Qishloq xoʻjaligi sohasida oʻquv-tajriba xoʻjaliklarini tashkil etish chora-tadbirlari toʻgʻrisida (527-son)

27.09.2022

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Yer kodeksining 24 va 491-moddalariga muvofiq hamda Oʻzbekiston Respublikasi Prezidentining “Yer munosabatlarida tenglik va shaffoflikni taʼminlash, yerga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida” 2021-yil 8-iyundagi PF-6243-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Yer kodeksining 491-moddasiga muvofiq:

oʻquv-tajriba xoʻjaliklariga qishloq xoʻjaligiga moʻljallangan yer uchastkalari belgilangan tartibda qishloq xoʻjaligi sohasida ilmiy-tadqiqot va tajriba-sinov ishlarini amalga oshirish, taʼlim maqsadlari, tovar qishloq xoʻjaligini yuritish hamda ilgʻor tajribani targʻib qilish uchun berilishi;

oʻquv-tajriba xoʻjaliklari qishloq xoʻjaligiga moʻljallangan yer uchastkalarini ijaraga yoki ikkilamchi ijaraga berish huquqiga ega emasligi belgilanganligi maʼlumot uchun qabul qilinsin.

2. Oʻzbekiston Respublikasi Qishloq xoʻjaligi vazirligi, Fanlar akademiyasi, Suv xoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklarining quyidagi takliflari maʼqullansin:

“Oʻzdaverloyiha” davlat ilmiy-loyihalash institutining Andijon, Buxoro, Jizzax, Navoiy, Namangan, Samarqand, Surxondaryo, Toshkent, Fargʻona va Xorazm viloyatlari boʻlinmalarida qishloq xoʻjaligi sohasida ilmiy-tadqiqot ishlarini amalga oshirish maqsadida oʻquv-tajriba xoʻjaliklarini tashkil etish;

“Oʻzdaverloyiha” davlat ilmiy-loyihalash institutining Qoraqalpogʻiston Respublikasi, Qashqadaryo va Sirdaryo viloyatlari boʻlinmalaridagi yordamchi xoʻjaliklarni oʻquv-tajriba xoʻjaliklariga aylantirish hamda Qoraqalpogʻiston dehqonchilik ilmiy-tadqiqot institutining ixtiyoriy voz kechish talabiga muvofiq Qoraqalpogʻiston Respublikasi Chimboy tumanidagi tajriba xoʻjaligi yerlarini zaxiraga qaytarish.

3. Quyidagilar:

Qishloq xoʻjaligi sohasida ilmiy-tadqiqot ishlarini amalga oshirish maqsadida oʻquv-tajriba xoʻjaliklarini tashkil etish uchun ajratiladigan yer uchastkalari roʻyxati 1-ilovaga muvofiq;

Qoraqalpogʻiston dehqonchilik ilmiy-tadqiqot instituti tajriba xoʻjaligining Chimboy tumani hokimligi zaxirasiga qaytaradigan yer uchastkalari roʻyxati 2-ilovaga muvofiq tasdiqlansin.

4. Belgilansinki:

qishloq xoʻjaligiga moʻljallangan yer uchastkalari oʻquv-tajriba xoʻjaliklariga oʻttiz yil muddatga ijara huquqi asosida ajratiladi;

oʻquv-tajriba xoʻjaliklariga ajratilgan yer uchastkalarida qishloq xoʻjaligi ekinlarini ekish va yetishtirish ishlari amalga oshiriladi hamda ekinlarning holati va rivojlanishini monitoring qilishning ilmiy asoslangan usullari sinovdan oʻtkaziladi;

spektorli kameralar bilan jihozlangan dronlarda olingan suratlarga ishlov berish orqali monitoring tizimini takomillashtirish boʻyicha ilmiy asoslangan taklif va tavsiyalar ishlab chiqiladi.

5. Oʻzbekiston Respublikasi Qishloq xoʻjaligi vazirligi:

a) Davlat soliq qoʻmitasi huzuridagi Kadastr agentligi bilan birgalikda oʻn kun muddatda:

mazkur qarorga 1-ilovaga muvofiq qishloq xoʻjaligi sohasida ilmiy-tadqiqot ishlarini amalga oshirish maqsadida oʻquv-tajriba xoʻjaliklarini tashkil etish uchun ajratilgan yer uchastkalariga boʻlgan huquqlarning davlat roʻyxatidan oʻtkazilishini;

Qoraqalpogʻiston Respublikasi Vazirlar Kengashi bilan birgalikda Qoraqalpogʻiston dehqonchilik ilmiy-tadqiqot instituti tajriba xoʻjaligining yer uchastkasi Chimboy tumani hokimligi zaxirasiga qaytarilishi hamda belgilangan tartibda davlat roʻyxatidan oʻtkazilib, qishloq xoʻjaligi mahsulotlarini yetishtirish uchun ochiq elektron tanlovga qoʻyilishini taʼminlasin;

b) oʻquv-tajriba xoʻjaliklarini tashkil etish uchun ajratilgan yer uchastkalaridan maqsadli foydalanilishi ustidan nazorat oʻrnatsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 27-sentabr,

527-son

Vazirlar Mahkamasining 2022-yil 27-sentabrdagi 527-son qaroriga 1-ILOVA

Qishloq xoʻjaligi sohasida ilmiy-tadqiqot ishlarini amalga oshirish maqsadida oʻquv-tajriba xoʻjaliklarini tashkil etish uchun ajratiladigan yer uchastkalari

ROʻYXATI

T/r Hudud nomi Yer uchastkasi manzili Kontur raqami Jami yer maydoni, ga Shundan: Tuman (shahar)lar nomi Joy nomi sugʻoriladigan yerlar bogʻzor boshqa yerlar “Oʻzdaverloyiha” davlat ilmiy-loyihalash institutining hududiy boʻlinmalari 1. Qoraqalpogʻiston Respublikasi Qonlikoʻl tumani Jayxun 2266, 2269, 2270a, 2270, 2271, 2272, 2273, 2274, 2275, 2276, 2277, 2278, 2279, 2280, 2281, 2282, 2283, 2284, 2285, 2288, 2289, 2290, 2291, 2312, 2313, 2314 93,9 26,0 67,9 2. Andijon viloyati Marxamat tumani Istiqlol 1098q 10,7 10,6 0,1 3. Buxoro viloyati Peshkoʻ tumani E. Ergashev 165 9,24 8,3 0,94 4. Jizzax viloyati Zarbdor tumani Gʻolib 4663q 16,7 16,7 5. Qashqadar? viloyati Qarshi tumani Oʻzbekiston Mustaqilligi 30 10,2 9,7 0,5 6. Navoiy viloyati Xatirchi tumani E. Abdiyev 16 10,95 10,95 7. Namangan viloyati Norin tumani Paxtakor 3569 15,62 14,7 0,92 8. Samarqand viloyati Payariq tumani Baxor 882q, 882a 12,86 12,0 0,86 9. Sirdaryo viloyati Xovos tumani Paxtakor 1265 23,57 22,52 1,05 10. Surxondaryo viloyati Jarqoʻrgʻon tumani Oqtepa 367q 10,32 10,0 0,32 11. Toshkent viloyati Bekobod tumani M. Ulugʻbek 285, 286, 287, 288 38,9 37,1 0,3 1,5 12. Fargʻona viloyati Quva tumani Boʻston 37 13,5 11,0 2,5 13. Xorazm viloyati Urganch tumani Guliston 58 12,4 11,1 1,3 Jami 278,86 200,67 0,3 77,57

Vazirlar Mahkamasining 2022-yil 27-sentabrdagi 527-son qaroriga 2-ILOVA

Qoraqalpogʻiston dehqonchilik ilmiy-tadqiqot instituti tajriba xoʻjaligining Chimboy tumani hokimligi zaxirasiga qaytaradigan yer uchastkalari

ROʻYXATI

Hudud nomi Yer uchastkasi manzili Kontur raqami Jami yer maydoni, ga Shundan: Tuman nomi Ovul nomi sugʻoriladigan yerlar boshqa yerlar Qoraqalpogʻiston Respublikasi Chimboy Seypil 63 408,85 408,85 Andrey 106 527,83 527,83 Aktogin 38 153,63 1,18 152,45 Jami 1090,31 1,18 1089,13