Bolalarning dam olishlarini tizimli tashkil etish va sogʻlomlashtirish ishlarini yanada takomillashtirishga doir qoʻshimcha chora-tadbirlar belgilanishi munosabati bilan Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish toʻgʻrisida (PF-95-son)

14.06.2023

Oʻzbekiston Respublikasi Prezidentining

Farmoni

Soʻnggi yillarda bolalarning dam olishini tashkil etish, ularni sogʻlomlashtirish va boʻsh vaqtlarini mazmunli oʻtkazishga doir muayyan ishlar amalga oshirilmoqda.

Xususan, bolalar oromgohlari faoliyatini tizimli va samarali tashkil etish maqsadida Bolalarning dam olishlarini tizimli tashkil etish va sogʻlomlashtirish masalalari boʻyicha respublika komissiyasi tashkil etilib, sohadagi boshqaruv yagona tizim asosida yoʻlga qoʻyildi.

Bolalar oromgohlari faoliyatini yagona tizim asosida yoʻlga qoʻyish, ularning moliyaviy holatini yaxshilash va oromgohlarga yoshlarni jalb etish qamrovini kengaytirish maqsadida 65 ta bolalar oromgohlari Oʻzbekiston kasaba uyushmalari Federatsiyasi tizimiga oʻtkazilib, boshqa tashkilotlar tizimida boʻlgan 35 ta bolalar oromgohlarini sotish yoki faoliyat turini oʻzgartirishni taqiqlashni nazarda tutuvchi roʻyxat tasdiqlandi.

Bolalar oromgohlarida mavsumdan tashqari vaqtlarda dam olish maskanlari faoliyatini yoʻlga qoʻyishning huquqiy asoslari belgilandi.

Bolalarning dam olishlarini tizimli yoʻlga qoʻyish va sogʻlomlashtirish ishlarini tashkil etishda bolalar oromgohlarini har tomonlama qoʻllab-quvvatlash, ularning samarali faoliyat yuritishi uchun zarur shart-sharoitlar yaratish maqsadida:

1. Oʻzbekiston Respublikasi Prezidentining ayrim hujjatlariga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

ayrim bolalar sogʻlomlashtirish oromgohlari Oʻzbekiston kasaba uyushmalari Federatsiyasi balansiga oʻtkazilganligi hamda ayrimlarini sotish yoki faoliyat turini oʻzgartirish taqiqlanganligi;

Bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruh negizida Bolalarning dam olishlarini tizimli tashkil etish va sogʻlomlashtirish masalalari boʻyicha respublika komissiyasi tashkil etilganligi munosabati bilan qonunchilik hujjatlarini muvofiqlashtirish;

taʼtil paytlarida bolalarning maroqli dam olishlari uchun qulay imkoniyatlar yaratish, ijtimoiy himoyani kuchaytirish hamda bolalar oromgohlarini moliyaviy sogʻlomlashtirish.

2. Oʻzbekiston Respublikasining Soliq kodeksiga muvofiq quyidagilar:

sanatoriy-kurort, sogʻlomlashtirish xizmatlarini, shuningdek, budjet tashkilotlari tomonidan koʻrsatiladigan jismoniy tarbiya va sportga doir xizmatlarni realizatsiya qilish boʻyicha aylanmalarga qoʻshilgan qiymat soligʻi solinmasligi;

sport va jismoniy tarbiya-sogʻlomlashtirish majmualari, oʻquv-mashq bazalari va bolalar-sogʻlomlashtirish oromgohlari egallagan yerlarga yer soligʻi solinmasligi;

realizatsiya qilishga doir aylanmalari soliq solinmaydigan aylanmalar boʻlgan chiptalar, abonementlar, yoʻllanmalar (joysiz davolanish uchun berilgan hujjatlar) va xizmatlarni olish huquqini beruvchi boshqa hujjatlar realizatsiya qilingan taqdirda, qoʻshilgan qiymat soligʻi boʻyicha soliq bazasi soliq summasini oʻz ichiga oladigan, realizatsiya qilish narxi va ularni sotib olish narxi oʻrtasidagi ijobiy farq sifatida aniqlanishi;

notijorat tashkilotlar tomonidan notijorat faoliyatini amalga oshirish doirasida foydalaniladigan obyektlar mol-mulk soligʻi boʻyicha soliq solish obyekti hisoblanmasligi maʼlumot uchun qabul qilinsin.

3. Oʻzbekiston kasaba uyushmalari Federatsiyasi (Q. Rafikov)ga Iqtisodiyot va moliya vazirligi (Sh. Kudbiyev) bilan birgalikda ikki oy muddatda:

kasaba uyushmalari tizimidagi bolalar sogʻlomlashtirish oromgohlari negizida bolalarning dam olish mavsumidan tashqari vaqtda tashkil etilgan dam olish maskanlari (dam olish uylari va dam olish zonalari)ning ushbu yoʻnalishdagi xizmatlarni koʻrsatishdan olgan daromadlari 2026-yil 1-yanvarga qadar foyda soligʻidan ozod etilishini;

bolalar sogʻlomlashtirish oromgohlari negizida bolalarning dam olish mavsumidan tashqari vaqtda tashkil etiladigan dam olish maskanlari (dam olish uylari va dam olish zonalari)ni majburiy sertifikatlashtirish talabini bekor qilishni nazarda tutuvchi Oʻzbekiston Respublikasining qonuni loyihasini Vazirlar Mahkamasiga kiritish tavsiya etilsin.

4. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 14-iyun,

PF-95-son

Oʻzbekiston Respublikasi Prezidentining 2023-yil 14-iyundagi PF-95-son Farmoniga ILOVA

Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2018-yil 28-avgustdagi “Idoralararo kollegial organlarni tubdan qisqartirish va yanada optimallashtirish chora-tadbirlari toʻgʻrisida”gi PF-5527-son Farmoniga 2-ilovaning 20-pozitsiyasi chiqarib tashlansin.

2. Oʻzbekiston Respublikasi Prezidentining 2020-yil 27-oktabrdagi “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar toʻgʻrisida”gi PF-6096-son Farmoniga 5-ilovaning 5-pozitsiyasi chiqarib tashlansin.

3. Oʻzbekiston Respublikasi Prezidentining 2021-yil 11-fevraldagi “Davlat aktivlarini xususiylashtirish jarayonlarini yanada jadallashtirish toʻgʻrisida”gi PF-6167-son Farmoniga 1-ilovaning 8 va 15-pozitsiyalari chiqarib tashlansin.

4. Oʻzbekiston Respublikasi Prezidentining 2020-yil 7-dekabrdagi “2021-2022-yillarda Toshkent viloyatining Ohangaron tumanini kompleks ijtimoiy-iqtisodiy rivojlantirish chora-tadbirlari toʻgʻrisida”gi PQ-4916-son qarorining 4-ilovasida:

13-pozitsiya chiqarib tashlansin;

izohdagi “**Boʻsh yer maydoni xatlovdan oʻtkazilib, ortiqcha yer maydoni mahalliy hokimlik zaxirasiga olingan holda, belgilangan tartibda savdolarga chiqariladi” soʻzlari chiqarib tashlansin.

5. Oʻzbekiston Respublikasi Prezidentining 2022-yil 18-martdagi “Iqtisodiyotda davlat ishtirokini yanada qisqartirish va xususiylashtirishni jadallashtirishga oid qoʻshimcha chora-tadbirlar toʻgʻrisida”gi PQ-168-son qaroriga 2-ilovaning 73, 367, 519, 530, 532, 759, 1377 va 1411-pozitsiyalari chiqarib tashlansin.

6. Oʻzbekiston Respublikasi Prezidentining 2022-yil 18-noyabrdagi “Bolalarning dam olishlarini tizimli tashkil etish va sogʻlomlashtirish ishlarini yanada takomillashtirishga doir qoʻshimcha chora-tadbirlar toʻgʻrisida”gi PQ-427-son qarorida:

a) 1-bandda:

“b” kichik bandining toʻrtinchi xatboshisidagi “oromgohlarga” soʻzidan keyin “yoki kasaba uyushmalari tashkilotlari orqali ularning aʼzolariga” soʻzlari bilan toʻldirilsin;

quyidagi mazmundagi “v” kichik bandi bilan toʻldirilsin:

“v) Oʻzbekiston kasaba uyushmalari Federatsiyasi tizimidagi oromgohlarni muassasa shaklidagi nodavlat notijorat tashkilotlari shaklida tashkil etish”;

b) 4-bandda:

uchinchi xatboshi quyidagi tahrirda bayon etilsin:

“davlat organlari va tashkilotlarida jamoa shartnomalariga muvofiq oʻz xodimlari tomonidan farzandlari uchun sotib olingan oromgohlar yoʻllanmalari narxi ish beruvchilarning budjetdan tashqari mablagʻlari hisobidan, moliyaviy imkoniyatiga qarab, toʻliq miqdorda yoki uning bir qismi toʻlab berilishi mumkin”;

toʻrtinchi xatboshi quyidagi mazmundagi toʻrtinchi — oltinchi xatboshilari bilan almashtirilsin:

“Oʻzbekiston kasaba uyushmalari Federatsiyasiga belgilangan tartibda taqsimlanadigan ijtimoiy soliq tushumlarning bir qismi quyidagi xarajatlarni qoplashga yoʻnaltiriladi:

xodimlarni sanatoriylarda sogʻlomlashtirish xarajatlarining bir qismini qoplash;

tashkiliy-huquqiy shaklidan qatʼi nazar Oʻzbekiston Respublikasi hududida faoliyat yuritayotgan bolalar sogʻlomlashtirish oromgohlari yoʻllanmalari narxining bir qismini qoplash uchun ijtimoiy soliq tushumidan ajratmani hisobga olgan holda oromgohlarga yoki kasaba uyushmalari tashkilotlari orqali uning aʼzolariga bazaviy hisoblash miqdorining kamida 50 foizi miqdorida kompensatsiya berish”;

v) 12-bandning ikkinchi xatboshisi quyidagi tahrirda bayon etilsin:

“Komissiya qarori asosida bolalarning dam olishi va ularni sogʻlomlashtirish ishlari bosqichma-bosqich maktab taʼtillari (yozgi, kuzgi, qishki va bahorgi) davrida tashkil etiladi, qolgan vaqtlarda oromgohlar dam olish maskani sifatida faoliyat yuritadi. Bunda dam olish maskanining sertifikatlashtirilishi talab etilmaydi”;

g) 1-ilovada:

24-pozitsiya quyidagi tahrirda bayon etilsin:

“ 24. “Shabada” bolalar oromgohi Kitob tumani, Qaynar qishlogʻi 6,10 1119,82 Qashqadaryo viloyati avtomobil yoʻllari bosh boshqarmasi ”;

46 va 64-pozitsiyalari chiqarib tashlansin;

quyidagi mazmundagi 571-pozitsiya bilan toʻldirilsin:

“ 571. Sobiq harbiy qism bino va inshootlari Fargʻona tumani, Navkent MFY 3,40 1 376,00 Fargʻona tumani hokimligi ”;

quyidagi mazmundagi 66 –– 69-pozitsiyalar bilan toʻldirilsin:

“ 66. Bolalar oromgohi bino va inshootlari Ohangaron tumani, Sanam MFY 20,30 4 193,9 Boʻsh turgan obyektlardan samarali foydalanishni tashkil etish markazining Toshkent viloyat hududiy boshqarmasi 67. “Transportchi avlod” bolalar oromgohi Ohangaron tumani, Qoʻrama QFY, Beshqoʻl qoʻrgʻoni 30,00 8811,20 “Qamchiqavtoyoʻl” ixtisoslashtirilgan yoʻllardan foydalanish unitar korxonasi 68. “Chotqol” bolalar oromgohi Boʻstonliq tumani, Yusufxona qoʻrgʻoni 18,00 7202,00 Boʻsh turgan obyektlardan samarali foydalanishni tashkil etish markazining Toshkent viloyat hududiy boshqarmasi 69. “Kosmos” sogʻlomlashtirish oromgohi Boʻstonliq tumani, Koʻktoʻnli MFY 13,76 1 308,00 Davlat aktivlarini boshqarish agentligining Toshkent viloyat boshqarmasi ”;

quyidagi mazmundagi izoh bilan toʻldirilsin:

“Izoh: obyektlarning yer uchastkasi hamda bino va inshootlar maydoniga kadastr hujjatlariga muvofiq aniqlik kiritilishi mumkin”;

d) 2-ilovada:

17 va 18-pozitsiyalari chiqarib tashlansin;

quyidagi mazmundagi 36-pozitsiya bilan toʻldirilsin:

“ 36. “Kimyogar” bolalar oromgohi Boʻstonliq tumani, Oqtosh qishlogʻi 2,80 3 658,61 “Maxam-Chirchiq” AJ ”.