48-modda. Davlat mulki reyestrini shakllantirish bosqichlari

Davlat mulki reyestri yagona markazlashtirilgan elektron axborot maʼlumotlar bazasi shaklida yuritiladi.

Davlat mulki oʻziga biriktirilgan (shu jumladan egalik qilish, foydalanish huquqi asosida yoki boshqacha tartibda biriktirilgan) yuridik shaxslar qonunchilikda belgilangan tartibda ushbu mulkning idoraviy hisobi yuritilishini, uning inventarizatsiya qilinishini hamda qayta baholanishini taʼminlaydi. Bunda davlat mulkining idoraviy hisobini yuritish davlat mulkining haqiqatda mavjudligini aniqlashga, shuningdek hisobga olinmagan davlat mulkini aniqlashga hamda keyinchalik uni tegishli davlat mulkini boshqarish subyektiga biriktirishga qaratilgan boʻlishi kerak.

Davlat mulki oʻziga biriktirilgan yuridik shaxslar ushbu Qonunning 47-moddasida nazarda tutilgan davlat mulki toʻgʻrisidagi maʼlumotlarni har chorakda elektron axborot tizimi orqali Agentlikka taqdim etadi.

Davlat mulki reyestrini shakllantirishda Agentlik quyidagi tashkilotlarning davlat mulki toʻgʻrisidagi dastlabki maʼlumotlaridan foydalanadi:

aksiyadorlik jamiyatlarining ustav fondlaridagi (ustav kapitallaridagi) davlat ulushi boʻyicha — Qimmatli qogʻozlar markaziy depozitariysi aksiyadorlik jamiyatining;

masʼuliyati cheklangan jamiyatlarning ustav fondlaridagi (ustav kapitallaridagi) davlat ulushi, davlat muassasalari, shuningdek davlat mulki boʻlgan intellektual mulk obyektlari boʻyicha — Oʻzbekiston Respublikasi Adliya vazirligining;

davlat mulki boʻlgan koʻchmas mulk obyektlari boʻyicha — Oʻzbekiston Respublikasi Iqtisodiyot va moliya vazirligi huzuridagi Kadastr agentligining;

davlat mulki boʻlgan moddiy madaniy meros obyektlari boʻyicha — Oʻzbekiston Respublikasi Madaniy meros agentligining;

davlat mulki boʻlgan avtotransport vositalari boʻyicha — Oʻzbekiston Respublikasi Ichki ishlar vazirligining.