“Maktabgacha taʼlim muassasalari va maktab-internatlardagi bolalar taʼminotiga haq toʻlash tartibi toʻgʻrisidagi nizomni tasdiqlash haqida”gi qarorga oʻzgartirishlar kiritish toʻgʻrisida (2821-2-son)

21.09.2022

Oʻzbekiston Respublikasi Xalq taʼlimi vazirligi Oʻzbekiston Respublikasi Moliya vazirligi Oʻzbekiston Respublikasi Maktabgacha taʼlim vazirligining

Qarori

[Oʻzbekiston Respublikasi Adliya vazirligi tomonidan 2022-yil 21-sentabrda roʻyxatdan oʻtkazildi, roʻyxat raqami 2821-2]

Oʻzbekiston Respublikasi Prezidentining 2021-yil 5-martdagi PQ-5020-son “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida” qarori hamda 2022-yil 7-martdagi PF-87-son “Oila va xotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida”gi Farmoniga muvofiq Oʻzbekiston Respublikasi Xalq taʼlimi vazirligi, Moliya vazirligi va Maktabgacha taʼlim vazirligi qaror qiladi:

1. Oʻzbekiston Respublikasi Xalq taʼlimi vazirligi va Moliya vazirligining 2016-yil 25-iyuldagi 8-mh, 55-son “Maktabgacha taʼlim muassasalari va maktab-internatlardagi bolalar taʼminotiga haq toʻlash tartibi toʻgʻrisidagi nizomni tasdiqlash haqida”gi qaroriga (roʻyxat raqami 2821, 2016-yil 23-avgust) (Oʻzbekiston Respublikasi qonun hujjatlari toʻplami, 2016-y., 34-son, 406-modda) ilovaga muvofiq oʻzgartirishlar kiritilsin.

2. Mazkur qaror Oʻzbekiston Respublikasi Sogʻliqni saqlash vazirligi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.

Xalq taʼlimi vaziri B. SAIDOV

Toshkent sh.,

2022-yil 26-avgust,

6-mh-son

Moliya vaziri T. IShMETOV

Toshkent sh.,

2022-yil 23-avgust,

43-son

Maktabgacha taʼlim vaziri A. ShIN

Toshkent sh.,

2022-yil 25-avgust,

7-son

Kelishildi:

Sogʻliqni saqlash vaziri B. MUSAYEV

2022-yil 18-avgust

Oʻzbekiston Respublikasi Xalq taʼlimi vazirligining 2022-yil 26-avgustdagi 6-mh-son, Moliya vazirligining 2022-yil 23-avgustdagi 43-son va Maktabgacha taʼlim vazirligining 2022-yil 25-avgustdagi 7-son qaroriga ILOVA

“Maktabgacha taʼlim muassasalari va maktab-internatlardagi bolalar taʼminotiga haq toʻlash tartibi toʻgʻrisidagi nizomni tasdiqlash haqida”gi qarorga kiritilayotgan oʻzgartirishlar

1. Qarorda:

1) nomi va 1-banddagi “muassasalari” degan soʻzlar “tashkilotlari” degan soʻzlar bilan almashtirilsin;

2) muqaddimadan “hamda Vazirlar Mahkamasining 2010-yil 18-iyundagi 117-son “Davlat maxsus maktabgacha taʼlim muassasalarining faoliyatini takomillashtirish chora-tadbirlari toʻgʻrisida”gi qaroriga” degan soʻzlar chiqarib tashlansin.

2. Nizomda:

1) nomidagi, 1, 3 va 6-bandlardagi “muassasalari” degan soʻzlar “tashkilotlari” degan soʻzlar bilan almashtirilsin;

2) muqaddima quyidagi tahrirda bayon etilsin:

“Mazkur Nizom maktabgacha taʼlim tashkilotlari va maktab-internatlarda bolalar taʼminotiga haq toʻlash tartibini belgilaydi.”;

3) 2-bandda:

birinchi xatboshidagi “muassasalari” va “muassasaning” degan soʻzlar tegishli ravishda “tashkilotlari” va “tashkilotning” degan soʻzlar bilan almashtirilsin;

ikkinchi xatboshidagi “muassasaning” degan soʻz “tashkilotning” degan soʻz bilan almashtirilsin;

4) 4-banddagi “muassasasiga” va “muassasasidan” degan soʻzlar tegishli ravishda “tashkilotiga” va “tashkilotidan” degan soʻzlar bilan almashtirilsin;

5) 5-banddagi “muassasalarida” va “aqliy” degan soʻzlar tegishli ravishda “tashkilotlarida” va “psixik” degan soʻzlar bilan almashtirilsin;

6) 7-banddagi “muassasalari” va “muassasasiga” degan soʻzlar tegishli ravishda “tashkilotlari” va “tashkilotiga” degan soʻzlar bilan almashtirilsin;

7) 8 va 11-bandlardagi “muassasasi” degan soʻzlar “tashkiloti” degan soʻzlar bilan almashtirilsin;

8) 9-bandning birinchi xatboshisidagi “muassasasidagi” va “muassasasiga” degan soʻzlar tegishli ravishda “tashkilotidagi” va “tashkilotiga” degan soʻzlar bilan almashtirilsin;

9) 10-band quyidagi tahrirda bayon etilsin:

“10. Maktabgacha taʼlim tashkilotlari va maktab-internatlarida bolalarni saqlash uchun toʻlovlar tijorat banklari orqali naqd pul yoki naqd pulsiz shaklda (bank plastik kartochkalari orqali, pul oʻtkazish orqali), shuningdek va elektron toʻlov yoʻli bilan toʻlanadi.”;

10) 3-bobning nomidagi “muassasalarida” degan soʻz “tashkilotlarida” degan soʻz bilan almashtirilsin;

11) 12-banddagi “muassasasida” degan soʻz “tashkilotida” degan soʻz bilan almashtirilsin;

12) 13-bandda:

birinchi va ikkinchi xatboshilardagi “muassasasiga” degan soʻz “tashkilotiga” degan soʻz bilan almashtirilsin;

uchinchi xatboshidagi “muassasasiga” va “muassasasi” degan soʻzlar tegishli ravishda “tashkilotiga” va “tashkiloti” degan soʻzlar bilan almashtirilsin;

toʻrtinchi xatboshidagi “muassasasida” degan soʻz “tashkilotida” degan soʻz bilan almashtirilsin;

13) 14-bandda:

birinchi va ikkinchi xatboshilardagi “muassasasiga” degan soʻzlar “tashkilotiga” degan soʻzlar bilan almashtirilsin;

uchinchi xatboshidagi “muassasalarida” degan soʻz “tashkilotlarida” degan soʻz bilan almashtirilsin;

14) 5-bobning nomi quyidagi tahrirda bayon etilsin:

“5-bob. Kam taʼminlangan oilalarning hamda boquvchisini yoʻqotgan ayollarning farzandlarini toʻlovlardan ozod qilish”;

15) 19-band quyidagi tahrirda bayon etilsin:

“19. Maktabgacha taʼlim tashkilotlaridagi (maktab-internatlardagi) bolalar umumiy sonining 15 foizi doirasida “Ijtimoiy himoya yagona reyestri” axborot tizimi orqali kam taʼminlangan deb eʼtirof etilgan oilalar farzandlari toʻlovdan ozod qilinadi. Bunda, birinchi navbatda ota-onalaridan biri yoki ikkalasi I yoxud II guruh nogironligi boʻlgan kam taʼminlangan oila farzandlariga, shuningdek, oʻrtacha oylik jami daromadi eng past darajada boʻlgan kam taʼminlangan oila farzandlariga imtiyoz beriladi.

Boquvchisini yoʻqotgan ayollarning farzandlari mazkur bandning birinchi xatboshisida koʻrsatilgan kvotadan qatʼi nazar ota-onalar toʻlovidan ozod qilinadi.”;

16) 20-band quyidagi tahrirda bayon etilsin:

“20. Toʻlovdan ozod qilinadigan bolalar roʻyxati quyidagi tasdiqlovchi hujjatlar asosida shakllantiriladi:

a) kam taʼminlangan oilalarning farzandlari uchun “Ijtimoiy himoya yagona reyestri” axborot tizimi orqali berilgan oila kam taʼminlangan deb eʼtirof etilganligi toʻgʻrisidagi maʼlumotnoma;

b) boquvchisini yoʻqotgan ayollarning farzandlari uchun (quyidagi tasdiqlovchi hujjatlardan biri taqdim etilishi mumkin):

boquvchisini yoʻqotgan ayol boquvchisining oʻlim haqidagi guvohnomasi;

boquvchisining bedarak yoʻqolgan deb topish toʻgʻrisidagi sudning hal qiluv qarori;

oʻlim holati fuqarolik holati dalolatnomalarini yozish organlarida qayd qilinganligi haqida tibbiyot muassasalari tomonidan berilgan QR-kod (matrik shtrixli kod) qoʻyilgan maʼlumotnoma;

davlat xizmatlari markazi orqali berilgan fuqarolik holati dalolatnomalarini yozish organlarida oʻlim qayd etilganligi haqida maʼlumotnoma.

Bunda, mazkur bandning “a” kichik bandida nazarda tutilgan maʼlumotnoma maktabgacha taʼlim tashkiloti tomonidan masʼul davlat organlari va tashkilotlaridan “Elektron hukumat” tizimi idoralararo integratsiyalashuv platformasi orqali soʻrab olinadi.”.

17) 21-banddagi “Toʻlovdan ozod qilinadigan kam taʼminlangan oila farzandlari roʻyxati” va “muassasasi” degan soʻzlar tegishli ravishda “Toʻlovdan ozod qilinadigan bolalar roʻyxati” va “tashkiloti” degan soʻzlar bilan almashtirilsin;

18) 23-banddagi “muassasasiga” va “19-bandiga” degan soʻzlar tegishli ravishda “tashkilotiga” va “19-bandining birinchi xatboshisiga” degan soʻzlar bilan almashtirilsin;

19) 24-banddagi “Toʻlovdan ozod qilinadigan kam taʼminlangan oila farzandlari roʻyxati” degan soʻzlar “Toʻlovdan ozod qilinadigan bolalar roʻyxati” degan soʻzlar bilan almashtirilsin;

20) 25-banddagi “muassasalari” va “muassasalarning” degan soʻzlar tegishli ravishda “tashkilotlari” va “tashkilotlarning” degan soʻzlar bilan almashtirilsin;

21) 26-banddagi “Moliya vazirligining Nazorat-taftish bosh boshqarmasi va uning hududiy nazorat-taftish boshqarmalari” degan soʻzlar “Moliya vazirligi huzuridagi Davlat moliyaviy nazorati inspeksiyasi va uning hududiy boshqarmalari” degan soʻzlar bilan almashtirilsin.

22) ilova mazkur oʻzgartirishlarning ilovasiga muvofiq tahrirda bayon qilinsin.

“Maktabgacha taʼlim muassasalari va maktab-internatlardagi bolalar taʼminotiga haq toʻlash tartibi toʻgʻrisidagi nizomni tasdiqlash haqida”gi qarorga kiritilayotgan oʻzgartirishlarga ILOVA

“Maktabgacha taʼlim tashkilotlari va maktab-internatlardagi bolalar taʼminotiga haq toʻlash tartibi toʻgʻrisidagi nizomga ILOVA

Maktabgacha taʼlim tashkilotlarida bolalar taʼminoti uchun ota-onalar toʻlovi undirilmaydigan bolalarning rivojlanishidagi jismoniy yoki psixik nuqsonlar

ROʻYXATI

1. Nutqidagi ogʻir nuqsonlar (rinolaliya, duduqlik, bolalar afaziyasi).

2. Eshitishdagi ogʻir nuqsonlar (II — IV darajali neyrosensor eshitish pastligi va karlik).

3. Koʻrishdagi ogʻir nuqsonlar (koʻzi ojizlik (amovroz); tugʻma nuqsonlar (mikroftalm, mikrokornea, anoftalm, toʻr pardaning rivojlanishidagi tugʻma nuqsonlar; koʻrish nervining atrofiyasi, koʻrish nervi disk va makulasining ogʻir darajadagi gipoplaziyasi, albinizm, aniridiya, koʻrish oʻtkirligi 0,4 gacha); katarakta (markaziy zonada toʻliq yoki qisman xiralashish, koʻrish oʻtkirligi 0,4 gacha), afakiya (koʻz gavxari yoʻqligi, koʻrish oʻtkirligi 0,4 gacha), koʻz gavxari siljishi (joy oʻzgarishi); glaukoma (tugʻma, ikkilamchi); toʻr pardaning koʻchishi).

4. Tayanch-harakat apparati buzilishi (III va IV darajali skolioz; koʻkrak qafasining III va IV darajali girdobsimon yoki kilsimon deformatsiyasi; artrogripoz; bolalar tserebral falaji va boshqa nevrologik patologiyalar oqibatida ortopedik deformatsiyalari; osteomiyelit asoratlari; toʻgʻma maymoqliq (jarrohlik muolajasidan keyingi holat); ortopedik sistem kasalliklari (axondroplaziya, disxondroplaziya, xondrodistrofiya); toʻgʻma son suyak chiqishi (operativ davolashdan keyigi holat).

5. Psixik rivojlanishdagi nuqsonlar (psixik rivojlanishda kechikish, psixik-nutqiy rivojlanishda kechikish, bolalar autizmi).

6. Aqliy rivojlanishdagi nuqsonlar (yengil va oʻrta darajadagi aqliy zaiflik).

7. Murakkab nuqsonlar (rivojlanishda ikki va undan ortiq nuqsonlar mavjudligi).”.