Oziq-ovqat mahsulotlarini koʻpaytirish, bahorgi ekin mavsumini samarali tashkil etish boʻyicha belgilangan tadbirlarning bajarilishi ustidan parlament nazoratini amalga oshirish toʻgʻrisida (3151-IV-son)
04.05.2023
Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining
qoʻshma qarori
Keyingi yillarda mamlakatimizda qishloq xoʻjaligi sohasini isloh qilish, oziq-ovqat xavfsizligini taʼminlash, aholining arzon va sifatli mahsulotlarga boʻlgan ehtiyojini qanoatlantirish boʻyicha bir qator chora-tadbirlar amalga oshirilmoqda.
Xususan, ozuqabop mahsulotlar yetishtirish, agrar sohada aholining bandligini taʼminlash maqsadida 200 ming gektar yer ajratilganligi hamda 500 ming gektar qoʻshimcha yerlar foydalanishga kiritilganligi ichki bozorda narx-navoni barqaror saqlashga xizmat qilmoqda.
Oʻzbekiston Respublikasi Prezidentining farmonlari va qarorlarida qishloq xoʻjaligi sohasida olib borilayotgan islohotlar samaradorligini oshirishga doir qator ustuvor vazifalar belgilab berilgan.
Jumladan, joriy yilda oziq-ovqat mahsulotlari yetishtirilishini koʻpaytirish uchun yangicha mexanizmlar asosida 6,2 trln soʻm, shu bilan birga 2023-yil 1-apreldan eʼtiboran 130 mln AQSH dollari miqdorida mablagʻlarni banklar ishtirokisiz, toʻgʻridan-toʻgʻri tadbirkorlarga ajratish uchun zarur chora-tadbirlar koʻrish koʻzda tutilgan. Tadbirkorlar loyihalariga muvofiq Oʻzbekiston Respublikasi Qishloq xoʻjaligi vazirligi tomonidan toʻgʻridan-toʻgʻri moliyalashtirish asosida intensiv bogʻlar va tokzorlar yaratilib, logistika obyektlari qurilib, tayyor holatda tadbirkorlarga lizingga berilishi nazarda tutilgan.
Qishloq xoʻjaligi mahsulotlarini koʻpaytirish, bahorgi ekin mavsumini samarali tashkil etish borasida hududlarda amalga oshirilayotgan ishlar holatini nazorat-tahlil tartibida oʻrganib borish, bu boradagi mavjud muammolarni tegishli vazirlik va idoralar bilan birgalikda joyida hal etish choralarini koʻrish muhim ahamiyat kasb etadi.
Hududlarda oziq-ovqat mahsulotlarini koʻpaytirish, bahorgi ekin mavsumini samarali tashkil etish borasida amalga oshirilayotgan ishlar ustidan parlament nazoratining samaradorligini yanada oshirish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:
1. Quyidagilar:
Oziq-ovqat mahsulotlarini koʻpaytirish, bahorgi ekin mavsumini samarali tashkil etish boʻyicha belgilangan tadbirlarning bajarilishi ustidan parlament nazoratini amalga oshirish boʻyicha ishchi guruhlar tarkibi (bundan buyon matnda Ishchi guruhlar deb yuritiladi) 1-ilovaga muvofiq;
Ishchi guruhlar tomonidan oziq-ovqat mahsulotlarini koʻpaytirish, bahorgi ekin mavsumini samarali tashkil etish chora-tadbirlari doirasida amalga oshirilayotgan ishlarning holati oʻrganiladigan tumanlar 2-ilovaga muvofiq tasdiqlansin.
2. Ishchi guruhlar:
Oʻzbekiston Respublikasi Prezidentining farmonlari va qarorlarida oziq-ovqat mahsulotlarini yetishtirishga qaratilgan, shu jumladan 2023-yil 23-mart kuni Oʻzbekiston Respublikasi Prezidenti Sh. Mirziyoyev raisligida oziq-ovqat mahsulotlarini koʻpaytirish, bahorgi ekin mavsumini samarali tashkil etish chora-tadbirlari yuzasidan oʻtkazilgan videoselektor yigʻilishi bayonida belgilangan vazifalarning ijro etilishi holatini oʻrganib borsin;
oʻrganishlar davomida oziq-ovqat mahsulotlarini koʻpaytirish, bahorgi ekin mavsumini samarali tashkil etish borasida amalga oshirilayotgan islohotlarning, qabul qilinayotgan qonunchilik hujjatlarining mazmun-mohiyati va ahamiyati toʻgʻrisida aholi oʻrtasida keng koʻlamli tushuntirish-targʻibot ishlarini olib borsin;
respublika darajasidagi tizimli muammolarni hal etishga doir takliflarning Oʻzbekiston Respublikasi Vazirlar Mahkamasiga kiritilishini taʼminlasin.
3. Oʻzbekiston Respublikasi Oliy Majlisi Qonunchilik palatasining Agrar va suv xoʻjaligi masalalari qoʻmitasi hamda Oʻzbekiston Respublikasi Oliy Majlisi Senatining Agrar va suv xoʻjaligi masalalari qoʻmitasi:
uch kun muddatda oziq-ovqat mahsulotlarini koʻpaytirish borasida belgilangan vazifalar hamda tegishli dasturlarning ijrosini oʻrganish va aholi oʻrtasida tushuntirish ishlarini tashkil etish boʻyicha tavsiyalar ishlab chiqsin hamda ularni Ishchi guruh aʼzolariga yetkazsin;
respublika ijro etuvchi hokimiyat organlari rahbarlarining mazkur oʻrganishlar boʻyicha olib borilayotgan ishlar toʻgʻrisidagi axborotini eshitib borsin.
4. Oʻzbekiston Respublikasi Oliy Majlisi Qonunchilik palatasining deputatlariga va Oʻzbekiston Respublikasi Oliy Majlisi Senatining aʼzolariga joylardagi faoliyati davomida oziq-ovqat mahsulotlarini koʻpaytirish, bahorgi ekin mavsumini samarali tashkil etish borasida amalga oshirilayotgan islohotlarning mazmun-mohiyati hamda ahamiyatini aholi oʻrtasida tushuntirish, sohadagi dasturlarning bajarilishiga koʻmaklashish va yoʻl qoʻyilgan kamchiliklarni bartaraf etishga qaratilgan takliflarni berib borish tavsiya etilsin.
5. Oʻzbekiston Respublikasi Qishloq xoʻjaligi vazirligi (A. Voitov) oziq-ovqat mahsulotlarini koʻpaytirish, bahorgi ekin mavsumini samarali tashkil etish boʻyicha tahliliy maʼlumotni har oyning 10 sanasiga qadar Oʻzbekiston Respublikasi Oliy Majlisi palatalariga kiritsin.
6. Qoraqalpogʻiston Respublikasi Joʻqorgʻi Kengesi, xalq deputatlari viloyatlar Kengashlariga oʻz sessiyalarida Ishchi guruhlar tomonidan olib borilgan oʻrganishlar natijalarini muhokama qilib, hududlarda oziq-ovqat mahsulotlarini koʻpaytirish, bahorgi ekin mavsumini samarali tashkil etish borasida aniqlangan muammolar yuzasidan hokimliklarga hamda boshqa tashkilotlarga tegishli takliflarni kiritish va ularni birgalikda hal etish choralarini koʻrish tavsiya etilsin.
7. Oʻzbekiston Respublikasi Oliy Majlisi Qonunchilik palatasi Devonining Parlament axborot markazi hamda Oʻzbekiston Respublikasi Oliy Majlisi Senati devonining Axborot xizmati deputatlar va Senat aʼzolarining qishloq xoʻjaligi mahsulotlarini koʻpaytirish, agrar sohadagi islohotlar samaradorligini oshirish hamda hududlarda oziq-ovqat mahsulotlarini yetishtirishga qaratilgan chora-tadbirlar ijrosini oʻrganish boʻyicha olib borayotgan ishlarini ommaviy axborot vositalarida keng yoritsin.
8. Ushbu Qoʻshma qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev hamda Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov zimmasiga yuklatilsin.
9. Ushbu Qoʻshma qaror qabul qilingan kundan eʼtiboran kuchga kiradi.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2023-yil 4-may,
3151-IV-son
Oʻzbekiston Respublikasi Oliy Majlisi Senatining Raisi T. NARBAYEVA
Toshkent sh.,
2023-yil 4-may,
KQ-496-IV-son
Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2023-yil 4-maydagi 3151-IV/KQ-496-IV-sonli Qoʻshma qaroriga 1-ILOVA
Oziq-ovqat mahsulotlarini koʻpaytirish, bahorgi ekin mavsumini samarali tashkil etish boʻyicha belgilangan tadbirlarning bajarilishi ustidan parlament nazoratini amalga oshirish boʻyicha ishchi guruhlar
TARKIBI
I GURUH Qoraqalpogʻiston Respublikasi, Xorazm, Buxoro va Navoiy viloyatlari 1. Tajiyev Baxadir Sadullayevich — Oʻzbekiston Respublikasi Oliy Majlisi Senati Agrar va suv xoʻjaligi masalalari qoʻmitasining raisi, Ishchi guruh rahbari 2. Tulekova Ziba Tolibekovna — Oʻzbekiston Respublikasi Oliy Majlisi Senati Agrar va suv xoʻjaligi masalalari qoʻmitasining aʼzosi 3. Toʻrazoda Batirbek Bekturdi oʻgʻli — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi 4. Jumaniyozov Kamol Komilovich — Oʻzbekiston Respublikasi Oliy Majlisi Qonunchilik palatasi Ekologiya va atrof muhitni muhofaza qilish masalalari qoʻmitasining aʼzosi II GURUH Samarqand, Qashqadaryo, Surxondaryo va Jizzax viloyatlari 1. Siddiqov Riskul Ergashboyevich — Oʻzbekiston Respublikasi Oliy Majlisi Senati Agrar va suv xoʻjaligi masalalari qoʻmitasi raisining oʻrinbosari, Ishchi guruh rahbari 2. Qodirov Begali Yaqubovich — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi 3. Raximov Sherzod Abduxalilovich — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi 4. Begmatov Ravshanbek Berdaliyevich — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi III GURUH Andijon, Namangan va Fargʻona viloyatlari 1. Imomova Dilorom Neʼmatovna — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasi raisining oʻrinbosari, Ishchi guruh rahbari 2. Najmiddinov Ikromxon Xoshimxonovich — Oʻzbekiston Respublikasi Oliy Majlisi Senati Agrar va suv xoʻjaligi masalalari qoʻmitasining aʼzosi 3. Otaxonova Odinaxon Inomovna — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi 4. Mirzamova Barno Qosimboyevna — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi IV GURUH Toshkent va Sirdaryo viloyatlari 1. Mamutov Ravshan Aminaddinovich — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining raisi, Ishchi guruh rahbari 2. Turdiyev Sodiqjon — Oʻzbekiston Respublikasi Oliy Majlisi Senati Agrar va suv xoʻjaligi masalalari qoʻmitasining aʼzosi 3. Xalbayeva Dilrabo Djurabekovna — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi 4. Toʻlaboyev Azamjon Qurbonovich — Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosi
Izoh: Ishchi guruhlar tarkibiga Qoraqalpogʻiston Respublikasi Joʻqorgʻi Kengesi va tegishli viloyatlar xalq deputatlari Kengashlarining 2 nafardan deputatlari kelishuv asosida kiritiladi.
Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2023-yil 4-maydagi 3151-IV/KQ-496-IV-sonli Qoʻshma qaroriga 2-ILOVA
Ishchi guruhlar tomonidan oziq-ovqat mahsulotlarini koʻpaytirish, bahorgi ekin mavsumini samarali tashkil etish chora-tadbirlari doirasida amalga oshirilayotgan ishlarning holati oʻrganiladigan tumanlar
Ishchi guruh Oʻrganiladigan tumanlar Oʻrganish vaqti I GURUH Qoraqalpogʻiston Respublikasining Nukus va Kegeyli tumanlari; Xorazm viloyatining Yangiariq va Xonqa tumanlari; Buxoro viloyatining Qorakoʻl va Olot tumanlari; Navoiy viloyatining Qiziltepa va Navbahor tumanlari. 2023-yil II, III chorak davomida (alohida ishchi guruhlar rejasi asosida) II GURUH Samarqand viloyatining Paxtachi, Ishtixon va Narpay tumanlari; Qashqadaryo viloyatining Nishon va Shahrisabz tumanlari; Surxondaryo viloyatining Jarqoʻrgʻon va Angor tumanlari; Jizzax viloyatining Doʻstlik va Sharof Rashidov tumanlari. III GURUH Andijon viloyatining Baliqchi va Marhamat tumanlari; Namangan viloyatining Pop va Kosonsoy tumanlari; Fargʻona viloyatining Soʻx va Toshloq tumanlari. IV GURUH Toshkent viloyatining Ohangaron va Urta Chirchiq tumanlari; Sirdaryo viloyatining Sirdaryo va Sayxunobod tumanlari.