Davlat mulki jamgʻarmasini tashkil qilish toʻgʻrisida (PF-471-son)

07.09.1992

Oʻzbekiston Respublikasi Prezidentining

Farmoni

“Davlat tasarrufidan chiqarish va xususiylashtirish toʻgʻrisida” Oʻzbekiston Respublikasining Qonuniga muvofiq hamda davlat tasarrufidan chiqarish va xususiylashtirish, bozor munosabatlarini shakllantirish jarayonida respublikaning mulkiy huquqlari va davlat manfaatlarini taʼminlash, shuningdek davlat korxonalari va tashkilotlarini boshqa xil mulkchilik shakllariga aylantirishdan tushadigan mablagʻlarni ustuvor umumdavlat vazifalarini hal etish va aholini ijtimoiy muhofaza qilishga safarbar etish maqsadida:

1. Oʻzbekiston Respublikasining Moliya vazirligi huzurida Davlat mulki jamgʻarmasi (“Oʻzdavjamgʻarma”) tashkil etilib, unga davlat boshqaruvi organi huquqlari berilsin.

2. Qoraqalpogʻiston Respublikasining Moliya vazirligi, viloyatlar va Toshkent shahar moliya boshqarmalari huzurida “Oʻzdavjamgʻarma”ning hududiy boʻlimlari tuzilsin.

3. Davlat mulki jamgʻarmasining zimmasiga quyidagi vazifalar yuklansin:

davlatning mulkiy huquqlari va manfaatlarini himoya qilish;

hissadorlik jamiyatlari, boshqa xoʻjalik jamiyatlari va shirkatlarining sarmoyasida davlatga tegishli ulush (pay, hissalar)ga egalik qilish vazifalarini, shuningdek Oʻzbekiston Respublikasining Davlat mulkini boshqarish va xususiylashtirish komiteti unga topshirgan davlat korxonalari va tashkilotlarini ijaraga berish toʻgʻrisidagi shartnomalarni amalga oshirish;

hissador (paychilar)ning umumiy yigʻilishlarida, jamiyatlar hamda shirkatlarning kengashlari va boshqaruvlarida mulk egasi boʻlmish davlatning vakolatlarini roʻyobga chiqarish;

oʻziga ishonib topshirilgan Davlat mulkidan samarali foydalanishi uchun javobgarlik;

davlat mulki inshootlarini davlat tasarrufidan chiqarish va xususiylashtirishdan, davlat korxonalari va tashkilotlarini ijaraga olish uchun toʻlanadigan haqdan, davlat yangi taʼsis etadigan hissadorlik jamiyatlarining aksiyalarini sotishdan olinadigan daromadlardan tushadigan mablagʻlarni jamlash;

davlat korxonalari va tashkilotlarini ijaraga topshirish, jamoa yoki ijarachi sotib olishi, ularni sotish, hissadorlik jamiyatiga, boshqa xoʻjalik jamiyatlari va shirkatlariga aylantirish chogʻida ulardagi mulkning qiymatiga baho beruvchi maxsus komissiyalarning ishida qatnashish.

4. Davlat mulki jamgʻarmasiga quyidagi huquqlar berilsin:

davlatga tegishli ulushlar (pay, hissalar) boʻyicha boshqarish huquqini davlat boshqaruvining oʻzga organlariga, konsernlar, assotsiatsiyalar, korporatsiyalar, uyushmalarga va boshqa xoʻjalik assotsiatsiyalariga berib qoʻyish;

hissadorlik jamiyatlarini rivojlantirish va ijtimoiy muammolarni hal qilish uchun davlatga tegishli hissalardan olinadigan foydaning qismini shartnoma asosida ana shu jamiyatlarga topshirish;

hissadorlik jamiyatlarining, boshqa xoʻjalik jamiyatlari, shirkatlarning hissalari (paylari)ni sotib olish;

Hukumatning yoki u vakil qilgan organning qaroriga binoan davlatga tegishli hissalarni sotish, shuningdek ularni davlat tasarrufidan chiqarish va xususiylashtirishga oid maxsus jamgʻarmalarning, xolding kompaniyalari hissalariga almashtirish ishlarini amalga oshirish.

5. Oʻzbekiston Respublikasining Moliya vazirligi davlat mulkini davlat tasarrufidan chiqarish va xususiylashtirishdan tushadigan mablagʻlarni jamlash uchun maxsus hisob raqami ochib, ularni respublika va mahalliy budjetlarning daromadlarida alohida modda qilib ajratib qoʻysin hamda davlat manfaatlari va aholini ijtimoiy muhofaza qilish manfaatlari yoʻlida ulardan samarali foydalanishni taʼminlasin.

6. Oʻzbekiston Respublikasining Prezidenti huzuridagi Vazirlar Mahkamasi bir oy muddat ichida Oʻzbekiston Respublikasining Moliya vazirligi huzuridagi Davlat mulki jamgʻarmasi faoliyatini tashkil etish toʻgʻrisida qaror qabul qilib, u haqdagi Nizomni tasdiqlasin.

Oʻzbekiston Respublikasining Prezidenti I. KARIMOV

Toshkent sh.,

1992-yil 7-sentabr,

PF-471-son