Bolalarning maktabgacha tarbiya muassasalarida boʻlishlari uchun ota-onalardan olinadigan haq miqdorlari toʻgʻrisida (374-son)

20.07.1994

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

1. 1994-yil 1-avgustdan boshlab bolaning respublika davlat budjetidan mablagʻ bilan taʼminlanadigan bolalar yaslisi, bolalar bogʻchasi yoki yasli-bogʻchada boʻlganligi uchun bir oyga toʻlanadigan haq miqdorini ish tartibiga muvofiq Oʻzbekiston Respublikasida belgilangan eng kam ish haqining oʻrtacha 25 foizi miqdorida belgilansin.

2. Oʻz tasarrufida bolalar maktabgacha tarbiya muassasalari boʻlgan korxonalar, tashkilotlar, muassasalarga bolalarning ularda boʻlishlari uchun ota-onalarning haq toʻlashini davlat budjetidan mablagʻ bilan taʼminlanadigan bolalar maktabgacha tarbiya muassasalarida qabul qilingandek tartibda belgilash tavsiya qilinsin.

Korxonalar, tashkilotlar va muassasalar oʻz mablagʻlari hisobidan oʻzlariga qarashli bolalar maktabgacha tarbiya muassasalarida bolalarning boʻlishi uchun ota-onalardan haq undirish boʻyicha qoʻshimcha imtiyozlar belgilashlari mumkin.

3. Oʻzbekiston Respublikasi Xalq taʼlimi vazirligi Moliya vazirligi va Mehnat vazirligi bilan kelishgan holda bir hafta muddatda bolalarning maktabgacha tarbiya muassasalarida boʻlishlari uchun haq undirish tartibi toʻgʻrisidagi yoʻriqnomani ishlab chiqsin va tasdiqlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M. Q. Qoraboyev zimmasiga yuklansin.

Oʻzbekiston Respublikasining Bosh vaziri A. MUTALOV

Toshkent sh.,

1994-yil 20-iyul,

374-son