Yangi tahrirdagi Oʻzbekiston Respublikasi Konstitutsiyasini amalga oshirish boʻyicha Oʻzbekiston Respublikasi Oliy Majlisi Qonunchilik palatasi oldida turgan ustuvor vazifalar toʻgʻrisida (3166-IV-son)

15.05.2023

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Prezidentining 2023-yil 8-maydagi “Yangi tahrirdagi Oʻzbekiston Respublikasi Konstitutsiyasini amalga oshirish boʻyicha birinchi navbatdagi chora-tadbirlar toʻgʻrisida”gi PF-67-sonli Farmonidan kelib chiqib, yangi tahrirdagi Oʻzbekiston Respublikasi Konstitutsiyasining mohiyati hamda ahamiyatini keng jamoatchilikka, ayniqsa, yoshlarga yetkazish va tushuntirish, shuningdek parlament faoliyatiga doir qonunchilikni yangi tahrirdagi Konstitutsiyaga muvofiqlashtirish borasidagi ishlarni samarali tashkil etish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Prezidentining 2023-yil 8-maydagi “Yangi tahrirdagi Oʻzbekiston Respublikasi Konstitutsiyasini amalga oshirish boʻyicha birinchi navbatdagi chora-tadbirlar toʻgʻrisida”gi PF-67-sonli Farmoni qabul qilinganligi maʼlumot uchun qabul qilinsin.

2. Yangi tahrirdagi Oʻzbekiston Respublikasi Konstitutsiyasining mohiyati va ahamiyatini keng jamoatchilikka yetkazish hamda parlament faoliyatiga doir qonunchilikni muvofiqlashtirish boʻyicha “Yoʻl-xaritasi” (bundan buyon matnda “Yoʻl-xaritasi” deb yuritiladi) ilovaga muvofiq tasdiqlansin.

3. “Yoʻl-xaritasi”da nazarda tutilgan tadbirlarni oʻz vaqtida va sifatli bajarilishi uchun Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari va oʻrinbosarlari, qoʻmitalari raislari, Devoni rahbari masʼul ekanligi belgilab qoʻyilsin.

4. Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalariga:

Oʻzbekiston Respublikasi Oliy Majlisi Qonunchilik palatasining deputatlari tomonidan saylov okruglaridagi faoliyati davomida yangi tahrirdagi Oʻzbekiston Respublikasi Konstitutsiyasining mohiyati va ahamiyatini saylovchilarga, ayniqsa, yoshlarga keng tushuntirish;

mahalliy Kengashlar deputatlari hamda partiyalarning hududiy boʻlinmalari bilan birgalikda yangi tahrirdagi Oʻzbekiston Respublikasi Konstitutsiyasining mohiyati va ahamiyatini keng jamoatchilikka yetkazishga qaratilgan targʻibot tadbirlarini tashkil etib borish tavsiya etilsin.

5. Oʻzbekiston Respublikasi Oliy Majlisi Qonunchilik palatasi Spikerining oʻrinbosari O. Tojiyev va Devoni rahbari K. Ernazarov “Yoʻl xaritasi”da belgilangan vazifalarning ijrosi doirasida amalga oshiriladigan ishlar hamda oʻtkaziladigan tadbirlarning ommaviy axborot vositalarida keng yoritilishini tashkil etsin.

6. Oʻzbekiston Respublikasi Oliy Majlisi Qonunchilik palatasi Devonining Nazorat-tahlil boʻlimi (J. Jumayev) “Yoʻl-xaritasi”ning ijrosi yuzasidan doimiy monitoring oʻrnatib, uning ijrosi toʻgʻrisida Oʻzbekiston Respublikasi Oliy Majlisi Qonunchilik palatasi Rahbariyatiga umumlashtirilgan maʼlumot kiritib borsin.

7. “Yoʻl-xaritasi”da nazarda tutilgan tadbirlarning bajarilishini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari va oʻrinbosarlari zimmasiga yuklatilsin.

8. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasi Spikerining oʻrinbosari O. TOJIYEV

Toshkent sh.,

2023-yil 15-may,

3166-IV-son