Oʻzbekiston Teleradiokompaniyasi tizimini texnika bilan kompleks qayta jihozlash toʻgʻrisida (412-son)

25.08.1997

Oʻzbekiston Respublikasi Vazirlar Mahkamasining

qarori

[Koʻchirma]

Oʻzbekiston Teleradiokompaniyasi tizimini jahon standartlariga javob beradigan texnika bilan qayta jihozlash va Hukumatning 1996-yil 24-maydagi 190-son qarorining 7-bandini bajarish yuzasidan Vazirlar Mahkamasi qaror qiladi:

1. “Oʻzbekiston Teleradiokompaniyasi tizimini texnika bilan kompleks qayta jihozlash dasturi” va Adresli dastur 1 va 2-ilovalarga* muvofiq tasdiqlansin.

* 1-2-ilovalar berilmaydi.

2. Quyidagilar belgilab qoʻyilsin:

dasturni bajarish Oʻzbekiston milliy teleradiokompaniyasining ishlab turgan korxonalarini bosqichma-bosqich modernizatsiyalash va yangilash uchun teleradio asbob-uskunalari, ehtiyot qismlar va materiallar yetkazib berish alohida kontraktlar bilan amalga oshiriladi;

yakka tartibdagi kontraktlarni mablagʻ bilan taʼminlash quyidagi tartibda amalga oshiriladi:

kontraktlar qiymatining 15 foizi va xorijiy kreditlarga xizmat koʻrsatish boʻyicha xarajatlar Oʻzbekiston milliy teleradiokompaniya uchun kapital qoʻyilmalarga ajratiladigan mablagʻlar doirasida Respublika budjeti hisobiga;

kontraktlar qiymatining 85 foizi — xorijiy banklar kreditlari hisobiga.

Asosiy qarzni, foizlarni, vositachilik haqini va Oʻzbekiston milliy teleradiokompaniyasi tizimini texnika bilan kompleks qayta jihozlash dasturi boʻyicha jalb etiladigan xorijiy kreditlarga xizmat koʻrsatish bilan bogʻliq boʻlgan boshqa xarajatlarni toʻlash qarz bitimlari muddatlari va shartlariga muvofiq Oʻzbekiston Respublikasi Davlat budjeti mablagʻlari hisobiga amalga oshiriladi.

3. Quyidagilar maʼlumot uchun qabul qilinsin:

Oʻzbekiston Teleradiokompaniyasi tomonidan 2-bandda koʻrsatib oʻtilgan shartlarda “Simens AG” (Avstriya) firmasi bilan Respublika Radio uyi uchun 18 mln. Avstriya shillingti summasida asbob-uskunalar yetkazib berish va “BFE AG” (Germaniya) firmasi bilan Respublika telemarkazi uchun 25 mln. Germaniya markasida asbob-uskunalar yetkazib berish yuzasidan yakka tartibda kontraktlar tuzilgan;

Vazirlar Mahkamasining “Oʻzbekiston Respublikasining 1997-yilgi investitsiya dasturi toʻgʻrisida” 1997-yil 20-yanvardagi 40-son qarori bilan (3-ilova) Oʻzbekiston Teleradiokompaniyasiga teleradio obyektlarini qurish va rekonstruksiya qilish uchun Davlat budjeti hisobidan 300 mln soʻm kapital qoʻyilmalar limiti ajratilgan.

4. Oʻzbekiston Respublikasi Iqtisodiyot vazirligi, Moliya vazirligi 1998-yil va keyingi yillar uchun markazlashtirilgan kapital qoʻyilmalar limitlarini shakllantirishda avans toʻlovlarini amalga oshirish hamda xorijiy banklar kreditlarini va qarz bitimlari muddatlari va shartlarida ular boʻyicha belgilangan foizlarni toʻlash uchun Oʻzbekiston milliy teleradiokompaniyasiga mablagʻlar ajratishni nazarda tutsinlar.

5. Oʻzbekiston Teleradiokompaniyasi, Tashqi iqtisodiy aloqalar vazirligi va Tashqi iqtisodiy faoliyat milliy banki Texnika bilan qayta taʼminlashning adresli dasturi bosqichlariga muvofiq “Simens AG” (Avstriya) va “BFE AG” (Germaniya) firmalari bilan zarur asbob-uskunalarni sotib olish loyihalarini kontraktdan oldin ishlab chiqishni amalga oshirsinlar va xorijiy banklar kreditlari jalb etilishini taʼminlasinlar.

6. Oʻzbekiston Respublikasi Tashqi iqtisodiy faoliyat milliy banki Oʻzbekiston milliy teleradiokompaniyasiga asbob-uskunalar yetkazib berish boʻyicha yakka tartibdagi kontraktlar uchun koʻpi bilan 0,5 foizli stavka bilan kreditlarni qayta moliyalashtirish yuzasidan xorijiy banklar bilan belgilangan tartibda yakka tartibdagi kredit bitimlarini tuzsin.

7. Oʻzbekiston Respublikasi Moliya vaziri J.B. Sayfiddinov jalb etiladigan xorijiy kreditlar boʻyicha Oʻzbekiston Respublikasi Hukumati kafolatlarini imzolashga vakil qilinsin. Oʻzbekiston Respublikasi Adliya vazirligi beriladigan Hukumat kafolatlari boʻyicha yuridik xulosalarni belgilangan tartibda rasmiylashtirsin.

9. Oʻzbekiston Teleradiokompaniyasi Oʻzbekiston Teleradiokompaniyasi tizimini texnika bilan kompleks qayta jihozlash dasturiga binoan keltiriladigan import asbob-uskunalar va materiallar uchun boj toʻlovlari toʻlashdan ozod qilinsin.

10. Mazkur qarorning bajarilishini nazorat qilish Bosh vazir oʻrinbosari A. A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 25-avgust,

412-son