Oʻzbekiston Respublikasi temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi faoliyatini takomillashtirish chora-tadbirlari toʻgʻrisida (101-son)

02.03.2004

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Respublika davlat boshqaruvi organlari faoliyatini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish yuzasidan hamda Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasini boshqarish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi (“Oʻzdavtemiryoʻlnazorat” inspeksiyasi)ning asosiy vazifalari etib belgilansin:

Oʻzbekiston Respublikasi temir yoʻl transportida yuk va yoʻlovchilar tashish xavfsizligi taʼminlanishi ustidan davlat nazoratini amalga oshirish;

temir yoʻllarda yuk va yoʻlovchilar tashish xavfsizligini taʼminlashga yoʻnaltirilgan kompleks oldini olish chora-tadbirlarini ishlab chiqish, tasdiqlash va ularning bajarilishini nazorat qilish;

temir yoʻl transporti sohasidagi faoliyatni litsenziyalash;

Oʻzbekiston Respublikasi temir yoʻllaridan foydalanish boʻyicha normativ hujjatlarni ishlab chiqish, tasdiqlash va ularning bajarilishini nazorat qilish;

loyihalarni ekspertizadan oʻtkazishda va temir yoʻl transporti obyektlarini, mahsulotlarini va texnologiyalarini ularning belgilangan talablarga muvofiqligi jihatidan doimiy yoki vaqtinchalik foydalanishga qabul qilish ishlarida qatnashish.

2. Quyidagilar:

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi va uning xodimlarining cheklangan umumiy soni 48 nafar, shu jumladan boshqaruv xodimlari 35 nafar boʻlgan markaziy apparati tuzilmasi 1 va 2-ilovaga muvofiq;

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasining mintaqaviy filiali tuzilmasi 3-ilovaga muvofiq;

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi toʻgʻrisidagi nizom 4-ilovaga muvofiq tasdiqlansin.

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi boshligʻiga “Oʻzdavtemiryoʻlnazorat” inspeksiyasi tuzilmasiga xodimlarning belgilangan cheklangan soni va taʼminot xarajatlari smetasi doirasida oʻzgartirishlar kiritishga ruxsat berilsin.

3. Belgilab qoʻyilsinki, “Oʻzdavtemiryoʻlnazorat” inspeksiyasining taʼminoti:

yuridik shaxslar tomonidan temir yoʻllarda yuk va yoʻlovchilar tashishdan olinadigan 0,15 foiz miqdoridagi majburiy toʻlovlar;

temir yoʻl transportida yuk va yoʻlovchilar tashish faoliyatini amalga oshirish huquqiga litsenziya berish toʻgʻrisidagi arizani koʻrib chiqqanlik uchun yigʻim mablagʻlari hisobiga amalga oshiriladi.

4. Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi joylashgan Toshkent shahri, Turkiston koʻchasi, 7-uydagi bino uning tasarrufida saqlab qolinsin.

5. Quyidagilar:

Vazirlar Mahkamasining “Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi faoliyatini tashkil etish toʻgʻrisida” 2001-yil 3-martdagi 109-son qarori;

Vazirlar Mahkamasining “Transport sohasidagi faoliyatning ayrim turlarini litsenziyalash toʻgʻrisidagi nizomlarni tasdiqlash haqida” 2003-yil 21-avgustdagi 360-son qaroriga 9-ilova II boʻlimining 4-bandi;

Vazirlar Mahkamasining “Oʻzbekiston Respublikasi Hukumatining ayrim qarorlariga qoʻshimcha va oʻzgartirishlar kiritish toʻgʻrisida” 2002-yil 1-maydagi 150-son qaroriga ilovaning 12-bandi oʻz kuchini yoʻqotgan deb hisoblansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.F. Fayzullayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 2-mart,

101-son

Vazirlar Mahkamasining 2004-yil 2-martdagi 101-son qaroriga 1-ILOVA

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi (“Oʻzdavtemiryoʻlnazorat” inspeksiyasi)ning tuzilmasi

Vazirlar Mahkamasining 2004-yil 2-martdagi 101-son qaroriga 2-ILOVA

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi (“Oʻzdavtemiryoʻlnazorat” inspeksiyasi) markaziy apparatining tuzilmasi

Vazirlar Mahkamasining 2004-yil 2-martdagi 101-son qaroriga 3-ILOVA

Oʻzbekiston Respublikasi Temir yoʻllarida yuk va yoʻlovchilar tashish xavfsizligini nazorat qilish davlat inspeksiyasi mintaqaviy filialining

NAMUNAVIY TUZILMASI

*‎‎‎‎‎ Toshkent mintaqaviy filialida‎

Vazirlar Mahkamasining 2004-yil 2-martdagi 101-son qaroriga 4-ILOVA

Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi (“Oʻzdavtemiryoʻlnazorat” inspeksiyasi) toʻgʻrisida

NIZOM

I. Umumiy qoidalar

1. Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi (keyingi oʻrinlarda matnda “Oʻzdavtemiryoʻlnazorat” inspeksiyasi deb yuritiladi) davlat nazoratini amalga oshirish sohasidagi maxsus vakolatli davlat organi hisoblanadi, u poyezdlar harakati xavfsizligini taʼminlash sohasida chora-tadbirlar ishlab chiqish, ularni amalga oshirish va muvofiqlashtirish hamda yuk va yoʻlovchilar tashish xavfsizligini taʼminlashga oid belgilangan qoidalar va normalarga tegishli vazirliklar, idoralar, korxonalar va tashkilotlar tomonidan rioya etilishini, shuningdek, “Oʻzbekiston temir yoʻllari” davlat-aksiyadorlik kompaniyasi va transport qurilishi korxonalarida qozonxonalar va koʻtarish inshootlaridan xavf-xatarsiz foydalanilishini nazorat qiluvchi Oʻzbekiston Respublikasining temir yoʻl maʼmuriyati funksiyalarini amalga oshiradi.

2. “Oʻzdavtemiryoʻlnazorat” inspeksiyasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining qarorlariga va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda mazkur Nizomga amal qiladi.

3. Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi tizimiga hududiy filiallar — Toshkent, Fargʻona, Buxoro, Orolboʻyi va Qashqadaryo filiallari hamda Atrof muhit muhofazasi boʻyicha temir yoʻl ilmiy-ishlab chiqarish markazi kiradi.

4. Oʻzbekiston Respublikasi Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasi oʻz faoliyatini davlat boshqaruvi boshqa organlari, huquqni muhofaza qiluvchi organlar, mahalliy davlat hokimiyati organlari, jamoat birlashmalari va tashkilotlari bilan oʻzaro hamkorlikda olib boradi.

5. “Oʻzdavtemiryoʻlnazorat” inspeksiyasining oʻz vakolatlariga tegishli masalalar boʻyicha qabul qilgan qarorlari vazirliklar, idoralar, korxonalar, muassasalar va tashkilotlar, temir yoʻl transporti xizmatlari koʻrsatuvchi yoki ulardan foydalanuvchi yuridik va jismoniy shaxslar tomonidan bajarilishi majburiy hisoblanadi.

6. “Oʻzdavtemiryoʻlnazorat” inspeksiyasi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan, oʻz nomi yozilgan muhrga ega boʻladi.

II. “Oʻzdavtemiryoʻlnazorat” inspeksiyasining vazifalari va funksiyalari

7. Quyidagilar “Oʻzdavtemiryoʻlnazorat” inspeksiyasining asosiy vazifalari hisoblanadi:

Oʻzbekiston Respublikasi temir yoʻl transportida yuk va yoʻlovchilar tashish xavfsizligi taʼminlanishi ustidan davlat nazoratini amalga oshirish;

temir yoʻl transporti sohasidagi faoliyat litsenziyalanishini tashkil etish;

temir yoʻllarda yuk va yoʻlovchilar tashish xavfsizligini taʼminlashga yoʻnaltirilgan oldini olish chora-tadbirlarini ishlab chiqish va ularning bajarilishini nazorat qilish;

Oʻzbekiston Respublikasi temir yoʻllaridan texnik foydalanish boʻyicha normativ hujjatlarni ishlab chiqish, tasdiqlash va ularning bajarilishini nazorat qilish;

loyihalarni ekspertizadan oʻtkazishda va temir yoʻl transporti obyektlarini, mahsulotlarini va texnologiyalarini, ularning belgilangan talablarga muvofiqligi jihatidan, doimiy yoki vaqtinchalik foydalanishga qabul qilish ishlarida qatnashish;

vazirliklar, idoralar, muassasalar, korxonalar va tashkilotlarning oʻz faoliyatini temir yoʻl transporti sohasida amalga oshiruvchi xodimlarining texnik foydalanish qoidalarini va yoʻriqnomalarni bilishini komissiya tuzib tekshirish;

temir yoʻllarda yuk va yoʻlovchilar tashish xavfsizligini taʼminlash masalalarida xorijiy davlatlar va xalqaro tashkilotlar bilan xalqaro hamkorlik qilish.

8. “Oʻzdavtemiryoʻlnazorat” inspeksiyasi oʻziga yuklangan vazifalarga muvofiq quyidagi funksiyalarni bajaradi:

tegishli vazirliklar, idoralar, korxonalar, muassasalar va tashkilotlar tomonidan Oʻzbekiston Respublikasida amalda boʻlgan Oʻzbekiston Respublikasi temir yoʻllarida texnik foydalanish qoidalariga, poyezdlar harakati va manevr ishlari yoʻriqnomasiga, signalizatsiya va aloqa yoʻriqnomasiga, shuningdek, temir yoʻl transporti texnika vositalarining avariyasiz ishlashini tartibga soluvchi boshqa yoʻriqnomalar va normativ hujjatlarga rioya qilinishi ustidan davlat nazoratini olib borish;

temir yoʻl transportida yuk va yoʻlovchilar tashish boʻyicha faoliyatni litsenziyalashni tashkil etish;

tegishli vazirliklar, idoralar, korxonalar, muassasalar va tashkilotlar tomonidan poyezdlar harakati xavfsizligini taʼminlashga va temir yoʻl transportida yuk va yoʻlovchilar tashish xavfsizligini taʼminlovchi texnik vositalarning ishonchliligini oshirishga qaratilgan oldini olish tadbirlari ishlab chiqilishi va belgilangan muddatlarda amalga oshirilishi ustidan davlat nazoratini olib borish;

temir yoʻl transporti sohasida yuk va yoʻlovchilar tashish xavfsizligini taʼminlash boʻyicha normativ-huquqiy hujjatlarni ishlab chiqish, tasdiqlash va ularning vazirliklar, idoralar, korxonalar, muassasalar va tashkilotlar tomonidan bajarilishini belgilangan tartibda nazorat qilish;

loyihalarni ekspertizadan oʻtkazish va obyektlarni, mahsulotlarni va texnologiyalarni, ularning temir yoʻl transporti sohasidagi belgilangan talablarga muvofiqligi jihatidan, foydalanishga qabul qilish ishlarini amalga oshirish;

“Oʻzbekiston temir yoʻllari” davlat-aksiyadorlik kompaniyasining lavozimga yangidan tayinlanayotgan xodimlarining, shuningdek, vazirliklar, idoralar, muassasalar, korxonalar va tashkilotlarning oʻz faoliyatini temir yoʻl transporti sohasida amalga oshiruvchi xodimlarining texnik foydalanish qoidalarini va yoʻriqnomalarni bilishini belgilangan tartibda komissiya tuzib, vaqti-vaqti bilan tekshirish;

Oʻzbekiston Respublikasi hududida yuz bergan favqulodda hodisalar (avariya, halokat)ga oid xizmat tekshiruvlari oʻtkazilishida ishtirok etish hamda MDHning boshqa mamlakatlari va xorijiy mamlakatlar hududida yoʻlovchi tashish poyezdlari bilan boʻlgan temir yoʻl hodisalariga oid xizmat tekshiruvini oʻtkazishda belgilangan tartibda ishtirok etish;

vazirliklar, idoralar, muassasalar va tashkilotlar tomonidan oʻtkazilayotgan poyezdlar harakati xavfsizligi talablari buzilishining xizmat tekshiruvlari toʻgʻriligini nazorat qilish;

vazirliklar, idoralar, korxonalar, muassasalar va tashkilotlar tomonidan poyezdlar harakati xavfsizligi talablari buzilishi hisobini yuritish hamda tahlil qilish;

Oʻzbekiston Respublikasi hududida harakat xavfsizligi talablarini buzish hollarini hamda ularning sabablarini tasniflash va ular yuzasidan xizmat tekshiruvi oʻtkazish tartibi boʻyicha normativ hujjatlarni ishlab chiqish va tasdiqlash;

temir yoʻl transporti obyektlarini tayyorlovchi, quruvchi va ulardan foydalanuvchi korxonalar va tashkilotlarning poyezdlar xavf-xatarsiz harakatlanishini taʼminlash yuzasidan ishlarini texnik tekshirishni tashkil etish va belgilangan tartibda oʻtkazish;

temir yoʻl transportida xavfli yuklar, qurol-yarogʻlar, harbiy texnika, harbiy mol-mulk, portlovchi moddalar va buyumlar, shuningdek, harbiy kontingentlarni tranzit tashishda xulosalar berish;

“Oʻzbekiston temir yoʻllari” davlat-aksiyadorlik kompaniyasi hamda transport qurilishi korxonalarida qozonxona obyektlari va koʻtarish inshootlarini saqlash va ulardan xavf-xatarsiz foydalanish boʻyicha qoidalar va yoʻriqnomalar, normativ hujjatlarga rioya etilishini nazorat qilish.

temir yoʻl transporti sohasida tashuvchilarning yoʻlovchilar hayoti, sogʻligʻi va (yoki) mol-mulkiga zarar yetkazganlik uchun qonunda belgilangan oʻz fuqarolik javobgarligini majburiy sugʻurta qilish boʻyicha majburiyati bajarilishini nazorat qilish;

“Oʻzdavtemiryoʻlnazorat” inspeksiyasi oʻziga yuklangan vazifalar va funksiyalarni bevosita, shuningdek, oʻziga qarashli hududiy filiallar orqali hal qiladi.

III. “Oʻzdavtemiryoʻlnazorat” inspeksiyasining huquqlari va javobgarligi

9. “Oʻzdavtemiryoʻlnazorat” inspeksiyasi oʻziga yuklangan vazifalar va funksiyalarni bajarish uchun quyidagi huquqlarga ega:

temir yoʻl transporti sohasida harakat xavfsizligini taʼminlash boʻyicha normativ-huquqiy hujjatlarning bajarilishini belgilangan tartibda nazorat qilish;

davlat nazoratini amalga oshirish bilan bogʻliq qoidalar, yoʻriqnomalar, nizomlar va boshqa normativ-huquqiy hujjatlarni belgilangan tartibda tasdiqlash;

oʻz faoliyatini temir yoʻl transporti sohasida amalga oshiruvchi vazirliklar va idoralar, muassasalar va tashkilotlarning korxonalari obyektlarini belgilangan tartibda tekshirish;

harakatlanadigan tarkibni va temir yoʻl transporti sohasidagi boshqa texnik vositalarni yaratish (qurish), sinab koʻrish, seriyali ishlab chiqarish, foydalanishga qabul qilishda qatnashish;

tegishli vazirliklar, idoralar, korxonalar, tashkilotlardan hujjatlarni, tadbirlar rejalarini talab qilib olish, shuningdek, temir yoʻllarda yuk va yoʻlovchilar tashish xavfsizligini taʼminlash bilan bogʻliq masalalar boʻyicha, shu jumladan, yuk va yoʻlovchilar tashish xavfsizligi qoidalari buzilishi hollarini tekshirish masalalari boʻyicha hisobotlarni eshitish;

temir yoʻllarda yuk va yoʻlovchilar tashish xavfsizligini taʼminlash masalalari boʻyicha qoidalar, yoʻriqnomalar, buyruqlar va koʻrsatmalarni buzayotgan shaxslarga nisbatan Oʻzbekiston Respublikasining amaldagi qonun hujjatlariga muvofiq choralar koʻrish;

temir yoʻl transporti texnika vositalaridan foydalanishni va ishlarni amalga oshirishni toʻxtatib turish, odamlarning hayoti va salomatligiga, yuk va yoʻlovchilar tashish xavfsizligiga xavf soluvchi nosozliklar tufayli peregonlarda, stansiyalarda va kirish yoʻllarida poyezdlar harakatini toʻxtatish yoki harakat tezligini cheklash toʻgʻrisida koʻrsatmalar berish;

lokomotivlar, motor vagonli harakatdagi sostav, vagonlar, yoʻllar va oʻtkazish stryelkalari, signalizatsiya va aloqa qurilmalari, bogʻlanish tarmoqlari sifatsiz taʼmirlangan hollarda ularni tuzatishdan chiqarishni taqiqlash;

lokomotivlar, vagonlar, yoʻllar, signalizatsiya va aloqa hamda elektr taʼminoti tizimlari va temir yoʻl transportining boshqa texnika vositalarining belgilangan tartib buzilgan holda oʻtkazilgan komissiya tekshiruvlari natijalarini bekor qilish;

poyezdlar harakati xavfsizligi talablari va standartlar buzilishi hollari boʻyicha materiallarni belgilangan tartibda tegishli organlarga berish;

temir yoʻl transporti sohasida tashuvchilarning yoʻlovchilar hayoti, sogʻligʻi va (yoki) mol-mulkiga zarar yetkazganlik uchun qonunda belgilangan oʻz fuqarolik javobgarligini majburiy sugʻurta qilish boʻyicha majburiyati bajarilmaganligi uchun aybdor shaxslarni qonun hujjatlarida nazarda tutilgan javobgarlikka tortish haqida sud organlariga taqdimnomalar kiritish;

tegishli vazirliklar, idoralar, shuningdek tashkilotlar va korxonalarga (ayni paytda ushbu tashkilotlar va korxonalar tizimiga kiruvchi vazirliklar va idoralarni xabardor qilgan holda) oʻz vakolatiga kiruvchi masalalar boʻyicha poyezdlar harakati xavfsizligini taʼminlash yuzasidan ishlardagi aniqlangan buzilishlar va kamchiliklarni bartaraf etish haqida koʻriladigan chora-tadbirlar toʻgʻrisida axborot taqdim etish muddatini belgilagan holda bajarilishi majburiy boʻlgan yozma koʻrsatmalar berish;

tegishli vazirliklar, idoralar, muassasalar va tashkilotlar bilan kelishgan holda ularning vakillarini, shuningdek ularga boʻysunuvchi korxonalar, muassasalar va tashkilotlarning malakali mutaxassislarini favqulodda hodisalarga oid xizmat tekshiruvini oʻtkazishda ishtirok etish, favqulodda hodisalarga oid xizmat tekshiruvini oʻtkazish bilan bogʻliq masalalar boʻyicha ekspertizalar oʻtkazish va texnikaviy maslahatlashish uchun jalb qilish;

poyezdlar harakati, yuk va yoʻlovchilar tashish xavfsizligini taʼminlash sohasidagi faoliyatni amalga oshirish va belgilangan tartibda tekshiruvlar oʻtkazish bilan bogʻliq transport, aloqa vositalari, xizmat xonalaridan, xizmat vagonining toʻsiqsiz yurishidan, shuningdek boshqa huquqlardan foydalanish;

Oʻzbekiston Respublikasi boʻylab safar qilishda lokomotivlar va poyezdlar brigadalari tarkibiga “Oʻzdavtemiryoʻlnazorat” inspeksiyasi xodimlarini belgilangan tartibda tekshiruvchilar sifatida kiritish.

“Oʻzdavtemiryoʻlnazorat” inspeksiyasi Oʻzbekiston Respublikasining qonun hujjatlariga muvofiq boshqa huquqlarga ham ega boʻlishi mumkin.

10. “Oʻzdavtemiryoʻlnazorat” inspeksiyasi oʻziga yuklangan vazifalarning va Oʻzbekiston Respublikasining qonun hujjatlariga muvofiq oʻz vakolati doirasida qabul qilingan qarorlarning bajarilishi uchun javob beradi.

“Oʻzdavtemiryoʻlnazorat” inspeksiyasi va uning hududiy filiallari mansabdor shaxslari xatti-harakatlari ustidan shikoyat qilish qonun hujjatlariga muvofiq amalga oshiriladi.

IV. “Oʻzdavtemiryoʻlnazorat” inspeksiyasi faoliyatini tashkil etish

11. “Oʻzdavtemiryoʻlnazorat” inspeksiyasiga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan boshliq rahbarlik qiladi.

Boshliqning belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan ikki nafar oʻrinbosari, shu jumladan bir nafar birinchi oʻrinbosari boʻladi.

“Oʻzdavtemiryoʻlnazorat” inspeksiyasi boshligʻi maqomiga koʻra vazirning birinchi oʻrinbosariga, “Oʻzdavtemiryoʻlnazorat” inspeksiyasi boshligʻining birinchi oʻrinbosari va oʻrinbosari tegishli ravishda vazir oʻrinbosarlariga tenglashtiriladi.

12. Oʻzbekiston Respublikasi “Oʻzdavtemiryoʻlnazorat” inspeksiyasi boshligʻi:

“Oʻzdavtemiryoʻlnazorat” inspeksiyasi faoliyatiga yakka boshchilik asosida umumiy rahbarlikni amalga oshiradi hamda unga yuklangan vazifalar va funksiyalar bajarilishi uchun shaxsan javob beradi;

markaziy apparatning tarkibiy boʻlinmalari va inspeksiyaning hududiy filiallari toʻgʻrisidagi nizomni belgilangan tartibda tasdiqlaydi;

xodimlarning belgilangan soni doirasida “Oʻzdavtemiryoʻlnazorat” inspeksiyasi tuzilmasiga oʻzgartirishlar kiritadi, shtatlar jadvalini, shuningdek, Oʻzbekiston Respublikasi Moliya vazirligi bilan kelishgan holda inspeksiyaning xarajatlari smetasini tasdiqlaydi;

markaziy apparat tarkibiy boʻlinmalari va Inspeksiyaning hududiy filiallari toʻgʻrisidagi nizomlarni belgilangan tartibda tasdiqlaydi;

“Oʻzdavtemiryoʻlnazorat” inspeksiyasi xodimlarini belgilangan tartibda lavozimga tayinlaydi va lavozimdan ozod qiladi.

Boshliq qonun hujjatlariga muvofiq boshqa vakolatlarni ham amalga oshiradi.

13. “Oʻzdavtemiryoʻlnazorat” inspeksiyasining hududiy filiallari bevosita “Oʻzdavtemiryoʻlnazorat” inspeksiyasi boshligʻiga boʻysunadi.

14. “Oʻzdavtemiryoʻlnazorat” inspeksiyasi xodimlariga belgilangan namunadagi kiyim-bosh kiyib yurishga ruxsat berilgan.

15. “Oʻzdavtemiryoʻlnazorat” inspeksiyasi xodimlariga qonun hujjatlariga muvofiq Oʻzbekiston Respublikasi temir yoʻl transportida belgilangan mehnatga haq toʻlash va imtiyozlar tizimi joriy etiladi.

16. “Oʻzdavtemiryoʻlnazorat” inspeksiyasini tugatish yoki qayta tashkil etish Oʻzbekiston Respublikasi qonun hujjatlariga muvofiq amalga oshiriladi.