“Maʼnaviyat va maʼrifat” jamoatchilik markazi faoliyatini yanada takomillashtirish va samaradorligini oshirish toʻgʻrisida (PF-1559-son)

09.09.1996

Oʻzbekiston Respublikasi Prezidentining

Farmoni

Jamiyatda yuksak maʼnaviy fazilatlarni kamol toptirish, milliy mafkurani shakllantirish, yoshlarni boy madaniy merosimiz, tarixiy anʼanalarimizga, umuminsoniy qadriyatlarga hurmat, Vatanga muhabbat, istiqlol gʻoyalariga sadoqat ruhida tarbiyalash mamlakatimizda amalga oshirilayotgan barcha islohotlarning hal qiluvchi omilidir.

Odamlarning oʻzliklarini chuqur anglashini, mustaqillikning qadrini tobora teran tushunishini, milliy tafakkurning kengayishi va takomillashuvini, tarixiy hurlik, mustaqillik ruhining uygʻonishini taʼminlash maʼnaviyat sohasidagi siyosatimizning asosiy maqsadiga aylanishi lozim. Ammo hanuz joylarda maʼnaviyatning mohiyatini, uning olgʻa siljishimiz, farovon jamiyatga tezroq yetishimizdagi qimmatini chuqur idrok etmaslik hollari mavjud.

Ayrim katta-kichik rahbarlar eski mustabidlik, zoʻravonlik mafkurasining sarqitlaridan haligacha qutula olmay, bu borada kechirib boʻlmaydigan oqsoqlik qilib maʼnaviyatning asl mohiyatini tushunib yetmaslik tufayli unga ikkinchi darajali ish sifatida qaramoqdalar. Maʼnaviy-maʼrifiy ishlarga boʻlgan bunday eʼtiborsizlik kelajagi buyuk demokratik, ozod davlat qurishdek ezgu maqsadimiz roʻyobi uchun mutlaqo ziddir.

Maʼnaviyat sohasida olib borayotgan ishlarimizni yanada takomillashtirish va samaradorligini oshirish maqsadida:

1. Maʼnaviy-maʼrifiy islohotlar davlat siyosatining asosiy, ustuvor yoʻnalishi deb hisoblansin.

Joylarda maʼnaviyat bilan bogʻliq ishlarning amalga oshirilishi uchun butun masʼuliyat shaxsan Qoraqalpogʻiston Respublikasi Vazirlar Kengashi raisi, viloyat, shahar va tuman hokimlari, respublikamizdagi barcha vazirliklar, idoralar, tashkilotlar birinchi rahbarlarining zimmasiga yuklansin.

Respublika “Maʼnaviyat va maʼrifat” jamoatchilik markazining joylardagi boʻlimlari ishini yanada yaxshilash maqsadida hokimliklar ularni ikki oy muddat ichida tegishli bino, zamonaviy jihozlar, transport va texnika vositalari bilan taʼminlasinlar.

2. Yoshlarimiz ongiga ona — Vatanga, buyuk ajdodlarimiz merosi va xalqimizning bugungi misli koʻrilmagan bunyodkorlik ishlariga yuksak ehtirom tuygʻularini singdirish maqsadida ularni dunyoni hayratga solgan qadimiy yodgorliklar va mustaqillik davrida bunyod etilgan ulkan inshootlar, maʼrifat maskanlari, yurtimizning goʻzal tabiati bilan muntazam tanishtirib borish uchun maxsus tanishtiruv sayohatlar tashkil etish barcha hokimlar zimmasiga yuklatilsin.

Bu maqsadda hokimliklar va “Maʼnaviyat va maʼrifat” markazi, Madaniyat ishlari vazirligi, “Oʻzbekturizm” milliy kompaniyasi, “Kamolot” yoshlar jamgʻarmasi tegishli tavsiyalarni 2 oy muddat ichida ishlab chiqsin va amalga oshirishga kirishsin.

3. Respublika “Maʼnaviyat va maʼrifat” markazi, uning Qoraqalpogʻiston Respublikasi, viloyatlar va Toshkent shahar boʻlimlarini istiqlol gʻoyalarini, milliy qadriyatlarni teran anglaydigan, fidoyi, tashkilotchi, tashabbuskor xodimlar bilan mustahkamlash uchun ularning rahbarlari shu yilning oxiriga qadar qayta sinovdan oʻtkazilsin.

4. Belgilab qoʻyilsinki, hududiy boʻlimlar rahbarlari tegishli hokimliklar tavsiyasiga binoan respublika “Maʼnaviyat va maʼrifat” markazi tomonidan tayinlanadi.

5. Yosh avlodni buyuk anʼanalarimizga, yuksak maʼnaviy qadriyatlarimizga sodiqlik va porloq kelajak egalari ekanliklariga qatʼiy ishonch ruhida tarbiyalash maqsadida 1997-yildan boshlab 1-oktabr “Oʻqituvchilar va murabbiylar” kuni deb eʼlon qilinsin hamda dam olish kuni hisoblansin.

Bu bayramda oʻtkaziladigan barcha tadbirlar oʻqituvchilar, murabbiylar, tarbiyachilar, umuman bolalar bilan ishlashga, ularning sogʻligʻini himoyalashga, jismonan va ruhan sogʻlom kamol toptirishga oʻz hayotini baxshida etgan insonlarni ulugʻlashga bagʻishlansin.

Vazirlar Mahkamasi bu borada tegishli taklifni Oliy Majlisga kiritsin.

6. Respublika “Maʼnaviyat va maʼrifat” markazi nashri “Tafakkur” jurnalini joylarda keng yoyish uchun mahalliy hokimiyatlar uning obunasiga har tomonlama yordam koʻrsatsinlar.

7. Oʻzbekiston Respublikasi Moliya vazirligi, Davlat Matbuot qoʻmitasi Markazning “Maʼnaviyat” nashriyotini tashkil etish, bu nashriyotning va “Tafakkur” jurnalining mualliflik qalam haqi miqdorlarini amaldagidan oshirish masalasini koʻrib chiqsin va hal etsin.

8. Respublika “Maʼnaviyat va maʼrifat” jamoatchilik markazi, uning joylardagi boʻlimlari, xoʻjalik hisobidagi korxonalari hamda “Tafakkur” jurnali Nizomida koʻrsatilgan maqsadlar va vazifalarga qatʼiy mos keladigan faoliyat yoʻnalishlari boʻyicha barcha turdagi soliqlardan besh yil muddatga ozod etilsin.

9. Toshkent shahar hokimi zimmasiga ikki oy muddatda Markazning asosiy binosini milliy uslubda taʼmirlash va zamonaviy jihozlash yuklatilsin.

10. Moliya vazirligi Markazga maxsus audio, video, foto va boshqa zarur texnik uskunalar xarid qilish uchun kerakli miqdorda mablagʻ ajratsin.

11. Respublika “Maʼnaviyat va maʼrifat” jamoatchilik markazi qoshida “Oltin meros” xalqaro xayriya jamgʻarmasi tuzilganligi eʼtiborga olinsin.

Ushbu Farmonda Markazga berilayotgan imtiyozlar uning “Oltin meros” jamgʻarmasiga ham taalluqli ekanligi belgilab qoʻyilsin.

Vazirlar Mahkamasi jamgʻarmani qoʻllab-quvvatlash toʻgʻrisida tegishli qaror qabul qilsin.

12. Oʻzbekiston Respublikasi Adliya vazirligi bir hafta muddatda Oʻzbekiston Respublikasining amaldagi qonun hujjatlariga zarur oʻzgartishlar kiritish toʻgʻrisidagi takliflarni ishlab chiqsin.

13. Ommaviy axborot vositalariga “Maʼnaviyat va maʼrifat” jamoatchilik markazi, uning “Oltin meros” jamgʻarmasi faoliyatini keng yoritish, doimiy maxsus ruknlar ochish tavsiya etilsin.

Oʻzbekiston teleradiokompaniyasi Markaz bilan hamkorlikda maxsus “Maʼnaviyat va maʼrifat” ijodiy guruhini tashkil qilsin, muntazam koʻrsatuvlar va eshittirishlarni yoʻlga qoʻysin.

14. Mazkur masalalarni amalga oshirish uchun tegishli idoralar vakillaridan iborat maxsus ishchi guruhi tashkil etilganligi eʼtiborga olinsin.

Oʻzbekiston Respublikasining Prezidenti I. KARIMOV

Toshkent sh.,

1996-yil 9-sentabr,

PF-1559-son

Oʻzbekiston Respublikasi Prezidentining 1996-yil 9-sentabrdagi PF-1559-sonli Farmoniga ILOVA

Ishchi guruhi roʻyxati