QMQ 2.04.03-19 “Kanalizatsiya. Tashqi tarmoqlar va inshootlar” qurilish meʼyorlari va qoidalarining 4.9-bandiga oʻzgartirish kiritish toʻgʻrisida (201-son)

22.11.2022

Oʻzbekiston Respublikasi Qurilish vazirining

Buyrugʻi

[Oʻzbekiston Respublikasi Adliya vazirligi tomonidan 2022-yil 28-noyabrda hisobga olindi, hisob raqami 118]

Oʻzbekiston Respublikasining Shaharsozlik kodeksi hamda Oʻzbekiston Respublikasi Prezidentining 2022-yil 24-maydagi PQ-257-son “Aholining ichimlik suv taʼminoti va oqova suv xizmatlari bilan taʼminlanganlik darajasini oshirish boʻyicha qoʻshimcha chora-tadbirlar toʻgʻrisida”gi qaroriga muvofiq buyuraman:

1. QMQ 2.04.03-19 “Kanalizatsiya. Tashqi tarmoqlar va inshootlar” shaharsozlik normalari va qoidalarining 4.9-bandi quyidagi tahrirda bayon etilsin:

“4.9. Oqova suv quvur oʻtkazgichlarida quyidagilar qoʻllanilishi kerak:

oʻzi oqar tarmoqlarda — bosimsiz va bosimli (asoslangan hollarda) temir betonli, betonli, sopolli, choʻyan, asbest sementli, plastmassa, bazalt kompozit quvurlar va temir betonli qismlar;

bosimli tarmoqlarda — bosimli temir betonli, asbest sementli, choʻyan, poʻlat, plastmassa va basalt kompozit quvurlar.

Izohlar:

oʻzi oqar tarmoqlarda choʻyan quvurlari hamda bosimli tarmoqlarda poʻlat quvurlari yetib borish qiyin boʻlgan joylardagi qurilishlarda, choʻkuvchan tuproqlarda, yer sathi kon ishlaridan zarar koʻrgan hududlarda, suv havzalarini, temir yoʻli va avtomobil yoʻllari ostidan kesib oʻtgan, xoʻjalik-ichimlik suv quvurlari bilan kesishgan va quvurlarga mexanik shikastlar yetkazilishi mumkin boʻlgan joylarda, shuningdek quvurlar estakada tayanchlari ustidan olib oʻtilganda qoʻllanilishi mumkin;

quvurlar yemiruvchan muhitlarda yotqizilganda korroziyaga chidamli quvurlarni qoʻllash lozim;

poʻlat quvurlar qoʻllanilganda tashqi va ichki yuzalarni korroziyadan himoyalash choralarini nazarda tutish lozim. Poʻlat quvurlarning tashqi yuzasini korroziyadan himoya qilish usullarini tanlashda tuproqning korrozion xususiyatlari hamda daydi toklar taʼsirida yemirilishi mumkinligi toʻgʻrisidagi maʼlumotlar bilan asoslanishi kerak. Poʻlat quvurlarni tashqi korroziyadan himoyalash GOST 9.602 ga muvofiq amalga oshirilishi lozim. Poʻlat quvurlarning ichki korroziyasini istisno qilish maqsadida ularning ichki yuzasini lok boʻyoq, rux va boshqa korroziyaga qarshi qoplamalar bilan himoyalashni nazarda tutish kerak;

barcha turdagi poʻlat va temir-betonli quvur oʻtkazgichlarni loyihalashda korroziyaga qarshi elektrkimyoviy himoyasini qurish imkoniyatini yaratish uchun ushbu quvurlarni elektr-kimyoviy oʻtkazuvchanligining uzluksizligini taʼminlovchi choralar nazarda tutilishi kerak;

bazalt kompozit quvurlar GOST 33123 ga mos boʻlishi hamda ular qoʻllanilganda mazkur izohlarning ikkinchi xatboshisida keltirilgan talablarga muvofiq boʻlishi lozim.”.

2. Mazkur buyruq Oʻzbekiston Respublikasi Uy-joy kommunal xizmat koʻrsatish vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Vazir B. ZAKIROV

Toshkent sh.,

2022-yil 22-noyabr,

201-son

Kelishildi:

Uy-joy kommunal xizmat koʻrsatish vaziri Sh. XIDOYATOV

2022-yil 21-noyabr