Bojxona organlari xodimlarini xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish tartibi toʻgʻrisidagi nizomni tasdiqlash haqida (3378-son)
11.08.2022
Oʻzbekiston Respublikasi Davlat bojxona qoʻmitasining
Qarori
[Oʻzbekiston Respublikasi Adliya vazirligi tomonidan 2022-yil 11-avgustda roʻyxatdan oʻtkazildi, roʻyxat raqami 3378]
Oʻzbekiston Respublikasi Prezidentining 2022-yil 27-apreldagi PF-122-son “Bojxona maʼmuriyatchiligini yanada takomillashtirishga doir qoʻshimcha chora-tadbirlar toʻgʻrisida”gi Farmoni, Vazirlar Mahkamasining 2022-yil 20-iyuldagi 391-son “Oʻzbekiston Respublikasi Davlat bojxona xizmati organlari xodimlarining farzandlariga davlat oliy taʼlim muassasalari hamda oliy harbiy va harbiylashtirilgan taʼlim muassasalariga oʻqishga kirish uchun tavsiyanomalar berish tartibi toʻgʻrisidagi nizomni tasdiqlash haqida”gi qaroriga muvofiq Oʻzbekiston Respublikasi Davlat bojxona qoʻmitasi qaror qiladi:
1. Bojxona organlari xodimlarini xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish tartibi toʻgʻrisidagi nizom ilovaga muvofiq tasdiqlansin.
2. Mazkur qaror Oʻzbekiston Respublikasi Ichki ishlar vazirligi va Tibbiy-ijtimoiy xizmatlarni rivojlantirish agentligi bilan kelishilgan.
3. Mazkur qaror rasmiy eʼlon qilingan kundan eʼtiboran kuchga kiradi.
Rais A. MAVLONOV
Toshkent sh.,
2022-yil 22-iyul,
13/02-22-24-son
Kelishildi:
Tibbiy-ijtimoiy xizmatlarni rivojlantirish agentligi direktori A. INAKOV
2022-yil 15-iyul
Ichki ishlar vaziri P. BOBOJONOV
2022-yil 14-iyul
Oʻzbekiston Respublikasi Davlat bojxona qoʻmitasining 2022-yil 22-iyuldagi 13/02-22-24-son qaroriga ILOVA
Bojxona organlari xodimlarini xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish tartibi toʻgʻrisidagi
NIZOM
Mazkur Nizom Oʻzbekiston Respublikasi davlat bojxona xizmati organlarida (Oʻzbekiston Respublikasi Davlat bojxona qoʻmitasi, Davlat bojxona qoʻmitasining Qoraqalpogʻiston Respublikasi, viloyatlar va Toshkent shahri boʻyicha boshqarmalari, “Toshkent-AERO” ixtisoslashtirilgan bojxona kompleksi, Bojxona instituti, Markaziy bojxona laboratoriyasi, Milliy kinologiya markazi) (bundan buyon matnda bojxona organlari deb yuritiladi) xizmat qilayotgan, maxsus unvon berilgan bojxona organlari xodimlari va Davlat bojxona qoʻmitasining Bojxona institutida tahsil olayotgan kursant va tinglovchilarni (bundan buyon matnda xodim deb yuritiladi) xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish tartibini belgilaydi.
1-bob. Umumiy qoidalar
1. Xodimlarni xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish xodim yoxud uning oila aʼzolariga bir martalik nafaqalar tayinlash va qonunchilik hujjatlarida belgilangan imtiyozlarni taqdim etish maqsadida amalga oshiriladi.
2. Xodim xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topilganda, xodimga yoki uning oila aʼzolariga Oʻzbekiston Respublikasi Vazirlar Mahkamasining 2019-yil 4-iyundagi 459-son qarori bilan tasdiqlangan Oʻzbekiston Respublikasi davlat bojxona xizmati organlarining xizmat majburiyatlarini bajarish chogʻida tan jarohati olgan xodimlariga, shuningdek, halok boʻlgan xodimlari oilalariga bir martalik nafaqa tayinlash tartibi toʻgʻrisidagi nizomda belgilangan tartibda bir martalik nafaqalar va qonunchilik hujjatlarida nazarda tutilgan boshqa imtiyozlar taqdim etiladi.
3. Xodimlarning halok boʻlishi yoki tan jarohati olishining har bir holati boʻyicha xizmat tekshiruvi oʻtkaziladi.
4. Xodimlarni xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish xizmat tekshiruvi xulosasi asosida amalga oshiriladi.
2-bob. Xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish tartibi
5. Xodim xizmat majburiyatlarini bajarish chogʻida tan jarohati olganda, bevosita uning rahbari yoki oʻrinbosari voqea joyiga zudlik bilan yetib borib, xolislar ishtirokida xodimning olgan tan jarohati boʻyicha dalolatnoma (bundan buyon matnda dalolatnoma deb yuritiladi) rasmiylashtiradi.
6. Dalolatnomani rasmiylashtirishda voqea tafsilotlari aniq va xolisona bayon etilishiga, shuningdek tan jarohatining xizmat majburiyatlarini bajarish bilan bogʻliq holda yuz berganligiga alohida eʼtibor qaratiladi.
7. Dalolatnoma tan jarohati olgan xodim, uning rahbari yoxud rahbar oʻrinbosari, voqea guvohi boʻlgan xodimlar yoki fuqarolar, voqea sodir boʻlgan hududdagi bojxona organi rahbari yoki uning vazifasini bajaruvchi tomonidan imzolanadi hamda gerbli muhr bilan tasdiqlanadi.
8. Voqea sodir boʻlgan hududdagi bojxona organi rahbari tomonidan Oʻzbekiston Respublikasi Davlat bojxona qoʻmitasi rahbariyatiga xodimning halok boʻlishi yoxud tan jarohati olishi holati yuzasidan zudlik bilan dastlabki axborot beriladi.
9. Xodimning halok boʻlishi yoxud tan jarohati olishining holati va sabablarini surishtirish uchun xodim xizmat qilayotgan hududdagi bojxona organi rahbarining yozma koʻrsatmasiga asosan voqea sodir boʻlgan vaqtdan boshlab 24 soat ichida xizmat tekshiruvi tayinlanadi.
10. Xizmat tekshiruvi bojxona organlarining shaxsiy xavfsizlik, kadrlar va boshqa boshqarmalarining (boʻlimlarining) masʼul xodimlari tomonidan 30 kun ichida oʻtkaziladi.
Bunda, xizmat tekshiruvini oʻtkazayotgan masʼul xodimlar xodimning halok boʻlishi yoxud tan jarohati olishi mazkur Nizomning 14-bandi asosida uning xizmat majburiyatlarini bajarishi bilan bogʻliqligiga, xodim tomonidan xizmat intizomi va qonunchilik hujjatlarining talablari buzilmaganligiga alohida eʼtibor qaratishlari shart.
11. Xizmat tekshiruvini oʻtkazish muddati qoʻshimcha oʻrganishlar talab etilgan taqdirda, xizmat tekshiruvini tayinlagan bojxona organi rahbari tomonidan bir oy muddatgacha uzaytirilishi mumkin.
12. Har bir holat boʻyicha sud-tibbiy ekspertiza muassasasining tegishli xulosasi olinadi va barcha hujjatlar umumlashtirilgan holda, xizmat tekshiruvini oʻtkazgan masʼul xodimlar tomonidan xizmat tekshiruvi natijasiga doir xulosa tuziladi.
Mazkur xulosa xizmat tekshiruvini tayinlagan bojxona organi rahbari tomonidan tasdiqlanadi.
13. Xizmat tekshiruvi xulosasida xodimning halok boʻlishi yoki uning tan jarohati olishi xizmat majburiyatini bajarish bilan bogʻliq yoxud xizmat majburiyatini bajarish bilan bogʻliq emas deb topilganligi koʻrsatiladi.
14. Xodimning halok boʻlishi yoxud uning tan jarohati olishi:
lavozim majburiyatlarini bajarish va jangovar harakatlarda ishtirok etganda;
xizmatni (jangovar xizmatni) oʻtash vaqtida;
xizmat safarida yoki davolanishda boʻlganida;
kun tartibida belgilangan xizmat vaqti davomida yoki xizmat zarurati tufayli bojxona organlari hududida boʻlganida;
xizmat yoki davolanish joyiga borish yoxud ulardan qaytish vaqtida;
yigʻinlarda (harbiy yigʻinlarda) ishtirok etganda;
asirlikda boʻlish (oʻz ixtiyori bilan asirga tushish hollari bundan mustasno), garovga olingan yoki ushlab qurolsizlantirilgan holatda boʻlganida;
shaxsning hayoti, sogʻligʻi, shaʼni va qadr-qimmatini himoya qilishga doir harakatlar vaqtida sodir boʻlganda;
qonuniylikni va huquq-tartibotni taʼminlashda boshqa shaxslarga yoki huquqni muhofaza qiluvchi organlarga yordam koʻrsatish vaqtida;
bedarak ketganda (xodim qonunda belgilangan tartibda bedarak yoʻqolgan deb topilguniga yoki vafot etgan deb eʼlon qilinguniga qadar);
sud tomonidan xodimning shaxs, jamiyat va davlat manfaatlarini koʻzlab sodir etilgan deb topilgan boshqa harakatlarni bajarayotganda sodir boʻlgan boʻlsa, xizmat majburiyatlarini bajarish bilan bogʻliq deb hisoblanadi.
15. Xodimning halok boʻlishi yoki uning tan jarohati olishi xizmat majburiyatini bajarish bilan bogʻliq emas deb topilgan taqdirda, xizmat tekshiruvi xulosasida buning asoslantirilgan sabablari koʻrsatiladi.
16. Bojxona organlari kadrlar tuzilmalari masʼul xodimlari xizmat tekshiruvi xulosasi tasdiqlangan kundan boshlab uch ish kuni ichida xodim va (yoki) uning oila aʼzolarini xizmat tekshiruvi natijalari toʻgʻrisida, shuningdek xodim xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topilgan taqdirda, xodim yoki uning oila aʼzolariga qonunchilik hujjatlarida taqdim etilishi belgilangan nafaqalar va imtiyozlar haqida yozma ravishda tanishtiradi.
3-bob. Xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topilgan xodimlarning yigʻmajildlarini yuritish
17. Bojxona organlari kadrlar tuzilmalari xizmat tekshiruvi xulosasi asosida xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topilgan har bir xodim va uning oila aʼzolari haqidagi maʼlumotlar hamda ushbu Nizomning 18-bandida nazarda tutilgan hujjatlarning alohida yigʻmajildini shakllantiradi.
18. Yigʻmajildga quyidagi hujjatlar yoki ularning nusxalari tikiladi:
xizmat tekshiruvi xulosasi;
dalolatnoma;
voqea oqibatida jarohat olgan xodimning sogʻligʻi holati toʻgʻrisidagi hujjatlar;
sud-tibbiy ekspertiza xulosasi;
voqea yuz bergan vaqtda xodimning xizmat vazifasi yoki majburiyatini bajarish bilan bogʻliqligini tasdiqlovchi hujjat (agar mavjud boʻlsa);
voqea yuzasidan jinoyat ishi qoʻzgʻatishni rad etish yoki jinoyat ishini tugatish toʻgʻrisidagi qaror yoki sudning hukmi (agar mavjud boʻlsa);
tibbiy-ijtimoiy ekspert komissiyasining xulosasi va nogironlik toʻgʻrisidagi maʼlumotnoma;
xodim bojxona organlaridan xizmatdan boʻshatilgan taqdirda, uning xizmatdan boʻshatilganligi toʻgʻrisidagi buyruq koʻchirmasi.
19. Xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topilgan xodimlarning yigʻmajildlari tegishli bojxona organlari kadrlar tuzilmalarida doimiy saqlanadi.
20. Bojxona organlari kadrlar tuzilmalari har chorak yakuni boʻyicha keyingi oyning uchinchi sanasidan kechiktirmay halok boʻlgan yoki olgan jarohati tufayli nogironligi boʻlgan xodimlar va ularning oila aʼzolari haqidagi maʼlumotlarni xatlovdan oʻtkazadi hamda xatlov natijasida aniqlangan maʼlumotlarni yangilab boradi.
4-bob. Yakuniy qoidalar
21. Xizmat majburiyatlarini bajarish chogʻida halok boʻlgan yoki olgan jarohati tufayli nogironligi boʻlgan shaxs deb topish boʻyicha bojxona organlarining xatti-harakatlari va qarorlaridan norozi boʻlgan shaxslar qonunchilik hujjatlarida belgilangan tartibda yuqori turuvchi bojxona organlariga yoki sudga shikoyat qilishlari mumkin.
22. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladi.