Referendum davrida ommaviy axborot vositalari vakillarini akkreditatsiyadan oʻtkazish tartibi toʻgʻrisidagi nizomni tasdiqlash haqida (1185-son)

30.08.2022

Oʻzbekiston Respublikasi Markaziy saylov komissiyasining

Qarori

“Oʻzbekiston Respublikasining referendumi toʻgʻrisida”gi Qonunning 18-moddasiga hamda Oʻzbekiston Respublikasi Saylov kodeksining 16-moddasiga muvofiq, Oʻzbekiston Respublikasi Markaziy saylov komissiyasi qaror qiladi:

1. Referendum davrida ommaviy axborot vositalari vakillarini akkreditatsiyadan oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Markaziy saylov komissiyasining rasmiy veb-saytida eʼlon qilinsin.

3. Mazkur qarorning ijrosini nazorat qilish Oʻzbekiston Respublikasi Markaziy saylov komissiyasi raisining oʻrinbosari B. Kuchkarov zimmasiga yuklansin.

Rais Z. NIZAMXODJAYEV

Toshkent sh.,

2022-yil 30-avgust,

1185-son

Oʻzbekiston Respublikasi Markaziy saylov komissiyasining 2022-yil 30-avgustdagi 1185-son qaroriga ILOVA

Oʻzbekiston Respublikasining referendumida ommaviy axborot vositalari vakillarini akkreditatsiyadan oʻtkazish tartibi toʻgʻrisidagi

NIZOM

Mazkur Nizom Oʻzbekiston Respublikasining “Oʻzbekiston Respublikasining referendumi toʻgʻrisida”, “Ommaviy axborot vositalari toʻgʻrisida” hamda “Axborot erkinligi prinsiplari va kafolatlari toʻgʻrisida”gi qonunlariga muvofiq Oʻzbekiston Respublikasining referendumini (bundan buyon matnda referendum deb yuritiladi) yoritish uchun xorijiy va mahalliy ommaviy axborot vositalari (bundan buyon matnda OAV deb yuritiladi) vakillarini akkreditatsiyadan oʻtkazish tartibini belgilaydi.

I bob. Umumiy qoidalar

1. Oʻzbekiston Respublikasining ommaviy axborot vositalari referendumga tayyorgarlikning borishi va u qanday oʻtayotganligini yoritib boradilar. Referendumga tayyorgarlik koʻrish va uni oʻtkazishga doir barcha tadbirlarda qatnashish uchun OAV vakillari akkreditatsiyadan oʻtkaziladi.

OAV vakillarining vakolatlari Oʻzbekiston Respublikasi Markaziy saylov komissiyasi (bundan buyon matnda MSK deb yuritiladi) tomonidan berilgan guvohnomalar bilan tasdiqlangan boʻlishi kerak.

2. OAV referendum tayinlash toʻgʻrisidagi qaror eʼlon qilingan kundan boshlab, referendum oʻtkazilishiga kechi bilan oʻn kun qolguniga qadar MSKga oʻz vakillarini akkreditatsiyadan oʻtkazish toʻgʻrisida murojaat qilishlari mumkin.

3. MSK tomonidan akkreditatsiyadan oʻtkazilgan OAV vakiliga mazkur Nizomning 1-ilovasiga muvofiq shakldagi guvohnoma beriladi.

4. OAV vakillari vakolat muddati unga akkreditatsiyadan oʻtganligi toʻgʻrisidagi guvohnoma berilgan kundan boshlanadi va referendum yakunlari rasman eʼlon qilingan kuni tugaydi.

II bob. Mahalliy OAV vakillarini akkreditatsiyadan oʻtkazish

5. Referendumda mahalliy OAV vakillari MSK tomonidan akkreditatsiyadan oʻtkaziladi.

6. Akkreditatsiya uchun mahalliy OAV rahbarlari MSKga ariza bilan murojaat qiladi.

Referendumni yoritish maqsadida mahalliy OAV rahbarlari MSKga ariza bilan murojaat qiladi.

Mahalliy OAVning arizasida akkreditatsiyaga taqdim etilgan xodimning familiyasi, ismi, otasining ismi va lavozimi koʻrsatiladi hamda quyidagi hujjatlar ilova qilinadi:

xodimning shaxsini tasdiqlovchi hujjat nusxasi;

mahalliy OAVning davlat roʻyxatidan oʻtganligi toʻgʻrisidagi guvohnomasi nusxasi;

har bir xodim uchun toʻldirilgan OAV vakilini akkreditatsiyadan oʻtkazish anketasi;

xodimning elektron fotosurati (oq fonda jpeg formatda, 3x4 sm oʻlchamda kamida 100 KV, 600x600r koʻpi bilan 90 kun oldin tushirilgan boʻlishi hamda xodimning yuzi va yelkalarining yuqori qismi koʻrinib turishi kerak).

Mahalliy OAV vakilini akkreditatsiyadan oʻtkazish uchun ariza va anketa mazkur Nizomning 2-ilovasiga muvofiq toʻldiriladi.

Ariza va unga ilova qilingan hujjatlar MSKga elektron shaklda yuboriladi. Bunda mazkur bandning ikkinchi — beshinchi va yettinchi xatboshisida nazarda tutilgan hujjatlar pdf formatda boʻlishi lozim.

7. Murojaat besh kun ichida koʻrib chiqilib, MSKning qarori asosida mahalliy OAV vakiliga akkreditatsiyadan oʻtganligi toʻgʻrisidagi guvohnoma beriladi.

III bob. Xorijiy OAV vakillarini akkreditatsiyadan oʻtkazish tartibi

8. Referendumda xorijiy OAV vakillari MSK tomonidan akkreditatsiyadan oʻtkaziladi.

9. Oʻzbekiston Respublikasi Tashqi ishlar vazirligida (bundan buyon matnda TIV deb yuritiladi) akkreditatsiyadan oʻtgan xorijiy OAV vakillarini MSKdan akkreditatsiyadan oʻtkazish uchun tegishli OAV muxbirlik punkti (byurosi, ofisi) rahbari MSKga murojaat qiladi.

Murojaatda akkreditatsiyaga taqdim etilgan xodimning familiyasi, ismi, otasining ismi va lavozimi koʻrsatiladi hamda quyidagi hujjatlar ilova qilinadi:

xodimning shaxsini tasdiqlovchi hujjat nusxasi;

har bir xodim uchun toʻldirilgan OAV vakilini akkreditatsiyadan oʻtkazish anketasi;

TIV tomonidan akkreditatsiya qilinganligi toʻgʻrisidagi guvohnomasi nusxasi;

xodimning elektron fotosurati (oq fonda jpeg formatda, 3x4 sm oʻlchamda kamida 100 KV, 600x600r, koʻpi bilan 90 kun oldin tushirilgan boʻlishi hamda xodimning yuzi va yelkalarining yuqori qismi koʻrinib turishi kerak).

Hujjatlar MSKga elektron shaklda yuboriladi. Bunda mazkur bandning ikkinchi — beshinchi xatboshilarida nazarda tutilgan hujjatlar pdf formatda boʻlishi lozim.

Murojaat besh kun ichida koʻrib chiqiladi va MSK qarori asosida xorijiy OAV vakiliga akkreditatsiyadan oʻtganligi toʻgʻrisidagi guvohnoma beriladi.

10. TIVdan akkreditatsiyadan oʻtmagan xorijiy OAV vakillari referendumni yoritish maqsadida TIVga murojaat qiladilar. Murojaatga:

ommaviy axborot vositasi toʻgʻrisida maʼlumotnoma-axborot;

akkreditatsiyaga taqdim etilgan xodimning tarjimai holi maʼlumotlari, uning shaxsini tasdiqlovchi hujjat nusxasi va 3x4 sm oʻlchamdagi ikki dona fotosurati ilova qilinadi.

11. TIVdan akkreditatsiyadan oʻtmagan xorijiy OAV vakillarining murojaati taqdim etilgan kundan keyin ikki haftadan kechikmay TIV tomonidan koʻrib chiqiladi. Mazkur Nizomning 10-bandida qayd etilgan maʼlumotlar koʻrsatilmagan, shuningdek belgilangan muddatda berilmagan murojaat koʻrilmasdan qoldiriladi.

12. TIV xorijiy OAV vakillarini akkreditatsiyadan oʻtkazish toʻgʻrisida MSKga taqdimnoma kiritadi.

Taqdimnoma besh kunlik muddat ichida koʻrib chiqilib, MSK qarori asosida xorijiy OAV vakiliga akkreditatsiyadan oʻtganligi toʻgʻrisidagi guvohnoma beriladi.

IV bob. OAV vakilining huquq va majburiyatlari

13. OAV vakili:

referendumga tayyorgarlik koʻrish va uni oʻtkazishga doir barcha tadbirlarni yoritish;

referendum oʻtkazuvchi komissiyalarning majlislarida hozir boʻlish;

referendum oʻtkazuvchi komissiyalarning qarorlari nusxalarini OAVda yoritish uchun olish;

muddatidan oldin ovoz berishni oʻtkazish vaqti va joyi haqida xabardor boʻlish hamda ushbu jarayonni kuzatish;

referendum kuni ovoz berish xonalarida, shu jumladan ovozlarni sanab chiqishda hozir boʻlish;

referendum oʻtkazuvchi komissiyalarning faoliyatiga hamda ovoz berish jarayoniga xalaqit bermasdan va ovoz berishning yashirinligini buzmasdan foto, video, audio yozuvlarni amalga oshirish (qamoqda saqlash va ozodlikdan mahrum etish joylari, harbiy qismlar, davolash muassasalarida tashkil etilgan referendum uchastkalari bundan mustasno);

fuqaroning turgan joyida uning ruxsati bilan ovoz berish jarayonida hozir boʻlish;

referendum oʻtkazuvchi okrug komissiyasi tomonidan uchastka komissiyalaridan ovozlarni sanab chiqish natijalari toʻgʻrisidagi bayonnomalarni qabul qilib olishi hamda okrug boʻyicha ovoz berish yakunlarini aniqlash jarayonida hozir boʻlish;

referendumga tayyorgarlik koʻrish va uning oʻtkazilishi boʻyicha oʻz fikrini bayon qilish huquqiga ega.

OAV vakili qonunchilik hujjatlariga muvofiq boshqa huquqlardan ham foydalanadi.

14. OAV vakili:

oʻz faoliyatida Oʻzbekiston Respublikasi Konstitutsiyasi, “Oʻzbekiston Respublikasining referendumi toʻgʻrisida”gi Qonun, ommaviy axborot vositalari toʻgʻrisidagi qonunchilik hujjatlari va MSKning qarorlariga amal qilishi;

referendum oʻtkazuvchi komissiyalarning binolari (xonalari), majlislari va matbuot anjumanlarida guvohnomani boshqalarga koʻrinadigan tarzda doimo taqqan boʻlishi;

majlislar, matbuot anjumanlari, ovoz berish va boshqa tadbirlar tashkil etiladigan binoning oʻzlari uchun ajratilgan joyida referendumga tayyorgarlikning borishi va u qanday oʻtayotganligini yoritishi;

referendum jarayonini yoritishda referendum oʻtkazuvchi komissiyaning faoliyatiga hamda ovoz berish jarayoniga xalaqit bermasligi;

referendum oʻtkazuvchi komissiyalarga, davlat hokimiyati va boshqaruv organlari va boshqa tashkilotlarga tashrif buyurganida unga berilgan guvohnomani hamda oʻz shaxsini tasdiqlovchi hujjatni yonida olib yurishi hamda mansabdor shaxslar talabiga muvofiq ularni koʻrsatishi shart.

15. OAV vakiliga quyidagilar man etiladi:

konstitutsiyaviy tuzumni zoʻrlik bilan oʻzgartirishni maqsad qilib qoʻyuvchi, respublikaning suvereniteti, yaxlitligi va xavfsizligiga, fuqarolarning konstitutsiyaviy huquq va erkinliklariga qarshi chiquvchi, urushni, ijtimoiy, milliy, irqiy va diniy adovatni targʻib qiluvchi, xalqning sogʻligʻi va maʼnaviyatiga tajovuz qiluvchi axborotlarni tarqatish;

ovoz beruvchilarga taʼsir oʻtkazish, qonunga xilof ravishda biron-bir tashviqot materiali yoki adabiyotini tarqatish;

ovoz beruvchi ovoz berish byulleteniga oʻz belgisini qoʻyayotgan paytda ovoz berish kabinasida yoki xonasida boʻlish;

ovoz beruvchilardan ular qanday ovoz berganliklarini surishtirish yoki ularga ovoz berish byulleteniga belgi qoʻyishda biron-bir tarzda yordam koʻrsatish;

referendum oʻtkazuvchi uchastka komissiyasining faoliyatiga, shu jumladan ovoz berish qutilari muhrlanayotgan, ochilayotgan, ovozlar sanab chiqilayotganda aralashish;

referendum kuni va ovoz berish boshlanishidan bir kun oldin jamoatchilik fikri soʻrovlari natijalarini, referendum natijalari prognozlarini, oʻtkazilayotgan referendum bilan bogʻliq boshqa tadqiqotlarni eʼlon qilish.

16. OAV vakili harbiy qismlarda, qamoqda saqlash va ozodlikdan mahrum etish joylarida tuzilgan referendum uchastkalariga borishi haqida tegishli referendum oʻtkazuvchi uchastka komissiyasini kamida uch kun oldin xabardor qilishi kerak.

17. OAV vakili referendum oʻtkazuvchi komissiyalarning majlislari, matbuot anjumanlari va boshqa tadbirlarda (bundan buyon matnda tadbir deb yuritiladi) ishtirok etishi haqida tegishli referendum oʻtkazuvchi komissiyani oldindan xabardor qilishi kerak. Bunda referendum oʻtkazuvchi komissiya OAV vakillarining tadbirlarda ishtirok etishi uchun zarur sharoit yaratish choralarini koʻradi.

Referendum oʻtkazuvchi komissiya OAV vakillarining tadbirda ishtirok etishi uchun roʻyxatdan oʻtish muddati, tadbirni oʻtkazish joyi va boshqa tashkiliy masalalarni eʼlon qiladi.

18. Ovoz beruvchining ovoz berish kabinasida yoki xonasida byulletenni toʻldirish jarayonini suratga yoki videoga olish, uni tarqatish, shu jumladan ijtimoiy tarmoqlarga joylashtirish taqiqlanadi.

Ommaviy axborot vositasi vakili ovoz berish sirini oshkor qilsa yoxud fuqarolarning xohish-irodasiga taʼsir koʻrsatishga harakat qilsa, u ovoz berish binosidan darhol chiqarib yuboriladi. Bu haqda uchastka komissiyasi qaror qabul qiladi.

19. Quyidagilar OAV vakilini akkreditatsiyadan oʻtkazishni rad etish uchun asos hisoblanadi:

a) akkreditatsiyadan oʻtkazish uchun hujjatlar toʻliq taqdim etilmaganda;

b) anketa toʻliq va toʻgʻri toʻldirilmagan boʻlsa;

v) mazkur Nizomda belgilangan muddatlarga rioya etilmaganda;

g) OAV akkreditatsiyadan oʻtayotgan davrda doimiy faoliyat yuritmaganda;

d) veb-sayt sifatida roʻyxatdan oʻtgan OAVning hujjatlarida koʻrsatilgan veb-sayti mavjud boʻlmaganda;

e) OAVning roʻyxatdan oʻtkazilganligi toʻgʻrisidagi guvohnomasi sud tomonidan haqiqiy emas deb topilgan boʻlsa;

j) OAVning chiqarilishi toʻxtatib turilganida yoki tugatilganida;

z) akkreditatsiyadan oʻtkazish toʻgʻrisidagi arizada yoki unga ilova qilingan hujjatda koʻrsatilgan maʼlumotlar haqiqatga mos kelmasa;

i) OAVning Oʻzbekiston Respublikasi hududida faoliyat yuritishi sud qaroriga muvofiq cheklangan yoki taqiqlanganda;

y) OAV qayta roʻyxatdan oʻtkazilmagan boʻlsa (agar OAV roʻyxatdan oʻtkazilganidan soʻng muassis toʻgʻrisidagi maʼlumotlar, OAVning nomi, tili va turi, maqsad va vazifalari haqidagi maʼlumotlarga oʻzgartirishlar kiritilgan boʻlsa).

MSK matbuot xizmati OAVga akkreditatsiyadan oʻtkazish uchun taqdim etilgan hujjatlarida mavjud kamchiliklarni bartaraf etishni taklif qilishi mumkin.

Hujjatlarda yoʻl qoʻyilgan kamchiliklar bir kunlik muddatda bartaraf etilmagan taqdirda, OAV vakilini akkreditatsiyadan oʻtkazish rad etiladi.

OAV vakilini akkreditatsiyadan oʻtkazish rad etilganida, bu haqda alohida qaror qabul qilinmaydi hamda OAVga uning rad etilganligi toʻgʻrisida mazkur Nizom va (yoki) qonunchilik normalariga asoslangan javob beriladi.

OAV mazkur bandning “a” va “b” kichik bandlarida nazarda tutilgan kamchilikni bartaraf qilgan holda referendumga oʻn kun qolguniga qadar MSKga qayta murojaat qilishi mumkin.

20. Quyidagi hollarda OAV vakilining akkreditatsiyasi MSKning qarori bilan muddatidan ilgari tugatilishi mumkin:

OAV vakili “Oʻzbekiston Respublikasining referendumi toʻgʻrisida”gi Qonun, ommaviy axborot vositalari toʻgʻrisidagi qonunchilik hujjatlari, MSKning qarorlari talablari va ushbu Nizom qoidalarini buzganida;

OAVning roʻyxatdan oʻtkazilganligi toʻgʻrisidagi guvohnomasi sud tomonidan haqiqiy emas deb topilgan boʻlsa;

akkreditatsiyadan oʻtkazish toʻgʻrisidagi arizada yoki unga ilova qilingan hujjatda koʻrsatilgan maʼlumotlar haqiqatga mos kelmasa;

akkreditatsiya qilingan xodim bilan OAV tahririyati oʻrtasida tuzilgan mehnat shartnomasi bekor qilinganda;

xodimning akkreditatsiyasini bekor qilishni soʻrab OAV tahririyati tomonidan MSKga yozma murojaat yoʻllangan taqdirda;

OAVning chiqarilishi toʻxtatib turilganida yoki tugatilganida.

21. MSK OAV vakilini akkreditatsiyadan oʻtkazish, akkreditatsiyadan oʻtkazishni rad etish va uning akkreditatsiyasini muddatidan ilgari tugatish masalalarini har tomonlama koʻrib chiqish va asoslangan qaror qabul qilish uchun zarur boʻlgan maʼlumotlar, qarorlar va boshqa hujjatlarni, davlat organlari va boshqa tashkilotlardan soʻrashga va olishga haqli.

22. Akkreditatsiyadan oʻtganlik toʻgʻrisidagi guvohnoma yoʻqotilgan yoki yaroqsiz holga kelgan taqdirda OAV vakilining murojaatiga asosan bir ish kunida guvohnomaning dublikati beriladi. Bunda guvohnomaning yuqori oʻng burchagiga “Dublikat” deb yoziladi.

23. Akkreditatsiya qilingan xodim ishdan boʻshatilgan taqdirda OAV tahririyati bu haqda darhol MSKni xabardor qiladi.

Oʻzbekiston Respublikasining referendumida ommaviy axborot vositalari vakillarini akkreditatsiyadan oʻtkazish tartibi toʻgʻrisidagi nizomga 1-ILOVA

OMMAVIY AXBOROT VOSITASI VAKILINI AKKREDITATSIYADAN OʻTGANLIGI TOʻGʻRISIDAGI GUVOHNOMA NAMUNASI

Izoh: Guvohnomani tayyorlashda Oʻzbekiston Respublikasi Davlat ramzlari, Markaziy saylov komissiyasining logotipi, shuningdek turli bezak va ranglardan foydalanilishi mumkin. Guvohnomada referendumni oʻtkazish sanasi koʻrsatilishi mumkin. Guvohnomaning orqa tomoniga OAVning huquq va majburiyatlariga oid muhim maʼlumotlar aks ettirilishi mumkin.

Mazkur guvohnomaning oʻlchami boʻyi 140 mm — eni 100 mm. Guvohnomaning old tomoni oʻzbek tilida, orqa tomoni oʻzbek yoki rus yoxud ingliz tilida rasmiylashtiriladi.

Oʻzbekiston Respublikasining referendumida ommaviy axborot vositalari vakillarini akkreditatsiyadan oʻtkazish tartibi toʻgʻrisidagi nizomga 2-ILOVA

OAV VAKILINI AKKREDITATSIYADAN OʻTKAZISh ANKETASI APPLICATION FORM FOR MEDIA ACCREDITATION Fotosurat Photo 3x4 jpeg I. Akkreditatsiyaga taqdim qilingan OAV vakili toʻgʻrisidagi maʼlumotlar Personal information Familiyasi Last name Ismi First name Fuqaroligi Nationality Oʻzbekistondagi manzili (xorijiy OAV uchun) Address in Uzbekistan (for foreign media) Doimiy yashash joyi Permanent address Tugʻilgan sanasi Date of birth Tugʻilgan joyi Place of birth Lavozimi Position/Designation Jinsi Sex Erkak Male Ayol Female E-mail Telefon Phone number Uyali telefon Mobile phone II. Ommaviy axborot vositasi toʻgʻrisidagi maʼlumotlar Information on the media organization Tashkilot nomi Name of media organisation OAV manzili Address of media organisation OAVning turi(bosma, TV-radio, Internet) Type of media (print, broadcast, Internet) E-mail OAVning internetdagi rasmiy veb-sayti Website Telefon Phone number