Vazirlar Mahkamasining 2020-yil 30-yanvardagi 49-son qarori bilan tasdiqlangan Konsullik roʻyxatida turuvchi Oʻzbekiston Respublikasi fuqarolariga Oʻzbekiston Respublikasining xorijdagi konsullik muassasalari, Oʻzbekiston Respublikasi Tashqi ishlar vazirligining Konsullik-huquqiy departamenti, shuningdek, Oʻzbekiston Respublikasi Tashqi ishlar vazirligining Qoraqalpogʻiston Respublikasi va viloyatlardagi boʻlinmalari tomonidan Oʻzbekiston Respublikasi fuqarosining xorijga chiqish biometrik pasportini rasmiylashtirish, berish va almashtirish tartibi toʻgʻrisidagi nizomga oʻzgartirish va qoʻshimchalar kiritish, shuningdek, Oʻzbekiston Respublikasi Hukumatining ayrim qarorlarini oʻz kuchini yoʻqotgan deb hisoblash toʻgʻrisida (492-son)
05.09.2022
Oʻzbekiston Respublikasi Vazirlar Mahkamasining
qarori
Mamlakatimizda aholiga davlat xizmatlari koʻrsatish tizimi tubdan isloh qilinib, ortiqcha byurokratik toʻsiqlarni bartaraf etish hamda davlat xizmatlari koʻrsatish sifatini yaxshilash borasida tizimli chora-tadbirlar amalga oshirilmoqda.
Shu bilan birga, Oʻzbekiston Respublikasi fuqarosining xorijga chiqish biometrik pasportini rasmiylashtirib berish jarayonida davlat xizmatini koʻrsatish uchun muhim boʻlmagan hujjatlarni aholidan talab qilish holatlarining mavjudligi dolzarb muammo boʻlib qolmoqda.
Oʻzbekiston Respublikasi fuqarosining xorijga chiqish biometrik pasportini rasmiylashtirish va berishga doir davlat xizmati koʻrsatish tartibini yanada soddalashtirish maqsadida, shuningdek, Oʻzbekiston Respublikasi Prezidentining “Oʻzbekiston Respublikasi fuqarolariga xorijga chiqish biometrik pasportini berishga doir davlat xizmati koʻrsatish tartibini yanada soddalashtirish chora-tadbirlari toʻgʻrisida” 2022-yil 16-iyundagi PQ-282-son qaroriga muvofiq Vazirlar Mahkamasi qaror qiladi:
1. Vazirlar Mahkamasining 2020-yil 30-yanvardagi 49-son qarori bilan tasdiqlangan Konsullik roʻyxatida turuvchi Oʻzbekiston Respublikasi fuqarolariga Oʻzbekiston Respublikasining xorijdagi konsullik muassasalari, Oʻzbekiston Respublikasi Tashqi ishlar vazirligining Konsullik-huquqiy departamenti, shuningdek, Oʻzbekiston Respublikasi Tashqi ishlar vazirligining Qoraqalpogʻiston Respublikasi va viloyatlardagi boʻlinmalari tomonidan Oʻzbekiston Respublikasi fuqarosining xorijga chiqish biometrik pasportini rasmiylashtirish, berish va almashtirish tartibi toʻgʻrisidagi nizomga 1-ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
tashqi koʻrinishga taʼsir qiluvchi ashyolar bilan suratga tushish istagi qatʼiy bildirilgan holatlarda fuqaroga xorijga chiqish biometrik pasportini rasmiylashtirishni rad etish;
xorijga chiqish biometrik pasportini bir yoshdan 25 yoshgacha boʻlgan fuqarolarga 5 yil muddatga, 25 yoshdan oshgan shaxslarga 10 yil muddatga amal qilish muddati bilan berish;
ota-onalardan biri xorijiy davlat fuqarosi boʻlgan holda voyaga yetmagan shaxslarga xorijga chiqish biometrik pasportini olish uchun ularning ota-onasi birgalikda maʼlumotlarni yigʻish punktiga bevosita murojaat qilganda ota-onaning bola xorijga chiqish biometrik pasportini olishiga eʼtirozi yoʻqligi haqida notarial tasdiqlangan arizasini talab qilishni bekor qilish.
2. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va ilmiy faoliyatni rivojlantirish masalalari departamenti boshligʻi hamda Oʻzbekiston Respublikasi tashqi ishlar vaziri v.b. V.I. Norov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 5-sentabr,
492-son
Vazirlar Mahkamasining 2022-yil 5-sentabrdagi 492-son qaroriga 1-ILOVA
Vazirlar Mahkamasining 2020-yil 30-yanvardagi 49-son qarori bilan tasdiqlangan Konsullik roʻyxatida turuvchi Oʻzbekiston Respublikasi fuqarolariga Oʻzbekiston Respublikasining xorijdagi konsullik muassasalari, Oʻzbekiston Respublikasi Tashqi ishlar vazirligining Konsullik-huquqiy departamenti, shuningdek, Oʻzbekiston Respublikasi Tashqi ishlar vazirligining Qoraqalpogʻiston Respublikasi va viloyatlardagi boʻlinmalari tomonidan Oʻzbekiston Respublikasi fuqarosining xorijga chiqish biometrik pasportini rasmiylashtirish, berish va almashtirish tartibi toʻgʻrisidagi nizomga kiritilayotgan oʻzgartirish va qoʻshimchalar
1. 6-band “bosh kiyim” soʻzlaridan keyin “, tashqi koʻrinishga taʼsir qiluvchi ashyolar” soʻzlari bilan toʻldirilsin.
2. 10-bandda:
uchinchi xatboshidagi “16 yoshgacha” soʻzlari “25 yoshgacha” soʻzlari bilan almashtirilsin;
toʻrtinchi xatboshidagi “16 yoshdan” soʻzlari “25 yoshdan” soʻzlari bilan almashtirilsin.
3. 15-band quyidagi mazmundagi xatboshi bilan toʻldirilsin:
“ilgari berilgan xorijga chiqish biometrik pasportini muddatidan oldin almashtirish boʻyicha murojaat etilganda”.
4. 17-bandning oʻn toʻrtinchi xatboshisi “(ota-onalarning har ikkisi maʼlumotlarni yigʻish punktiga bevosita murojaat qilgan hollar bundan mustasno)” soʻzlari bilan toʻldirilsin.
5. 33-band quyidagi mazmundagi xatboshi bilan toʻldirilsin:
“ilgari berilgan xorijga chiqish biometrik pasportini muddatidan oldin almashtirish boʻyicha murojaat etilganda”.
6. 44-band quyidagi mazmundagi xatboshi bilan toʻldirilsin:
“ilgari berilgan xorijga chiqish biometrik pasportini muddatidan oldin almashtirish boʻyicha murojaat etilganda”.
7. 49-bandning ikkinchi xatboshisi “xorijga chiqish biometrik pasportining amal qilish muddati tugagan” soʻzlaridan keyin “, ammo ichiga qoʻyilgan xorijiy davlatlarga kirish vizalarining amal qilish muddati tugamagan” soʻzlari bilan toʻldirilsin.
Vazirlar Mahkamasining 2022-yil 5-sentabrdagi 492-son qaroriga 2-ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari
ROʻYXATI
1. Vazirlar Mahkamasining “Fuqarolarning xorijga chiqish biometrik pasportini olish uchun Yagona interaktiv davlat xizmatlari portali orqali ariza yuborish boʻyicha davlat xizmati koʻrsatishning maʼmuriy reglamentini tasdiqlash toʻgʻrisida” 2022-yil 5-yanvardagi 5-son qarori.
2. Vazirlar Mahkamasining “Geografik koʻrsatkichlarni roʻyxatdan oʻtkazish boʻyicha davlat xizmatini koʻrsatishning maʼmuriy reglamentini tasdiqlash toʻgʻrisida” 2022-yil 13-iyuldagi 385-son qaroriga 2-ilovaning 37-bandi.