39-modda. Seleksiya yutugʻidan foydalanish huquqini boshqa shaxsga berish
“Seleksiya yutuqlari toʻgʻrisida”gi Oʻzbekiston Respublikasi qonuniga oʻzgartishlar va qoʻshimchalar kiritish haqida (395-II-son) · Sana: 29.08.2002 · Amalda
Patent berilgan nav yoki zot litsenziya shartnomasining predmeti boʻlishi mumkin.
Patent egasi boʻlmagan har qanday yuridik yoki jismoniy shaxs patent bilan muhofaza qilinayotgan seleksiya yutugʻidan patent egasining ruxsati bilangina litsenziya shartnomasi asosida foydalanishga haqlidir.
Patent egasi seleksiya yutugʻidan foydalanish huquqini har qanday shaxsga berish (ochiq litsenziya) toʻgʻrisida Vazirlikka ariza topshirishi mumkin. Bu holda patentni oʻz kuchida saqlab turganlik uchun undiriladigan patent boji ellik foizga kamaytiriladi.
Patent egasining ochiq litsenziyaga boʻlgan huquqni boshqa shaxsga berish toʻgʻrisidagi arizasi chaqirib olinmaydi.
Ochiq litsenziya olish istagini bildirgan shaxs patent egasi bilan litsenziya shartnomasini tuzishi shart.
Patent egasi mutlaq litsenziya yoki oddiy (nomutlaq) litsenziya bergan holda seleksiya yutugʻidan foydalanish huquqini boshqa shaxsga oʻtkazishi mumkin.
Mutlaq litsenziya berilganida litsenziat seleksiya yutugʻidan litsenziya shartnomasida koʻrsatilgan doirada foydalanish uchun mutlaq huquq oladi, seleksiya yutugʻidan foydalanish huquqining litsenziatga berilmaydigan qismi litsenziarda saqlanib qoladi.
Oddiy (nomutlaq) litsenziya berilganida litsenziar seleksiya yutugʻidan foydalanish huquqini litsenziatga berib, patentdan kelib chiqadigan barcha huquqlarni, shu jumladan boshqa shaxslarga litsenziya berish huquqini ham oʻzida saqlab qoladi.