Tabiiy gaz va suyuq uglevodorodni qazib chiqarish, qayta ishlash hamda realizatsiya qilish hisobini yuritish tizimini takomillashtirish chora-tadbirlari toʻgʻrisida (PQ-157-son)

12.05.2023

Oʻzbekiston Respublikasi Prezidentining

Qarori

Tabiiy gaz hajmlari hamda suyuq uglevodorod miqdorining aniq hisobini yuritish, neft-gaz tarmogʻida hisob-kitob qilish tartibini takomillashtirish, gaz taʼminoti sohasini raqamlashtirish, isteʼmolchilarga energiya resurslarini uzluksiz yetkazib berish hamda Davlat budjetiga tushumlarning oʻz vaqtida kelib tushishini taʼminlash maqsadida:

1. Iqtisodiyot va moliya vazirligi hamda Energetika vazirligining tabiiy gaz hajmining aniq hisobini yuritish maqsadida barcha tabiiy gazni qabul qilish va uzatish nuqtalariga onlayn elektron hisoblagichlarni oʻrnatish, ularni soliq organlarining axborot tizimlari bilan integratsiya qilish orqali yagona avtomatlashtirilgan tabiiy gaz harakati tizimini joriy etish toʻgʻrisidagi taklifiga rozilik berilsin.

2. Quyidagilar:

Zamonaviy elektron hisoblagichlar oʻrnatiladigan tabiiy gazni qabul qilish va uzatish nuqtalarining jamlanma roʻyxati 1-ilovaga muvofiq;

Xromatograflar oʻrnatiladigan tabiiy gazni qabul qilish va uzatish nuqtalarining roʻyxati 2-ilovaga muvofiq;

Respublika hududida qoʻshimcha quriladigan gaz oʻlchash stansiyalari roʻyxati 3-ilovaga muvofiq;

Tabiiy gazni qazib olishdan yakuniy isteʼmolchilarga yetkazib berishgacha boʻlgan jarayonlarni toʻliq avtomatlashtirish orqali uning aniq hisobini yuritish boʻyicha “yoʻl xaritasi” 4-ilovaga muvofiq tasdiqlansin.

3. 2023-yil 1-oktabrdan boshlab Oʻzbekiston Respublikasi hududidan tabiiy gazni quvurlar orqali tashish (tranzit) xizmatlarini koʻrsatuvchi korxonalar tomonidan tabiiy gazni qabul qilish va uzatish nuqtalariga davlat reyestriga kiritilgan xromatograf hamda elektron hisoblagichlar oʻrnatilishi va soliq organlarining axborot tizimlari bilan integratsiya qilinishi majburiy etib belgilansin.

Tijorat oʻlchov uzellariga oʻrnatilgan elektron hisoblagichlarni soliq organlarining axborot tizimlari bilan integratsiya qilmagan tabiiy gaz va suyuq uglevodorodni qazib chiqarish, qayta ishlash, tashish hamda realizatsiya qilishni amalga oshiruvchi korxonalarga nisbatan Oʻzbekiston Respublikasi Soliq kodeksining 2271-moddasida belgilangan javobgarlik choralari qoʻllanilishi maʼlumot uchun qabul qilinsin.

4. Soliq qoʻmitasi 2023-yil 1-iyulga qadar tabiiy gaz va suyuq uglevodorodni realizatsiya qilish toʻgʻrisidagi shartnomalarga oid zarur maʼlumotlarni kiritish uchun axborot tizimini joriy etsin. Bunda, mazkur shartnomalarga oid konfidensial maʼlumotlarni Soliq qoʻmitasining maxsus himoyalangan axborot tizimiga kiritish imkoniyati yaratilsin.

Mazkur bandda nazarda tutilgan axborot tizimini ishlab chiqish, unga texnik xizmat koʻrsatish, saqlash va takomillashtirishning moliyalashtirish manbai etib Soliq qoʻmitasining maxsus jamgʻarmasi belgilansin.

5. Shunday tartib oʻrnatilsinki, unga muvofiq 2023-yil 1-oktabrdan boshlab:

a) tabiiy gaz va suyuq uglevodorod realizatsiyasini amalga oshiruvchi hamda ularni xarid qiluvchi korxonalar tomonidan tabiiy gaz va suyuq uglevodorodni realizatsiya qilish toʻgʻrisidagi shartnomalarga oid zarur maʼlumotlar Soliq qoʻmitasining axborot tizimiga kiritib boriladi.

Bunda, tabiiy gaz va suyuq uglevodorodni realizatsiya qilish toʻgʻrisidagi shartnomalar boʻyicha axborot tizimiga soliqlarni hisoblab chiqarish va toʻlash uchun zarur boʻlgan maʼlumotlar, shu jumladan shartnoma turi, raqami, sanasi, tovar turi (markasi), miqdori va narxi, oʻlchov birligi, hisob-kitob shakli va bajarish muddatlarini oʻz ichiga olgan maʼlumotlar kiritiladi;

b) tabiiy gaz va suyuq uglevodorodni realizatsiya qilish toʻgʻrisidagi shartnomalar yuzasidan elektron hisobvaraq-fakturalar mazkur shartnomalar boʻyicha Soliq qoʻmitasining axborot tizimiga kiritilgan maʼlumotlar asosida shakllantiriladi.

6. Energetika vazirligi Soliq qoʻmitasi bilan birgalikda 2024-yil 1-yanvarga qadar “Oʻzbekneftgaz” AJ, “UzGasTrade” AJ, “Hududgaztaʼminot” AJ, mahsulot taqsimotiga oid bitim ishtirokchilari hamda qoʻshma va xorijiy korxonalar tomonidan tabiiy gaz hajmlari boʻyicha hisob-kitoblar Energetika vazirligi tomonidan yaratiladigan yagona avtomatlashtirilgan tabiiy gaz harakati tizimida yuritilishini taʼminlasin, shuningdek, elektron hisobvaraq-fakturalar ushbu tizim maʼlumotlari asosida avtomatik ravishda rasmiylashtirilib, tabiiy gazni qabul qiluvchi tashkilotlarga yuborilishini yoʻlga qoʻysin.

7. Energetika vazirligi Iqtisodiyot va moliya vazirligi hamda Investitsiyalar, sanoat va savdo vazirligi huzuridagi Oʻzbekiston texnik jihatdan tartibga solish agentligi bilan birgalikda 2023-yil 1-iyulga qadar barcha bosqichlarda texnologik yoʻqotishlar va oʻz ehtiyojlari uchun ishlatiladigan tabiiy gaz hajmi meʼyorini belgilovchi normativlarni qayta koʻrib chiqib, amaliyotga joriy etsin.

8. Mazkur qarorning ijrosini samarali tashkil qilishga masʼul va shaxsiy javobgar etib iqtisodiyot va moliya vaziri Sh.D. Kudbiyev hamda energetika vaziri J.T. Mirzamahmudov belgilansin.

Qaror ijrosini muhokama qilib borish, masʼul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2023-yil 12-may,

PQ-157-son

Oʻzbekiston Respublikasi Prezidentining 2023-yil 12-maydagi PQ-157-son qaroriga 1-ILOVA

Zamonaviy elektron hisoblagichlar oʻrnatiladigan tabiiy gazni qabul qilish va uzatish nuqtalarining jamlanma

ROʻYXATI

Izoh: elektron hisoblagichlarni oʻrnatish muddati — 2023-yil 1-iyulga qadar.

Oʻzbekiston Respublikasi Prezidentining 2023-yil 12-maydagi PQ-157-son qaroriga 2-ILOVA

Xromatograflar oʻrnatiladigan tabiiy gazni qabul qilish va uzatish nuqtalarining

ROʻYXATI

Oʻzbekiston Respublikasi Prezidentining 2023-yil 12-maydagi PQ-157-son qaroriga 3-ILOVA

Respublika hududida qoʻshimcha quriladigan gaz oʻlchash stansiyalari

ROʻYXATI

Izohlar:

1) gaz oʻlchash stansiyalarini qurish uchun masʼullar: Energetika vazirligi, “UzGasTrade”AJ hamda “Oʻztransgaz” AJ;

2) gaz oʻlchash stansiyalarini qurish muddati: 2024-yil 1-oktabrga qadar;

3) Qoraqalpogʻiston Respublikasi Vazirlar Kengashi bir oy muddatda Qoraqalpogʻiston Respublikasi zaxirasidagi boʻsh turgan yer maydonini gaz oʻlchash stansiyasini qurish uchun “Oʻztransgaz” AJga qonunchilikda belgilangan tartibda ajratishga masʼul hisoblanadi;

4) Raqamli texnologiyalar vazirligi 2024-yil 1-oktabrga qadar gaz oʻlchash stansiyalari quriladigan hududlarning internet aloqasi bilan taʼminlanishiga masʼul hisoblanadi;

5) gaz oʻlchash stansiyalarini loyihalashtirish, qurish va jihozlash ishlarini moliyalashtirish aniq hisob-kitoblar asosida “UzGasTrade”AJ hamda “Oʻztransgaz” AJlar tomonidan 2023-yil 1-iyunga qadar 150 mlrd soʻm miqdoridagi oʻz mablagʻlarini ajratish hisobiga amalga oshiriladi.

Oʻzbekiston Respublikasi Prezidentining 2023-yil 12-maydagi PQ-157-son qaroriga 4-ILOVA

Tabiiy gazni qazib olishdan yakuniy isteʼmolchilarga yetkazib berishgacha boʻlgan jarayonlarni toʻliq avtomatlashtirish orqali uning aniq hisobini yuritish boʻyicha

“YOʻL XARITASI”