Vazirlar Mahkamasining “Oʻzbekiston Respublikasidagi diplomatik va ularga tenglashtirilgan boshqa chet el vakolatxonalarining faoliyat koʻrsatishi uchun zarur shart-sharoitlar yaratish chora-tadbirlari toʻgʻrisida” 1993-yil 25-maydagi 247-son qaroriga qoʻshimchalar kiritish haqida (56-son)

07.02.1994

Oʻzbekiston Respublikasi Vazirlar Mahkamasining

qarori

Diplomatik va ularga tenglashtirilgan chet el vakolatxonalari kontingentining ishlashi, dam olishi va yashashi uchun zarur shart-sharoitlar yaratish maqsadida Vazirlar Mahkamasi qaror qiladi:

1. Toshkent shahar hokimligi:

Yunusobod tumanining S-4 dahasidagi 10-uyda joylashgan binoni bir oy muddatda boʻshatsin va ijtimoiy-madaniy hamda maishiy maqsadlardagi obyektlari majmui bilan birga Oʻzbekiston Respublikasi Tashqi ishlar vazirligining Diplomatik servis xizmati balansiga topshirsin;

“Toshkentqurilish” davlat korporatsiyasi bilan birga Baynalmilal koʻchasidagi Tashqi ishlar vazirligi binolari majmui qurilishini 1994-yilning III choragida nihoyasiga yetkazish yuzasidan zarur chora-tadbirlar koʻrsin.

Oʻzbekiston Respublikasi Tashqi ishlar vazirligining Diplomatik servis xizmati (rekonstruksiya qilish va qurilish ishlari nihoyasiga yetkazilgandan soʻng) Diplomatik chet el vakolatxonalari uchun ixtisoslashtirilgan doʻkonni, qabul qilish zali va restorani boʻlgan inter klubni, axborot-analitik markazni, ijtimoiy-maishiy xizmat koʻrsatish obyektlarini va mehmonxonani koʻrsatilgan binolarga joylashtirsin.

2. Oʻzbekiston Respublikasi Energetika va elektrlashtirish vazirligi Toshkent viloyatining Boʻstonliq tumanidagi “Kosmos” pioner lagerini keyinchalik rekonstruksiya qilish va chet el diplomatik vakolatxonalari uchun Dam olish uyi sifatida foydalanish maqsadida bir oy muddatda Oʻzbekiston Respublikasi Tashqi ishlar vazirligining Diplomatik servis xizmati balansiga topshirsin.

3. Dam olish uyi obyektlarini rekonstruksiya qilish va qurilish boʻyicha bosh pudratchi etib “Oʻzsanoatxoʻjalikqurilish” davlat korporatsiyasining 160-son tresti belgilansin va rekonstruksiya qilish ishlari 1994-yilning 1-iyuligacha tugallansin.

Oʻzbekiston Respublikasi Moliya vazirligi Tashqi ishlar vazirligiga ushbu maqsadlar uchun zarur boʻlgan mablagʻlarni ajratsin.

“Oʻzsanoatqurilishbank” loyiha-smeta hujjatlari tasdiqlangunga qadar obyektlarni rekonstruksiya qilishni va qurishni haqiqiy xarajatlar boʻyicha moliyaviy taʼminlasin.

4. “Toshshaharyoʻlovchitrans” davlat uyushmasi 2-avtokombinat negizida diplomatik chet el vakolatxonalari avtotransportiga xizmat koʻrsatishni va tuzatishni ikki oy muddatda tashkil etsin.

5. Davlat sport qoʻmitasi Oʻzbekiston Respublikasi Tashqi ishlar vazirligining Diplomatik servis xizmati bilan birgalikda “Paxtakor” sport majmui negizida chet el Diplomatik vakolatxonalari uchun sport-sogʻlomlashtirish klubini ikki oy muddatda tashkil etsin.

“Oʻzbeksavdo” davlat uyushmasi Toshkent shahar Yunusobod tumanidagi sport-sogʻlomlashtirish majmui qurilishi nihoyasiga yetkazilgan va foydalanishga topshirilgandan soʻng Tashqi ishlar vazirligining Diplomatik servis xizmati talabnomasiga koʻra chet el diplomatiya vakolatxonalariga xizmat koʻrsatishni tashkil etsin.

6. Oʻzbekiston Respublikasi Tashqi ishlar vazirligi:

Krasnodon tor koʻchasidagi oʻz balansiga berilgan 14 va 16-uylarni yangidan ochilgan Diplomatik vakolatxonalar uchun ofis qilib qayta jihozlasin;

Diplomatik va ularga tenglashtirilgan boshqa chet el vakolatxonalari boʻlgan xizmat va uy-joy binolarini ijaraga berish uchun tuzilgan shartnomalarni qayta rasmiylashtirish ishlarini “Ijara toʻgʻrisida”gi Oʻzbekiston Respublikasi Qonuni va Vazirlar Mahkamasining 1993-yil 25-maydagi 247-son qaroriga muvofiq olib borsin.

7. Oʻzbekiston Respublikasi Markaziy bankiga 1994-1995-yillarda Tashqi ishlar vazirligi uchun Diplomatik korpusga xizmat koʻrsatish maqsadidagi obyektlarni rekonstruksiya qilish va jihozlashga oid ishlarni pul bilan taʼminlash maqsadida imtiyozli kredit ajratish tavsiya etilsin.

8. Tashqi ishlar vazirligi obyektlarini qurish, rekonstruksiya qilish va tuzatish boʻyicha bosh pudratchi etib “Toshkentqurilish” davlat korporatsiyasining 159-tresti belgilansin.

9. “Oʻzbeksavdo” davlat uyushmasi va “Oʻzmaishiyxizmat” uyushmasi tashkil etilgan ixtisoslashtirilgan doʻkonni va ijtimoiy-maishiy xizmat koʻrsatish obyektlarini zarur asbob-uskunalar, malakali kadrlar bilan butlashda va ularning ishini tashkil etishda koʻmaklashsinlar.

10. Oʻzbekiston Respublikasi Mudofaa vazirligi Qizilobod koʻchasi, 20-uydagi garajni Tashqi ishlar vazirligi balansiga bersin.

11. Oʻzbekiston Respublikasida akkreditatsiya qilingan diplomatik va ularga tenglashtirilgan vakolatxonalarda ishlovchi Oʻzbekiston Respublikasi fuqarolarining maqomi toʻgʻrisida ilova qilinayotgan Vaqtinchalik nizom tasdiqlansin.

12. “Oʻzistiqbolstat” davlat qoʻmitasi va Oʻzbekiston Respublikasi Moliya vazirligi 1994-1995-yillarda chet el Diplomatik vakolatxonalarni joylashtirish uchun moʻljallangan obyektlarni rekonstruksiya qilish va asosli tuzatish maqsadida markazlashtirilgan sarmoya mablagʻlari ajratishni nazarda tutsinlar.

13. Mazkur qarorning bajarilishini nazorat qilish Bosh vazir oʻrinbosarlari K.N. Toʻlaganov, U.T. Sultonov va B.S. Hamidovga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 7-fevral,

56-son

Vazirlar Mahkamasining 1994-yil 7-fevraldagi 56-son qarori bilan TASDIQLANGAN

Oʻzbekiston Respublikasida akkreditatsiya qilingan diplomatik va ularga tenglashtirilgan vakolatxonalarda ishlovchi Oʻzbekiston Respublikasi fuqarolarining maqomi haqida

VAQTINCHALIK NIZOM

1. Ushbu Nizom diplomatik va ularga tenglashtirilgan vakolatxonalarda maʼmuriy-texnik xodimlar sifatida ishlovchi Oʻzbekiston Respublikasi fuqarolarining maqomini belgilaydi.

Chet el vakolatxonalarida diplomatik lavozimlarda ishlovchi Oʻzbekiston Respublikasi fuqarolari “Diplomatik aloqalar haqida”gi 1961-yil Vena Konvensiyasi va “Konsullik aloqalari haqida”gi 1963-yil Vena Konvensiyasiga muvofiq imtiyozlar va daxlsizlik (immunitet)lardan foydalanadilar.

2. Oʻzbekiston Respublikasi fuqarolari vakolatxonaning diplomatik, maʼmuriy-texnik xodimlari tarkibiga akkreditatsiya qilinayotgan davlatning albatta roziligi bilan qabul qilingan kundan boshlab chet el vakolatxonasi xodimi maqomini oladilar.

3. Diplomatik va ularga tenglashtirilgan vakolatxonalardagi ishga rasmiylashtirish zimmasiga chet el vakolatxonalarining samarali faoliyat koʻrsatishi uchun lozim shart-sharoitlar yaratib berish vazifasi yuklatilgan Oʻzbekiston Respublikasi Tashqi ishlar vazirligining Diplomatik servis xizmati orqali amalga oshiriladi.

4. Maʼmuriy-texnik, xizmat koʻrsatuvchi xodimlar qatoriga yoki xususiy uy xizmatchisi sifatida ishga qabul qilingan Oʻzbekiston Respublikasi fuqarolarining mehnat sharoitlari Oʻzbekiston Respublikasining mehnat haqidagi qonuni va ushbu Nizomga muvofiq shartnoma bilan belgilanadi.

5. Oʻzbekiston Respublikasi fuqarolarini chet el vakolatxonalariga ishga qabul qilish Oʻzbekiston Respublikasining mehnat haqidagi amaldagi qonuniga zid boʻlmagan mehnat munosabatlarining oʻzaro maʼqullangan shartlari oldindan kelishilgan, maʼlum muddatga xodim va chet el vakolatxonasining boshligʻi oʻrtasida tuzilgan yozma ravishdagi mehnat shartnomasi (kontrakti) bilan rasmiylashtiriladi.

6. Oʻzbekiston Respublikasi fuqarolarining mehnat daftarchalarini yuritish, ishga qabul qilish yoki ishdan boʻshatishni rasmiylashtirish haqidagi tegishli buyruqlarni chiqarish, ularning mehnat huquqlarini himoya qilish Oʻzbekiston Respublikasi Tashqi ishlar vazirligi Diplomatik servis xizmati tomonidan amalga oshiriladi.

7. Mehnat shartnomasi (kontrakti) tomonlardan har birining talabiga koʻra bekor qilinishi mumkin. Shartnoma chet el vakolatxonasi tashabbusi bilan bekor qilingan taqdirda ishdan boʻshatilgan xodimga ishdan boʻshaganda beriladigan pul Oʻzbekiston Respublikasining qonuni bilan belgilangan tartibda va miqdorda toʻlanadi.

Shartnoma chet el vakolatxonasi xodimi tashabbusi bilan bekor qilingan taqdirda ishdan boʻshaganda beriladigan pul unga, agar bunday bekor qilish vakolatxonaning shartnoma boʻyicha oʻz zimmasiga olgan majburiyatlarini bajarmaganligi tufayli kelib chiqqan boʻlsa, toʻlanadi.

8. Diplomatik va ularga tenglashtirilgan chet el vakolatxonalari oʻzlarida ishlayotgan Oʻzbekiston Respublikasi fuqarolari jumlasidan boʻlgan mutaxassislar uchun tegishli fondlarga Oʻzbekiston Respublikasi qonunlari bilan nazarda tutilgan holda belgilangan tartibga muvofiq badallarni oʻtkazadilar.

9. Chet el vakolatxonalarida ishlovchi Oʻzbekiston Respublikasi fuqarolariga soliq solish Oʻzbekiston Respublikasi fuqarolaridan olinadigan soliqlar haqidagi qonunga muvofiq umumiy asoslarda amalga oshiriladi.

10. Chet el vakolatxonalarida ishlovchi Oʻzbekiston Respublikasi fuqarolari qonunga xilof ravishda xatti-harakat qilganlari uchun Oʻzbekiston Respublikasining amaldagi qonunlariga muvofiq umumiy asoslarda javobgarlikka tortiladilar.

11. Diplomatik va boshqa ularga tenglashtirilgan chet el vakolatxonalarida ishlash uchun qabul qilingan Oʻzbekiston Respublikasi fuqarolari:

muddati shartnoma tuzgan tomonlar kelishuvi boʻyicha belgilangan, ammo haftasiga 40 soatdan oshmaydigan normalangan ish vaqti;

shartnomaga muvofiq belgilangan mehnat haqi stavkasi;

har yilgi pul toʻlanadigan taʼtillarga va yakshanba, bayram kunlarida dam olish. Bayram va dam olish kunlarida, shuningdek, ishdan tashqari vaqtda ishlanganligi uchun haq toʻlash chet el vakolatxonasi tomonidan tuzilgan shartnoma shartlariga muvofiq amalga oshiriladi;

Oʻzbekiston Respublikasi qonunlarida koʻzda tutilgan vaqtinchalik ishga yaroqsizligi uchun nafaqa va ijtimoiy sugʻurta boʻyicha boshqa nafaqalar olish;

Oʻzbekiston Respublikasi qonuni bilan ularga berilgan boshqa huquqlardan foydalanish huquqiga egadirlar.

12. Chet el vakolatxonasiga ishga qabul qilingan Oʻzbekiston Respublikasi fuqarolari:

oʻz vazifalarini tegishli ravishda va mehnat shartnomasi (kontrakt)da aytilgan shartlarga muvofiq bajarishga;

chet el vakolatxonasiga foydalanish uchun berilgan hududlar va binolarda akkreditatsiya qiluvchi davlat tomonidan belgilangan mehnat intizomi, oʻzini tutish qoidalari, tartib va boshqa normalarga amal qilishga;

chet el vakolatxonasida ishlagan vaqtida olgan xoh valyutadagi, xoh mahalliy pul birligidagi daromadlardan Oʻzbekiston Respublikasi qonunlari bilan belgilangan tartibda soliqlar toʻlashga;

zimmasiga yuklangan vazifalarni bajarish uchun xodimga topshirilgan chet el vakolatxonasining mulki va moddiy boyliklaridan ehtiyotkorlik bilan foydalanishga;

Oʻzbekiston Respublikasi davlat manfaatlariga siyosiy yoki moddiy zarar yetkazishga koʻmaklashuvchi xatti-harakatlarga yoxud loqaydlikka yoʻl qoʻymaslikka majburdirlar.