidan, Oʻzbekiston Respublikasi Prezidentining 2018-yil 20-sentabrdagi PQ-3947-sonli Qarori bilan Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurash boʻyicha idoralararo komissiyasi tashkil etildi.

Oʻzbekiston Respublikasi Prezidentining 2021-yil 28-iyundagi PF-6252-sonli Farmoni bilan Oʻzbekiston Respublikasining jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish milliy tizimini rivojlantirish strategiyasi va unda belgilangan vazifalarni amalga oshirish boʻyicha “Yoʻl xaritasi” tasdiqlandi.

Oʻzbekiston Respublikasi Prezidentining 2021-yil 1-iyuldagi PF-6255-sonli Farmoni bilan 2021 — 2026-yillarga moʻljallangan ekstremizm va terrorizmga qarshi kurashish boʻyicha Oʻzbekiston Respublikasi Milliy strategiyasi (bundan buyon matnda Milliy strategiya deb yuritiladi) tasdiqlandi va uning ustuvor yoʻnalishlari belgilandi.

Toʻrtinchidan, Oʻzbekiston Respublikasi hukumati terrorizm va ekstremizm bilan bogʻliq jinoyatlarning sabablarini bartaraf etish maqsadida tadbirkorlikni rivojlantirish va qoʻshimcha ish oʻrinlari yaratish, investitsiya va ishbilarmonlik muhitini yaxshilash hamda zamonaviy infratuzilmani yaratish, odamlarni yangi kasblarga oʻrgatish va aholiga ijtimoiy yordam koʻrsatish orqali kambagʻallikni kamaytirish boʻyicha iqtisodiy islohotlarni amalga oshirmoqda.

Beshinchidan, soʻnggi yillarda Oʻzbekistonning jamiyatda ekstremistik gʻoyalar tarqalishining oldini olish boʻyicha ishlarga yondashuvi tubdan yangilandi, yaʼni avvalgi “repressiv” chora-tadbirlar oʻrnini profilaktik va diniy-maʼnaviy ishlar, shu jumladan buzgʻunchi mafkuralar taʼsiriga tushib qolgan fuqarolarni reabilitatsiya qilishga qaratilgan ishlar egalladi.

Mamlakatimizda terrorizmga va ekstremizmga qarshi kurashishda profilaktika choralarini amalga oshirish ustuvor yoʻnalishlardan biri hisoblanadi. Shu bilan birga fuqarolarning ushbu sohadagi huquqlari va erkinliklarini taʼminlashga imkon beradigan terrorizmga va ekstremizmga qarshi kurashish boʻyicha samarali davlat siyosati amalga oshirilishini taʼminlash Milliy strategiyaning maqsadlaridan biri sifatida belgilandi.

Oltinchidan, terrorizmga va ekstremizmga aloqadorligi sababli ozodlikdan mahrum qilish tarzidagi jazoni oʻtayotgan, qilmishidan chin koʻngildan pushaymon boʻlib, tuzalish yoʻliga oʻtgan shaxslar jazoni oʻtash joylaridan ozod qilindi. Shuningdek ularni reabilitatsiya va reintegratsiya qilish boʻyicha faol ishlar olib borilmoqda.

Xususan, Oʻzbekiston Respublikasidan tashqarida boʻlgan, oʻz qilmishlarining noqonuniyligini anglagan va tuzatish yoʻliga oʻtgan fuqarolarga oʻz vatanlariga, oilalariga, tinch hayotga qaytish imkoniyatini berish maqsadida Oʻzbekiston Respublikasi Prezidentining 2018-yil 19-sentabrdagi “Terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan Oʻzbekiston Respublikasi fuqarolarini jinoiy javobgarlikdan ozod etish tartibini takomillashtirish toʻgʻrisida”gi PF-5542-sonli Farmoni bilan Bosh prokuror raisligida Terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan Oʻzbekiston Respublikasi fuqarolarining murojaatlarini koʻrib chiqish boʻyicha Respublika idoralararo komissiyasi tashkil etildi. Shuningdek Farmon bilan, terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan Oʻzbekiston Respublikasi fuqarolarini Komissiya xulosasiga asosan jinoiy javobgarlikdan ozod etilishi belgilandi.

2019 — 2021-yillarda “Mehr” dasturi doirasida Afgʻoniston, Suriya va Iroqdan xalqaro terrorchilik tashkilotlari safiga adashib qoʻshilib qolgan umumiy hisobda 435 nafar fuqaro (ulardan 312 tasi bolalar, 102 tasi esa ayollar) Oʻzbekistonga qaytarildi. Mazkur shaxslarga tibbiy, psixologik, moddiy va maʼnaviy yordam koʻrsatildi, ularning tinch hayotga qaytishi, jamiyatda moslashishi uchun zarur sharoitlar yaratildi, uy-joy va ish bilan taʼminlash choralari koʻrildi.

IV. MILLIY HARAKATLAR REJASINING MAQSADI, VAZIFALARI VA ASOSIY TAMOYILLARI

Milliy harakatlar rejasining maqsadi maxsus maʼruzachining tavsiyalarini amalga oshirish uchun huquqiy va tashkiliy chora-tadbirlarni belgilashdan iborat. Ushbu chora-tadbirlarni belgilashda maxsus maʼruzachining quyidagi asosiy tavsiyalari eʼtiborga olinadi:

javobgarlikka tortishni taʼminlash, qiynoqlar, tegishli huquqiy tartib-qoidalarni suiisteʼmol qilish va adolatsiz sud jarayonlari qurbonlariga nisbatan zararni qoplash va kompensatsiya toʻlash maqsadida Oʻzbekiston Respublikasi Jinoyat kodeksining tegishli moddalari bilan 2016-yilgacha qoʻzgʻatilgan ishlarni tizimli va mustaqil qayta koʻrib chiqish tartibini belgilash;

xalqaro huquq normalariga toʻlaqonli rioya etilishini taʼminlash maqsadida ekstremizm, terrorizm va milliy xavfsizlik bilan bogʻliq jinoyatlarga nisbatan normativ-huquqiy bazani qayta koʻrib chiqish;

Sud taʼqibini amalga oshiruvchi shaxslarning roliga doir rahbariy tamoyillarga muvofiq ekstremizm, terrorizm va milliy xavfsizlik bilan bogʻliq jinoyatlarni tergov qilishni hamda ular boʻyicha jinoiy javobgarlikka tortishni Oʻzbekiston Respublikasi Bosh Prokuraturasi tomonidan amalga oshirilishini taʼminlash;

jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish sohasidagi qonunchilikni takomillashtirish;

1951-yilgi Qochoqlar maqomi toʻgʻrisidagi Konvensiyani hamda 1961-yilgi Fuqarolikka ega boʻlmaganlikni qisqartirish toʻgʻrisidagi Konvensiyani ratifikatsiya qilish;

ayni paytda Oʻzbekistonda joylashgan, chiqarib yubormaslik tamoyili asosida qaytarib yuborib boʻlmaydigan, yordamga muhtoj Afgʻoniston fuqarolarining holatini tartibga solish maqsadida aniq va ravshan milliy standartlarni belgilash va qoʻllash;

terrorizmga va (zoʻravonlik bilan amalga oshirilgan) ekstremizmga qarshi kurashish, shu jumladan maʼlumotlar yigʻish boʻyicha faoliyatni amalga oshiruvchi idoralar ustidan nazorat va monitoring olib borishning mustaqil mexanizmini joriy qilish;

shaxslarni mamlakat chegaralari orqali har qanday topshirishni, chiqarib yuborishni, ekstraditsiya qilishni yoki koʻchirishni xalqaro huquqqa muvofiq aniq protsedurali kafolatlar va qatʼiy nazorat ostida hamda toʻliq mustaqil va xolis sud organlarining ruxsati bilan amalga oshirilishini taʼminlash;

Barcha shaxslarni zoʻrlik ostida gʻoyib boʻlishidan himoya qilish toʻgʻrisidagi Xalqaro konvensiyani kechiktirmasdan ratifikatsiya qilish;

ozodlikdan mahrum etish joylaridagi shart-sharoitlarni zamonaviy talablarga mos ravishda yaxshilash;

qamoqxonalarda ishlaydigan tibbiyot xodimlarining faqatgina va bevosita Oʻzbekiston Respublikasi Sogʻliqni saqlash vazirligiga boʻysunishini taʼminlash;

qamoqxona xodimlarining qiynoqlarning oldini olish va inson huquqlari masalalari boʻyicha muntazam tayyorgarlikdan oʻtishini taʼminlash;

repatriatsiya (shaxsni oʻz Vataniga qaytarish) boʻyicha saʼy-harakatlarni davom ettirish.

Yuqorida qayd etilgan maqsadga erishish uchun quyidagi vazifalarni hal qilish koʻzda tutilgan.

1. Terrorizmga va ekstremizmga qarshi kurashish masalalari boʻyicha qonunchilikni takomillashtirish.

Ushbu tavsiyani amalga oshirishda “ekstremizm”, “radikalizm” tushunchalarining huquqiy taʼrifini aniqlash va ularni inson huquqlari sohasidagi xalqaro standartlarga muvofiqlashtirish, “terrorizm” tushunchasining takroriyligini bartaraf etish va ixchamligini taʼminlash, ekstremizm, terrorizm va milliy xavfsizlik bilan bogʻliq jinoyat ishlarini tergov qilish, jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha qonun hujjatlariga oʻzgartish va qoʻshimchalar kiritish, ekstremizm, terrorizm va milliy xavfsizlik bilan bogʻliq ishlarni koʻrib chiqishda sud majlislarida oshkoralik tamoyillarini taʼminlash darajasini oshirish nazarda tutilgan.

2. Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha inson huquqlari va qonun ustuvorligi sohasidagi talablarga javob beradigan samarali chora-tadbirlarni qabul qilish.

Bildirilgan tavsiyalarni amalga oshirish jarayonida jinoiy faoliyatdan olingan daromadlarni legallashtirish va terrorizmni moliyalashtirish tavakkalchiliklarini milliy darajada baholash natijalari boʻyicha chora-tadbirlar rejasini ishlab chiqish, Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha Yevroosiyo guruhi (EOG) kotibiyati bilan EOG oʻzaro baholashining 2-bosqichi yakunlari boʻyicha aniqlangan kamchiliklarni bartaraf etish borasida Oʻzbekiston Respublikasiga texnik yordam koʻrsatish rejasini amalga oshirish doirasida hamkorlik qilish, terrorizmni moliyalashtirishga qarshi kurashish doirasida maʼlumotlarning maxfiyligini taʼminlashni kuchaytirish boʻyicha metodik tavsiyalar ishlab chiqish, xalqaro standartlarga oid tegishli oʻquv tadbirlarini oʻtkazishda texnik koʻmak olish maqsadida xalqaro tashkilotlar bilan hamkorlikni kuchaytirish koʻzda tutilgan.

3. Terrorizmga hamda ekstremizmga qarshi kurashish sohasidagi milliy qonunchilikning xalqaro normalarga muvofiqligini yanada samarali taʼminlash maqsadida xalqaro shartnomalarga qoʻshilish jarayonini tezlashtirish.

Qayd etilgan ushbu tavsiyani amalga oshirishda 1951-yilgi Qochoqlar maqomi toʻgʻrisidagi Konvensiyaga va uning 1967-yilgi Protokoliga, 1954-yilgi Apatridlar maqomi toʻgʻrisidagi Konvensiya va 1961-yilgi Fuqarolikka ega boʻlmaganlikni qisqartirish toʻgʻrisidagi Konvensiyaga, Barcha shaxslarni zoʻrlik ostida gʻoyib boʻlishidan himoya qilish toʻgʻrisidagi Xalqaro konvensiyaga qoʻshilish, shuningdek milliy qonunchilik va amaliyotni mazkur xalqaro standartlar bilan muvofiqlashtirish nazarda tutilgan.

4. Ozodlikdan mahrum etish joylaridagi shart-sharoitlarni zamonaviy talablarga mos ravishda yaxshilash.

Mazkur tavsiyani tatbiq etish — jazoni ijro etish muassasalari ijtimoiy infratuzilma obyektlarining holatini va shart-sharoitlarini (obyektlarning hamda xizmatlarning qurilish-arxitektura qoidalariga va talablariga muvofiqligini) oʻrganish, eskirgan muassasalarni modernizatsiya qilish uchun muntazam mablagʻ ajratish, jazoni ijro etish muassasalarining davolash-profilaktika boʻlimlarini bevosita Oʻzbekiston Respublikasi Sogʻliqni saqlash vazirligi boʻysunuviga oʻtkazish, jazoni ijro etish muassasalarining barcha xodimlarini inson huquqlari masalalari va qiynoqlarning oldini olish boʻyicha muntazam tayyorgarlikdan oʻtkazish boʻyicha tadbirlarni amalga oshirishni oʻz ichiga oladi.

V. MILLIY HARAKATLAR REJASI BAJARILIShINI MONITORING QILISh VA BAHOLASh

Milliy harakatlar rejasi va uning “Yoʻl xaritasi”da belgilangan tadbirlar davlat organlari, mahalliy davlat hokimiyati organlari, ilmiy muassasalar hamda fuqarolik jamiyati institutlari tomonidan amalga oshiriladi.

Milliy harakatlar rejasi va uning “Yoʻl xaritasi” bajarilishini nazorat qilish Inson huquqlari boʻyicha Oʻzbekiston Respublikasi Milliy markazi tomonidan amalga oshiriladi.

Milliy harakatlar rejasining “Yoʻl xaritasi”da masʼul etib belgilangan ijrochilar har chorakda Inson huquqlari boʻyicha Oʻzbekiston Respublikasi Milliy markaziga tegishli bandlarning bajarilishi toʻgʻrisida hisobot taqdim etadi. Inson huquqlari boʻyicha Oʻzbekiston Respublikasi Milliy markazi har chorak yakuni boʻyicha Milliy harakatlar rejasining “Yoʻl xaritasi” ijrosi holati toʻgʻrisidagi umumlashtirilgan maʼlumotni Inson huquqlari sohasida Oʻzbekiston Respublikasining xalqaro majburiyatlariga rioya etilishi boʻyicha Parlament komissiyasiga va Oʻzbekiston Respublikasi Prezidenti Administratsiyasiga kiritadi.

“YOʻL XARITASI”