Eksport qiluvchilar garov sifatida sugʻurta xizmatlaridan foydalanganda, sugʻurta mukofoti uchun toʻlov xarajatlarini kompensatsiya qilish tartibi toʻgʻrisidagi nizomga eksportni qoʻllab-quvvatlash bilan bogʻliq faoliyatni sugʻurta qilish tartibini takomillashtirishga yoʻnaltirilgan oʻzgartirish va qoʻshimchalar kiritish haqida (673-son)
25.11.2022
Oʻzbekiston Respublikasi Vazirlar Mahkamasining
qarori
Soʻnggi yillarda tadbirkorlik subyektlarining eksport faoliyatini davlat tomonidan qoʻllab-quvvatlash va ragʻbatlantirishga alohida eʼtibor qaratilmoqda. Xususan, eksport faoliyatini sugʻurta qilish, sugʻurta xizmatlaridan foydalanishning davlat tomonidan moliyaviy qoʻllab-quvvatlash mexanizmlari yaratildi.
Shu bilan birga, eksport qiluvchilar garov sifatida sugʻurta xizmatlaridan foydalanganda, sugʻurta mukofoti uchun toʻlov xarajatlarini kompensatsiya qilish amaliyoti sugʻurta kompaniyalarining eksport qiluvchilar faoliyatini qoʻllab-quvvatlash boʻyicha faolligini oshirish bilan bir qatorda asosiy eʼtiborini sugʻurta mukofoti uchun toʻlov summalarini oshirishga qaratayotganligini koʻrsatmoqda.
Bundan tashqari, amaldagi tartibda eksport qiluvchilar garov sifatida sugʻurta xizmatlaridan foydalanganda, sugʻurta mukofoti uchun toʻlov xarajatlarini kompensatsiya qilish boʻyicha sugʻurta shartnomalarining aniq turlari koʻrsatilmaganligi tadbirkorlik subyektlariga ushbu xizmatlardan foydalanishda noqulayliklar keltirib chiqarmoqda.
Eksport qiluvchilarni sugʻurta mexanizmlaridan foydalanishda moliyaviy qoʻllab-quvvatlash tizimini takomillashtirish hamda eksport qiluvchilar garov sifatida sugʻurta xizmatlaridan foydalanganda, sugʻurta mukofoti uchun toʻlov xarajatlarini kompensatsiya qilish tartibini qonunchilik hujjatlari bilan oʻzaro muvofiqlashtirish maqsadida Vazirlar Mahkamasi qaror qiladi:
1. Vazirlar Mahkamasining 2020-yil 25-avgustdagi 512-son qarori bilan tasdiqlangan Eksport qiluvchilar garov sifatida sugʻurta xizmatlaridan foydalanganda, sugʻurta mukofoti uchun toʻlov xarajatlarini kompensatsiya qilish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
eksport qiluvchilar garov sifatida sugʻurta xizmatlaridan foydalanganda Eksportni ragʻbatlantirish agentligi tomonidan kompensatsiya qilinadigan sugʻurta mukofotining miqdorini sugʻurta pulining 1 foizidan 0,5 foizigacha kamaytirish;
sugʻurta mukofoti uchun toʻlov xarajatlarini kompensatsiya qilish mexanizmini haqiqatda foydalanilgan sugʻurta xizmatlari boʻyicha toʻgʻridan-toʻgʻri faqat sugʻurta qildiruvchiga toʻlash tartibini belgilash.
2. Oʻzbekiston Respublikasi Investitsiyalar va tashqi savdo vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 25-noyabr,
673-son
Vazirlar Mahkamasining 2022-yil 25-noyabrdagi 673-son qaroriga ILOVA
Vazirlar Mahkamasining 2020-yil 25-avgustdagi 512-son qarori bilan tasdiqlangan Eksport qiluvchilar garov sifatida sugʻurta xizmatlaridan foydalanganda, sugʻurta mukofoti uchun toʻlov xarajatlarini kompensatsiya qilish tartibi toʻgʻrisidagi nizomga kiritilayotgan oʻzgartirishlar va qoʻshimchalar
1. 2-bandda:
ikkinchi xatboshi quyidagi tahrirda bayon etilsin:
“garov sifatida sugʻurta xizmati — tadbirkorlik subyektlarining eksport faoliyati kafolati sifatida sugʻurta shartnomalari asosida sugʻurta himoyasi taqdim etilishi”;
quyidagi mazmundagi xatboshi bilan toʻldirilsin:
“sugʻurta shartnomasi — Oʻzbekistonda ishlab chiqarilgan tovarlar va xizmatlarni (ishlarni) eksport qilish bilan bogʻliq faoliyatni siyosiy va tijorat tavakkalchiliklaridan sugʻurta qilish boʻyicha yozma kelishuv”.
2. 3-band quyidagi tahrirda bayon etilsin:
“3. Eksport qiluvchilar quyidagi sugʻurta shartnomalariga asosan garov sifatida sugʻurta xizmatlaridan foydalanganda, sugʻurtalovchilarga toʻlab berilgan sugʻurta mukofotining 100 foizi, lekin sugʻurta pulining 0,5 foizidan ortiq boʻlmagan qismi Agentlik tomonidan kompensatsiya qilib beriladi:
eksport shartnomasi boʻyicha majburiyatlar bajarilmasligini sugʻurta qilish shartnomasi;
eksport qiluvchining qisqa yoki uzoq muddatli debitor qarzdorligini sugʻurta qilish shartnomasi;
eksport faktoringini sugʻurta qilish shartnomasi;
eksport qiluvchining aylanma mablagʻlarini toʻldirish krediti oʻz vaqtida qaytarilmasligidan sugʻurta qilish shartnomasi.”.
3. 4-bandda:
ikkinchi xatboshi quyidagi tahrirda bayon etilsin:
“sugʻurta shartnomasi boʻyicha sugʻurta mukofoti sugʻurtalovchiga sugʻurta qildiruvchi tomonidan toʻlangan boʻlishi”;
quyidagi mazmundagi uchinchi xatboshi bilan toʻldirilsin:
“sugʻurtalovchi tomonidan eksport qiluvchiga sugʻurta shartnomasi boʻyicha toʻlovlar amalga oshirilgandan keyin sugʻurta polisi taqdim qilinishi va sugʻurta polisi taqdim qilingan sanada xizmatlar koʻrsatilganligini tasdiqlovchi hisobvaraq-fakturalar rasmiylashtirilgan boʻlishi”;
uchinchi — oltinchi xatboshilar tegishlicha toʻrtinchi — yettinchi xatboshilar deb hisoblansin.
4. 5-banddagi “sugʻurtalovchilar va” soʻzlari chiqarib tashlansin.
5. 6-bandda:
birinchi xatboshidagi “sugʻurtalovchilar yoki” soʻzlari chiqarib tashlansin;
uchinchi xatboshi quyidagi tahrirda bayon etilsin:
“sugʻurta mukofoti xarajatini tasdiqlovchi hujjatlar — sugʻurta shartnomasi va sugʻurta polisining nusxasi, toʻlov amalga oshirilganligi toʻgʻrisida bank maʼlumotnomasi, xizmat koʻrsatilganligini tasdiqlovchi hisobvaraq-faktura nusxasi”.
6. 7-banddagi “Sugʻurta qildiruvchi yoki sugʻurtalovchilardan” soʻzlari “Sugʻurta qildiruvchidan” soʻzlari bilan almashtirilsin.
7. 23-bandning uchinchi xatboshidagi “Sugʻurta qildiruvchi yoki sugʻurtalovchining” soʻzlari “Sugʻurta qildiruvchining” soʻzlari bilan almashtirilsin.
8. Nizomga 1-ilovaning matni quyidagi tahrirda bayon etilsin:
“Garov sifatida sugʻurta xizmatlaridan foydalanilganda, Agentlik tomonidan sugʻurta mukofotini kompensatsiya qilish boʻyicha sugʻurta qildiruvchilarning arizalarini koʻrib chiqish SXEMASI
Bosqichlar Masʼul ijrochilar Tadbirlar Bajarish muddatlari 1-bosqich Sugʻurta qildiruvchi Eksportni ragʻbatlantirish agentligiga ariza bilan birga quyidagi hujjatlarni taqdim etish: ushbu Nizomga 2-ilovadagi shaklga muvofiq ariza; eksport shartnomasi (invoys) yoki eksportoldi shartnomasi va (yoki) vositachilik shartnomasi nusxasi; sugʻurta mukofoti xarajatini tasdiqlovchi hujjatlar — sugʻurta shartnomasi va sugʻurta polisining nusxasi, toʻlov amalga oshirilganligi toʻgʻrisida bank maʼlumotnomasi, xizmat koʻrsatilganligini tasdiqlovchi hisobvaraq-faktura nusxasi. Sugʻurta qildiruvchining ixtiyoriga koʻra 2-bosqich Eksportni ragʻbatlantirish agentligi Taqdim etilgan hujjatlarni koʻrib chiqish va xulosa berish: hujjatlar toʻliq taqdim etilmaganda, ularni eksport qiluvchilarga javob xati bilan yozma yoki elektron shaklda qaytarish; 3 ish kuni mobaynida toʻliq taqdim etilgan hujjatlar boʻyicha tegishli xulosa tayyorlash va eksport qiluvchilarni xabardor qilish. 7 ish kuni mobaynida 3-bosqich Eksportni ragʻbatlantirish agentligi Oʻzbekiston Respublikasi Moliya vazirligiga mablagʻ ajratish boʻyicha buyurtmanoma berish. Har hafta yakuni boʻyicha keyingi haftaning birinchi ish kunida 4-bosqich Oʻzbekiston Respublikasi Moliya vazirligi Kompensatsiya mablagʻlarini Agentlikning hisobvaragʻiga oʻtkazib berish. 3 ish kuni davomida 5-bosqich Eksportni ragʻbatlantirish agentligi Sugʻurta qildiruvchilarning hisobvaragʻiga tegishli mablagʻlarni oʻtkazib berish. Mablagʻlar tushgan kundan boshlab 1 ish kuni davomida ”.
9. Nizomga 2-ilovaning matni quyidagi tahrirda bayon etilsin:
(Qonunchilik maʼlumotlari milliy bazasi, 26.11.2022-y., 09/22/673/1040-son)