Oʻzbekiston Respublikasi Savdo-sanoat palatasining faoliyati takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (217-son)
29.05.2023
Oʻzbekiston Respublikasi Vazirlar Mahkamasining
qarori
Soʻnggi yillarda aholini tadbirkorlikka jalb qilish, tadbirkorlik tashabbuslarini amalga oshirish uchun qulay huquqiy, iqtisodiy va ijtimoiy shart-sharoitlar yaratish borasida keng koʻlamli ishlar olib borilmoqda.
Bu borada Oʻzbekiston Respublikasi Savdo-sanoat palatasiga uning faoliyati samaradorligini oshirish va takomillashtirish maqsadida bir qator yangi vakolatlar berildi.
Oʻzbekiston Respublikasi Prezidentining “Savdo-sanoat palatasi faoliyatini yanada takomillashtirish boʻyicha qoʻshimcha chora-tadbirlar toʻgʻrisida” 2023-yil 23-yanvardagi PQ-15-son qarorida belgilangan maqsadlarga erishish hamda Oʻzbekiston Respublikasi Savdo-sanoat palatasi tizimini yanada takomillashtirish orqali uning faoliyati samaradorligini oshirish maqsadida Vazirlar Mahkamasi qaror qiladi:
1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:
davlat organlari va idoralar tomonidan tadbirkorlikka oid barcha begʻaraz koʻmak loyihalarini amalga oshirishda Oʻzbekiston Respublikasi Savdo-sanoat palatasi (keyingi oʻrinlarda — Palata) loyiha hamkori sifatida jalb qilinishi;
Oʻzbekiston Respublikasi hududida xalqaro grant loyihalarini amalga oshirishda Palataga milliy hamkor biriktirish talabi qoʻllanilmasligi;
Palata huzuridagi Tadbirkorlikka koʻmaklashish markazlari tugatilib, ularning oʻrniga Palataning tuman (shahar) boʻlimlari tashkil etilayotganligi.
2. Mazkur qarorning bajarilishini nazorat qilish Oʻzbekiston Respublikasi Savdo-sanoat palatasi raisi D.A. Vaxabov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 29-may,
217-son
Vazirlar Mahkamasining 2023-yil 29-maydagi 217-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 2017-yil 9-fevraldagi 66-son qarori bilan tasdiqlangan Tadbirkorlik subyektlarini davlat roʻyxatidan oʻtkazish tartibi toʻgʻrisidagi nizom quyidagi mazmundagi 391-band bilan toʻldirilsin:
“391. Davlat roʻyxatidan oʻtgan tadbirkorlik subyektlari toʻgʻrisidagi maʼlumotlar aʼzo sifatida roʻyxatga qoʻyish uchun Savdo-sanoat palatasi bilan davlat roʻyxatidan oʻtkazuvchi organ oʻrtasidagi oʻzaro integratsiyalashgan elektron tizim orqali Palata tomonidan toʻgʻridan-toʻgʻri olinadi.
Bunda, Palata tomonidan tadbirkorlik subyektlarini aʼzo qilish “Oʻzbekiston Respublikasi Savdo-sanoat palatasi toʻgʻrisida”gi Oʻzbekiston Respublikasining Qonunida belgilangan tartibda amalga oshiriladi”.
2. Vazirlar Mahkamasining “Yoshlar tadbirkorlik klasterlarini tashkil etishga doir tashkiliy chora-tadbirlar toʻgʻrisida” 2017-yil 16-oktabrdagi 834-son qarorining 6-bandi uchinchi xatboshisidagi “huzuridagi tadbirkorlikka koʻmaklashish markazlari” soʻzlari “tuman (shahar) boʻlimlari” soʻzlari bilan almashtirilsin.
3. Vazirlar Mahkamasining “Ishlab chiqarish maydonlaridan foydalanish samaradorligini yanada oshirish chora-tadbirlari toʻgʻrisida” 2019-yil 13-avgustdagi 666-son qarorida:
a) 1-ilovadagi “Tuman (shahar) tadbirkorlikka koʻmaklashish markazi direktori” soʻzlari “Savdo-sanoat palatasi tuman (shahar) boʻlimi boshligʻi” soʻzlari bilan;
b) 2-ilovadagi “Tuman (shahar) tadbirkorlikka koʻmaklashish markazi direktori” soʻzlari “Savdo-sanoat palatasi tuman (shahar) boʻlimi boshligʻi” soʻzlari bilan almashtirilsin.
4. Vazirlar Mahkamasining 2021-yil 29-dekabrdagi 786-son qarori bilan tasdiqlangan Tashqi begʻaraz koʻmak mablagʻlari hisobiga moliyalashtiriladigan loyihalarni tayyorlash, amalga oshirish va monitoring qilish tartibi toʻgʻrisidagi nizomning 26-bandi quyidagi mazmundagi ikkinchi xatboshi bilan toʻldirilsin:
“Davlat organlari va idoralari tomonidan tadbirkorlikka oid barcha begʻaraz koʻmak loyihalarini amalga oshirishda Savdo-sanoat palatasi loyiha hamkori sifatida jalb qilinadi”.