Oʻzbekiston Respublikasi Oliy Majlisi Qonunchilik palatasining Odob-axloq komissiyasini tuzish toʻgʻrisida (3161-IV-son)

11.05.2023

Oʻzbekiston Respublikasi Oliy Majlisi Qonunchilik palatasining

Qarori

Oʻzbekiston Respublikasi Oliy Majlisi Qonunchilik palatasi deputatlarining oʻz deputatlik vakolatlarini amalga oshirish chogʻida deputatlik odob-axloq qoidalariga hamda umum qabul qilingan odob-axloq normalariga rioya etishini taʼminlash maqsadida Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasining Odob-axloq komissiyasi tarkibi 1-ilovaga muvofiq tasdiqlansin.

2. Oʻzbekiston Respublikasi Oliy Majlisi Qonunchilik palatasining Odob-axloq komissiyasi toʻgʻrisidagi nizom 2-ilovaga muvofiq tasdiqlansin.

3. Oʻzbekiston Respublikasi Oliy Majlisi Qonunchilik palatasi deputatining odob-axloq qoidalari 3-ilovaga muvofiq tasdiqlansin.

4. Oʻzbekiston Respublikasi Oliy Majlisi Qonunchilik palatasining:

2020-yil 23-martda qabul qilingan “Oʻzbekiston Respublikasi Oliy Majlisi Qonunchilik palatasining Odob komissiyasini tuzish toʻgʻrisida”gi 185-IV-sonli (Oʻzbekiston Respublikasi Oliy Majlisi palatalarining Axborotnomasi, 2020-yil, № 3, 226-modda);

2021-yil 8-iyunda qabul qilingan “Oʻzbekiston Respublikasi Oliy Majlisi Qonunchilik palatasi Odob komissiyasining yangi tarkibini tasdiqlash toʻgʻrisida”gi 1016-IV-sonli (Oʻzbekiston Respublikasi Oliy Majlisi palatalarining Axborotnomasi, 2021-yil, № 6, 532-modda);

2022-yil 15-martda qabul qilingan “Oʻzbekiston Respublikasi Oliy Majlisi Qonunchilik palatasi Odob komissiyasining yangi tarkibini tasdiqlash toʻgʻrisida”gi 1968-IV-sonli (Oʻzbekiston Respublikasi Oliy Majlisi palatalarining Axborotnomasi, 2022-yil, № 3, 261-modda) qarorlari oʻz kuchini yoʻqotgan deb topilsin.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2023-yil 11-may,

3161-IV-son

Oʻzbekiston Respublikasi Oliy Majlisi Qonunchilik palatasining 2023-yil 11-mayda qabul qilingan 3161-IV-sonli qaroriga 1-ILOVA

Oʻzbekiston Respublikasi Oliy Majlisi Qonunchilik palatasi Odob-axloq komissiyasining

TARKIBI

Salixov Erkin Tagirovich — Mudofaa va xavfsizlik masalalari qoʻmitasi raisi, Komissiya raisi Aripov Davron Raximovich — Korrupsiyaga qarshi kurashish va sud-huquq masalalari qoʻmitasi aʼzosi, Komissiya raisi oʻrinbosari Xodjayeva Mavludaxon Islamovna — Mehnat va ijtimoiy masalalar qoʻmitasi raisi Bafayev Shuxrat Gafurovich — Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi raisi Djurayev Qodir Asadovich — Xalqaro ishlar va parlamentlararo aloqalar qoʻmitasi raisining oʻrinbosari Korjikova Inna Ivanovna — Fan, taʼlim, madaniyat va sport masalalari qoʻmitasi aʼzosi Seytova Leyli Pulatovna — Budjet va iqtisodiy islohotlar qoʻmitasi aʼzosi

Oʻzbekiston Respublikasi Oliy Majlisi Qonunchilik palatasining 2023-yil 11-mayda qabul qilingan 3161-IV-sonli qaroriga 2-ILOVA

Oʻzbekiston Respublikasi Oliy Majlisi Qonunchilik palatasining Odob-axloq komissiyasi toʻgʻrisidagi

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Oliy Majlisi Qonunchilik palatasining Odob-axloq komissiyasi (bundan buyon matnda Komissiya deb yuritiladi) vazifalarini, vakolatlarini, faoliyatining asosiy yoʻnalishlarini, shuningdek uning ishini tashkil etish tartibini belgilab beradi.

2. Komissiya Oʻzbekiston Respublikasi Oliy Majlisi Qonunchilik palatasi Reglamentining (bundan buyon matnda Qonunchilik palatasi Reglamenti deb yuritiladi) normalariga, Oʻzbekiston Respublikasi Oliy Majlisi Qonunchilik palatasi deputatining odob-axloq qoidalariga (bundan buyon matnda Odob-axloq qoidalari deb yuritiladi) rioya etilayotganligi ustidan nazoratni taʼminlash va ularga rioya etish bilan bogʻliq masalalarni koʻrib chiqish uchun tuziladi.

3. Komissiyaning faoliyati Oʻzbekiston Respublikasi Konstitutsiyasiga, “Oʻzbekiston Respublikasi Oliy Majlisining qonunchilik palatasi toʻgʻrisida”gi Oʻzbekiston Respublikasi Konstitutsiyaviy qonuniga, “Parlament nazorati toʻgʻrisida”gi, “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi, “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi Oʻzbekiston Respublikasi qonunlariga, ushbu Nizomga hamda Oʻzbekiston Respublikasining boshqa qonun hujjatlariga muvofiq amalga oshiriladi.

4. Komissiya Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) majlisida salmoqli tajribaga va Qonunchilik palatasining deputatlari (bundan buyon matnda deputat deb yuritiladi) oʻrtasida obroʻ-eʼtiborga ega boʻlgan deputatlar orasidan Qonunchilik palatasi vakolatlari muddatiga Qonunchilik palatasining qarori bilan tuziladi hamda Komissiya raisi, uning oʻrinbosari va aʼzolarini qoʻshganda yetti nafardan iborat boʻladi.

5. Komissiya aʼzolarining soni va tarkibi Qonunchilik palatasining qaroriga asosan oʻzgartirilishi mumkin.

6. Komissiya oʻz faoliyatini qonuniylik, xolislik va adolatlilik tamoyillariga asosan olib boradi.

7. Komissiyaning faoliyati Qonunchilik palatasining qarori bilan muddatidan ilgari toʻxtatilishi mumkin.

2-bob. Komissiyaning asosiy vazifalari hamda vakolatlari

8. Komissiyaning asosiy vazifalari quyidagilardan iborat:

Odob-axloq qoidalari loyihasini ishlab chiqadi va Qonunchilik palatasi tasdigʻiga kiritadi, uni takomillashtirish yuzasidan takliflar ishlab chiqadi;

Komissiya faoliyatiga doir masalalar yuzasidan Qonunchilik palatasining qarorlari loyihalarini tayyorlaydi;

deputatlar tomonidan Odob-axloq qoidalariga, shuningdek umum qabul qilingan odob-axloq normalariga rioya etilishi masalalarini koʻrib chiqadi;

deputatlar oʻrtasida qoidabuzarliklarning oldini olishga qaratilgan kompleks chora-tadbirlarni amalga oshiradi;

Odob-axloq qoidalariga rioya etish boʻyicha deputatlarga maslahat va tavsiyalar beradi;

deputat maqomini tartibga soluvchi normalar buzilganligi toʻgʻrisidagi masalalarni koʻrib chiqadi;

deputatning Qonunchilik palatasining, oʻzi aʼzo boʻlgan Qonunchilik palatasi qoʻmitalarining majlislarida uzrli sababsiz hozir boʻlmasligi toʻgʻrisidagi masalalarni koʻrib chiqadi;

Qonunchilik palatasi topshiriqlarining deputat tomonidan bajarilmayotganligi toʻgʻrisidagi masalalarni koʻrib chiqadi;

deputatlar, Qonunchilik palatasining Spikeri va Spiker oʻrinbosarlari, fraksiyalar, komissiyalar rahbarlari, qoʻmitalar raislarining deputat tomonidan umum qabul qilingan odob-axloq normalarini, deputatlik Odob-axloq qoidalarini buzadigan, deputat obroʻsini toʻkadigan va Qonunchilik palatasi nufuziga putur yetkazadigan xatti-harakatlar sodir etilganligi bilan bogʻliq murojaatlarini koʻrib chiqadi;

jismoniy va yuridik shaxslarning ayrim deputatlarning xatti-harakatlariga doir murojaatlarini koʻrib chiqadi;

deputatlarning qonun hujjatlarida nazarda tutilgan oʻz vakolatlarini amalga oshirishi chogʻida davlat organlari va ularning mansabdor shaxslari tomonidan deputatlarning huquqlari buzilishi haqidagi arizalarini koʻrib chiqadi;

deputatlarning shaʼni va qadr-qimmatini himoya qilish hamda deputat faoliyatining boshqa kafolatlarini taʼminlash bilan bogʻliq masalalarni koʻrib chiqadi;

Odob-axloq qoidalarini buzgan deputatga nisbatan taʼsir choralarini qoʻllash, shuningdek Qonunchilik palatasi Reglamenti qoidalari buzilishi holatlarini bartaraf etish toʻgʻrisida Qonunchilik palatasi Kengashiga takliflar kiritadi;

Qonunchilik palatasi yoki Qonunchilik palatasi Kengashining topshirigʻiga binoan deputatlar tomonidan Odob-axloq qoidalariga rioya etilishi holatini oʻrganib chiqib, uning natijalari haqida Qonunchilik palatasini yoki Qonunchilik palatasining Kengashini xabardor qiladi;

deputatning vakolatlarini muddatidan ilgari tugatish va uni chaqirib olish toʻgʻrisidagi materiallarni Qonunchilik palatasi koʻrib chiqishi uchun tayyorlaydi.

9. Komissiya oʻz vakolatlari doirasida:

deputatlar Qonunchilik palatasi Reglamenti normalariga va Odob-axloq qoidalariga rioya etayotganligi, shu jumladan, Qonunchilik palatasi va uning organlari majlislarida doimiy ishtirok etayotganligi yuzasidan monitoring olib boradi;

Odob-axloq qoidalarining buzilishi bilan bogʻliq masalalar yuzasidan xulosalar tayyorlaydi;

Oʻzbekiston Respublikasi Bosh prokurorining taqdimnomasi boʻyicha deputatni jinoiy javobgarlikka tortish, ushlab turish, qamoqqa olish yoki unga sud tartibida beriladigan maʼmuriy jazo choralarini qoʻllashga rozilik berish toʻgʻrisidagi materiallarni Qonunchilik palatasi koʻrib chiqishi uchun tayyorlaydi;

deputatlarni daxlsizlik huquqidan mahrum etish toʻgʻrisidagi materiallarni Qonunchilik palatasida koʻrib chiqish uchun tayyorlaydi;

Qonunchilik palatasi, fraksiyalar va qoʻmitalarning majlislarida oʻz vakolatiga kiradigan masalalar yuzasidan Komissiya xulosasini taqdim etadi;

deputat tomonidan Odob-axloq qoidalari buzilgan taqdirda, deputatdan hamda boshqa jismoniy va yuridik shaxslardan zarur axborotni soʻrab oladi;

oʻzi koʻrib chiqishi uchun kiritilgan masalalarni hal etishda Komissiya majlislariga ekspertlar va mutaxassislarni taklif qiladi.

Komissiya Qonunchilik palatasi va uning Kengashi qarorlariga, shuningdek ushbu Nizomga muvofiq boshqa vakolatlarga ham ega boʻlishi mumkin.

10. Komissiya Qonunchilik palatasidagi fraksiyalar, qoʻmitalar, Qonunchilik palatasi Devonining tarkibiy boʻlinmalari, boshqa organlar, mansabdor shaxslar va jamoatchilik bilan hamkorlik qiladi.

11. Komissiya masalalarni Qonunchilik palatasining yoki uning Kengashining topshirigʻiga binoan yoxud oʻz tashabbusi bilan koʻrib chiqadi.

3-bob. Komissiya ishini tashkil etish

12. Komissiya oʻz ishini majlis shaklida tashkil etadi. Komissiya majlislari zaruriyatga qarab oʻtkaziladi.

Komissiya majlislari ochiq tarzda oʻtkaziladi. Zarur hollarda Komissiya yopiq majlis oʻtkazish toʻgʻrisida qaror qabul qilishi mumkin.

13. Komissiya majlislarida unga taklif etilgan manfaatdor shaxslar ishtirok etishlari mumkin. Komissiya sayyor majlislar oʻtkazishga haqli.

14. Komissiya majlisini Komissiya raisi, u yoʻqligida esa, uning topshirigʻiga binoan uning oʻrinbosari yoki Komissiya aʼzolaridan biri olib boradi. Komissiya majlisida bayonnoma yuritiladi, uni raislik qiluvchi imzolaydi.

15. Komissiya majlislari, agar ularda Komissiya aʼzolari umumiy sonining yarmidan koʻpi ishtirok etsa, vakolatli hisoblanadi.

16. Komissiyaning navbatdagi kelgusi majlisi toʻgʻrisida uning raisi Komissiya aʼzolariga yozma ravishda, qoida tariqasida, kamida ikki kun oldin xabar qiladi, shuningdek majlisning boshqa ishtirokchilarini oldindan xabardor etadi.

17. Komissiya qarori ochiq ovoz berish yoʻli bilan qabul qilinadi. Komissiya qarori, agar unga majlisda hozir boʻlgan Komissiya aʼzolarining koʻpchiligi ovoz bergan boʻlsa, qabul qilingan hisoblanadi. Qarorni yoqlab va unga qarshi berilgan ovozlar teng boʻlib qolgan taqdirda, Komissiya majlisiga raislik qiluvchining ovozi hal qiluvchi hisoblanadi. Komissiya qarori raislik qiluvchi tomonidan majlisning oʻzida imzolanadi.

18. Komissiya raisi:

Komissiya ishini tashkil etadi va muvofiqlashtiradi;

Komissiya majlislarini chaqiradi va olib boradi;

Komissiya aʼzolariga topshiriqlar beradi;

Fraksiyalar, qoʻmitalar, Qonunchilik palatasi Devonining tarkibiy boʻlinmalari, boshqa organlar, mansabdor shaxslar va jamoatchilik bilan munosabatlarda Komissiya nomidan ish koʻradi;

Komissiya tomonidan tayyorlangan qarorlar, xulosa va takliflarni Qonunchilik palatasiga, Qonunchilik palatasi Kengashiga taqdim etadi;

Komissiya aʼzolarini Komissiyaga kelib tushayotgan barcha hujjatlar va materiallardan xabardor qiladi;

Komissiya majlislarida ishtirok etish uchun manfaatdor shaxslarni taklif etadi;

Komissiya aʼzolarini Komissiya qarorlarining bajarilishi haqida xabardor qiladi.

19. Komissiya raisining oʻrinbosari:

Komissiya ish yurituvini taʼminlaydi;

Komissiya majlislari uchun materiallarni tayyorlash boʻyicha ishlarni tashkil etadi;

Komissiya aʼzolarini majlislar vaqti va kun tartibi toʻgʻrisida xabardor etish boʻyicha ishlarni tashkil qiladi;

rais boʻlmaganida uning vazifalarini bajarib turadi.

20. Komissiya aʼzosi Komissiya majlisida hozir boʻlishi va oʻziga yuklatilgan topshiriqlarni, majburiyatlarni bajarishi shart.

Komissiya aʼzosining Komissiya majlisida hozir boʻlishi imkoni boʻlmaganda, Komissiya raisini oldindan xabardor etishi lozim.

21. Komissiya aʼzosi:

Komissiya tomonidan koʻrib chiqiladigan barcha masalalar boʻyicha ovoz berishga;

Komissiya koʻrib chiqishi uchun masalalar va takliflar kiritishga;

qarorlar tayyorlanishida, muhokamasida, qabul qilinishida, shuningdek ularning amalga oshirilishini tashkil etish hamda bajarilishini nazorat qilishda ishtirok etishga;

koʻrib chiqilayotgan masalaga doir hujjatlar, maʼlumotnomalar va boshqa zarur axborot bilan tanishishga;

Komissiya qaroriga rozi boʻlmagan taqdirda oʻz nuqtai nazarini bayon etishga haqli.

Komissiya aʼzosi ushbu Nizomga muvofiq boshqa huquqlarga ham ega boʻlishi mumkin.

4-bob. Odob-axloq qoidalari bilan bogʻliq masalalarni koʻrib chiqish va Komissiya majlislarini oʻtkazish tartibi

22. Deputat tomonidan Odob-axloq qoidalarini buzish bilan bogʻliq oʻrganishni dastlabki tarzda oʻtkazish uchun quyidagilar asos boʻladi:

yuridik va jismoniy shaxslardan deputat tomonidan Odob-axloq qoidalarini buzish bilan bogʻliq shikoyatlarning kelib tushishi;

ommaviy axborot vositalari, shu jumladan, Internet jahon axborot tarmogʻi va ijtimoiy tarmoqlar orqali eʼlon qilingan deputatning nojoʻya harakatlariga doir xabarlar;

deputat tomonidan qonun hujjatlari, axloq normalari va Odob-axloq qoidalarini buzish faktlari boʻyicha materiallarni koʻrib chiqish haqida Qonunchilik palatasining, uning Kengashining topshirigʻi yoki Qonunchilik palatasi Spikerining taklifi;

deputat degan nomga dogʻ tushiruvchi nojoʻya xatti-harakatlar sodir etilganligi haqidagi korxona, tashkilot, muassasa va jamoat birlashmalari hamda mansabdor shaxslar bergan xabarlar;

huquqni muhofaza qiluvchi organlarning rasmiy xabarlari.

23. Odob-axloq qoidalarini buzish bilan bogʻliq oʻrganishlar Komissiya tomonidan bunday axborot kelib tushgan kundan eʼtiboran oʻn besh kun ichida oʻrganib chiqiladi.

Qoʻshimcha oʻrganish talab etiladigan ayrim hollarda yuqoridagi muddat Qonunchilik palatasi Spikeri tomonidan koʻpi bilan yana oʻn besh kunga uzaytirilishi mumkin.

24. Deputat oʻzining huquqi, shaʼni va qadr-qimmati, ishchanlik obroʻsiga daxl qiladigan murojaat boʻyicha amaldagi qonun hujjatlariga muvofiq oʻzini himoya qilishga haqli.

25. Komissiya majlisiga, haqiqiy holatlarni aniqlash va xolisona qaror qabul qilish maqsadida, oʻziga nisbatan masala koʻrib chiqilayotgan deputat, zarur boʻlgan hollarda esa, murojaat qiluvchi va boshqa shaxslar taklif etiladi. Komissiya majlisining vaqti va joyi haqida tegishli ravishda xabardor etilgan shaxslarning kelmasligi murojaatni koʻrib chiqish uchun toʻsqinlik qilmaydi.

26. Komissiya majlisida:

kun tartibidagi masala oʻqib eshittiriladi;

Qonunchilik palatasining, uning Kengashining topshirigʻi, Qonunchilik palatasi Spikerining taklifi yoki deputat tomonidan odob-axloq qoidalari buzilganligi toʻgʻrisidagi murojaat oʻqib eshittiriladi;

Odob-axloq qoidalari buzilganligi toʻgʻrisida oʻziga nisbatan murojaat kelib tushgan deputat, zarur boʻlgan hollarda esa, murojaat qiluvchi eshitiladi.

27. Oʻziga nisbatan oʻrganish oʻtkazilayotgan deputat quyidagi huquqlarga ega:

oʻrganish tayinlanganligi va unga asos boʻlgan hujjat mazmuni bilan tanishib chiqish;

oʻrganish oʻtkazish boʻyicha Komissiya aʼzolari yuzasidan eʼtirozi boʻlgan taqdirda Qonunchilik palatasi Spikeriga asoslantirilgan raddiya berish;

hujjatlar, maʼlumotnomalar va boshqa dalillarni taqdim etish;

oʻrganish natijasidan norozi boʻlgan taqdirda Qonunchilik palatasiga belgilangan tartibda shikoyat qilish.

28. Deputatning koʻrilayotgan ish yuzasidan aybsizligini yoki ishning boshqa biror holatlarini isbotlashi majburiyati zimmasiga yuklatilishi mumkin emas.

29. Deputat oʻrganish yuzasidan soʻralgan zarur hujjatlarni va boshqa axborotlarni Komissiyaga taqdim etishi lozim. Bunda oʻrganishni oʻtkazishga toʻsqinlik qilishga, Komissiya aʼzolariga oʻz vazifalarini amalga oshirishga xalaqit qilishga va ularga taʼsir oʻtkazishga yoʻl qoʻyilmaydi.

30. Murojaat materiallari, Qonunchilik palatasi yoki uning Kengashining topshirigʻi yoxud Qonunchilik palatasi Spikerining taklifi bilan tanishib chiqish yakunlari boʻyicha Komissiya deputatning harakatlarida Odob-axloq qoidalarining buzilishi faktining mavjudligini, deputatga nisbatan aniq taʼsir choralarini koʻrsatgan holda yoki deputatning Odob-axloq qoidalari buzilishi faktining mavjud emasligini belgilaydi.

31. Odob-axloq qoidalarining deputat tomonidan buzilganligi fakti aniqlangan taqdirda, Komissiya:

deputatga nisbatan ogohlantirish tarzidagi taʼsir chorasini qoʻllash toʻgʻrisida;

deputatning Komissiya yoki Qonunchilik palatasi majlisida uzr soʻrashi toʻgʻrisida;

Qonunchilik palatasiga deputatning vakolatlarini muddatidan ilgari tugatish va uni chaqirib olish haqida taklif kiritish toʻgʻrisida qaror qabul qilishga;

Komissiya Odob-axloq qoidalarini buzgan deputatga nisbatan “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi va “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasining qonunlarida belgilangan taʼsir choralarini qoʻllash yoxud Qonunchilik palatasiga taklif kiritishga haqli.

32. Deputatlar xatti-harakatiga doir quyidagi murojaatlar koʻrib chiqilmaydi:

komissiyada oldin koʻrib chiqilgan murojaat va aynan shu mazmundagi takroriy murojaatlar;

anonim murojaatlar;

jismoniy va yuridik shaxslarning vakillari orqali berilgan murojaatlar, ularning vakolatiga oid hujjatlar mavjud boʻlmaganda;

qonun hujjatlarida belgilangan boshqa talablarga muvofiq boʻlmagan murojaatlar.

33. Komissiya qabul qilingan qaror haqida murojaat qiluvchiga, oʻziga nisbatan masala koʻrib chiqilgan deputatga va Qonunchilik palatasi Kengashiga yozma ravishda maʼlum qiladi.

Qonunchilik palatasi qarorining loyihasi Komissiya tomonidan Qonunchilik palatasi koʻrib chiqishi uchun kiritilganda, unga qisqa tushuntirish xati va boshqa zarur materiallar ilova qilinadi.

34. Komissiya qarori ustidan Qonunchilik palatasiga shikoyat qilish mumkin. Qonunchilik palatasi Komissiya qarorini bekor qilishga va oʻz vakolati doirasida boshqa qaror qabul qilishga haqli.

35. Deputat tomonidan Qonunchilik palatasining majlisi jarayonida Odob-axloq qoidalarining buzilishiga yoʻl qoʻyilgan taqdirda Qonunchilik palatasi majlisida raislik qiluvchi Qonunchilik palatasining Reglamentiga muvofiq choralar koʻradi, shuningdek Komissiyaga deputat tomonidan Odob-axloq qoidalari talablari buzilganligi masalasini koʻrib chiqishni taklif etishga haqli.

36. Murojaat uning tashabbuskori tomonidan Komissiya qarori qabul qilinguniga qadar qaytarib olinishi mumkin.

37. Taraflar yarashuvi, shuningdek deputat oʻz xohishi bilan oshkora uzr soʻragan hollarda, deputat taʼsir choralari qoʻllanilishidan ozod etilishi mumkin.

5-bob. Yakunlovchi qoidalar

38. Komissiya faoliyatiga moddiy-texnik, axborot va boshqa xizmatlarning koʻrsatilishi Qonunchilik palatasining Devoni tomonidan taʼminlanadi.

39. Mazkur Nizom talablarini buzish tegishli huquqiy taʼsir choralarini qoʻllashga sabab boʻladi.

Oʻzbekiston Respublikasi Oliy Majlisi Qonunchilik palatasining 2023-yil 11-mayda qabul qilingan 3161-IV-sonli qaroriga 3-ILOVA

Oʻzbekiston Respublikasi Oliy Majlisi Qonunchilik palatasi deputatining odob-axloq

QOIDALARI

1-bob. Umumiy qoidalar

1. Oʻzbekiston Respublikasi Oliy Majlisi Qonunchilik palatasi deputatining Odob-axloq qoidalari (bundan buyon matnda Odob-axloq qoidalari deb yuritiladi) “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi Oʻzbekiston Respublikasi Qonuniga, umum qabul qilingan odob normalariga muvofiq ishlab chiqilgan hamda Oʻzbekiston Respublikasi Oliy Majlisi Qonunchilik palatasi deputati (bundan buyon matnda deputat deb yuritiladi) uchun uning oʻz deputatlik vakolatlarini amalga oshirishi chogʻida majburiy boʻlgan xulq-atvorning maʼnaviy-axloqiy prinsiplari va qoidalarini belgilaydi.

2. Odob-axloq qoidalari deputatning Oʻzbekiston Respublikasi Konstitutsiyasi hamda Oʻzbekiston Respublikasi qonunlari bilan kafolatlangan huquq va erkinliklarini cheklamaydi.

3. Deputat oʻz vakolatlarini amalga oshirishi chogʻida Oʻzbekiston Respublikasi Konstitutsiyasiga, “Oʻzbekiston Respublikasi Oliy Majlisi Qonunchilik palatasi toʻgʻrisida”gi Oʻzbekiston Respublikasi Konstitutsiyaviy Qonuniga, “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi Oʻzbekiston Respublikasi Qonuniga, boshqa qonunlarga, Oʻzbekiston Respublikasi Oliy Majlisi Qonunchilik palatasining Reglamentiga, shuningdek ushbu Qoidalarga amal qiladi.

4. Deputat oʻz faoliyatida jamiyatda umum qabul qilingan odob-axloq prinsiplariga qatʼiy rioya etishi, fuqarolarning, mansabdor shaxslarning huquqlari, shaʼni, qadr-qimmati va ishchanlik obroʻsini hurmat qilishi, shuningdek deputat nomiga dogʻ tushiradigan va Oʻzbekiston Respublikasi Oliy Majlisi Qonunchilik palatasining (bundan buyon matnda Qonunchilik palatasi deb yuritiladi) nufuziga, umuman davlat manfaatlariga putur yetkazadigan xatti-harakatlardan oʻzini tiyishi lozim.

5. Deputat oʻz vazifalarini vijdonan va halol bajarishi, oʻzi aʼzo boʻlgan siyosiy partiya, fraksiya va qoʻmitaning (komissiyaning) ish rejalarida, qarorlarida belgilangan vazifalarning ijrosini taʼminlashi, oʻz malakasini muntazam ravishda oshirib borishi, nazariy bilimlari va amaliy koʻnikmalarini takomillashtirib borishi kerak.

6. Deputat oʻz vakolatlari davrida ilmiy va pedagogik faoliyatdan tashqari boshqa haq toʻlanadigan faoliyat turlari bilan shugʻullanishi mumkin emas. Deputatning ilmiy va pedagogik faoliyat bilan shugʻullanishi uning asosiy kasbiy vazifalarini bajarishga zarar yetkazmasligi kerak.

7. Deputat oʻz kasbiy faoliyatini quyidagi prinsiplar asosida amalga oshirishi kerak:

inson va fuqarolarning huquqlari, erkinliklari va qonuniy manfaatlari ustuvorligi;

Oʻzbekiston Respublikasining Konstitutsiyasi, qonunlari va boshqa qonun hujjatlariga rioya etish;

saylovchilarning, oʻzini deputatlikka nomzod qilib koʻrsatgan siyosiy partiyaning manfaatlarini Qonunchilik palatasida ifodalash;

deputatlik faoliyatining ochiqligi va oshkoraligi, oʻz faoliyati toʻgʻrisida saylovchilarini doimiy xabardor qilib borish.

2-bob. Qonunchilik palatasi, uning Kengashi, siyosiy partiya fraksiyasi, qoʻmita va komissiya majlislarida oʻzini tutish qoidalari

8. Deputat Qonunchilik palatasi, siyosiy partiya fraksiyasining (bundan buyon matnda fraksiya deb yuritiladi), oʻzi tarkibiga saylangan qoʻmita va komissiyaning majlislarida ishtirok etishi shart.

Majlisda ishtirok etish imkoniyati boʻlmagan taqdirda, deputat bu haqda tegishincha Qonunchilik palatasi Spikeriga, fraksiya, qoʻmita va komissiya rahbariga kamida bir kun oldin (majlisda ishtirok etish imkoniyatiga toʻsqinlik qiluvchi toʻsatdan yuzaga kelgan vaziyat boʻyicha majlis boshlanishidan oldin) xabar qilishi shart.

9. Qonunchilik palatasi, uning Kengashi, siyosiy partiya fraksiyasi, qoʻmita va komissiyaning majlislarida deputat:

oʻz nutqida deputatlarning yoki boshqa shaxslarning shaʼni, qadr-qimmati yoki ishchanlik obroʻsiga putur yetkazadigan qoʻpol, haqoratomuz ibora va soʻzlarni, imo-ishoralarni qoʻllamasligi;

majlislarni oʻtkazishga xalaqit beradigan harakatlarga yoʻl qoʻymasligi — soʻzga chiqqanlarning soʻzini boʻlmasligi, Oʻzbekiston Respublikasi Oliy Majlisi Qonunchilik palatasi Reglamentining 81 va 82-moddalarida nazarda tutilgan tartibga zid ravishda oʻz fikrini bayon qilishga urinmasligi;

oʻtirgan joyidan baqirmasligi, muhokama etilayotgan masala yuzasidan soʻzga chiqqanlarning oʻz nuqtai nazarini erkin bayon etishiga toʻsiqlar vujudga keltirmasligi;

turli uzrsiz sabablarga koʻra majlislar zalidan namoyishkorona chiqib ketmasligi;

kun tartibidagi muhokama qilinayotgan masaladan imkon qadar chetga chiqib soʻzlamasligi, biror shaxsning shaʼni, qadr-qimmati yoki ishchanlik obroʻsiga putur yetkazuvchi asossiz ayblovga yoʻl qoʻymasligi;

soʻzga chiqishlar, deputatlik faoliyatining boshqa shakllarini amalga oshirish chogʻida bila turib yolgʻon va notoʻgʻri axborotdan foydalanmasligi;

Oʻzbekiston Respublikasi Oliy Majlisi Qonunchilik palatasi Reglamentining va ushbu Qoidalarning talablarini buzadigan boshqa xatti-harakatlarni sodir etmasligi kerak.

10. Deputat ushbu Qoidalarning 9-bandida koʻrsatilgan xatti-harakatlarni sodir etgan taqdirda, majlisda raislik qiluvchi:

bunday qoidabuzarliklarga yoʻl qoʻyib boʻlmasligi toʻgʻrisida deputatni ogohlantirishga;

deputatni soʻzlash huquqidan mahrum qilishga;

deputatdan majlislar zalini tark etishni talab qilishga;

Oʻzbekiston Respublikasi Oliy Majlisi Qonunchilik palatasining Odob-axloq komissiyasidan (bundan buyon matnda Komissiya deb yuritiladi) tegishli deputatning xatti-harakatiga baho berishni soʻrashga haqli.

11. Deputat majlisda shaxsan ovoz berishi hamda ovoz berish kartochkasining lozim darajada saqlanishini taʼminlashi shart.

Ovoz berishni boshqa deputatga yoki oʻzga shaxsga bergan deputatning xatti-harakatlari boʻyicha Komissiya yoki uning taklifi bilan palata tomonidan ushbu Qoidalarda hamda “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi Oʻzbekiston Respublikasi Qonunida belgilangan taʼsir choralari qoʻllanilishi mumkin.

3-bob. Deputatning boshqa deputatlar, saylovchilar, siyosiy partiya va uning fraksiyasi, Qonunchilik palatasi Devoni xodimlari hamda yordamchilari bilan oʻzaro munosabatlari

12. Deputatlar oʻrtasidagi oʻzaro munosabatlar jinsi, millati, tili, dini, ijtimoiy kelib chiqishi, eʼtiqodi, shaxsi, ijtimoiy mavqeyi va siyosiy mansubligidan qatʼi nazar teng huquqlilik, bir-birini oʻzaro hurmat qilish asosida yoʻlga qoʻyiladi.

13. Deputatlar tanqidga sabr-toqat bilan yondashishi, oʻziga nisbatan bildirilgan tanqidiy fikrlarga qoʻpollik bilan munosabat bildirishga yoʻl qoʻymasligi kerak.

14. Deputatlar oʻz ishida har qanday masalani erkin jamoaviy muhokama qilishi, fikrlar xilma-xilligini hurmat qilishi, nizolarga yoʻl qoʻymasligi, kelishmovchiliklarni ochiq fikr almashish orqali bartaraf etish yoʻllarini birgalikda izlashi kerak.

15. Deputat oʻz okrugidagi saylovchilar bilan doimiy aloqada boʻlib turadi. Deputatning saylovchilar bilan oʻzaro munosabatlari oʻzaro hurmat qilish, saylovchilar tomonidan koʻtariladigan muammolar va masalalarga deputatning eʼtibor bilan munosabatda boʻlishiga asoslanadi.

16. Deputat:

oʻz saylovchilarining huquqlari, erkinliklari va qonuniy manfaatlarini taʼminlash chora-tadbirlarini koʻrishi;

saylovchilardan tushgan takliflar, arizalar, shikoyatlarni koʻrib chiqishi, ularda koʻrsatilgan masalalarning toʻgʻri va oʻz vaqtida hal etilishiga oʻz vakolatlari doirasida koʻmaklashishi;

jismoniy shaxslarni va yuridik shaxslarning vakillarini oldindan belgilangan grafik asosida shaxsan qabul qilishi lozim.

17. Deputat saylovchilar bilan ishlashga vijdonan va halol yondashishi, ular bilan boʻladigan uchrashuvlarda shaxsan ishtirok etishi, bu jarayonda rasmiyatchilikka yoʻl qoʻymasligi hamda soxta hisobotlar taqdim etmasligi shart.

18. Deputat oʻz ishi haqida saylovchilarni belgilangan tartibda vaqti-vaqti bilan, shu jumladan ommaviy axborot vositalaridan foydalangan holda xabardor qiladi.

Deputat tomonidan saylovchilarga taqdim etiladigan axborot toʻliq, toʻgʻri va xolisona boʻlishi kerak.

19. Deputat uni deputatlikka nomzod qilib koʻrsatgan siyosiy partiya va uning fraksiyasi bilan aloqa bogʻlab turadi hamda ularning ustavida (nizomida) belgilangan odob-axloq va intizom qoidalariga amal qiladi.

Deputat Qonunchilik palatasida uni deputatlikka nomzod qilib koʻrsatgan siyosiy partiya manfaatlarini ifoda etadi.

20. Deputatning Qonunchilik palatasi Devoni xodimlari hamda yordamchilari bilan oʻzaro munosabati hurmat, professionallik asosida amalga oshiriladi.

Deputat Qonunchilik palatasi Devoni xodimlari hamda yordamchilari uchun oʻrnak boʻlishi, ularga xushmuomalalik bilan munosabatda boʻlishi, ularni jinsi, millati, tili, dini, ijtimoiy kelib chiqishi, eʼtiqodi va ijtimoiy mavqeyi boʻyicha kamsitishga yoʻl qoʻymasligi lozim.

Deputat Qonunchilik palatasi Devoni xodimlari hamda yordamchilaridan shaxsiy manfaatlari yoʻlida yoki ularning xizmat majburiyatlariga kirmaydigan vazifalarda foydalanishi mumkin emas.

Deputat yaqin qarindoshlari (ota-ona, aka-uka, opa-singil, farzand, er-xotin, shuningdek er-xotinlarning ota-onasi, aka-ukasi va opa-singlisi) uning yordamchisi boʻlishi mumkin emasligi toʻgʻrisidagi qonun talabiga qatʼiy rioya etishi lozim.

4-bob. Qonunchilik palatasi deputati tomonidan joylardagi ishlarning holatini oʻrganishda deputatlik odobi

21. Deputat joylarga chiqib, aholi bilan oʻtkazilgan muloqotlar va sohalarni oʻrganish jarayonida oldiga qoʻyilgan vazifalarni sidqidildan bajarishi, oʻrganilayotgan masalaning tub mohiyatiga yetib borishi, uchrashuvlarda shaxsan ishtirok etishi lozim.

22. Joylarga chiqqanda rasmiyatchilik va koʻz boʻyamachilikka yoʻl qoʻymasligi hamda xolis va haqqoniy hisobotlar taqdim etishi kerak.

23. Joylardagi ishlarning holatini oʻrganishda deputatning davlat organlariga, shu jumladan mahalliy ijroiya hokimiyati organlariga tazyiq oʻtkazishiga, ular faoliyatiga aralashishiga yoki ularning qonuniy faoliyatiga toʻsqinlik qilishiga, oʻz faoliyatini qonunchilikka zid ravishda amalga oshirishga undashiga, bunday harakatni bajarmaganlik uchun doʻq-poʻpisa va bosim oʻtkazishiga yoʻl qoʻyilmaydi.

5-bob. Ommaviy chiqishlar chogʻidagi deputatlik odobi

24. Deputat ommaviy axborot vositalari, matbuot konferensiyalari, boshqa jamoat tadbirlari va omma oldidagi bayonotlarida, shu jumladan, Internet jahon axborot tarmogʻida ochilgan shaxsiy sahifalarida hamda ijtimoiy tarmoqlardagi chiqishlarida (blog, post, izohlar qoldirishda):

Qonunchilik palatasining, uni nomzod qilib koʻrsatgan siyosiy partiya va uning fraksiyasining nufuzini tushirishga olib kelishi yoki oʻz vakolatlarini vijdonan amalga oshirishiga shubha tugʻdirishi mumkin boʻlgan harakatlardan tiyilishi;

oʻzining xatti-harakati, axloqi tufayli jamoatchilikning tanqidiga uchramasligi hamda asosli va konstruktiv tanqidni toʻgʻri qabul qilishi;

davlat organlari, boshqa tashkilotlar, mansabdor shaxslar hamda fuqarolarning faoliyatiga nisbatan eʼtirozlari boʻlsa, ularni asoslangan, aniq muammoga qaratilgan holda bayon etishi, tekshirilmagan, isbotlanmagan maʼlumot va dalillardan foydalanmasligi;

yuridik shaxslarning ishchanlik obroʻsiga, jismoniy shaxslarning shaʼni, qadr-qimmati yoki ishchanlik obroʻsiga putur yetkazishi mumkin boʻlgan asossiz, yolgʻon yoki notoʻgʻri maʼlumotlarni tarqatmasligi;

fuqarolar bilan muloqot qilishda ularning shaʼni, qadr-qimmati yoki ishchanlik obroʻsiga putur yetkazadigan qoʻpol, haqoratomuz ibora va soʻzlarni qoʻllamasligi hamda asossiz ayblovlarga yoʻl qoʻymasligi, qonunga xilof xatti-harakatlarga daʼvat etmasligi hamda bila turib yolgʻon va notoʻgʻri axborotdan foydalanmasligi kerak.

Deputat ommaviy chiqishlari chogʻida sud tizimi va sudyalar haqida tanqidiy fikr bildirishda ularning mustaqilligi va xolisligiga taʼsir koʻrsatmasligi, tanqidiy fikr dalillar bilan asoslangan va aniq boʻlishi hamda sudga hurmatsizlikni ifoda etmasligi lozim. Deputat sudlar siyosatdan xoli ekanligi va tanqidlarga javob berishi uning xolisligini shubha ostiga qoʻyishi mumkinligini inobatga olishi zarur.

25. Agar deputatning omma oldidagi bayonotlarida fuqarolarning shaʼni, qadr-qimmati yoki ishchanlik obroʻsiga, yuridik shaxsning ishchanlik obroʻsiga putur yetkazadigan fikrlar mavjud boʻlsa, deputat oʻz fikrlarining yanglishligi yoki notoʻgʻriligini oshkora tan olishi hamda shaʼni, qadr-qimmati yoki ishchanlik obroʻsiga daxl qilingan fuqaro va (yoki) yuridik shaxsdan uzr soʻrashi kerak.

26. Deputat boshqa deputatlarning kasbiy va shaxsiy sifatlarini oshkora shubha ostiga qoʻymasligi lozim.

27. Deputat oʻziga rasman vakolat berilgan hollardagina Qonunchilik palatasi nomidan soʻzlashi mumkin.

6-bob. Deputatning maqomidan gʻayriqonuniy ravishda foydalanishga yoʻl qoʻyilmasligi

28. Deputat oʻz maqomidan fuqarolar, jamiyat va davlatning qonuniy manfaatlariga zarar yetkazadigan tarzda foydalanishi mumkin emas.

Deputatning oʻz maqomidan, shu jumladan, nazorat vakolatlaridan:

oʻzi, qarindoshlari va oʻziga yaqin boshqa shaxslar uchun manfaat, xizmatlar, tijoratga oid yoki boshqa naf olish;

sud hokimiyati organlari faoliyatiga aralashish, shaxsiy masalalar boʻyicha davlat organlari va tashkilotlari, davlat xizmatchilari va boshqa shaxslarga taʼsir oʻtkazish;

ijroiya hokimiyati organlarining kadrlar siyosatiga aralashish, muayyan shaxslarni ishga qabul qilish, lavozimini koʻtarish yoki moddiy yoxud maʼnaviy ragʻbatlantirishga undash;

qonunchilikda nazarda tutilmagan imtiyozlar, preferensiyalar yoki afzalliklarni olishiga yoxud boshqa qonunchilikka zid maqsadlarda foydalanishiga yoʻl qoʻyilmaydi.

29. Deputat moddiy manfaatdorlik evaziga palata, fraksiya, qoʻmita (komissiya) majlisida biror masalani olib chiqishi yoki uni qoʻllab-quvvatlab ovoz berishi mumkin emas.

30. Deputat deputatlik blankalaridan faqat deputatlik vakolatlarini amalga oshirish uchun zarur boʻlgan rasmiy xat, soʻrovlar va boshqa hujjatlarni rasmiylashtirishda foydalanishi shart.

Deputat davlat mulkining but saqlanishini taʼminlashi hamda oʻziga ishonib topshirilgan davlat mulkidan faqat xizmat maqsadlarida foydalanishi lozim.

7-bob. Deputatlik vakolatlarini amalga oshirishi munosabati bilan deputat tomonidan olingan maʼlumotlarning oshkor etilmasligi

31. Deputat deputatlik vakolatlarini amalga oshirishi munosabati bilan oʻziga maʼlum boʻlib qolgan maʼlumotlarni, agar ushbu maʼlumotlar:

Qonunchilik palatasi, uning Kengashining, fraksiya, qoʻmita va komissiyaning yopiq majlislarida koʻrib chiqilgan masalalarga taalluqli boʻlsa;

davlat siriga va qonun bilan qoʻriqlanadigan boshqa sirga taalluqli boʻlsa;

deputatning daxlsizligini cheklashga yoki deputat tomonidan ushbu Qoidalarning buzilganligi bilan bogʻliq boʻlsa;

saylovchining yoki boshqa shaxsning shaxsiy hayotiga oid siri boʻlsa va deputatga ularni oshkor etmaslik sharti bilan ishonib maʼlum qilingan boʻlsa, oshkor etmasligi lozim.

32. Deputat davlat organlari, fuqarolarning oʻzini oʻzi boshqarish organlari, korxonalar, muassasalar va tashkilotlar, mansabdor shaxslar tomonidan oʻziga taqdim etilgan rasmiy xizmatga oid maʼlumotdan shaxsiy naf koʻrish uchun foydalanishga haqli emas.

8-bob. Xorijga xizmat safari davrida, chet ellik fuqarolar bilan uchrashuvlarda deputatlik odob-axloq qoidalari

33. Deputat rasmiy delegatsiyalar tarkibida va chet ellik fuqarolar bilan uchrashuvlarda oliy davlat vakillik organining vakili ekanligini namoyish eta olishi lozim.

34. Deputat rasmiy delegatsiyalar tarkibida chet davlatlarda boʻlgan paytida xizmat safarining maqsad va vazifalarini roʻyobga chiqarishga, Qonunchilik palatasi nufuzini va umuman Oʻzbekiston Respublikasining manfaatlarini himoya qilishga koʻmaklashishi, oʻzi borgan mamlakatning qonun hujjatlari talablariga hamda rasmiy va norasmiy tadbirlarni oʻtkazish chogʻida umum qabul qilingan odob normalariga rioya etishi kerak.

9-bob. Xizmatdan tashqari vaqtdagi va kiyinish odobi qoidalari

35. Deputat xizmatdan tashqari vaqtda deputatning yuksak nomiga dogʻ tushiradigan, oʻzining shaʼni, qadr-qimmati va ishchanlik obroʻsiga, Qonunchilik palatasining nufuziga putur yetkazadigan xatti-harakatlardan tiyilishi, shu jumladan:

jamoat joylarida (kafe, restoran va boshqa koʻngilochar maskanlarda) oʻzini tutish qoidalariga rioya etishi, atrofdagilarning eʼtiborini tortuvchi ortiqcha va salbiy harakatlarga yoʻl qoʻymasligi;

dabdababozlik, shuhratparastlik, guruhbozlik, maishatbozlik, ichkilikbozlik va boshqa salbiy illatlarga yoʻl qoʻymasligi;

jamoat tartibi va xavfsizligiga qarshi qaratilgan xatti-harakatlarni sodir etmasligi hamda boshqalarni noqonuniy harakatlarga daʼvat qilmasligi shart.

Shaxsiy oʻzaro munosabatlarda deputat kamtar, halol, xushmuomala boʻlishi va hech kimga nisbatan qoʻpol munosabatda boʻlmasligi lozim.

36. Kundalik turmushda odob normalariga rioya etish ushbu Qoidalarning ajralmas qismidir. Deputat kiyinishi uslubining sipoligi va kamtaronaligi bilan ajralib turishiga harakat qilishi lozim.

Deputat, ayniqsa, deputatlik vakolatlarini amalga oshirish chogʻida oʻta dabdabali kiyim-bosh kiymasligi, ortiqcha bezaklar va boshqa aksessuarlar taqmasligi kerak.

Siyosiy partiyaga aʼzoligi toʻxtatilgan Qonunchilik palatasi rahbariyati palata, siyosiy partiya fraksiyasi va qoʻmitalar yigʻilishlarida qatnashganda kiyim-boshida biror-bir siyosiy partiyaning shiori yoki ramzi boʻlmasligi lozim.

10-bob. Manfaatlar toʻqnashuvi va korrupsiyaga qarshi choralar

37. Deputat oʻz faoliyatida manfaatlar toʻqnashuviga yoʻl qoʻymasligi, begʻaraz va xolis boʻlishi kerak. Basharti, Qonunchilik palatasi, uning Kengashi, siyosiy partiya fraksiyasi, qoʻmita (komissiya) majlisida deputat bevosita yoxud yaqin qarindoshlari orqali shaxsiy manfaatdorlikka ega boʻlgan masala koʻrib chiqilayotgan boʻlsa, u bu haqda raislik qiluvchini xabardor qilishi shart.

Raislik qiluvchi manfaatlar toʻqnashuvining oldini olish maqsadida shaxsiy manfaatdorligi boʻlgan deputatning muhokamalarda soʻz olish huquqini cheklashi mumkin.

38. Deputat oʻz vakolatlarini jismoniy va yuridik shaxslar manfaatlarini koʻzlab bajarish yoki bajarmaslik evaziga ulardan har qanday sovgʻa olishi taqiqlanadi.

Deputat alohida xizmatlari uchun Qonunchilik palatasi yoki uning Kengashining qarori asosida olingan sovgʻalar, shuningdek musobaqalar va tanlovlarda erishgan yutuqlari, davlat bayramlari, nishonlanadigan sanalar hamda boshqa rasmiy tadbirlar munosabati bilan mukofotlash natijasida yoxud xizmat safarlari, xorijlik delegatsiyaning Oʻzbekistonga tashrifi vaqtida, shuningdek xalqaro va boshqa rasmiy tadbirlar munosabati bilan sovgʻalar olishi mumkin.

Xizmat safarlari, xorijlik delegatsiyaning Oʻzbekistonga tashrifi vaqtida, shuningdek xalqaro va boshqa rasmiy tadbirlar munosabati bilan olingan sovgʻa qiymati bazaviy hisoblash miqdorining toʻrt baravaridan oshmasligi lozim, ushbu miqdordan oshadigan sovgʻalar Qonunchilik palatasi muzeyiga topshiriladi.

39. Deputat oʻz vakolatlarini amalga oshirishi chogʻida korrupsiyaga nisbatan murosasiz munosabatda boʻlishi va korrupsiyaga olib kelishi mumkin boʻlgan harakatlarning (harakatsizlikning) oldini olishi shart.

Agar deputat korrupsiya faktlari toʻgʻrisidagi axborotga ega boʻlsa, u korrupsiyaning oldini olish uchun zarur choralar koʻrishi, shu jumladan Qonunchilik palatasi yoki uning organlari rahbarlarini yoki korrupsiyaga qarshi kurashish boʻyicha maxsus vakolatli davlat organini darhol xabar qilishi yoxud huquqni muhofaza qiluvchi organga murojaat etishi kerak.

11-bob. Yakunlovchi qoidalar

40. Ushbu Qoidalar buzilgan taqdirda deputatning xulq-atvori toʻgʻrisidagi masala Komissiya tomonidan koʻrib chiqilishi yoki Qonunchilik palatasi koʻrib chiqishi uchun kiritilishi mumkin.

Komissiya ushbu Qoidalarni buzgan deputatga nisbatan quyidagi taʼsir koʻrsatish choralarini qoʻllashga haqli:

deputatga ushbu Qoidalarni buzishga yoʻl qoʻyilmasligini koʻrsatib oʻtgan holda ogohlantirish berish;

deputatdan Komissiya yoki Qonunchilik palatasi majlisida uzr soʻrashni talab etish;

Qonunchilik palatasiga deputatning vakolatlarini muddatidan ilgari tugatish va uni chaqirib olish haqida taklif kiritish toʻgʻrisida qaror qabul qilish.

Komissiya Odob-axloq qoidalarini buzgan deputatga nisbatan “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi va “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi qonunlarida belgilangan taʼsir choralarini qoʻllashga yoxud Qonunchilik palatasiga taklif kiritishga haqli.

41. Deputat tomonidan ushbu Qoidalar buzilgan taqdirda, alohida hollarda, Qonunchilik palatasi deputatni “adolatli deputat”, “xalqparvar deputat” yoki “mehnatkash deputat” maqomidan mahrum qilishi mumkin.

42. Deputat tomonidan umum qabul qilingan odob normalarini, deputatlik odobini qoʻpol tarzda buzadigan, deputatning yuksak nomiga dogʻ tushiradigan xatti-harakatlar sodir etilgan taqdirda, u qonunda belgilangan tartibda chaqirib olinishi yoxud Qonunchilik palatasi qarori bilan vakolati muddatidan oldin tugatilishi mumkin.