QMQ 2.04.17-2019 “Turar joy va jamoat binolarining elektr jihozlari” qurilish meʼyorlari va qoidalariga qoʻshimchalar kiritish toʻgʻrisida (100-son)
08.05.2023
Oʻzbekiston Respublikasi qurilish va uy-joy kommunal xoʻjaligi vazirining
buyrugʻi
[Oʻzbekiston Respublikasi Adliya vazirligi tomonidan 2023-yil 8-iyunda hisobga olindi, hisob raqami 171]
Oʻzbekiston Respublikasining Shaharsozlik kodeksiga asosan buyuraman:
1. QMQ 2.04.17-2019 “Turar joy va jamoat binolarining elektr jihozlari” qurilish meʼyorlari va qoidalariga ilovaga muvofiq qoʻshimchalar kiritilsin.
2. Mazkur buyruq Oʻzbekiston Respublikasi Energetika vazirligi va Favqulodda vaziyatlar vazirligi bilan kelishilgan.
3. Mazkur buyruq rasmiy eʼlon qilingan kundan eʼtiboran kuchga kiradi.
Vazir B. ZAKIROV
Toshkent sh.,
2023-yil 8-may,
100-son
Kelishildi:
Oʻzbekiston Respublikasi energetika vaziri J. MIRZAMAHMUDOV
2023-yil 27-aprel
Oʻzbekiston Respublikasi favqulodda vaziyatlar vaziri A. KULDAShEV
2023-yil 17-aprel
Oʻzbekiston Respublikasi qurilish va uy-joy kommunal xoʻjaligi vazirining 2023-yil 8-maydagi 100-son buyrugʻiga ILOVA
QMQ 2.04.17-2019 “Turar joy va jamoat binolarining elektr jihozlari” qurilish meʼyorlari va qoidalariga kiritilayotgan qoʻshimchalar
1. Quyidagi mazmundagi 16-bob bilan toʻldirilsin:
“16-bob. Kabel liniyalarini yongʻindan himoya qilish tadbirlarini tashkil etish va oʻtkazish
16.1. Kuchlanishli va boshqaruv kabellaridan, shu jumladan kabel qurilmalariga yotqizilgan yonmaydigan hamda aloqa kabellaridan tashkil topgan kabel liniyalari yuzasi boʻylab, shuningdek bino va inshootlarning ichkarisi va tashqarisidagi kabel konstruksiyalari boʻylab yongʻinning tarqalishini oldini olish uchun GOST R 53311-2009, GOST IEC 60332-3-22-2011 va GOST IEC 60331-2-2021 talablariga muvofiq olovdan himoyalovchi qoplamalar (bundan buyon matnda olovbardosh toʻr deb yuritiladi) dan foydalanishga ruxsat etiladi.
Ruxsat etilgan davomli tok yuklamasini kamaytirish koeffitsiyenti 0,98 dan kam boʻlmasligi kerak.
Olovbardosh toʻrning olovdan shikastlangan yoki kuygan qismining uzunligi GOST IEC 60332-3-22-2011 ning 6-bandiga muvofiq oʻlchanganida 1,5 m dan oshmasligi kerak.
16.2. Agressiv muhit, yuqori harorat, namlik va atrof muhitning boshqa taʼsirida ishlatiladigan olovbardosh toʻrlar, koʻrsatib oʻtilgan omillarga texnik shartlarda keltirilgan bardoshlilikka ega boʻlishi lozim.
16.3. Olovbardosh toʻrlar:
kabel liniyalaridan foydalanish vaqtida nominal tok yuklamalarini kamaytirmasligi;
yuklama ostida boʻlgan kabelning hisoblangan qizish haroratini oshirmasligi;
kabellarni va toʻplam shaklida yotqizilgan kabellarni almashtirish ishlariga toʻsqinlik qilmasligi kerak.
16.4. Olovbardosh toʻrlardan foydalanganda quyidagilarga rioya qilinishi lozim:
kuchlanishli, boshqaruv va aloqa kabellari butun yuzasi boʻylab qoplanishi;
qutilar va lotoklarda yotqizilgan boshqaruv kabellarining qatori butun tashqi yuzasi boʻylab qoplanishi;
toʻplam shaklida yotqizilgan boshqaruv kabellarining qatori tashqi yuzasi boʻylab qoplanishi;
olovbardosh toʻrlar kabel liniyalarining holatini davriy tekshirish, shuningdek kabel liniyalarini qoʻshimcha yotqizish va kabel liniyalarini almashtirish imkoniyatini taʼminlashi.
16.5. Olovbardosh toʻrlarni qobiqlari va himoya shlanglarida koʻrinadigan shikastlanishlari mavjud (uzilishlar, tirqishlar va yoriqlar) kabel tarmoqlariga oʻrnatish taqiqlanadi.
16.6. Kabellarni yongʻindan himoyalashda, mazkur QMQ va Elektr uskunalarining tuzilishi qoidalariga (EUQ) (2004-yil 27-fevral, 20-15-62/24-son) asosan ushbu kabellarni yongʻinga bardoshliligining meʼyoriy chegarasiga muvofiqligini taʼminlash uchun bino va inshootlar qurilish konstruksiyalarining kabel oʻtkaziladigan joylarida olovga bardoshlilikni taʼminlovchi zichlashtirish (tiklanish) ishlari amalga oshirilishi lozim.”.