Namangan toʻqimachilik sanoati institutini tashkil etish toʻgʻrisida (PQ-386-son)

05.10.2022

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2022-yil 28-yanvardagi “2022 — 2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida”gi PF-60-son Farmoniga muvofiq, shuningdek, respublikada toʻqimachilik sanoatidagi malakali kadrlarga boʻlgan ehtiyojni qondirish maqsadida:

1. Namangan shahrida Namangan toʻqimachilik sanoati instituti (keyingi oʻrinlarda — Institut) tashkil etilsin.

Belgilansinki, Institutda oʻquv jarayoni 2023/2024 oʻquv yilidan boshlanadi va kredit-modul tizimi asosida tashkil etiladi.

2. Quyidagilar Institutning asosiy vazifalari etib belgilansin:

toʻqimachilik sanoati tarmoqlari uchun mehnat bozorida raqobatbardosh, yuqori malakaga ega oliy maʼlumotli va ilmiy-pedagog kadrlar tayyorlash, shuningdek, mutaxassislarni qayta tayyorlash va ularning malakasini oshirish;

taʼlim dasturlarini yetakchi xorijiy oliy taʼlim tashkilotlari bilan hamkorlikda, jumladan qoʻshma taʼlim dasturlari asosida joriy etish hamda ilmiy tadqiqotlar olib borish;

taʼlim bilan ishlab chiqarishning integratsiyasini kuchaytirish, soha tashkilotlarida talabalarning malakaviy amaliyotini yoʻlga qoʻyish, kafedra filiallarini hamda professor-oʻqituvchilarning stajirovkasini tashkil etish;

oʻquv jarayonini talabalarda mustaqil bilim olish, tizimli tahlil qilish, ijodiy fikrlash va amaliy, jumladan tadbirkorlik koʻnikmalarini rivojlantirishga yoʻnaltirish;

oʻquv jarayoniga ilgʻor xorijiy tajribani, jumladan zamonaviy taʼlim texnologiyalarini tatbiq etish, ochiq axborot-taʼlim muhitini taʼminlash;

ilmiy-pedagogik salohiyatni oshirib borish, jumladan professor-oʻqituvchilar stajirovkasi va malaka oshirishini nufuzli mahalliy va xorijiy oliy taʼlim tashkilotlari va ilmiy-tadqiqot markazlarida tashkil etish.

3. Belgilansinki, Institutda taʼlim jarayoni nufuzli xorijiy davlatlar oliy taʼlim tashkilotlari bilan hamkorlikda, jumladan qoʻshma taʼlim dasturlari asosida tashkil etiladi.

Oliy va oʻrta maxsus taʼlim vazirligi Prezident taʼlim muassasalari agentligi, “Oʻztoʻqimachiliksanoat” uyushmasi va “Oʻzbekiston paxta-toʻqimachilik klasterlari” uyushmasi bilan hamkorlikda:

a) 2023/2024 oʻquv yiliga qadar toʻqimachilik sanoati rivojlangan xorijiy davlatlar oliy taʼlim tashkilotlarini hamkor sifatida belgilab, Institut taʼlim jarayonini zamonaviy oʻquv dasturlari asosida tashkil etsin;

b) 2023/2024 oʻquv yilidan boshlab:

Institut professor-oʻqituvchilari, doktorantlari va magistrantlarini xorijiy davlatlarning yetakchi oliy taʼlim tashkilotlariga ilmiy stajirovka va malaka oshirishga yuborish choralarini koʻrsin;

Institut talabalarining tanishuv va malakaviy amaliyotini xorijiy va mahalliy yirik toʻqimachilik korxonalarida oʻtash tizimini joriy etsin;

Institut talabalarining fanlarni oʻzlashtirish koʻrsatkichini va professor-oʻqituvchilarning ish samarasini xalqaro standartlar asosida baholash tizimini joriy etsin;

v) 2024/2025 oʻquv yiliga qadar Institut huzurida toʻqimachilik texnoparki faoliyatini yoʻlga qoʻysin.

Bunda, Texnopark:

Namangan viloyati hokimligi tomonidan jalb etiladigan xalqaro tashkilotlarning grantlari va salohiyatli investorlar mablagʻlari hisobiga, jumladan davlat-xususiy sheriklik shartlari asosida tashkil etiladi;

Institut taʼsischiligida masʼuliyati cheklangan jamiyat shaklida tashkil etiladi hamda unga texnologik mahsulotlarni ishlab chiqarishni yoʻlga qoʻyish va tijoratlashtirish huquqi beriladi;

xoʻjalik faoliyatidan olinadigan daromadlar, grantlar, homiylik xayriyalari, Institutning budjetdan tashqari mablagʻlari hamda qonunchilik hujjatlarida taqiqlanmagan boshqa manbalar hisobidan moliyalashtiriladi;

g) 2026/2027 oʻquv yiliga qadar Institutning kamida 2 ta bakalavriat taʼlim yoʻnalishi va 3 ta magistratura mutaxassisligining xalqaro tan olingan tashkilotlar akkreditatsiyasidan oʻtkazilishini taʼminlasin.

4. Institut tarkibida quyidagilar yuridik shaxs maqomisiz tashkil etilsin:

Toʻqimachilik matolari texnologiyalari va ularni tadqiq qilish hamda Boʻyash-pardozlash jarayonlari texnologiyalari va ularni tadqiq qilish laboratoriyalaridan iborat toʻqimachilik sohasida ilmiy-tadqiqot faoliyati bilan shugʻullanuvchi Ilgʻor toʻqimachilik muhandisligi maktabi;

taʼlim jarayonida va undan tashqari vaqtlarda talabalarga zamonaviy libos koʻrinishlarini yaratish imkonini beruvchi Dizayn studiyasi;

ilmiy-tadqiqot yutuqlarini tijoratlashtirish hamda yangi ishlanma va texnologiyalarni amaliyotga joriy etish bilan shugʻullanuvchi Innovatsiyalar va texnologiyalar transferi markazi.

5. Institutga quyidagi huquqlar berilsin:

xalqaro eʼtirof etilgan tashkilotlarning amaldagi reytingida oliy taʼlim muassasalari orasida birinchi 1 000 talikka kirgan xorijiy oliy taʼlim muassasasining dasturi asosida oʻz taʼlim dasturlarini shakllantirish;

ish beruvchilar talablari asosida oʻquv rejalaridagi nazariy taʼlim ulushini qisqartirish va amaliy mashgʻulotlar hajmini oshirish, yuqori kurs talabalari uchun haftalik oʻquv mashgʻulotlarini “4+2” tartibida tashkil etish;

Institut faoliyati yoʻnalishlari boʻyicha shartnoma asosida maslahat va ekspert-tahliliy xizmatlar koʻrsatish hamda ilmiy-tadqiqot va innovatsion xizmat koʻrsatuvchi korxonalarni tashkil etish;

taʼlim va ilmiy-tadqiqot jarayoniga xorijiy mutaxassislarni jalb qilish hamda ularga mehnat bozorining amaldagi konyunkturasini hisobga olgan holda, Institutning budjetdan tashqari mablagʻlari hisobidan oylik maosh hamda boshqa toʻlovlarni belgilash va toʻlash;

professor-oʻqituvchilarni oʻquv-metodik, ilmiy-tadqiqot ishlari va “ustoz-shogird” tizimi boʻyicha bajargan ishlarining natijasi boʻyicha ragʻbatlantirib borish.

6. Quyidagilar:

2023 — 2026-yillarda Namangan toʻqimachilik sanoati institutini rivojlantirish va moddiy-texnika bazasini mustahkamlash boʻyicha chora-tadbirlar dasturi 1-ilovaga muvofiq;

Namangan toʻqimachilik sanoati institutini 2026-yilga qadar rivojlantirishning maqsadli koʻrsatkichlari 2-ilovaga muvofiq;

Namangan toʻqimachilik sanoati institutida tashkil etiladigan bakalavriat taʼlim yoʻnalishlari va magistratura mutaxassisliklari roʻyxati 3-ilovaga muvofiq tasdiqlansin.

7. Belgilansinki:

Institut yuridik shaxs maqomiga ega boʻlgan davlat oliy taʼlim muassasasi hisoblanadi hamda Oliy va oʻrta maxsus taʼlim vazirligi tizimida faoliyat yuritadi;

Institutga talabalarni davlat granti asosida qabul qilish parametrlari har yili tasdiqlanadigan oliy taʼlim muassasalariga oʻqishga qabul qilishning davlat buyurtmasi doirasida aniqlanadi;

2023/2024 oʻquv yilidan boshlab Namangan muhandislik-texnologiya institutiga toʻqimachilik sanoati boʻyicha bakalavriat va magistratura bosqichlarida kadrlar tayyorlash boʻyicha ajratiladigan davlat buyurtmasi kvotasi Institutga yoʻnaltiriladi;

Namangan muhandislik-texnologiya institutining toʻqimachilik sanoati taʼlim yoʻnalishlari va mutaxassisliklar boʻyicha tahsil olayotgan talabalar oʻqishi Institutga koʻchiriladi;

Institut faoliyati Davlat budjeti mablagʻlari, talabalarni toʻlov-kontrakt asosida oʻqitishdan tushadigan mablagʻlar, xoʻjalik faoliyati va shartnoma asosida xizmatlar koʻrsatishdan tushadigan mablagʻlar, homiylik xayriyalari va grantlar hamda qonunchilik hujjatlari bilan taqiqlanmagan boshqa manbalar hisobidan moliyalashtiriladi;

Namangan muhandislik-texnologiya institutining toʻqimachilik oʻquv laboratoriyasi jihozlari Institut balansiga oʻtkaziladi.

8. Oliy va oʻrta maxsus taʼlim vazirligi:

a) 2023/2024 oʻquv yiliga qadar:

Institutni tanlov asosida ishlab chiqarish tashkilotlari, oliy taʼlim va ilmiy-tadqiqot muassasalarida katta ilmiy va (yoki) amaliy tajriba orttirgan mutaxassislar, ustuvor ravishda, ilmiy darajaga ega boʻlgan yuqori malakali kadrlar bilan toʻldirish chorasini koʻrsin;

Tashqi ishlar vazirligi bilan birgalikda xalqaro nufuzli oliy taʼlim tashkilotlarida faoliyat yurituvchi chet ellik va (yoki) xorijda yashovchi vatandosh professor-oʻqituvchilarni shartnoma asosida oʻquv va Ilgʻor toʻqimachilik muhandisligi maktabining ilmiy-tadqiqot jarayonlariga jalb etish choralarini koʻrsin;

Iqtisodiy taraqqiyot va kambagʻallikni qisqartirish vazirligi, Davlat aktivlarini boshqarish agentligi bilan birgalikda Institut ixtisoslashgan fakultet va kafedralarining mos yoʻnalishlari boʻyicha davlat ulushiga ega yirik toʻqimachilik korxonalari bilan hamkorligini yoʻlga qoʻyish boʻyicha “yoʻl xaritasi”ni tasdiqlasin;

b) Institutning ilmiy salohiyatini oshirish maqsadida:

Iqtisodiy taraqqiyot va kambagʻallikni qisqartirish vazirligi bilan birgalikda tegishli magistratura mutaxassisliklari boʻyicha Institut uchun kadrlarni maqsadli tayyorlash;

Innovatsion rivojlanish vazirligi bilan birgalikda belgilangan tartibda Institut tayanch doktoranturasiga tegishli ixtisosliklar boʻyicha qabul kvotalarini belgilash choralarini koʻrsin.

9. Iqtisodiy taraqqiyot va kambagʻallikni qisqartirish vazirligi Oliy va oʻrta maxsus taʼlim vazirligi bilan birgalikda tasdiqlangan loyiha-smeta hujjatlariga asosan Institut uchun yangi oʻquv binolari va talabalar turar joyini qurish hamda ularni jihozlash, Institutning bino va inshootlarini rekonstruksiya qilish loyihalari 2023-yil va kelgusi yillarga moʻljallangan Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturlariga belgilangan tartibda kiritilishini taʼminlasin.

10. Institutga Namangan shahar, “Gulobod” MFY, Janubiy aylanma yoʻli koʻchasi, 17-uy manzilida joylashgan Namangan tadbirkorlikni tashkil etish texnikumining bino va inshootlari tegishli hududi bilan birgalikda operativ boshqaruv huquqi asosida bepul berilsin.

11. Oliy va oʻrta maxsus taʼlim vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qaror ijrosini samarali tashkil qilishga masʼul va shaxsiy javobgar etib oliy va oʻrta maxsus taʼlim vaziri A.X. Toshkulov hamda Namangan viloyati hokimi Sh.Sh. Abdurazakov belgilansin.

Ushbu qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining maslahatchisi O.Q. Abduraxmanov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 5-oktabr,

PQ-386-son

Oʻzbekiston Respublikasi Prezidentining 2022-yil 5-oktabrdagi PQ-386-son qaroriga 1-ILOVA

2023 — 2026-yillarda Namangan toʻqimachilik sanoati institutini rivojlantirish va moddiy-texnika bazasini mustahkamlash boʻyicha

CHORA-TADBIRLAR DASTURI

T/r Chora-tadbir nomi Amalga oshirish mexanizmi Moliyalashtirish manbalari Ijro muddati Masʼul ijrochilar I. Namangan toʻqimachilik sanoati instituti faoliyatini yoʻlga qoʻyish va uning oʻquv jarayonini tashkil etish 1. Namangan toʻqimachilik sanoati instituti (keyingi oʻrinlarda — Institut) faoliyatini yoʻlga qoʻyish uchun zarur boʻlgan hujjatlarni tayyorlash. 1. Institut ustavini ishlab chiqib, tasdiqlash va belgilangan tartibda davlat roʻyxatidan oʻtkazish. - 2022-yil oktabr Oliy va oʻrta maxsus taʼlim vazirligi, Moliya vazirligi, Institut 2. Institut tuzilmasi, shtat jadvali va xarajatlar smetasini tasdiqlash. 2022-yil oktabr 2. Institutni Namangan tadbirkorlikni tashkil etish texnikumi binosiga joylashtirish. 1. Namangan tadbirkorlikni tashkil etish texnikumiga qabul jarayonini toʻxtatish. 2. Namangan tadbirkorlikni tashkil etish texnikumida taʼlim olayotgan oʻquvchilar oʻqishni yakunlaguniga qadar davom ettirishi uchun sharoit yaratish. - 2023-yil sentabr Oliy va oʻrta maxsus taʼlim vazirligi, Bandlik va mehnat munosabatlari vazirligi 3. Oʻquvchilar oʻqishi yakunlangandan soʻng Namangan tadbirkorlikni tashkil etish texnikumi faoliyatini tugatish hamda texnikum faoliyati tugatilishi munosabati bilan xodimlarni ish bilan taʼminlash chorasini koʻrish. 2023-2024-yillar 3. Institutni zarur bilim va amaliy koʻnikmalarga ega kadrlar bilan toʻldirish. 1. Institutni pedagog va ilmiy xodimlar bilan toʻldirish uchun tanlov eʼlon qilish. 2. Tanlovda nomzodning ilmiy tadqiqotlari natijadorligi, pedagogik mahorati va xorijiy tilni bilish darajasiga asosiy eʼtiborni qaratish. - 2023/2024 oʻquv yiliga qadar Institut, Oliy va oʻrta maxsus taʼlim vazirligi, Bandlik va mehnat munosabatlari vazirligi 3. Saralab olingan nomzodlar bilan muddatli mehnat shartnomasini tuzish va professor-oʻqituvchilarning ish samarasini xalqaro standartlar asosida baholab borish. Doimiy 4. Institut oʻquv-metodik hujjatlarini hamkor xorijiy oliy taʼlim tashkiloti takliflari va xalqaro reyting tashkilotlarining birinchi 1 000 talik roʻyxatiga kirgan universitetlarningtaʼlim dasturlari asosida ishlab chiqish. 1. Taʼlim dasturlarini xalqaro eʼtirof etilgan tashkilotlarning amaldagi reytingida oliy taʼlim muassasalari orasida birinchi 1 000 talikka kirgan xorijiy oliy taʼlim muassasalarining dasturlari asosida shakllantirish. 2. Institutning bakalavriat taʼlim yoʻnalishlari va magistratura mutaxassisliklaridan kelib chiqib, Oliy taʼlim yoʻnalishlari va mutaxassisliklari klassifikatoriga hamda, zarur hollarda, Xizmatchilarning asosiy lavozimlari va ishchilar kasblari klassifikatoriga tegishli oʻzgartirish kiritish. 3. Oʻquv rejasidagi tanlov fanlarini kadr buyurtmachilari takliflari asosida shakllantirish. - 2023/2024 oʻquv yiliga qadar Institut, Oliy va oʻrta maxsus taʼlim vazirligi, Prezident taʼlim muassasalari agentligi, “Oʻztoʻqimachiliksanoat” uyushmasi, “Oʻzbekiston paxta-toʻqimachilik klasterlari” uyushmasi, hamkor xorijiy oliy taʼlim tashkiloti (kelishuv asosida) 4. Taʼlim yoʻnalishlarining xususiyatlaridan kelib chiqib, xorijiy tillarda oʻqitiladigan mutaxassislik fanlari salmogʻini oshirish. 2023/2024 oʻquv yilidan boshlab 5. Taʼlim jarayoniga xalqaro taʼlim standartlariga asoslangan ilgʻor taʼlim texnologiyalari va oʻqitish metodlarini joriy etish hamda xorijiy mutaxassislarni jalb etish. 1. Yetakchi xorijiy oliy taʼlim muassasalarining ilgʻor taʼlim metodika va texnologiyalarini joriy etish. 2. Taʼlim va ilmiy-tadqiqot jarayonlariga xorijiy mutaxassislar va (yoki) xorijiy ish tajribasiga ega vatandoshlarni jalb etish. - 2023/2024 oʻquv yilidan boshlab Oliy va oʻrta maxsus taʼlim vazirligi, Tashqi ishlar vazirligi, Prezident taʼlim muassasalari agentligi, Institut 6. Institutga talabalarni qabul qilish jarayonini tashkil etish. 1. Institutda bakalavriat va magistratura bosqichlarida kadrlar tayyorlash boʻyicha davlat buyurtmasini aniqlash va qabulni tashkil etish. - Har yili iyun — avgust Oliy va oʻrta maxsus taʼlim vazirligi, Iqtisodiy taraqqiyot va kambagʻallikni qisqartirish vazirligi, Institut 2. Namangan muhandislik-texnologiya institutining toʻqimachilik sanoati taʼlim yoʻnalishlari va mutaxassisliklar boʻyicha tahsil olayotgan talabalar oʻqishini Institutga koʻchirish. Bunda talabalar oʻqishni yakunlaguniga qadar Namangan muhandislik-texnologiya institutining bino va inshootlarida davom ettiradi. 2023-yil avgust 3. Institutga qabul jarayonini takomillashtirish yuzasidan ilgʻor xorijiy davlatlar tajribasi asosida Oʻzbekiston Respublikasi Prezidenti Administratsiyasiga taklif kiritish. 2023-yil aprel 7. Institutning kutubxona fondini shakllantirish hamda uni zamonaviy oʻquv, oʻquv-metodik va ilmiy-texnik adabiyotlar bilan boyitish. 1. Taʼlim jarayoni va ilmiy faoliyatni amalga oshirish uchun lozim boʻlgan, xarid qilinadigan va yangidan yaratiladigan adabiyotlar roʻyxatini shakllantirish. 2. Yangi avlod oʻquv adabiyotlarini yaratish boʻyicha mualliflar tarkibini shakllantirish. 3. Xorijiy tajriba va toʻqimachilik sanoatidagi texnik taraqqiyotga tayangan holda yangi avlod oʻquv adabiyotlarini reja asosida yaratish va nashr etish. 4. Institutning kutubxona fondini raqamlashtirish va elektron kutubxona tizimiga kiritish. Davlat budjetidan mazkur maqsad uchun ajratilgan mablagʻlar, Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari, grantlar 2023 — 2026-yillar Institut, Oliy va oʻrta maxsus taʼlim vazirligi, “Oʻztoʻqimachiliksanoat” uyushmasi, “Oʻzbekiston paxta-toʻqimachilik klasterlari” uyushmasi 8. Institutning taʼlim jarayoniga “Oliy taʼlim jarayonlarini boshqarish — NEMIS” axborot tizimini joriy etish. 1. Institutning akademik faoliyati, xususan, talabaning davomat hisoboti, oʻzlashtirish qaydnomasi va reyting daftarchasi, guruh jurnali, dars va imtihon jadvallarini raqamlashtirish. 2. Professor-oʻqituvchilarning ilmiy loyihalari, maqolalari, ilmiy-uslubiy nashrlari, ilmiy izlanuvchilar toʻgʻrisidagi maʼlumotlar bazasini shakllantirish. 3. Boshqaruv kadrlari, professor-oʻqituvchilar tarkibi va talabalar toʻgʻrisidagi maʼlumotlarni yuritish hamda tegishli hisobotlarni tayyorlash jarayonlarini raqamlashtirish. 4. Toʻlov-shartnomalarni hamda stipendiya toʻlovlari toʻgʻrisidagi maʼlumotlarni elektron shaklda tizim orqali taqdim etishni yoʻlga qoʻyish. 5. Institut koʻrsatkichlarining maʼlumotlar bazasini shakllantirish hamda oliy taʼlim muassasalari milliy reytingini yuritish va taʼlim sifatini masofaviy monitoring qilish imkoniyatini yaratish. Institutning budjetdan tashqari mablagʻlari 2023/2024 oʻquv yili davomida Oliy va oʻrta maxsus taʼlim vazirligi, Institut 9. Institutning professor-oʻqituvchi, tadqiqotchi va talabalari uchun xalqaro ilmiy-texnik maʼlumotlar bazasidan bepul foydalanish imkoniyatini yaratish. 1. Nufuzli ilmiy-texnik maʼlumotlar bazasiga ega kompaniyalar bilan muzokaralar olib borish. Institutning budjetdan tashqari mablagʻlari, grantlar 2023-yil iyul Institut, Oliy va oʻrta maxsus taʼlim vazirligi 2. Elektron maʼlumotlar bazalariga obunani tashkil qilish hamda professor-oʻqituvchilar, tadqiqotchi va talabalar uchun ulardan bepul foydalanish imkoniyatini yaratish. 2023-yili sentabr 10. Institutning oʻquv jarayonini tashkil etishda axborot-kommunikatsiya texnologiyalarini keng joriy etish. 1. Institutni yuqori tezlikdagi Internet tarmogʻiga ulash hamda zarur telekommunikatsiya jihozlari bilan taʼminlash. 2. Oʻquv auditoriyalarini onlayn veb-kameralar bilan toʻliq jihozlash va har bir fakultetda maʼruza mashgʻulotlari uchun moʻljallangan “SMART” auditoriyalar yaratish. 3. Har bir talabani raqamli texnologiyalarga asoslangan ID-kartalar bilan taʼminlash va shu orqali taʼlim jarayonini nazorat qilish. 4. Taʼlim jarayonida xalqaro miqyosda keng qoʻllaniladigan zamonaviy dasturiy mahsulotlardan foydalanishni yoʻlga qoʻyish. Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari, grantlar 2023/2024 oʻquv yilidan boshlab Institut, Oliy va oʻrta maxsus taʼlim vazirligi, Axborot texnologiyalari va kommunikatsiyalarini rivojlantirish vazirligi II. Ilmiy-tadqiqot va innovatsion faoliyatni hamda xalqaro hamkorlikni tashkil etish 11. Iqtidorli talabalar, yosh olimlar hamda professor-oʻqituvchilarning innovatsion va startap loyihalarini qoʻllab-quvvatlash maqsadida Institut huzurida texnopark tashkil etish. 1. Texnoparkni tashkil etish boʻyicha loyiha hujjatlarini ishlab chiqish hamda zarur yer maydoni, bino yoki inshootni ajratish. 2. Texnoparkni xalqaro tashkilotlarning grantlari va salohiyatli investorlar mablagʻlari hisobiga, jumladan davlat-xususiy sheriklik shartlari asosida, tashkil etish. Grantlar, investorlar mablagʻlari, zarur hollarda, Namangan viloyati viloyat budjeti mablagʻlari 2024/2025 oʻquv yiliga qadar Namangan viloyati hokimligi, Institut, Oliy va oʻrta maxsus taʼlim vazirligi, Prezident taʼlim muassasalari agentligi, “Oʻztoʻqimachiliksanoat” uyushmasi, “Oʻzbekiston paxta-toʻqimachilik klasterlari” uyushmasi 12. Toʻqimachilik sohasida yuqori texnologik yoʻnalishlar boʻyicha ilmiy tadqiqotlarni amalga oshirish hamda innovatsion ishlanmalarni tijoratlashtirishni jadallashtirish maqsadida Institut tarkibida Ilgʻor toʻqimachilik muhandisligi maktabi, Dizayn studiyasi va Innovatsiyalar va texnologiyalar transferi markazini tashkil etish. 1. Ilgʻor toʻqimachilik muhandisligi maktabi, Dizayn studiyasi hamda Innovatsiyalar va texnologiyalar transferi markazini tashkil etish boʻyicha loyiha hujjatlarini tayyorlash, zarur bino ajratish. 2. Ilgʻor toʻqimachilik muhandisligi maktabi, Dizayn studiyasi hamda Innovatsiyalar va texnologiyalar transferi markazini jihozlash, ularning faoliyatini yoʻlga qoʻyish. 3. Ilgʻor toʻqimachilik muhandisligi maktabi, Dizayn studiyasi hamda Innovatsiyalar va texnologiyalar transferi markazi faoliyatiga xorijiy va mahalliy mutaxassislarni jalb etish. Institutning budjetdan tashqari mablagʻlari, grantlar 2023/2024 oʻquv yili davomida Institut, Oliy va oʻrta maxsus taʼlim vazirligi, Innovatsion rivojlanish vazirligi 13. Institut professor-oʻqituvchilarining ilmiy salohiyatini oshirib borish hamda yoshlarni ilmiy faoliyatga jalb etish. 1. Institutning professor-oʻqituvchilari va talabalarini ilmiy-tadqiqot ishlariga faol jalb etish hamda ularning chet tilini bilish darajasini oshirib borish. 2. Xalqaro eʼtirof etilgan tashkilotlarning reytingida birinchi 1 000 talik roʻyxatiga kirgan oliy taʼlim tashkilotlari tomonidan eʼlon qilib borilayotgan grantlarda Institut yosh tadqiqotchilarining ishtirok etishini taʼminlash. 3. Professor-oʻqituvchilar hamda yosh tadqiqotchilarning ilmiy maqolalarini “Web of Science”, “Scopus” kabi xalqaro maʼlumotlar bazalarida indekslanuvchi jurnallarda chop etish choralarini koʻrish. Grantlar, Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari 2023/2024 oʻquv yildan boshlab doimiy Institut, Oliy va oʻrta maxsus taʼlim vazirligi, Innovatsion rivojlanish vazirligi 14. Institutda ilmiy-tadqiqot ishlari natijadorligini oshirish. 1. Zamonaviy ilgʻor tajribani oʻzlashtirish orqali Institut ilmiy-tadqiqot ishlari samaradorligini oshirish boʻyicha maqsadli chora-tadbirlar rejasini ishlab chiqish va tasdiqlash. - 2023-yil mart Oliy va oʻrta maxsus taʼlim vazirligi, Innovatsion rivojlanish vazirligi, Davlat statistika qoʻmitasi, “Oʻztoʻqimachiliksanoat” uyushmasi, “Oʻzbekiston paxta-toʻqimachilik klasterlari” uyushmasi, Institut 2. Tadqiqotchilarni statistik, texnik va boshqa maʼlumotlar bilan taʼminlash mexanizmlarini takomillashtirish. 2023-yil may 15. Institut professor-oʻqituvchilari va tadqiqotchilarining “Scopus”, “Web of Science” kabi xalqaro maʼlumotlar bazalarida indekslanuvchi jurnallarda maqolalar chop etish koʻnikmalarini oshirish. 1. Institut professor-oʻqituvchilari va tadqiqotchilari uchun xalqaro talablar asosida ilmiy maqolalar tayyorlash boʻyicha seminar-treninglar tashkil etish va konsultatsiya oʻtkazish. 2. Iqtiboslar soni boʻyicha “Xirsh” indeksi 5 dan yuqori boʻlgan respublikadagi va xorijiy professor-oʻqituvchilarni jalb qilgan holda, zarur maslahatlar berib borish. Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari 2023 — 2026-yillar Oliy va oʻrta maxsus taʼlim vazirligi, Innovatsion rivojlanish vazirligi, Institut 16. Institut olimlari tomonidan yaratilgan ilmiy-innovatsion ishlanmalarni tijoratlashtirish koʻlamini kengaytirish. 1. Ilmiy-innovatsion ishlanmalarni tijoratlashtirish yuzasidan ishlab chiqarish tashkilotlari bilan hamkorlik aloqalarini rivojlantirish. Ijrochilar mablagʻlari, xoʻjalik shartnomalari asosida jalb qilinadigan mablagʻlar, grantlar 2023/2024 oʻquv yilidan boshlab Institut, Oliy va oʻrta maxsus taʼlim vazirligi, Innovatsion rivojlanish vazirligi, “Oʻztoʻqimachiliksanoat” uyushmasi, “Oʻzbekiston paxta-toʻqimachilik klasterlari” uyushmasi 2. Toʻqimachilik sanoati korxonalaridagi mavjud muammolar bankini shakllantirish. Har yili 3. Shakllangan muammolar banki asosida fundamental, amaliy, innovatsion va startap loyihalarni amalga oshirish. Doimiy 4. Ilmiy-innovatsion ishlanmalarni tarmoq korxonalari orasida tijoratlashtirish chorasini koʻrish. 17. Institut ilmiy laboratoriyalari faoliyati samaradorligini oshirish va ilmiy-tadqiqot ishlariga iqtidorli talabalarni jalb etish. 1. Institut laboratoriyalarida amalga oshirilayotgan ilmiy-tadqiqot ishlariga iqtidorli talabalarini jalb etish. - 2023/2024 oʻquv yili davomida Institut 2. Ishlab chiqarish korxonalarida tashkil etilgan laboratoriyalarga professor-oʻqituvchilar va ilmiy tadqiqotchilarni jalb etish. 2024 — 2026-yillarda “Oʻztoʻqimachiliksanoat” uyushmasi, “Oʻzbekiston paxta-toʻqimachilik klasterlari” uyushmasi 18. Institutda professor-oʻqituvchilarning kasbiy mahoratini oshirib borish. 1. Xorijiy stajirovka va malaka oshirishga yuboriladigan kamida 10 nafar professor-oʻqituvchilarni saralab olish. 2. Professor-oʻqituvchilar uchun xorijiy ilmiy-tadqiqot markazlari va oliy taʼlim tashkilotlarida, shuningdek, kadrlar buyurtmachilari boʻlgan tashkilotlarda stajirovka va malaka oshirish kurslarini tashkil etish. Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari 2023/2024 oʻquv yilidan boshlab doimiy Institut, Oliy va oʻrta maxsus taʼlim vazirligi 19. Institutning taʼlim sohalariga mos tegishli yetakchi xorijiy ilmiy va oliy taʼlim tashkilotlari bilan hamkorlik aloqalarini rivojlantirish. 1. Xorijiy ilmiy va oliy taʼlim tashkilotlarining yetakchi olimlari bilan hamkorlikda xalqaro doiradagi ilmiy-tadqiqot ishlarini olib borish. 2. Xorijiy professor-oʻqituvchilar bilan hamkorlikda oʻquv, uslubiy va ilmiy adabiyotlarni tayyorlash. 3. Xorijiy hamkor tashkilotlar bilan mutaxassislik fanlari boʻyicha vebinarlar tashkil qilish. Institutning budjetdan tashqari mablagʻlari, grantlar 2024/2025 oʻquv yilidan boshlab doimiy Institut, Oliy va oʻrta maxsus taʼlim vazirligi, “El-yurt umidi” jamgʻarmasi 20. Institutning oʻquv dasturlarini xalqaro tan olingan tashkilotlarning tashqi akkreditatsiyasidan oʻtkazish. 1. Oʻquv dasturlarini xalqaro tan olingan tashkilotlarning tashqi akkreditatsiyasidan oʻtkazish uchun hamkor tashkilot bilan aloqalarni oʻrnatish. Grantlar, Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari 2023/2024 oʻquv yili davomida Oliy va oʻrta maxsus taʼlim vazirligi, Taʼlim sifatini nazorat qilish davlat inspeksiyasi, Institut 2. Institutning kamida 2 ta bakalavriat taʼlim yoʻnalishi va 3 ta magistratura mutaxassisligini xalqaro tan olingan tashkilotlarning tashqi akkreditatsiyasidan oʻtkazish. 2026/2027 oʻquv yiliga qadar 21. Institutda xorijiy talabalar ulushini bosqichma-bosqich oshirib borish. 1. Institutning targʻibot-maslahat guruhlarini tashkil etish. Institutning budjetdan tashqari mablagʻlari, grantlar 2023-yil iyun Institut, Oliy va oʻrta maxsus taʼlim vazirligi 2. Institut veb-saytini zamon talablari asosida ishlab chiqish va unda maʼlumotlarni xorijiy tillarda ham joylashtirib borish. 3. Xorijiy hamkor oliy taʼlim tashkilotlari bilan qoʻshma taʼlim dasturlari doirasida kadrlar tayyorlash salmogʻini oshirish. 2024 — 2026-yillar 4. Institutning hamkorlik aloqalari doirasida xorijiy oliy taʼlim tashkilotlari talabalari ishtirokida xalqaro anjumanlar oʻtkazish. Doimiy III. Institutning moddiy-texnika bazasini mustahkamlash 22. Institut uchun yangi oʻquv binolari va talabalar turar joylarini qurish, mavjudlarini rekonstruksiya qilish, kapital taʼmirlash hamda jihozlash. 1. Institut taʼlim jarayonini tashkil etish uchun bino va inshootlarga boʻlgan ehtiyojni aniqlash boʻyicha ishchi guruh tashkil etish. Ijtimoiy va ishlab chiqarish infratuzilmasini rivojlantirish dasturi, Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari, Namangan viloyati viloyat budjeti mablagʻlari 2022-yil oktabr Oliy va oʻrta maxsus taʼlim vazirligi, Iqtisodiy taraqqiyot va kambagʻallikni qisqartirish vazirligi, Namangan viloyati hokimligi, Institut 2. Ishchi guruh tomonidan Institutga istiqboldagi qabul rejalarini hisobga olgan holda yangi oʻquv binolari va talabalar turar joylarini qurish, rekonstruksiya qilish, kapital taʼmirlash hamda jihozlash boʻyicha dastur ishlab chiqish. 2023-yil yanvar 3. Dasturda obyektlarni qurish, rekonstruksiya qilish, kapital taʼmirlash va jihozlash ishlarini moliyalashtirish manbalarini belgilash. 4. Davlat budjeti mablagʻlari hisobidan bajariladigan ishlarni Oʻzbekiston Respublikasining Ijtimoiy va ishlab chiqarish infratuzilmasini rivojlantirish dasturiga kiritish boʻyicha Iqtisodiy taraqqiyot va kambagʻallikni qisqartirish vazirligiga taklif taqdim etib borish. 2023 — 2026-yillar 23. Institutning moddiy-texnika bazasini modernizatsiya qilish. 1. Institutning moddiy-texnika bazasini xatlovdan oʻtkazish. Institutning budjetdan tashqari mablagʻlari, Oliy taʼlim muassasalarini rivojlantirish jamgʻarmasi mablagʻlari 2023-yil mart Oliy va oʻrta maxsus taʼlim vazirligi, Iqtisodiy taraqqiyot va kambagʻallikni qisqartirish vazirligi, Namangan viloyati hokimligi, Moliya vazirligi, Institut 2. Xatlov natijalariga koʻra moliyalashtirish manbalarini aniq koʻrsatgan holda Institutning moddiy-texnika bazasini modernizatsiya qilish va mustahkamlash boʻyicha kompleks chora-tadbirlar dasturini ishlab chiqish. 2023-yil may 24. Institutni zamonaviy oʻquv-ilmiy laboratoriya uskunalari bilan jihozlash. 1. Namangan muhandislik-texnologiya institutining toʻqimachilik oʻquv laboratoriyasi jihozlarini Institut balansiga oʻtkazish. Institutning budjetdan tashqari mablagʻlari, Namangan viloyati viloyat budjeti mablagʻlari, grantlar 2023-yil avgust Institut, Oliy va oʻrta maxsus taʼlim vazirligi, Namangan viloyati hokimligi 2. Oʻquv-amaliyot mashgʻulotlarini olib borish va tadqiqotlar oʻtkazish uchun Institutga qoʻshimcha yangi laboratoriya jihozlarini xarid qilish. 2023 — 2026-yillar 25. Institutning axborot-telekommunikatsiya infratuzilmasini zamon talablari asosida jihozlash. 1. Mavjud lokal va optik tolali tarmoqlarni xatlovdan oʻtkazib, yangilash boʻyicha texnik topshiriq ishlab chiqish. Davlat budjetidan mazkur maqsad uchun ajratilgan mablagʻlar, Institutning budjetdan tashqari mablagʻlari 2023-yil mart Institut, Oliy va oʻrta maxsus taʼlim vazirligi, Axborot texnologi?lari va kommunikatsiyalarini rivojlantirish vazirligi 2. Xatlov natijalaridan kelib chiqib hamda texnik topshiriq asosida tarmoq jihozlarini xarid qilish va oʻrnatish. 2023-yil may 3. Oʻquv jarayonida foydalanish uchun zarur dasturiy taʼminot mahsulotlarini xarid qilish. 2023-yil avgust 26. Institut uchun talabalar turar joyini tashkil etish va jihozlash. 1. Institut talabalar turar joyini davlat xususiy sheriklik loyihasi asosida tashkil etish uchun Vazirlar Mahkamasining 2021-yil 9-sentabrdagi 563-son qaroriga tegishli qoʻshimcha kiritish.  2022-yil noyabr Oliy va oʻrta maxsus taʼlim vazirligi, Moliya vazirligi, Namangan viloyati hokimligi, Institut 2. Loyihaga tadbirkorlik subyektlarini jalb etgan holda talabalar turar joyini barpo etish. 2023-2024-yillar

Oʻzbekiston Respublikasi Prezidentining 2022-yil 5-oktabrdagi PQ-386-son qaroriga 2-ILOVA

Namangan toʻqimachilik sanoati institutini 2026-yilga qadar rivojlantirishning

MAQSADLI KOʻRSATKICHLARI

T/r Ustuvor vazifa Maqsadli koʻrsatkich Yillar kesimida Oʻsish koʻrsatkichi, (2023-yilga nisbatan) 2023-yil 2024-yil 2025-yil 2026-yil 1. Xorijiy tillarni bilish darajasini belgilovchi milliy yoki xalqaro tan olingan sertifikatga ega professor-oʻqituvchilar va talabalar ulushini oshirish Asosiy shtatdagi mutaxassislik fanlari professor-oʻqituvchilari soniga nisbatan, foizda 15 25 35 45 3 barobar 2. Jami talabalar soniga nisbatan, foizda 17 31 45 51 3 barobar 3. Yuqori malakali ilmiy va ilmiy-pedagog kadrlarni tayyorlash Ilmiy salohiyat, foizda 53 59 65 71 1,3 barobar 4. Himoya qilinadigan falsafa doktori dissertatsiyalari (PhD) soni 15 22 28 37 2,5 barobar 5. Himoya qilinadigan doktorlik dissertatsiyalari (DSc) soni 3 5 7 9 3 barobar 6. Falsafa doktori ilmiy darajasini olishga talabgor doktorantlar (PhD) soni 11 21 29 34 3 barobar 7. Fan doktori ilmiy darajasini olishga talabgor doktorantlar (DSc) soni 3 5 7 9 3 barobar 8. Mustaqil izlanuvchilar soni 5 7 9 11 2 barobar 9. Professor-oʻqituvchilarning ilmiy-uslubiy faoliyati natijadorligini oshirish Darsliklar soni 5 8 12 15 3 barobar 10. Oʻquv qoʻllanmalar soni 9 14 20 27 3 barobar 11. Monografiyalar soni 12 19 27 36 3 barobar 12. Scopus, Web of Science maʼlumotlar bazasiga kiritilgan maqolalar soni 10 30 55 90 9 barobar 13. Respublika jurnallarida eʼlon qilingan ilmiy maqolalar soni 70 90 120 140 2 barobar 14. Scopus, Web of Science maʼlumotlar bazasiga kiritilgan har bir maqolaga toʻgʻri keluvchi iqtiboslar soni 0,5 1,0 1,5 2,0 4 barobar 15. Ilmiy-tadqiqot faoliyati va ilmiy-tadqiqot natijalarini amaliyotga tatbiq etish asosida olingan mablagʻlar (mlrd soʻm hisobida) Xorijiy grantlar va xoʻjalik shartnomalari asosida xizmatlar koʻrsatishdan olingan mablagʻlar 0,1 0,3 0,8 1,0 10 barobar 16. Davlat grantlari asosida oʻtkazilgan ilmiy tadqiqotlardan olingan mablagʻlar 0,1 0,2 0,3 0,5 5 barobar 17. Xalqaro ilmiy-texnik hamkorlikni kengaytirish Institut professor-oʻqituvchilarini jahonning yetakchi universitetlari va ilmiy markazlariga xizmat safarlariga yuborish 10 15 24 30 3 barobar 18. Institutga xorijiy professor-oʻqituvchilar va olimlarni jalb etish 3 6 8 12 4 barobar

Oʻzbekiston Respublikasi Prezidentining 2022-yil 5-oktabrdagi PQ-386-son qaroriga 3-ILOVA

Namangan toʻqimachilik sanoati institutida tashkil etiladigan bakalavriat taʼlim yoʻnalishlari va magistratura mutaxassisliklari

ROʻYXATI

T/r Taʼlim yoʻnalishi/magistratura mutaxassisligi I. Bakalavriat taʼlim yoʻnalishlari 1. Toʻqimachilik muhandisligi 2. Toʻqimachilik mashinalari muhandisligi 3. Sanoat mahsulotlarini loyihalash va muhandislik ishi 4. Toʻqimachilik kimyosi, boʻyash va pardozlash muhandisligi 5. Tabiiy tolalarni dastlabki ishlash texnologiyasi 6. Toʻqimachilik va yengil sanoat dizayni II. Magistratura mutaxassisliklari 1. Toʻqimachilik muhandisligi 2. Toʻqimachilik mahsulotlarini ishlab chiqarish texnologiyasi (mahsulot turlari boʻyicha) 3. Toʻqimachilik mashinalari muhandisligi 4. Sanoat mahsulotlarini loyihalash va muhandislik ishi 5. Toʻqimachilik kimyosi, boʻyash va pardozlash muhandisligi 6. Tabiiy tolalarni dastlabki ishlash texnologiyasi 7. Toʻqimachilik va yengil sanoat dizayni 8. Toʻqimachilik mahsulotlari marketingi

Izoh: mazkur bakalavriat taʼlim yoʻnalishlari va magistratura mutaxassisliklari roʻyxatiga kadr buyurtmachilarining va (yoki) hamkor xorijiy oliy taʼlim muassasasi takliflari asosida oʻzgartirish va qoʻshimchalar kiritilishi mumkin.