“Xoʻjalik yurituvchi subyektlarning bank hisobvaraqlaridan pul mablagʻlarini hisobdan chiqarish tartibi toʻgʻrisidagi yoʻriqnomani tasdiqlash haqida”gi qarorga oʻzgartirishlar va qoʻshimcha kiritish toʻgʻrisida (2342-11-son)

30.05.2023

Oʻzbekiston Respublikasi Markaziy banki boshqaruvi Oʻzbekiston Respublikasi Iqtisodiyot va moliya vazirligining

Qarori

[Oʻzbekiston Respublikasi Adliya vazirligi tomonidan 2023-yil 30-mayda roʻyxatdan oʻtkazildi, roʻyxat raqami 2342-11]

Oʻzbekiston Respublikasining Soliq kodeksi va Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuniga muvofiq Oʻzbekiston Respublikasi Markaziy banki boshqaruvi hamda Iqtisodiyot va moliya vazirligi qaror qiladi:

1. Oʻzbekiston Respublikasi Markaziy banki boshqaruvi, Moliya vazirligi va Davlat soliq qoʻmitasining 2011-yil 12-dekabrdagi 35/4, 82 va 2011-41-son “Xoʻjalik yurituvchi subyektlarning bank hisobvaraqlaridan pul mablagʻlarini hisobdan chiqarish tartibi toʻgʻrisidagi yoʻriqnomani tasdiqlash haqida”gi qaroriga (roʻyxat raqami 2342, 2012-yil 15-mart) (Oʻzbekiston Respublikasi qonun hujjatlari toʻplami, 2012-y., 11-son, 127-modda) ilovaga muvofiq oʻzgartirishlar va qoʻshimcha kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi M. NURMURATOV

Toshkent sh.,

2023-yil 10-may,

11/2-son

Oʻzbekiston Respublikasi Iqtisodiyot va moliya vaziri Sh. KUDBIYEV

Toshkent sh.,

2023-yil 5-may,

11-son

Oʻzbekiston Respublikasi Markaziy banki boshqaruvining 2023-yil 10-maydagi 11/2-son hamda Iqtisodiyot va moliya vazirligining 2023-yil 5-maydagi 11-son qaroriga ILOVA

“Xoʻjalik yurituvchi subyektlarning bank hisobvaraqlaridan pul mablagʻlarini hisobdan chiqarish tartibi toʻgʻrisidagi yoʻriqnomani tasdiqlash haqida”gi qarorga kiritilayotgan oʻzgartirishlar va qoʻshimcha

1. Qaror muqaddimasi quyidagi tahrirda bayon etilsin:

“Oʻzbekiston Respublikasining Fuqarolik kodeksi, Soliq kodeksi, Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi qonunlariga, Oʻzbekiston Respublikasi Prezidentining 1998-yil 4-fevraldagi PF-1923-son “Hisob-kitob mexanizmini takomillashtirish hamda Oʻzbekiston Respublikasining Respublika budjetiga, Qoraqalpogʻiston Respublikasi budjeti, viloyatlar va Toshkent shahar mahalliy budjetlariga toʻlovlar tushishini ragʻbatlantirish choralari toʻgʻrisida”gi va 2002-yil 30-martdagi PF-3047-son “Pul massasi oʻsishini cheklash va moliya intizomiga rioya etish masʼuliyatini oshirish chora-tadbirlari toʻgʻrisida”gi farmonlariga muvofiq Oʻzbekiston Respublikasi Markaziy banki boshqaruvi hamda Iqtisodiyot va moliya vazirligi qaror qiladilar:”.

2. Yoʻriqnomada:

a) muqaddima quyidagi tahrirda bayon etilsin:

“Mazkur Yoʻriqnoma xoʻjalik yurituvchi subyektlarning bank hisobvaraqlaridan (bundan buyon matnda hisobvaraq deb yuritiladi) pul mablagʻlari ularga qoʻyilgan talablarni qondirish uchun yetarli boʻlmaganda, mablagʻlarni hisobdan chiqarish tartibini belgilaydi.”;

b) 1-bandda:

ikkinchi xatboshi quyidagi tahrirda bayon etilsin:

“ixtiyoriy tugatilayotgan xoʻjalik yurituvchi subyektlarning tugatish hisobvaraqlari hamda toʻlovga qobiliyatsizlik tartib-taomillari asosida ochilgan hisobvaraqlarga;”;

toʻrtinchi xatboshidagi “Moliya vazirligi va Davlat soliq qoʻmitasi” degan soʻzlar “Iqtisodiyot va moliya vazirligi” degan soʻzlar bilan almashtirilsin;

beshinchi xatboshi quyidagi tahrirda bayon etilsin:

“Oʻzbekiston Respublikasi Vazirlar Mahkamasining qarorlari asosida ochilgan qonunchilik hujjatlariga muvofiq undiruvga yoʻl qoʻyilmaydigan maxsus maqsadli hisobvaraqlarga;”;

quyidagi mazmundagi oltinchi xatboshi bilan toʻldirilsin:

“ish haqi toʻlash uchun banklar tomonidan berilgan kreditlarga nisbatan qoʻllanilmaydi.”;

v) 2-banddagi, 4-bandning toʻrtinchi xatboshisidagi “pul-hisob-kitob” degan soʻzlar “toʻlov” degan soʻz bilan almashtirilsin;

g) 3-bandda:

birinchi xatboshidagi “pul-hisob-kitob” degan soʻzlar “toʻlov” degan soʻz bilan almashtirilsin;

ikkinchi va uchinchi xatboshilar quyidagi tahrirda bayon etilsin:

“Xoʻjalik yurituvchi subyektning asosiy hisobvaragʻiga davlat ijrochilari tomonidan soliq qarzi boʻyicha elektron inkasso topshiriqnomalari qoʻyilgan taqdirda, ushbu inkasso topshiriqnomalari toʻgʻrisidagi elektron xabarnoma banklar tomonidan shu kunning oʻzida soliq organiga yuboriladi.

Soliq organi keyingi ish kunidan kechiktirmay, ushbu elektron xabarnoma asosida oʻz inkasso topshiriqnomalarini banklardan chaqirib oladi.”;

toʻrtinchi va beshinchi xatboshilar chiqarib tashlansin;

d) 4-bandning ikkinchi xatboshisi quyidagi tahrirda bayon etilsin:

“Mazkur maʼlumotlar Bank depozitorlarining milliy axborotlar bazasi orqali Iqtisodiyot va moliya vazirligi huzuridagi Soliq qoʻmitasiga axborot tariqasida yuboriladi.”;

e) 5-bandning “a” kichik bandi ikkinchi xatboshisidagi “birga shu oyning keyingi dekadasi birinchi sanasiga, joriy oyning uchinchi dekadasi va keyinchalik esa keyingi oyning uchinchi sanasigacha bankka taqdim qilinadi” degan soʻzlar “birga bir oyda bir marta bankka taqdim qilinadi, oyning oxirgi ish kuni bundan mustasno” degan soʻzlar bilan almashtirilsin;

j) 6-band quyidagi tahrirda bayon etilsin:

“6. Xoʻjalik yurituvchi subyektning milliy valyutadagi hisobvaraqlaridagi mablagʻlar qoʻyilgan talablarni qondirish uchun yetarli boʻlmasa, xizmat koʻrsatuvchi bank soliq organlarining topshiriqnomasi asosida mazkur xoʻjalik yurituvchi subyektning chet el valyutasidagi hisobvaragʻida mavjud boʻlgan mablagʻning ushbu talablarni qondirish uchun yetarli boʻlgan miqdoridagi qismini keyingi ish kunidan kechiktirmay bank tomonidan chet el valyutasining soʻmga nisbatan belgilangan kursda sotadi.”;

z) 2-boʻlimning nomidagi “pul-hisob-kitob” degan soʻzlar “toʻlov” degan soʻz bilan almashtirilsin;

i) 11-bandda:

ikkinchi xatboshidagi “boshqa majburiy toʻlovlari” degan soʻzlar “yigʻimlar” degan soʻz bilan almashtirilsin;

uchinchi xatboshi quyidagi tahrirda bayon etilsin:

“soliq organining majburiyatga ega shaxslarning hisobvaraqlaridan pul mablagʻlarini hisobdan chiqarish va budjetga oʻtkazishga doir inkasso topshiriqnomalari;”;

k) 1-ilova oʻz kuchini yoʻqotgan deb topilsin;

l) 2-ilovadagi “yagona ijtimoiy toʻlov” degan soʻzlar “ijtimoiy soliq” degan soʻzlar bilan almashtirilsin.