“Surxon” professional futbol klubi” masʼuliyati cheklangan jamiyati ustav fondidagi davlat ulushini “FC-Surhan” masʼuliyati cheklangan jamiyatiga sotish toʻgʻrisida (4-son)

06.01.2023

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2019-yil 4-dekabrdagi “Oʻzbekistonda futbolni rivojlantirishni mutlaqo yangi bosqichga olib chiqish chora-tadbirlari toʻgʻrisida”gi PF-5887-son Farmoni ijrosini taʼminlash, shuningdek, professional futbol klublari faoliyatiga xususiy investitsiyalarni jalb qilishni ragʻbatlantirish maqsadida Vazirlar Mahkamasi qaror qiladi:

1. Yoshlar siyosati va sport vazirligi, Davlat aktivlarini boshqarish agentligi, Surxondaryo viloyati hokimligi va Oʻzbekiston futbol assotsiatsiyasining “Surxon” professional futbol klubi” masʼuliyati cheklangan jamiyati ustav fondidagi davlat ulushini “FC-Surhan” masʼuliyati cheklangan jamiyatiga nominal (balans) qiymatda toʻgʻridan-toʻgʻri sotish haqidagi taklifiga rozilik berilsin.

2. Surxondaryo viloyati hokimligi:

bir hafta muddatda “Surxon” professional futbol klubi” masʼuliyati cheklangan jamiyatining oʻtgan davrdagi faoliyati yuzasidan tezkor mustaqil audit tekshiruvini oʻtkazib, aniqlangan klubning kreditor qarzdorligi 2023-yil 10-yanvarga qadar bartaraf etilishini;

bir oy muddatda “Surxon” professional futbol klubi” masʼuliyati cheklangan jamiyati ustav fondidagi davlat ulushining belgilangan tartibda “FC-Surhan” masʼuliyati cheklangan jamiyatiga nominal (balans) qiymatda berilishini taʼminlasin.

3. Vazirlar Mahkamasining 2021-yil 30-apreldagi 261-son qarori bilan tasdiqlangan Ustav kapitalidagi davlat ulushlari davlat organlari va xoʻjalik jamiyatlariga oʻtkaziladigan futbol klublari roʻyxatining 13-pozitsiyasi oʻz kuchini yoʻqotgan deb hisoblansin.

4. Davlat aktivlarini boshqarish agentligi Sport vazirligi, Oʻzbekiston futbol assotsiatsiyasi hamda boshqa manfaatdor vazirlik va idoralar bilan birgalikda professional futbol klublari ustav fondidagi davlat ulushlarini salohiyatli xususiy investorlarga sotish boʻyicha takliflarni Davlat aktivlarini xususiylashtirish va xususiylashtirish jarayonlarini muvofiqlashtirish davlat komissiyasiga kiritsin.

5. Mazkur qarorning bajarilishini nazorat qilish Bosh vazir oʻrinbosari J.A. Qoʻchqorov, yoshlar siyosati va sport vaziri A.I. Ikramov hamda Surxondaryo viloyati hokimi vazifasini bajaruvchisi U.B. Qosimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2023-yil 6-yanvar,

4-son