Sanoat sohasida hamkorlik toʻgʻrisida

21.06.2022

Oʻzbekiston Respublikasi Hukumati bilan Ozarbayjon Respublikasi Hukumati oʻrtasida

Bitim

Oʻzbekiston Respublikasi Hukumati va Ozarbayjon Respublikasi Hukumati, keyingi oʻrinlarda “Tomonlar” deb ataluvchilar,

ikki mamlakatning sanoat, agrosanoat, ishlab chiqarish va ilmiy-texnik salohiyati imkoniyatlari, shuningdek, ularning ikki tomonlama oʻzaro manfaatli hamkorlikni rivojlantirishdagi manfaatdorliklarini inobatga olib,

tenglik va oʻzaro manfaat prinsiplari asosida sanoat sohasidagi ikki tomonlama hamkorlikning samaradorligini rivojlantirish va oshirish uchun mavjud salohiyatni eʼtirof etgan holda,

quyidagilar toʻgʻrisida kelishib oldilar:

1-modda

Mazkur Bitimning maqsadlari Tomonlarning oʻz vakolatlari doirasida va Tomonlar davlatlarining qonunchiligiga muvofiq sanoat sohasidagi hamkorlikni teng huquqlilik va oʻzaro manfaatlilik asosida mustahkamlashga koʻmaklashish va bunday hamkorlikning ustuvor yoʻnalishlarini belgilash hisoblanadi.

2-modda

Tomonlar sanoat sohasidagi hamkorlikni metallurgiya, kimyo, qurilish, farmatsevtika, neft va gaz hamda zargarlik sanoati, qishloq xoʻjaligi mahsulotlarini qayta ishlash kabi ustuvor yoʻnalishlarda va oʻzaro qiziqish uygʻotadigan boshqa sohalarda rivojlantiradilar.

3-modda

Mazkur Bitimni amalga oshirish maqsadida Tomonlar:

ishbilarmonlik va sheriklik hamkorligini tashkil etish maqsadida oʻz davlatlarining sanoat korxonalari oʻrtasida ishbilarmonlik aloqalarini oʻrnatishga koʻmaklashadilar;

Oʻzbekiston Respublikasi va Ozarbayjon Respublikasi hududida mazkur Bitimning 2-moddasida koʻrsatilib oʻtilgan yoʻnalishlar boʻyicha sanoat sohasida faoliyat olib boruvchi qoʻshma korxonalarni tashkil etishga koʻmaklashadilar;

Oʻzbekiston Respublikasi va Ozarbayjon Respublikasining sanoat sohasidagi hamkorlikni tartibga soluvchi qonunchiligi boʻyicha axborot almashadilar;

sanoatni rivojlantirishning milliy ustuvor yoʻnalishlari boʻyicha axborot almashadilar;

Tomonlar davlatlari hududidagi koʻrgazma-yarmarka tadbirlarida Oʻzbekiston Respublikasi va Ozarbayjon Respublikasining sanoat korxonalari va tegishli sohaviy uyushmalarini jalb qilishga koʻmaklashadilar;

sanoat sohasidagi hamkorlik masalalari boʻyicha konferensiya, seminar va davra suhbatlarini tashkil etishga koʻmaklashadilar.

4-modda

Mazkur Bitim doirasida Tomonlar:

a) qoʻshma chora-tadbirlar rejasi, harakatlar dasturi va mazkur Bitimni amalga oshirishga qaratilgan loyihalarni ishlab chiqadilar va amalga oshiradilar;

b) zarur boʻlganda, qoʻshma ishchi guruh tuzadilar va ikki tomonlama hamkorlikning joriy holati va uni takomillashtirish istiqbollarini muhokama qilish boʻyicha doimiy maslahatlashuvlarni oʻtkazish mexanizmini yoʻlga qoʻyadilar.

5-modda

Mazkur Bitimni talqin qilish yoki qoʻllashda kelishmovchiliklar yuzaga kelgan hollarda, Tomonlar ularni muzokaralar va maslahatlashuvlar orqali hal etadilar.

6-modda

Mazkur Bitim Tomonlarning ularning davlatlari ishtirokchisi boʻlgan boshqa xalqaro shartnomalar boʻyicha huquq va majburiyatlariga daxl qilmaydi.

7-modda

Tomonlarning oʻzaro roziligi bilan mazkur Bitimga uning ajralmas qismi boʻlgan va mazkur Bitimning 8-moddasida belgilangan tartibda kuchga kiradigan alohida bayonnomalar bilan rasmiylashtiriladigan oʻzgartirishlar va qoʻshimchalar kiritilishi mumkin.

8-modda

Mazkur Bitim uning kuchga kirishi uchun zarur boʻlgan davlat ichki protseduralarini Tomonlar bajarganligi toʻgʻrisidagi oxirgi yozma xabarnoma diplomatik kanallar orqali olingan sanadan boshlab kuchga kiradi.

Mazkur Bitim besh yil muddatga tuziladi. Mazkur Bitimning amal qilishi, basharti Tomonlardan biri uning amal qilishini tugatish niyati toʻgʻrisida tegishli muddat tugashiga olti oy qolgunga qadar boshqa Tomonni diplomatik kanallar orqali xabardor qilmasa, oʻz-oʻzidan keyingi besh yillik muddatlarga uzayaveradi.

Toshkent shahrida 2022-yil 21-iyunda, har biri oʻzbek, ozarbayjon va rus tillarida boʻlgan ikki asl nusxada tuzildi, bunda barcha matnlar teng autentikdir.

Matnlar oʻrtasida farqlar yuzaga kelgan taqdirda, Tomonlar rus tilidagi matnga murojaat qiladilar.

(imzolar)